Read Koreeg nà moog‑e 14

Koreeg nà moog‑e14

¹É mun naadinə Amraafil taǎn məlig é Cenaar, Aryuk məlig é Alasar, Kadarlomar məlig é Elaam èg Tedal məlig é Juyiim.²Məliigə neen eg waj ẽ mas eg dawda Baara məlig é Sədum, Barcaa məlig é Əmuur, Cenaab məlig é Adma, Cameber məlig é Səbuyim, èg məlig é Baala (ná ɲiləs Sowar‑e).

³Məliigə nee kay eg mal moraag iyəgin è mumul baw‑eelg é Sadiim (een ná baw é Deel ná Tirsí).⁴Duugu 12 e tàa dhəmg é Kadarlomar‑e, gəl duudu ná ədə golgo 13 eg làd iiŋgə.

⁵É duudu ná 14, Kadarlomar èg məliig nà èg deen‑e e dàf Rafayiigə eg musə̌niigə é Acitarot Garnayim, èg Susiigə é Aam, Emiigə é baw é Gariyatim,⁶èg Oriigi é gaam iyənin Saiir ləŋ é Il‑Faaran ná dumuun wəl‑uul‑i.⁷Aneenda eg mə̀r e àdaga é En‑Mecafat (ná ɲiləs Gaadic‑i), e bàg gaamg é Amalekiigə kay èg ná é Amuuriig nà anǎn é Asasun‑Tamaar‑e.

⁸Aneenda məlig é Sədum, èg məlig é Əmuur, èg məlig é Adma, è məlig é Səbuyim, məlig é Baala ná ɲiləs Sowar‑e, e lìw iiŋgə ã də̀wsə baw‑eelg é Sadiim‑i⁹ẽ dawdo Kadarlomar məlig é Elaam, Tedal məlig é Juyiim, Amraafil məlig é Cenaar èg Aryuk məlig é Alasara. Məliig nà yəəs‑i e də̀wsə èg məliigə nà asamane‑ne.¹⁰Bare baw é Sadiim‑i taǎn fuulg ná iilg taa é laad. É gara məlig é Sədum èg məlig é Əmuur gəldíigǐ‑i, jag iyəgin biig e wàl fuulg‑iilg, biig e gàl dumuun gaamg‑uulg.¹¹Məliig nà yəəs‑i e korj kaaŋa ná é Sədum‑i èg ná é Əmuurii‑ni èg namees ná tu‑i kay. Aneenda e wàj tui.¹²E bàg jaan é awl é Abrama Lutu jo di èg jeg inəgin nà bilə̌nǐ'ii‑ni, é kora ənə̌nǐ é Sədum é mun naadin‑i.

¹³Jen man ná ləzzǐ‑i e lee e kor Abram ná Ibrani‑i ná anǎn é guldug məŋgun nà é Mamara ná Amuur‑i, awl é Acakol èg Aner, eg kay taǎn kasanaag é Abram nà tall èg deen‑e.¹⁴É gara Abram fiŋəssǐ jaa dë awlane bagsán‑e, e tarb buŋurg inəgin nà kossána ussə́nə teyag dë maade taa 318, e wàj e də̀wniigə ləŋ é Dan.¹⁵É gara wag əssǐ kaay‑e Abram e lad buŋurg inəgin iilgə e bur jogo e musíigiigə e gùniigə ləŋ é Oba dumuun é wag ná den wag dumuun tad é Dimask‑e.¹⁶E pədəgə kaaŋan kay, e baga jaan é awlane Lutu èg jeg inəgin nà bilə̌nǐ‑i, èg ozoog biig èg jag fuuig biig di.

¹⁷É gara Abram mərǐ musə̌nǐ Kadarlomar èg məliig nà tall èg deene‑e, məlig é Sədum e ladaga tu ẽ muddi diiŋ é baw é Caawa (ná ɲiləs Baw é Məlig‑i).¹⁸Aneenda Məliksadig məlig é Salem e waraga bəuulg èg saa. Taǎn seen ná jisə hayg‑e é Məi Tel ná Faan‑e.¹⁹E əild Abram iiŋ, e bee: “Bii Məi Tel ná Faan‑e ná təlǐ aweelga èg addeeg‑e ẽ əiləndə Abram iiŋ.²⁰Bii maanga ẽ adda Məi Tel ná Faan ná wələnsí jag nà ŋəmənə oon‑e dö aas‑e.” Aneenda Abram e gəfi ĩnə əsəgdi é jeg kərəŋ nà bəí‑i.²¹Məlig é Sədumu e bee Abraman: “Gəfə̃n jogo, u wər jega oonde.”²²Gəl Abram e bee məlik é Sədumən: “A warsa ä aas taw Məi Telan, Tel ná Faan təlǐ aweelg èg addeeg‑e a bellda ä aas tad é Tel‑muu²³ná â guɲǐ jeem uun ná u bilǐ‑i wa‑e, ma e been reen‑e, war meed é saw, aneenda gar û gər ũ kurí ‘Aana əssə Abram ë aas kaaŋa‑e’ wa.²⁴Aan â guɲ jeem wa, gəl ná jag ənəgə nəmsíig‑i een na jo, gəl fand é jag nà wajjéegě èg daan‑e Aner è Acakol èg Mamara‑ne. Bii warda fəndəg iyəgin.”

Pioneer Bible Translators

https://app.library.bible/content/a230cccfbf4362be