ন্যায়কর্তা17
1এফ্রাইম তাওয়া মিং নিওয়া ইচো য়্যাগোইকো জায়গাতা মিকা তাওয়া দিংঙাহা য়ুংমি নিমি।2আকুহা আপনিকো আয়ুহিং জাংয়ে, “হাত্রং নাকো এগারাশো জাতাংকো টাংকা কুচাপুনুওয়া, নাতিহা কুইওয়া দিংঙাহিংয়া শ্রাপেহে। নাকো শ্রাপেওয়াহা কাহা হিংয়ে। কাং, আকু টাংকাহা কুংতা নিও। আকু কুইওয়া দিংঙাহা কারাং নিমগা। আকো আয়ুহা জাংয়ে, “কুং চেংওয়া, প্রভুসেংজা নাতিহিং আশিষ পিচাকো!”3আকুহা আয়ুহিংয়া জাতাংকো টাংকাবি লাপিয়ে। আয়ুহা জাংয়ে, “কুং শ্রাপহা কুং চেওয়াকো তোইতা মেলেকো তামসা কা তাংসা জাতাংকো টাংকাবি প্রভুসেংজাহিং পিচারোওয়া। জাতাংসো সাজাইমসা কাঠকো মু্র্তি বানাইকোহা জাতাং ঘ্যইমগা। আকো সোতা জাতাংকো টাংকাহা কা নাতিহিংয়া লাপিরোওয়া।”4আত্রংহা আকুহা আপনিকো আয়ুহিংয়া আকু জাতাং লাপিয়ে। আয়ুহা দুইশো জাতাংহা ইচো জাতাংকো হাইক্রি বানাইওয়া দিংঙাহিং পিচায়ে। জাতাংকো কাম জোওয়া দিংঙাহা কাঠ খোপেমসা ইচো মুর্তি বানাইয়ে আসা আকু মুর্তিহিংয়া জাতাংসো সাজাইয়ে। আবিহা আকু মুর্তিহিংয়া মিকাকো সাতা এহে।5ই মিকা তাওয়া দিংঙাকোহা আপনিকো জেসাং হুইওয়া ইচো সিরি নিমগা। মুর্তিবি আসা ইচো পাউবিকো লুওয়া আংদুং আকুহা বানইয়ে আপনিকো ইচো চেংওয়াহিংয়া আউতা পাউকো কাম পিচায়ে।6আত্রংহা ইস্রাইলতাহা জাইপু মোতোমি। হাংসুহিং হাই জোদাংবে আকুহা ওইপারাং জোকো ছুমি।7আত্রংহা য়হুদাকো বেথলেহেম শহরতা ইচো ওয়াংটেংটেংগেংওয়া লেবী য়ুংমি নিমি।8আকুহা বেথলেহেম হুইতেমসা দোসরা জায়গা য়ুংকো তামসা জায়গা মোকাকো হ্যায়ে। এপা জোমসা তেইওয়া তেইওয়াতা আকুহা এফ্রাইমকো য়্যাগোইতা মিকাকো সাতা আকুহা দেকায়ে।9মিকাহা উইয়ে, “নাতিহা হানিসো ওয়াংমগা?” আকুহা জাংয়ে, “কাহা য়হুদাকো বেথলেহেমতা য়ুংওয়া ইচো লেবীগা। কাহা ইচো য়ুংওয়া জায়গা মোদিংনা।”10মিকাহা জাংয়ে, “কাহিংপা য়ুংপুই। কুং সল্লাকার আসা পাউ জিংমসা লো চাংনুওয়া কাহা নাতিহিংয়া ত্যাচো জাতাংকো ন্যাস্যা, চাওয়া আংওয়া আসা লুচাওয়া আংদুংবি চোইপিরোওয়া।”11আকু লেবীহা মীকাহিংপা য়ুংকো রাজি খুশি জিংপুয়ে আসা আকো চেংবেপা জিংপুয়ে।12মীকাহা আকুহিংয়া পাউকো কামতা লাগাইয়ে আসা আকুহা মিকাকো সাতা য়ুংকো শুরু জোয়ে।13মিকাহা জাংয়ে, “নেহা কাহিংপাহা ইচো লেবী পাউ নিও আসা প্রভুসেংজাহা তাংসা কুং ভলাইকো সোতারাং জো পিরোওয়া।”
The Seed Company