লুক5
1ইশুহা সাইয়ু গনেসোরেত তাওয়া দাব্রিকো আবেইতা জাদিংমি। উইসে দিংঙাবিহা এচাবেচাপক্যইপা সেংজাকো নুওয়াং হিংকো তামসা লেহে।2আকুহা দাব্রিকো আরিতা নিহসো নোওয়াই তিংয়ে। জেরে তিইমবিহা নোওয়াইসো বাইরে নোমসা জেরে দুদিংমি।3ইচো নোওয়াইহা সিমোনকো নিমি। ইশুহা আকু নোওয়াই বাইমসা সিমোনহিং আস্যই নাগাই পুরাকো তামসা জাংয়ে। আসা আকুহা আবিহিং ঝিপায়ে।4ঝিপাওয়া ত্যইনুওয়া ইশুহা সিমোনহিংয়া জাংয়ে, “নোওয়াইহিং উইদাংওয়া তিতা পুরাতু আসা নায়া প্যইকো জেরে তি।”5ই হিংমসা সিমোনহা ইশুহিং জাংয়ে, “উটকেওয়া, কাবিহা হিপপিরি জেরে তিনা, আদো নায়াহা ইপুরে মামুংনা। আদো নাকো জাংওয়া সেই কা জেরে তিমসা কাংরোওয়া।”6হাত্রং আবি আউতা জেরে তি, আত্রংহা উইসে নায়া জেরেতা পোরেমসা আবিকো জেরেরে য়াইপুদাংয়ে।7আসা আবিহা দোসরা নোওয়াই নিওয়া ব্যারোবিহিংনে য়ুজ্রুকো তামসা লাবে চামসা মোউয়ে। আসা আবিহা লেমসা নায়া নোওয়াইতা ওয়্যাজ্রুয়ে। আবিকো নিহসো নোওয়াইহা নায়াসো মেইপুমসা নুচাপুদাংয়ে।8ই তিংমসা সিমোন পত্রসহা ইশুকো কোকোইকো নাগাইতা চুনুইমসা জাংয়ে, “ও প্রভু, কা পাপিগা, কুংসো তানাং য়ুং!”9হাংপাতানাহা এসে উইসে নায়া জেরেতা ওয়াংওয়া তিংনুওয়া সিমোন পত্রস আসা আকো ব্যারোবিহা আআংপেপেচপুয়ে।10আসা সিমোনহিংপা লেওয়া জোব্দিকো চেংওয়া য়াকুবসো য়হুন্নারে আআংপেপেচপুয়ে। ইশুহা সিমোনহিং জাংয়ে, “মাচ্ছুংগে, ইসো য়ুতাহা নাতিহা নায়া প্যইমি ত্যাবাপা, দিংঙাহিং প্যইমসা কুংতা পারাওয়া জিংরোওয়া।”11ই হিংমসা আবিহা আকু নোওয়াইবিহিং তিকো আরিতা পারায়ে আসা তাংসা হুইতেমসা ইশুকো নুনুই হুইপুয়ে।12সাইয়ুহা ইশুহা ইচো শহরতা নিমি। আকু শহরতাহা ইচো য্যা চাপুওয়া দিংঙা নিমি। আকুহা ইশুহিং তিংমসা আকো কোকোইকো নাগাইতা নুমসা এপা জাংয়ে, “প্রভু, নাতিবেমি কাহিং সাংপাকো কেংনাহা সাংপামসা চোসোপা জোপিকো চুরোওয়া।”13ইশুহা আকো তোইতা খুই ওইমসা জাংয়ে, “নাতি সাংকো তামসা কা ইচ্ছা জোরোওয়া।” আত্রংতারাং আকো য্যা চাপুওয়া সাংয়ে।