Lee Koreeg nà moog‑e 13

Koreeg nà moog‑e13

¹Aneenda Abram e wajaga é Məsirə dumuun é Nagab è odenene èg kaaŋa iinini nà bilə̌nǐ‑i, Lutu təə̌ní èg deene.²Abram taǎn seen é kaaŋa‑e belǎn lewdag eg talg, kursug èg paramg.³E lee é garga nà é Nagaba e mag e məŋə̌n ləŋ cagg og dumuun é wag man é ceeg é Bet‑El èg Ayne⁴é wag ná kussǐ wən moog‑e. É garadinə Abram e fir Məi Telan.

⁵Gəl Lutu ná leeŋa èg Abram‑e taǎn seende jo re belǎn əəriig, miəg, tog èg dhəmg èg kumurg.⁶Gəl aldan assa dega é ɲaan é kora kaaŋa iyəni əssǐ é mada əndəg‑i ega e gàr e àn gar taman wa.⁷Kasag é lewdag é Abrama èg kasag é Luti e àd fiyəs egee. É mun naadinə Kanaanga èg Firissiigə anǎn é alda na jo di.⁸Enna Abram biissǐ Lutun: “Bii ar aga fiissǎ agee wa‑e, war kasag é lewdag unug èg ənəgi wa, é kora ag biləsǎ teerma əndəg‑i.⁹Aldan ná mada naa dö muu ta‑e waw? Wəjí ã lada əəlgə. Ô waja koyandan‑e â waj melendan, ô waja melendan‑e â waj koyandan.”

¹⁰Lutu e wii wag dumuun é baw é deel Urdun é mun kay ləŋ é Sowar e ɲaar e taa feg, e taa ar kaal é Məi Tel‑e, e taa ar alda ná é Məsirii‑ni. (Niin taǎn bara Tel e jədə Sədum èg Əmuuri.)¹¹Aneenda jag nee ləssə iilgə. Enna Lutu wərsǐ baw ná é deel Urdun‑i é mun kay‑e e ab dumuun é wag ná tel bəə̂n‑i.¹²Abram e ab é aldan é Kanaan. Lutu e ab baw‑eelg e bell kumurg inəgin tad teerma é Sədum.¹³Gəl jag nà é Sədum‑i ruigə̌n. Eg jissə əniid ná ən əndəg‑i é Məi Tel muu.

¹⁴É gara Lutu ləssǐ iiŋ é Abram iiŋ‑i, Məi Tel e bee Abraman: “Wiinə wag é wag ná u təllǐ, tur wag dumuun tad èg dum taw, dumuun wag ná tel bəə̂n‑i èg dumuun é wag ná tel wələ‑i.¹⁵Aldan ná u den ná kay‑e â gəfũn èg məyəd unug‑i ləŋ pad.¹⁶Â ədə ü məyədə ar dufurd é aldan‑e, aneenda jen man e garsâ ẽ birsə dufurd‑i e gar ẽ birsə ü məyədə.¹⁷Əə way pərə aldan eelga kay taw ləŋ tad de â gaf ũnu.”¹⁸Aneenda Abram wərsǐ kumurg inəgin sildiigə é guldug é Mamara nà maŋg‑e é wag ná bel Abron‑e. É wag naadinə e kuu wən ẽ firdí Məi Telan.

Pioneer Bible Translators

https://app.library.bible/content/a230cccfbf4362be