ন্যায়কর্তা16
1সাইয়ুহা শিমশোনহা পলিশ্তিবিকো শহর গাজাতা হোয়ে। আকুহা আউতাহা ইচো নুংনাংরি মেমেহিং দোসুয়ে আসা লিশুংহা আকু মেমেহিংপা জিংয়ে।2শিমশোনহা গাজাতা নিও তাওয়া আকো দিংঙাবিহা সিদা চ্যইয়ে, আবিহা আকুহিংয়া হুরাপা য়োইসুয়ে আসা হিপ্পিরি শহরকো মাটা লাপুংতা আকুহিং খুইমসা য়ুংয়ে। আবিহা হিপ্পিরি চেক্কেপা আউতারাং খুইসুমসা য়ুংয়ে, হাংপাতানাহা আবিহা জাংসুয়ে, “হাংপকোং চোইপা য়াংবিহা খুইরোওয়া আসা আকুহিংয়া স্যারোওয়া।”3আদো আদি রাততা মেংচে শিমশোনহা ন্যাগুতা জিংয়ে। আত্রংহা লোমসা শহরকো মাটা লাপু, নিসোসা হুইটিং, আসা বিরিবি তাংসা আকুহা ওইপুয়ে আসা আকুহিংয়া বুচুংতা পাপুমসা হেব্রোনকো তোইকো য়্যাগোইকো পুদাংতা সাপুয়ে।4আকো নোইতা শিমশোনহা ইচো দলীলা মিং নিওয়া মেমেহিংপা জেজেংসুওয়াতা পরেয়ে। আকু মেমেহা সরেককো ওয়াংবোইতা য়ুংমি নিমি।5পলিশ্তিবিকো ঙাচো জাইপুবিহা আকোতা হোমসা জাংয়ে, “শিমশোনহা হাং জোমসা এসেপাকো সে নিওয়া জিংপুমগা আকুহিং ল্যইপামসা উই আসা য়াংবিহা হেপা জোমসা আকুহিংয়া আপনিকো কাবুতা পারামসা তাইকো ছুকোগা, কাবি তাংসা নাতিহা এগারা এগারাশো জাতাংকো তাংকা মুংচারোওয়া।”6আত্রংহা দলীলাহা শিমশোনহিংয়া জাংয়ে, “নাতিহা হাং জোমসা এসেপাকো সে নিওয়া দিংঙা জিংপুমগা, কাহিং জাংকে। হেপা জোমসা নাতিহিংয়া তাইমসা একো ছুকোগা?”7শিমশোনহা জাংয়ে, “কাহিংয়া মেসেংয়াংওয়া তাজা লিংপেকো নীচো চুবে সিংদিসো তাইনাহা কাহা দোসরাবি বেপা সে মাতাপা জিংপুরোওয়া।”8আকু পলিশ্তি জাইপুবিহা নীচো চুবে মেসেংয়াংওয়া লিংপেকো সিংদিবি লাগাইয়ে, আসা দলীলাহা আকু সিংদিসো আকুহিংয়া তাইপুয়ে।9আকুহা আপনিকো নাপো সিরিতাহা লেরা দিংঙাবিহিং খুইপাদিংমি আসা ঙামসা আকুহিং জাংয়ে, “শিমশোন পলিশ্তিবিহা দেপানা!” আদো মেহসো ওংপুওয়া সিংদি বেপা আসা লিংপেকো সিংদিহিংয়া আকুহা দ্যইপাপুয়ে। এপা জোপমসারাং আকো সেহা হাংতা নিম্মে আবিহা কোইমক্যইতো।10দলীলাহা শিমশোনহিংয়া জাংয়ে, “কাং, নাতিহা কাহিংয়া তোউজি বানাইয়ে আসা আজিপ্পা নুওয়াংহা মাজাংতো। নাতিহিংয়া হেপা তাইমসা একো চুকোগা, জাংকে।”11আকুহা জাংয়ে, “হাত্রংরে মাতাইয়াংওয়া চুবে পার্দিসো তাইনাহা কাহা দোসরা বেপা সে মোতোওয়া দিংঙা জিংপুরোওয়া।”