ন্যায়কর্তা18
1আত্রংকো বেলাতাহা ইস্রাইলতাহা হাংসুরে জাইপু মোতোমি। আত্রংহা দানকো জিরিবিহা আপনিবি য়ুংকো তামসা জায়গা মোদিংমি, হাংপাতানাহা ইস্রাইলকো জিরিকো প্যাকোতা আবিহা আপনিকো সোতা য়ুংওয়া জায়গা মোমুংয়াংমি।2আকো সোতা দান জিরিবিহা আপনিকো প্যাকোতা তাংসা প্যাপ্যাম্যাম্যাবিকো প্যাকোতা ঙাচো য়োগ্য দিংঙাবিহিং জেংয়ে। দান জিরিকো দিংঙাবিহা আবিহিং জায়গা মোওকো আসা আকো নাপোকো নুওয়াং কোইকো তামসা সোরা আসা এস্তোল শহরসো নিংপুয়ে। আকু ঙাচো এবি হাত্রং এফ্রাইমকো য়্যাগোইতা দেয়োং, আবিহা মীকাকো সাতা য়ুংয়ে।3আউতা য়ুংনুওয়া আবিহা আকু ওয়াংটেংটেংগেওয়া লেবীকো য়্যইওয়া নাইয়ে আসা আকুহিং উইয়ে, “নাতিহিংয়া ইতা হাংসু পারাংমগা? নাতিহা ইতা হাং জোদিংগা? ইতাহা নাকোহা হাং কাম নিংগা?4আকুহা জাংয়ে, “মীকাকো জোওয়া সেই কাহা ইতা নিও কা আকো পাউকো কাম জোমগা আসা আকুরাং কাহিংয়া হাজিরা পিচারোওয়া।”5আবিহা আকুহিংয়া জাংয়ে, “কাবি হানি কামতা নোমি নি, আউতা কাবি সফল জিংকোমে না মাজিংকোমে, কৃপা জোমসা সেংজাহিংপা উইপি।”6পাউহা জাংয়ে, “নাবিহা সিংদুমঘ্যহরোওয়া। নাবিকো হ্যাদাংওয়াতা কামতাহা সেংজাকো খুইতা নিও।”7আকো সোতা আকু ঙাচো আউতা হ্যাপুয়ে আসা লেশ শহরতা দেকায়ে। সিদোনকো দিংঙাবি বেপা আউতা য়ুংওয়া দিংঙাবি তিমেপা আসা মুতু-মসাপা য়ুংওয়া আবিহা তিংয়ে। লেশকো দিংঙাবি তিমেপা আসা য়াংতাপা য়ুংওয়া নিমি, আবিকো প্যাকোতা হাইক্রি স্যাসু-ট্যইংসুওয়া মাতোমি। ঘ্যইওয়া নুওয়াং তাংসা আবিহিংপা নিমি। আবিহা সীদোনিবিসোহা তানাং য়ুংচাংমি আসা দোসরা হাংসুহিংপারে আবিকোহা সন্পর্ক মোতোমি।8আকু ঙাচো দিংঙাবিহা সোরা আসা এস্তোলতা লায়োংনুওয়া, “নাবিহা হাং-হাং তিংগা?” তামসা আকো আপনিকো দিংঙাবিহা উইয়ে।9আবিহা জাংয়ে, “তে, আসা য়াংবিহা লেশ শহরহিং আক্রমন জোসুকো। কাবিহা আকু জায়গা কাংয়ে, আকুহা অসল জায়গা নিও। আউতা খুই চোউমসা মায়ুংসি। সেন্নেপারাং হোসি আসা লেশ শহরহিং ঘিংচাপুসি।10হাত্রং আউতা দেকা, আকো দিংঙাবিহা হাই নুওয়াকোরে সংখ্যা মোজোরোওয়া, আকুহা নাবিহা তিংরোওয়া। আকুহা ইচো টেবো জায়গা নিও। দিংঙাবিহিং ঘ্যইওয়া তাংসা সোংসাবিহা আউতা মুংমগা। সেংজাহা আকু জায়গাহা নাবিহিং পিচামি নিও।”11এপা জোমসা লুইসুকো তৈয়ার জিংমসা সোরা আসা এস্তোলসো ছয়শো দান জিরিকো দিংঙাবিহা হ্যাপুয়ে।12আবিহা য়্যাগোই ল্যইপুয়ে আসা য়হুদাকো ক্রিয়াদ-য়ারিমকো দিব্যা কাটুতা তাম্বু বানাইমসা য়ুংয়ে। আকো সোতারাং আকু জায়গাহিংয়া হিনি চোইপা দানকো ‘মহনেহ-দান তামসা জাংমগা।13আউসোহা নাগাই ঘ্যইমসা আবিহা এফ্রাইমকো য়্যাগোইতা মীকাকো সাতা দেরেয়ে।14আত্রংহা লেশ আসা হুরাপা নিওয়া জায়গাকো নাপোকো নুওয়া লাংকো হ্যাওয়া আকু ঙাচো দিংঙাবিহা দানকো দিংঙাবিহিং জাংয়ে, “নাবিহা গেমি নিংগা কি ই সাবিকো প্যাকোতাহা ইচো সাতাহা জাতাংসো মেরোইওয়া ইচো কাটকো মুর্তি নিও? দোসরা ইচো মুর্তি আসা ইচো পাউবিকো লুওয়া আংদুংরে আউতা নিও। কাবিহা হাং জোনেকোগা? হাং নোচেং নিংগা?”15আবিহা মীকাকো সাতা হোয়ে আসা আউতা য়ুংওয়া ওয়াংটেংটেংগেংওয়া লেবীহিংপা আকো দেরেংবি উইয়ে।