14আসা ইশুহা আকুহিং জাংয়ে, “কাং, ই নুওয়াং হাংসুহিংনে মাজাং। আদো পাউবিকোতা হোমসা আপনিহিং তিংপাতু, আসা মোসাকো লিংপাংতা জাংমি ত্যাবাপা বলি পিচামসা দিংঙাবিহিং নাকো সাংওয়া প্রমান পিচা।”15আত্রংসো য়ুতাহা ইশুকো নুওয়াংবিহা নাগাইকোরোমা সিওপা তাংসাতা বেইপুয়ে, আসা উইসে দিংঙাবিহা আকো ঝিপাওয়া হিংকো আসা সাংকো তামসা লেহে।16আদো আকুহা চিচ্চোওয়া জায়গাতা হোমসা পাচাইয়াচাংমি।17সাইয়ু ইশুহা দিংঙাবিহিং ঝিপাদিংমি। আউতা ফরিসিবি আসা তাংজিকো উটকেওয়াবিরে আকো আবেইতা নিমি। আবিহা গালীল আসা য়হুদিয়া জায়গাকো লোইবিসো আসা য়রুশালেম শহরবিসোরে লেমি নিমি। ইশুহিংপাহা হাইমবিহিং সাংপাওয়া প্রভুসেংজাকো সে নিমি।18দিংঙাবিহা ইচো তেইমক্যইওয়া সাঁপে দিংঙাহিং ন্যাগু নিপারাং পুপামসা পারায়ে। আসা আবিহা আকুহিংয়া ইশুকো নাগাইতা পারামসা একো কেংয়ে।19আদো দিংঙাবি উইসে নিমকো সোতা ইশুকোতা দেপাম ক্যইতো। আকো সোতা আকু সাঁপে দিংঙাহিং সাকো কেংবুতা পুরায়ে আসা কেংবু নোপামসা আকুহিংয়া ন্যাগু নিপারাং ইশুকো নাগাইতা ধুইয়ে।20হাত্রং ইশু আকু দিংঙাবিকো দেংওয়া তিং, আত্রং ইশুহা আকু সাঁপে দিংঙাহিংয়া জাংয়ে, “ও কুং ব্যারো, নাকো পাপহা ওয়েংপুয়ে।”21ইশুকো ই জাংওয়া নুওয়াং হিংমসা তাংজিকো উটকেওয়াবি আসা ফরিসিবিহা তাইবি লারাইরাং নোসুয়ে, “সেংজাহিং মোতুপা জাংওয়াহা ই দিংঙাহা হাংসুগা? সেংজা মেংচে পাপহিং ওয়েংপাকো চুমগা। দিংঙারে পাপহিংয়া ওয়েংপাকো চুমগাসা?”22আবিকো নোচেং কোইমসা ইশুহা জাংয়ে, “নাবিহা হাংপাসা এপা নোচাংমগা?23আকু সাঁপে দিংঙাহিং ‘নাকো পাপ ওয়েংপুয়ে’ তাকো আসা ‘লোমসা তেই’ তামসা জাংকো হানি জাংতোংপা নিংগা?24আদো কাং, ই বাসিমতিতাহা দিংঙাকো চেংওয়াহা পাপ ওয়েংপাকো অধিকার নিও তামসা নাবিহা গেকো জো।” আকো নোইতাহা ইশুহা আকু সাঁপে দিংঙাহিংয়া জাংয়ে, “কা নাতিহিংয়া জাংরোওয়া, লো আসা নাকো ন্যাগু য়োপুমসা সাতা হোতু।”25আকু দিংঙাহা তাত্রিংপা আবিকো নাগাইতা জায়ে, আসা আপনিকো ন্যাগু য়োপুমসা সেংজাহিং তাচামসা সাতা হোপুয়ে।