লুক7
1দিংঙাবিহিং আপনিকো ই নুওয়াং তাংসা ঝিপাপুনতেনুওয়া ইশুহা কোর্ফরনহুম তাওয়া শহরতা লাকাপুয়ে।2আউতা রোমি ক্যাপ্টেইনকো জেজেংপা জোওয়া ডেইয়া হাইমসা সিপুদাংতেমি নিমি।3হাত্রং আকু ইশুকো নুওয়াং হিং, আত্রংহা ক্যাপ্টেইন লেমসা তাইকো ডেইয়াহিং সাংপাপিকো তামসা আকুহা য়হুদিবিকো ইচো নিহসো মাটা ওয়ারাংপাবিহিং জাংয়াপিকো তামসা নিংপুয়ে।4আকু মাটা দিংঙাবিহা ইশুকোতা লেমসা জাংচারেহে, “প্রভু, আকু রোমি ক্যাপ্টেইনহিংয়া নাতিহা য়ুজ্রুদো ক্যাচেংকো বেপা নিও,5হাংপাতানাহা আকুহা কাবিকো জ্যাহিংয়া জেজেংপা জোমগা, আসা আকুরাং কাবিকো জোংসুওয়া সারে বানাইপিমগা।”6ইশুহা আবিহিংপা হোয়ে। সাকো আবেইতা দেয়োংনুওয়া ক্যাপ্টেইনহা আপনিকো ব্যারোবিহিংয়া ইশুকোতা এপা জিংওয়া দেরেং কাইপুয়ে, “উটকেওয়া মোকোইচ্যাগে, নাতিহিংয়া কুং আপনিকো সাকো নাপোতা পুরাকো বেপা কা মোতো।7কা আপনিহিংনে নাকো আবেইতা ওয়াংকো চুওয়া বেপারে মোনোতো। আদো নাতিহা ইয়্যই মেংচে য়্যইদি জাংপিনাহা কুং ডেইয়াহা সাংচপুরোওয়া।8হাংপাতানাহা কারে টেবো কাইজিবিকো লিতা য়ুংমি নিও। কুং লিতারে সিপাইবি নিও। কা ইচোহিং ‘হ্যাতু’ তানাহা আকুহা হ্যামগা, দোসরাহিং ‘ওয়াং’ তানাহা আকুহা ওয়াংমগা। এপারাং কুং ডেইয়াহিং ‘ই জো’ তানাহা আকুহা এপারাং জোমগা।”9আকো নুওয়াং হিংমসা ইশুহা আআংপেপেচপুয়ে, আসা আপনিকো নুনুই হুইপাওয়া দিংঙাবিকোতা ন্যইমসা জাংয়ে, “কা নাবিহিংয়া জাংরোওয়া, কাহা ইস্রাইলতাহা এসেপাকো টেবো দেংওয়াহা মাতিংয়াংতো।”10আকু দেরেং জাংয়ামসা ওয়াংপাওয়া ব্যারোবিহা সাতা দেয়োংনুওয়া আকু ডেইয়াহিংয়া সাংতেওয়া তিংয়ে।11সাইয়ু নিহয়ুকো নোইতাহা ইশুহা নাইন তাওয়া শহরতা হায়ে। আকো য়োংতোংবি আসা উইসে দিংঙাবিহা আকো নুনুই হুইপুয়ে।12ইশু শহরকো লাপুংকো আবেইতা দেয়োংনুওয়া ইচো মুরিংমুকো ইচোচিংওয়া চেংওয়াকো সিপুওয়া জুপা চোইপুমসা লাইমিবিহা হাদাংমি। আকু মুরিংমুহিংপা শহরকো উইসে দিংঙাবিরে নিমি।13হাত্রং ইশু মুরিংমুহিং তিং, আত্রংহা ইশুহা লামতুপুমসা আকুহিং জাংয়ে, “নাতিহা মাকাই।”14আসা নাগাই হ্যামসা ইশুহা সিপুনতেওয়া দিংঙাহিং চইওয়া চ্যইরুংহিং সুকায়ে, আসা আকু চোইসুওয়া দিংঙাবিহা জায়ে। আত্রংহা ইশুহা সিপুওয়া দিংঙাহিং জাংয়ে, “ও পোজা, কা নাতিহিং জাংরোওয়া, লো!”15আত্রংহা সিপুওয়া পোজাহা লোমসা গায়ে, আসা য়্যইয়ে। ইশুহা আকু পোজাহিংয়া আকো আয়ুকোতা স্যইপুয়ে।