16আত্রংহা লুইসুকো তৈয়ার জিংমসা শহরকো মাটা লাপুংতা ছয়শো দান জিরিকো দিংঙাবিহা জাদিংমি নিমগা।17ঙাচো আকু পোজাবিহা গেংপা মীকাকো সাতা হোপুয়ে আসা আকু জাতাংসো মেরোইওয়া কাটকো মুর্তি আসা দোসরা মুর্তিবি আসা পাউবিকো লুওয়া আংদুংহিংয়া খুইতা গিচাপুয়ে। আত্রংহা পাউবিহা ছয়শো সিপাইবিহিংপা মাটা লাপুংতা জাদিংওয়া নিমি।18এপারাং আকু দিংঙাবিহা মীকাকো সাতা হোমসা আকু পবিত্র সোংসাবি পুচানুওয়া পাউহা উইয়ে, “ইহা নাবিহা হাং জোদিংগা?”19আবিহা আকুহিংয়া জাংয়ে, “চেকেপা য়ুং, ইয়্যইরে মোয়্যই কাবিহিংপা ওয়াং আসা কাবিকো পাউ আসা সল্লাহ পিচাওয়া দিংঙা জিং। ইচো প্যাপ্যাম্যাম্যারোমা তাংসা ইস্রাইলি জিরিকো পাউ জিংকোহা নাতিহিংয়া এনতাওয়া নুওয়াং মোকোমগাসা?”20ই নুওয়াংতাহা আকু পাউহা গাগ্রুচাপুয়ে। আকো সোতা আকু পবিত্র সোংসাবি পুমসা আকুহা আবিহিংপা হোপুয়ে।21আবিহা আউসোহা লায়োংমসা আপনিকো চেংচুবি, সেংচেং-পাচেংবি আসা এনতাওয়া এনতাওয়া সোংসাবিহা নাগাই পুমসা হোপুয়ে।22আবিহা মীকাকো সাসো তানাংতা দেকায়ে। আত্রংহা আপনিকো সেবেইবিহিং লুইসপাকো মীকাহা মোউয়ে। আবিহা হ্যামসা দান জিরিকো দিংঙাবিহিংয়া নিংয়ায়ে।23আসা আবিহিংয়া য়েংয়ায়ে। দান জিরিকো দিংঙাবিহা হুরামসা মীকাহিংয়া উইয়ে, “হাং জিংপুংগা? ইতাহা হাংপাসা উইসে দিংঙাবি জাসুমগা?”24মীকাহা জাংয়ে, “নাবিহা হাং জাংদিংগা? হাংপাসা নাবিহা কাহিংয়া হাং জিংপুংগা তামসা উইসুমগা? কুং পাউহিং আসা চোইসুংকো মুর্তিবিহা নাবিহা পুচাদাংমি নিও কাহিংপাহা নেহা হাং নিংগাসা?”25দান জিরিকো দিংঙাবিহা জাংয়ে, “নাতিহিংয়া চেকেপা য়ুংওয়ারাং এনতারোওয়া। ই দিংঙাবিহা সেদ্রাংপামসা নাতিহিং আক্রমন জোকো মেকেংদানাহা নাতিহা চেকেপা য়ুং। মোকোনাহা নাতি আসা নাকো প্যাপ্যাম্যাম্যা তাংসাহিং স্যাপুরোওয়া।”26এপা জাংমসা দান জিরিকো দিংঙাবিহা হোপুয়ে। মীকাহা আবিহিংয়া আপনিরোমা সিওপা সাডুংপা জিংওয়া তিংয়ো। আসা হুরামসা আকুহা আপনিকো সাতা হোপুয়ে।27মীকাকো পাউ আসা মুর্তিবি পুমসা হ্যাপুনতেনুওয়া দান জিরিকো দিংঙাবিহা লেশ শহরকো তোইতা আক্রমন জোয়ে। তিমেপা আসা চাংসুমসা য়ুংওয়া দিংঙাবিকো আকু শহর বেথ-রহোব শহরহিংপা ইচো ওয়াংবোইতা নিমগা। আবিহা লেশতা য়ুংওয়াবিহিংয়া স্যাপুয়ে আসা শহরতা মেহ চুংপুয়ে। আবিহিং বাচাইকো সোতাহা হাংসুরে মেলেতো, হাংপাতানাহা সিদোনীবিহা আবিকোসো তানাং নিমি আসা আকু জ্যাবিহিংপা আবিকোহা হাইরে সম্পর্করাং মোতোমি। আকু শহরহিংয়া ন্যাসা বানাইমসা দান জিরিকো দিংঙাবিহা আউতা য়ুংয়ে।29আকো মিংহা লেশসোহা সোমসা আবিহা আপনিকো আটা আজাবিকো মিং ত্যাবাপা দান এহে। আবিকো আটা আজাকো মিংহা দান নিমি, হাংসু য়াকুবকো চেংওয়া নিমমে।30দান জিরিকো দিংঙাবিহা মিকাকো বানাইওয়া মুর্তিহিং দান শহরতা জাপায়ে। আবিহা আকু মুর্তিহিংয়া আরাধনা জোয়ে। দান জিরিকো দিংঙাবিহিং কৈদ জোমসা দোসরা জায়গাতা মাপুরানু চোইপা মোসাকো চুওয়া গের্শোমকো চেংওয়া জোনাথন আসা আকো চেংওয়াবিহা দান জিরিবিকো পাউ জিংমসা কাম জোয়ে।31শিলোতা সেংজাকো তাম্বু নিনু চোইপাহা আবিহা মিকাকো দানতা বানাইওয়া মুর্তিহিং আরাধনা জোসুচাংমি।
The Seed Company