12আকো সোতা দলিলাহা চুবে পার্দি পামসা আকুহিং তাইয়ে। আত্রংহা আকুহা ঙামসা জাংয়ে, “শিমশোন, পলিশ্তিবিহা দেপানা!” আকু দিংঙাবিহা দোসরা সিরিতা খুইসুদিংমি নিমি। আদো সিংদি ত্যাবাপা আকুহা আকু পার্দিবিহা দ্যইপাপুয়ে।13দলীলাহা শিমশোনহিংয়া জাংয়ে, “নাতিহা কাহিংয়া তোউজি বানাইদিংয়ো আসা আজিপ্পা নুওয়াংহা মাজাংয়াংতো। নাতিহিংয়া হেপা তাইকো ছুকোগাসা, কাহিং জাংকে।” আকুহা জাংয়ে, “কুং পুরিংকো নীচো লাটাহিং লেংমসা গুনাতা তাইমসা এনাহা কাহা দোসরা দিংঙাবেপা সে মোতোওয়া জিংপুরোওয়া।”14দলীলাহা আকুহিংয়া নোইপামসা জিংপায়ে আসা আকো নীচো পুরিংকো লাটা লেংমসা গুনা টামসা আউতা টাপুয়ে। আত্রংহা আকুহা ঙামসা জাংয়ে, “শিমশোন, পলিশ্তিবিহা দেপানা!” শিমশোনহা লোয়ে আসা আকুহা তাইওয়া পুরিংসো গুনাবিহিংয়া ওইপুয়ে।15আকুহা শিমশোনহিংয়া জাংয়ে, নাতিহা হেপা “কাহিংয়া জেজেংমি’ তামসা জাংকো ছুকোগা, হাত্রং নাতি কাহিং আজিপ্পা নুওয়াং মাজাং? সুংকোই নাতিহা কাহিংয়া ল্যাইপায়ে আসা হিনি চোইপা নাকো সেহা হাংতা নিম্মে আকুহা নাতিহা মাজাংয়াংতো।”16সোদাইদিন আকুহা শিমশোনহিং উইয়ে। সোদাইদিন আকুহা উইওয়াকো সোতা আকুহা দলীলাহিংয়া সাইয়ুহা আজিপ্পা নুওয়াং জাংপুয়ে।17“কেনুকো দিনসোহা সেংজাকো সোতা লারাংসা জোমসা কাহা [নাজিরী] বানাইমি নিও। কুং পুরি চ্যাপুনাহা কুং সেহা য়াংপুরোওয়া আসা কাহা দোসরা দিংঙাবেপা সে মোতোওয়া দিংঙা জিংপুরোওয়া।18এপা জোমসা আজিপ্পা নুওয়াং শিমশোন জাংপুনতেনুওয়া দলীলাহা পলিশ্তী জাইপুবিহিংয়া দেরেং কাইপুয়ে, “ইকোই নাবিহা লেপিকো জো। শিমশোনহা কাহিংয়া আজিপ্পা নুওয়াং জাংমি নিও।” আবিহা ন্যাস্যা পামসা লেহে।19দলীলাহা শিমশোনহিং নোইপামসা নুইতা জিংপায়ে আসা ইচো দিংঙাহিং মোইমসা আকো পুরিংকো নীচো লাটাবি চ্যাপাপুয়ে। আত্রংহা শিমশোনকো সেহা য়াংপুয়ে।20আত্রংহা আকুহা জাংয়ে, “শিমশোন, পলিশ্তিবিহা দেপানা!” আকুহা লোয়ে আসা নোয়ে, “কাহা আতাংকো ত্যাবাপা আপনিহিং ছুটকারা জোরোওয়া।” আদো আকুহিংয়া সেংজাহা ল্যাপুনতেওয়ো তাওয়া নুওয়াং আকুহা সিদা মোচ্যইয়াংতো।21আত্রংহা পলিশ্তিবিহা আকুহিংয়া প্যইপুয়ে, আসা আকো মিচো নোপাপুয়ে, আসা গাজাতা পারায়ে। আউতাহা আবিহা আকুহিংয়া কাঁসাকো সাংগ্লিসো তাইপুয়ে, আসা জেলতা ওয়াংটা উইপায়ে।