16আত্রংহা তাংসা আআংপেপেচপুমসা চুসুংসপুয়ে, আসা সেংজাহিং তাচামসা জাংয়ে, “ইচো টেবো অগমবক্তা কাবিকো প্যাকোতা তিংরেয়ে, আসা সেংজাহা আপনিকো দিংঙাবিহিং বাচাইকো লেমি নিও।”17ইশু আকু পোজাহিং সিপুওয়াসো ঙারোপাওয়া নুওয়াংহা য়হুদিয়া আসা আকো হুরাপা নিওয়া জায়গাবিতারে বেইপুয়ে।18য়হুন্নাকো য়োংতোংবিহা ইশুকো জোওয়া তাংসা কামবিহা য়হুন্নাহিং হিংপায়ে, আসা আকুহা আপনিকো নিহসো য়োংতোংবিহিং মোউমসা19প্রভু ইশুকোতা এপা উইকো নিংপুয়ে, “কাবিকো খুইচদিংওয়া মুক্তি পিচাওয়া খ্রীষ্টহা নাতিরাংগা? কাবিহা না দোসরাহিং খুইচাকোগা?”20আসা আকু নিহসো য়োংতোংবিহা ইশুকোতা হোমসা জাংয়ায়ে, “বাপ্তিস্মা পিচাওয়া য়হুন্নাহা কাবিহিং এপা জাংমসা নিংপুমি নিও, কাবিকো খুইচাদিংওয়া মুক্তি পিচাওয়া খ্রীষ্টহা নাতিরাংগা? না কাবিহা দোসরাহিং খুইচাকোগা?”21আত্রংরাং ইশুহা উইসে হাইওয়া মোংওয়াবি আসা জেসাং দ্যইংচপুওয়াবিহিং সাংপাদিংমি। আউতাহা মিচো মিতিংওয়া উইসে দিংঙাবিরে মিচো তিংয়ে।22আসা ইশুহা য়হুন্নাকো য়োংতোংবিহিং জাংয়ে, “নাবি হাই হাই তিংদিংমিনি আসা হিংদিংমিনি, হোমসা আকু নুওয়াংহা য়হুন্নাহিং জাংয়াতু, মিচো মিতিংওয়াবিহা তিংদিংনা, তেইমক্যইমবিহা তেইদিংনা, য্যা চাপুওয়াবিহা সাংদিংনা, নানুং মাহিংবিহা হিংদিংনা, সিপুনতেমবিহা ঙারোদিংনা আসা জোরোংবিহা এনতাওয়া দেরেং হিংকো মুংচাদিংনা।23আশিষিত নিও, আকু দিংঙাহা হাংসু কুং তোইতা মেংতাপা মোনো।”24য়হুন্নাকো নিংপুওয়া য়োংতোংবি হ্যাপুনতেনুকো নোইতাহা ইশুহা দিংঙাবিহিং আকো বিষয়তা জাংয়ে, “নাবিহা চিচ্চোওয়া জায়গাতা হাং কাংকো হোমগা? বিংঙাকো য়াপাদিংওয়া মিপাহিং কাংকো হোমগা?25না এনতা-এনতাওয়া আংদুং লুওয়া দিংঙাবিহিং কাংকো হোমগা? এনতা-এনতাওয়া আংদুং লুওয়া দিংঙাবিহা জাইপুকো সাতা য়াংতামসা য়ুংমি নিমগা।26আজিপ্পারাং জাংকে, নাবিহা হাং কাংকো হোমগা? না ইচো অগমবক্তাহিং কাংকো হোমগা? আজিপ্পারাং কা জাংরোওয়া, নাবিহা আকু অগমবক্তাবিরোমাহা ইচো টেবো দিংঙাহিং তিংয়ো।27হাংপাতানা য়হুন্নাকো তোইতাহা তাংজিকো হিগাতাহা এপা লামি নিও:‘কাং, কা কুং পোইংহিং নাকো নাগাই নাগাই নিংপুদাংয়ো।আসা আকুহা নাকো ন্যাতা চোপারোওয়া।’28“কা নাবিহিং জাংরোওয়া, নেচোইপা বাসিমতিতা কেওয়া দিংঙাবিকো প্যাকোতা য়হুন্নারোমা টেবো হাংসুরে মোতো। আদো সেংজাকো রাজ্যতা হাংসু চিওপানি, আকুহা য়হুন্নারোমা টেবোগা।”