Proverbs30
1Jakeh napei Agur samdung, kerangbe:Mina aide Ithiel dage mdugai, Ithiel nah Ucal dage:2Ih mina swade makaune nzwa ki dida nah Ih mina kecet nzwa macet keci de gada.3Ih kemteu sam de keteu luma,mede Kemci Tinggwang maci de a da gah.4Cauge tinggim ga hang nah nghung no? Cau pe ba gage tingkai herak lu dino? Cau pe cwatie gage duidung hekwalu dino? Cau kideube raidung leune kailu dino? Pe zi cau no, nah pe napei zi cau no? Nang cibam zie cai acu ranglia lo!5Tinggwang sam leune kedei pie dida; pe dage nsiu kegai leune de pa au gum beula.6Tinggwang samdung gage kai si so, mecai pa ncu ledeu gai zie, nah nang kenretme gelie kecu keu lia zie. 7Ih n dade ma kena kie la, Ih tsaidi kemak dwa a dade cidungde kebai di so:8Kemtabe nah kenretdung a dade keu mdei di. Acu magah mede mahei peu so, teu maikesia ge rünne taktyei acu peu lo.9Ih kiee zu bam dicai, Ih ncu mlai nah rang di lubui, “RAMPAUBE cau no?” Mede Ih magah dicai, Ih rega nah a Tinggwang zi de tei hengam tei di lubui.10Kilabe de pe mpaube dwa de madaude rang msia so, mecai pa ncu reset zie nah nang mau dizie.11Ceheu ge penui pei de reset kecu tei nah penui pui de samlam beu lama.12Ceheu ge penui miak gade au mci kecu ge la, nah ciude penui kehera de hui mci dima.13Ceheu ge penui miak hu kecu la, nah penui miakkum dai hu ge cu no!14Ceheu ge pe gei au kingtiedung, nah penui gei jara au kieceunadung nzwa, ciu eh penui kegahme de kideu gade nah kengha teumaisia cume de minadung kakgade ngkap di kerane.15Tambet pe napui hangna bam: “Peulo nah peulo” de eh penai hap. Ma kecum ge madaude nnung canglu kelak ge bam, mdai cide madaude “Cang da” de rang lama:16Sheol; nagah pui: hangdeu madau gede dui le nnung lu kemak; nah mi madau gede “Cangda!” de rangkemak de.17Pe pei de henui tei kelabe miak de nah pe pui samzai teila kemak, chabak ga hegakdung ne pe miak nsau mpet dizie, nah pecu heraruidung ne tyei luzie.18Ma kecum a ziemne a swagah süt kecuge bam, mdai ge Ih ci gai kelak:19tinggim ga helie zai nzwa; nah tangtsu reuga henei zai nzwa; jaaidi mlungbe ga lim zai nzwa; nah mipei ge mipui kehena ge de ngngwa kebam zai nzwa.20Aide kemmha pui ge zai: pa tyeila nah pe mui neu dila nah rangla, “Ih magede teimau ma.”21Ma kecum kangga kideube mbeu bam, nah mdai be kangga cide au lia gai lak:22kila ge hegwang tei kedidau; kemie kau ge pa taktyei be pui kelu dau;23kengkau pui ge pa kemeu dau; nah kilapui ge pe mpaube pui bam keu kelu dau.24Kideu ga ma mdai ge ceu dede penui au mriak süt:25tangtiane au ngking kemak kaune ge, dede penui tinglum dau penui pok telei lula;26tsura kaunedung au kengking kaunedung ma, dede penui tsura gage penui ki tei lula.27Tangriemdung penui hegwang gah, dede penui hemaa tei eh mlai lala.28Kikwabe ziemne au, nang n ba kena gage herak lubui, dede penuide hegwangme kidung gade de ngau lula.29Ma kecum ncüt delwe tetpet kecu ngau kehega sütla nah mdai au sünne eh tet la:30hingho ge, makaunedung kak de ngkingtube, mage dade de caili dila ma;31mitwa luu neu eh tetkela ruirie ge; hemeu ge; nah hegwang ge pecai ga pe reugwamedung kebam.32Nang mie eh, n katei ncu hetwa pwa peu lacai mede nang kesiabe riem la cai, mtak dilu nah cet mtinglu.33Tungdui pwa kenuak gaige pecaa ngaulu kela nzwa nah mi ngkie keriak gaige cide hezai di kela nzwa, cine rata gade matei kedi au ngngwa kesia bui beula.
Bridge Connectivity Solutions Pvt. Ltd.