22আদো আকো পুরিং চ্যাপুনতেনুকো নোইতাহা ন্যাসা পুরিংহা দেপুদাংয়ে।23পলিশ্তি জাইপুবিহা আপনিকো চোইসুং দাগোনহিং ইচো টেবো বলিদান চড়াইকো আসা ল্যইচ্যইপ্যইচ্যই মানাইকো জমা জিংসুয়ে। আবিহা এপা জোমসা লেহদী লেহহে, “য়োংকো চোইসুংহা য়োংকো দুসমান শিমশোনহিংয়া য়োংকো খুইতা স্যইপুয়ে।!”24আবিহা চাসু-আংসুদিংওয়া এপা জাংয়ে, “শিমশোনহিং পারা, আকুহা য়াংবিহিং খেল তামাসা তিংপাকো।” আবিহা শিমশোনহিংয়া জেলসো নোপায়ে, খেল তামাসা তিংপাকো লাগাইয়ে আসা সাকো প্যাকোকো টারবো হুটিংকো প্যাকোতা জাপায়ে। শিমশোনহিং তিংমসা দিংঙাবিহা আপনিকো চোইসুংহিং এপা জোমসা তাচায়ে, “য়োংকো উইসে ডুওয়া এবিহিং ইহা স্যাপুয়ে, আদো য়োংকো চোইসুংহা য়াংবিহিংয়া আকো তোইতা জিয়োপায়ে।!”26শিমশোনহা আকো খুই চুংমসা তেরোইওয়া পোজাহিং জাংয়ে, “সাকো ব্যাহিং য়োইমসা এওয়া হাংসুরোমা ডিয়োওয়া হুটিংতা কাহিং সুকো পিচা, কা আউতা ব্যারোওয়া।”27সাতাহা পোজা মেমেবি মেইপা নিমি। ঙাচো পলিশ্তি জাইপুবি নিমি। কেংবুকো তোইতা শিমশোনকো খেল তামাসা কাংমসা, তিন হাজার কাচি মেমে পোজা আউতা গাওয়া নিমি।28আত্রংহা শিমশোনহা পাচাইয়ে, “ও প্রভুসেংজা, কাহিং প্যারাপাপি, সেংজা, কৃপা জোমসা কাহিং ন্যাসা ইকোই সে পিচা আসা কুং নিহমিং মিচো টুইপাপুওয়াকো সোতা ই পলিশ্তিবিহিংপা কা ইকোইত্তা বদলা লাংকো ছুকো।”29শিমশোনহা প্যাকোতা নিওয়া নিহসো হুটিংবিহিং চুংয়ে, আকু হুইতিংবিহা সাকো ব্যাহিং থামেমসা এওয়া নিমি। দাংক্রেং খুইসো ইচো আসা কেক্রেং খুইসো ইচো হুটিংহিং আপনিকোতা নিওয়া তাংসা সেসো জুইয়ে।30আসা আকুহা জাংয়ে, “কাহা পলিশ্তিবিহিংপা সিপুরোওয়া।” শিমশোনহা আপনিকোতা নিওয়া তাংসা সেসো আকু সাকো হুটিংবিহিং জুইয়ে আসা আকু সাহা ইপুমসা ঙাচো জাইপু আসা লেরা তাংসা দিংঙাবিকো তোইতা য়ুইচপুয়ে। আকু মাসিনু চোইপা হাসে দিংঙাবিহিং আকু স্যামি নিমমে, আকুরোমা সিওপা দিংঙাবিহিং শিমশোনহা আপনি সিদাংনুওয়া স্যাপে।31আকো ডুওয়া এবি আসা প্যাপ্যাম্যাম্যাবি আসা দোসরা দিংঙাবিহা আকো সিপুওয়া জুপাহিং লাংরেকো লেয়ে। আবিহা আকো সিপুওয়া জুপা পুচায়ে আসা সোরা আসা এস্তোলকো প্যাকোতা আকো আপা মানোহকো তোম্যইতা লিপুয়ে। আকুহা লো ইকাইনিং চোইপা ইস্রাইলকো মাটা নিমি।
The Seed Company