29ইশুকো ঝিপাওয়া হিংমসা “সেংজাকো জাংওয়াহা আজিপ্পারাংগুং” তামসা দিংঙাবিহা য়হুন্নাকোসো বাপ্তিস্মা লাংয়ে। তোংক্যা জুমবিরে পাপি জিংদো আকু জাংওয়া হিংমসারাং বাপ্তিস্মা লাংয়ে।30আদো ফরিসি আসা তাংজিকো উটকেওয়াবিহা সেংজাকো জাংওয়া নুওয়াংহিংয়া আজ্যাপাগে তাওয়া নোমসা বাপ্তিস্মা মালাংতো।31ইশুহা ন্যাসারাং জাংয়ে, “এপা জিংওয়া দিংঙাবিহিংয়া কা হাংসুবিহিংপা নোওকোগা? আবিহা হেপা জিংওয়াগা?32আবিহা হাতিতা গাসুমসা এপা য়্যইসুওয়া আপেবিবেপা নিও,‘কাবিহা নাবিকো সোতা বাসি মুইনুওয়ানাবিহা মোয়ৌইতো।কাবিহা দুঃখকো লেহদি লেনুওয়ানাবিহা মাকাইতো।’33“হাংপাতানাহা বাপ্তিস্মা পিচাওয়া য়হুন্নাহা কোব্রেং মাচাপা আসা আংগুরকো য়ু মাআংপা লেহে। আদো আকুহিংয়া নাবিহা সিংঙো দ্যইংচপুমি নিও তামসা জাংসুয়ো।34দিংঙাকো চেংওয়া লেমসা চায়ে আসা আংয়ে, নাবিহা আকুহিংয়া জাংয়ো, কাং, ‘ই দিংঙাহা মায়াওয়াগা, গাইব্রেগা, আসা তোংক্যা জুমবি আসা পাপিবিকো ব্যারোগা!’35সেংজাকোসো দুংজি মুংচাওয়াবিরাং আকো দুংজিহা আজিপ্পারাংগা তামসা তিংপামগা।”36ইচো ফরিসিহা ইশুহিং চাকো মোউচায়ে। ইশু আকো সাকো নাপোতা হোমসা চাকো গায়ে।37আকু শহরকো ইচো পাপি মেমেহা ইশু ফরিসিকো সাতা ওয়াংমি নিও তাওয়া হিংয়ে। আকুহা ওহও্যহপা মেনাংওয়া চুইতি বোত্রাতা পামসা আকু সাতারাং ওয়াংয়ে।38আকুহা ইশুকো নুনুই লেমসা আকো কোকোই কাটুসো জামসা কাইয়ে, আসা মিতিসো ইশুকো কোকোই জাপায়ে, আসা আপনিকো পুরিংসো ইশুকো কোকোইহিং প্যায়ে আসা আকো কোকোইতা চুম্মা জোমসা আকো কোকোইতা চুইতি ন্যাপিয়ে।39ই তিংমসা ইশুহিং চাকো মোউওয়া ফরিসিহা তুংসিং নাপোসো জাংয়ে, “ই দিংঙামি অগমবক্তা বেনাহা ই মেমেহা হেপা জিংওয়া পাপি মেমেমে তামসা নাইকোগা।”40আত্রং ইশুহা আকু ফরিসিহিং জাংয়ে, “সিমোন, নাতিহিংয়া কা হাইক্রি জাংকো নিনা।”
সিমোনহা জাংয়ে, “উটকেওয়া, জাং।”41ইশুহা জাংয়ে, “ইচো দিংঙাকোতা নিহসো দিংঙাহা ন্যাস্যা খিমি নিমি, ইচোহা লাবে ঙারা জাতাংকো টাংকা আসা ইচোহা নিহকাইসো ত্যাসে জাতাংকো টাংকা।42আবি নিহসোসা তামক্যইমসা ন্যাস্যা খিচপাওয়া দিংঙাহা আবি নিহসোহিংসা মাপ জোপিয়ে। নেহা জাং, আবি নিহসোতাহা হাংসু সিওপা আকু খিচপাওয়া দিংঙাহিং জেজেংপা জোকোগা?”43সিমোনহা জাংয়ে, “কাহা জাংরোওয়া, হাংসু সিওপা খিচা আকু।”
