Read Koreeg nà moog‑e 12

Koreeg nà moog‑e12

¹Məi Tel e bee Abraman: “Doos way oon bii gaam uunu èg jag unug è maag nà dö baawan‑e dumuun é wag man ná â rimdũn‑i.²Â ədun kaŋ mada‑e. Â əildə uuŋu, â ədə ö saaga é maŋg. Â əildə jag iiŋgə kərdəŋ é kor uun.³Â əildə jag nà əildə uuŋ‑i. Â mir jag nà məɲũn jisig əng‑i. Wisəg ë muug kay addeeg‑oolo iiŋgə ê əil é kor uun.”

⁴Abram e doos e waj ar ná Məi Tel kursǐ ĩnə‑i, Lut e wəjí èg deen‑e. Abram belǎn duugu 75 é gara wəjjǐ tui é Araan‑e.⁵Abram e war od iini Sara'en èg jaa ná dë awlane Lutu èg kaaŋa iyəni ná məldíigə tad é Araan‑e èg dhəmg iyəgin nà kaama ĩgən‑i. Eg waj é kay dumuun é Kanaan ləŋ e cagga wag.⁶Abram e doos e waj e lee é aldan ná ləŋ e bad é wag ná taa guldu məniiŋ‑i é Moora é Səkiim‑i. É garanda Kanaanga ànǎn é aldan na.

⁷Məi Tel e doos e god iiŋ Abraman, e bii'ĩnə: “Â gaf alda niin ü məyədən.” Abrama e doos e kuu wə man Məi Telan é kora Məi Tel rimsǐ iiŋ‑i.⁸Aneenda Abram e məŋə dumuun gaamg‑əəŋg é Bet‑El dumuun é wag ná tel bəə̂n‑i. Abram e doos e bell kumur iini tad é ceeg é Bet‑Ela (ween é Tela) dumuun é wag ná tel wələ‑i é Ay dumuun é wag ná tel bəə̂n‑i. E doos e kuu wə man Məi Telan, e fir Məi Telan.⁹Aneenda Abram e məŋə e lee dumuun é Nagab.

¹⁰É garadinə kun man ləzzíigǐ tu, Abram e waj dumuun é Məsir ẽ adda tu é yaag é kora kun nəəmə̌nǐ əndəg‑i.¹¹Ar e bada é Məsir‑i e bee odene Sara'en: “A ɲel é gara u wiidə̂nǐ əndəg‑i.¹²Məsiriigə e tùrsunî‑i ê bèen oon od əənə, aneenda ê tìrda ê bìju.¹³Bii'ĩgən oon ä yaazzn, anaanda gar ê godan maŋ é kor uun. Gar ã assé taw a denoog é kor uun.”¹⁴É gara Abram lijjǐ é Məsir‑i, Məsiriigə e tur Sara'e asam ná wiidǐ əndəg‑i.¹⁵Jag faŋg nà é Firuun ë aaɲj‑e é gara tursíiginǐ‑i, e məzə̌níigi é Firuun‑muu, e wəríigin e waja deena é ween é Firuun.¹⁶E jis Abram ma maŋ é kor é odo, e gaf ĩnə əəriig èg miəg, tog, cooleeg nà fuuig èg nà ɲeeg, dhəmg nà fuuig èg nà ɲeeg èg kəmdəlig.¹⁷Gəl Məi Tel e tal waneega nà əng‑i ẽ naamda Firuunu èg jag é maag inəgini é kor é Sara'e od é Abram.¹⁸Anaanda Firuun e ko é Abrama. E bii'ĩnə: “Ɲiin u jissə̃n taa anaan‑e? Ɲiin u kursǐ ə̃nə Sara'e od uunu wa?¹⁹Ɲiin u biissǐ ö yaazzn, ləŋ a waren ẽ adda od əən‑i? Bare od uunun ni. Waren u wəjə deena tui.”²⁰Aneenda Firuun e kurd jag inəgin é kor é Abram, e dhəwníigi ẽ wayda è odene èg jeg inəgin nà bilə̌nǐ kay‑e.

Pioneer Bible Translators

https://app.library.bible/content/a230cccfbf4362be