26আবিহা তাংসা আআংপেপেচপুয়ে, আসা সেংজাকো টেবো সে তিংমসা চুসুংপুয়ে। আবিহা সেংজাহিং তাচামসা জাংয়ে, “হিনিহা য়াংবিহা আআংপেচপুক্যইওয়া নুওয়াং তিংয়ে!”27আকো নোইতাহা ইশুহা আউসো নোপুমসা হ্যাপুয়ে, আসা তোংক্যা জুওয়া লেবি মিং নিওয়া দিংঙাহিং তোংক্যা জুওয়া জায়গাতা গাদিংওয়া তিংয়ে আসা জাংয়ে, “কুং নুনুই হুই।”28আসা আকুহা তাত্রিংপা লোয়ে, আসা তাংসা হুইতেমসা ইশুকো নুনুই হুইপুয়ে।29আকো নোইতা লেবিহা ইশুহিং তাইকো সাতা চাওয়া আংওয়াবি চাকো মোউচায়ে। আউতাহা তোংক্যা জুওয়া উইসে দিংঙাবি আসা দোসরা দিংঙাবিরে চাসু আংসুদিংমি।30আদো ফরিসি আসা আবিকো তাংজিকো উটকেওয়াবিহা তাইবিলারাই ন্যাক্যানুকুপা য়্যইসুমসা ইশুকো য়োংতোংবিহিং জাংয়ে, “নাবিহা হাংপাসা, তোংক্যা জুমবি আসা দোসরা পাপিবিহিংপা গামসা চাচাংমগা?”31ইশুহা আবিহিং জাংয়ে, “ডাক্তারহা মাহাইমবিহিং মোকো, আদো হাইমবিহিং মেংচে ঘ্যইমগা!32এপারাং কা তাংজি নিমবিহিং মোকো, আদো পাপিবিহিং পশ্চতাপ জোপাকো তামসা লেমগা।”33সাইয়ুহা ইচো নিহসো দিংঙাবিহা ইশুহিং জাংয়ে, “য়হুন্নাকো য়োংতোংবিহা উপাস য়ুংচাংমি আসা পাচাইচাংমি। ফরিসিকো য়োংতোংবিরে এপারাং জোমি, আদো নাকো য়োংতোংবিহা চাপুচাংমি আসা আংপুচাংমি।”34ইশুহা আবিহিংয়া জাংয়ে, “নাবিহা বিয়ৌতা বিয়ৌলাহিংপা ওয়াংওয়া ব্যারোবিহিংয়া চাওয়া আংওয়াবি মিচাপা নিংপুমগা?35আদো এপা জিংওয়া দিনবিরে লেরোওয়া, বিয়ৌলাহিংয়া আকো ব্যারোবিহিংপা ওয়েংপাপুরোওয়া। আত্রংহা আবিহা উপাস য়ুংরোওয়া।”36ইশুহা ন্যাসারাং দোসরা নুওয়াংরে থ্যাহপামসা জাংয়ে, “হাংসুরে চুবে আংদুংহিংয়া ছিমসা জেবে আংদুংতা মাতৌরোওয়া। মোকোনাহা আকু জেবেসোহা চুবে আংদুংহিংয়া মাসুংপা জোপুরোওয়া, আসা জেবে আংদুংহা চুবে আংদুংহিংপাহা মামিলেরোওয়া।”37“এপারাং হাংসুরে চুবে আংগুরকো য়ুহা জেবে বেকোংকো জিয়োতা মেএরোওয়া। নাবিমি এপুনাহা চুবে য়ুসোহা য়ু এওয়া বেকোংকো জিয়োহিংয়া ওয়্যাপাপুরোওয়া আসা আকু য়ুবিহা ক্যাপুরোওয়া। আকু বেকোংকো জিয়োহা হাইরে কামতা মোয়োংরোওয়া।38চুবে আংগুরকো য়ুহা চুবে বেকোংকো জিয়োতারাং এনেমগা।39হানি দিংঙারে জেবে আংগুরকো য়ু আংমসা চুবে আংগুরকো য়ু আংরো মাতামগা, হাংপাতানাহা আবিহা জাংমগা, জেবে আংগুরকো য়ুরাং এনতামগা।”
The Seed Company