আকুহা জাংয়ে, “নাতিহা আজিপ্পারাং জাংয়ো।”44আকো নোইতা ইশুহা মেমেহিং ন্যইমসা সিমোনহিং জাংয়ে, “নাতিহা ই মেমেহিংয়া তিংদিংগা? কা নাকো সাতা ওয়াংয়ে, আদো নাতিহা কাহিংয়া কোকোই দুকো তিরে মিচাতো, আদো ইহা কাহিংয়া তাইকো মিতিসো কুং কোকোইহিং জাপামসা পুরিংসো প্যাপিয়ে।45নাতিহা কাহিং চুম্মা জোমসা লেই মাতাতো, আদো কা সাতা দেয়োংতানি ইহা কুং কোকোইতা চুম্মা জোকো মাল্যায়াংতো।46নাতিহা কুং পোরোতা চুইতি মানাইপিতো, আদো ইহা কুং কোকোইতা ওহও্যহপা মেনাংওয়া চুইতি নাইপিয়ে।47ইহা হাংপা এপা জোমে কা নাতিহিং জাংরোওয়া, ইকোহা উইসে পাপবি মাপ জিংতেও। আকো সোতা ইহা কাহিংয়া সিওপা জেজেংওয়া তিংপায়ে। এংসি মেংচে পাপ ছমা জিংওয়া দিংঙাবিহা এংসি মেংচে জেজেংওয়া তিংপামগা।”48আকো নোইতা ইশুহা আকু মেমেহিং জাংয়ে, “নাকো পাপহা ছমা জিংতেনা।”49ইশুহিংপা লেরা চাকো গামবিহা তুংসি নাপোসো নোসুয়ে, “ইহা হাংসুগা? পাপরে ছমা পিচাওয়াহা।”50আত্রং ইশুহা আকু মেমেহিং জাংয়ে, “নাকো দেংওয়াসো নাতিহা বাচেমি নিও। নাতিহা তিমেপা হ্যাতু।”
সিমোনহা জাংয়ে, “উটকেওয়া, জাং।”41ইশুহা জাংয়ে, “ইচো দিংঙাকোতা নিহসো দিংঙাহা ন্যাস্যা খিমি নিমি, ইচোহা লাবে ঙারা জাতাংকো টাংকা আসা ইচোহা নিহকাইসো ত্যাসে জাতাংকো টাংকা।42আবি নিহসোসা তামক্যইমসা ন্যাস্যা খিচপাওয়া দিংঙাহা আবি নিহসোহিংসা মাপ জোপিয়ে। নেহা জাং, আবি নিহসোতাহা হাংসু সিওপা আকু খিচপাওয়া দিংঙাহিং জেজেংপা জোকোগা?”43সিমোনহা জাংয়ে, “কাহা জাংরোওয়া, হাংসু সিওপা খিচা আকু।”
আকুহা জাংয়ে, “নাতিহা আজিপ্পারাং জাংয়ো।”44আকো নোইতা ইশুহা মেমেহিং ন্যইমসা সিমোনহিং জাংয়ে, “নাতিহা ই মেমেহিংয়া তিংদিংগা? কা নাকো সাতা ওয়াংয়ে, আদো নাতিহা কাহিংয়া কোকোই দুকো তিরে মিচাতো, আদো ইহা কাহিংয়া তাইকো মিতিসো কুং কোকোইহিং জাপামসা পুরিংসো প্যাপিয়ে।45নাতিহা কাহিং চুম্মা জোমসা লেই মাতাতো, আদো কা সাতা দেয়োংতানি ইহা কুং কোকোইতা চুম্মা জোকো মাল্যায়াংতো।46নাতিহা কুং পোরোতা চুইতি মানাইপিতো, আদো ইহা কুং কোকোইতা ওহও্যহপা মেনাংওয়া চুইতি নাইপিয়ে।47ইহা হাংপা এপা জোমে কা নাতিহিং জাংরোওয়া, ইকোহা উইসে পাপবি মাপ জিংতেও। আকো সোতা ইহা কাহিংয়া সিওপা জেজেংওয়া তিংপায়ে। এংসি মেংচে পাপ ছমা জিংওয়া দিংঙাবিহা এংসি মেংচে জেজেংওয়া তিংপামগা।”48আকো নোইতা ইশুহা আকু মেমেহিং জাংয়ে, “নাকো পাপহা ছমা জিংতেনা।”49ইশুহিংপা লেরা চাকো গামবিহা তুংসি নাপোসো নোসুয়ে, “ইহা হাংসুগা? পাপরে ছমা পিচাওয়াহা।”50আত্রং ইশুহা আকু মেমেহিং জাংয়ে, “নাকো দেংওয়াসো নাতিহা বাচেমি নিও। নাতিহা তিমেপা হ্যাতু।”
The Seed Company