Proverbs29
1Mige mina rata ngau kiee zu eh bam liede pelung tak eh bam cai zette teingkap pwa teihemi gai kelak ge tei dizie.2Mina makesangme kiee si kegai dau, minadung sui yila, dede kenlienme ne kedibe di ge, mina ncam dila. 3Maci de hung kelame pe pei suiyi tei la, dede helipuidung de ngngwa kelabe pe mahei ngkap dila.4Hegwangpei kemzuibe teu eh hangdeu teucuh lula, dede hetauhenim kie kelabe tei msia dila.5Mige pe kidabe de cwa kela be au pe pi ziemne hetak kaam la.6Kesiame penui mau gage penuide keuh lula, dede makesangme lei tei nah penui sui yibam la.7Makesangme kegahme mzeudung ci la; kenlienme maci cidungde ci lamah.8Mi de henui tei kelamedung namdi be ga mi twa gai la, dede kemriakme au lunghop gade caili lula.9Kenriakme ge kemangme gede ngngwa kesamlim kecu dau, pa pe rata la nah nui la, nah cika mtak gai kera bam lak.10Hejai teilwa neu kelame mmau gai kelakme de ngkau la nah kemzuime teilung peei la.11Kemangme pe rata pelane lia la, dede kenriakme kam di nah pekatei pecu kezeu dila.12Kedime ge kenret samdung gage pelung kai dicai, pe kangga kedime pelane kenretme tei dizie.13Makegahme nah tei keherei kelabe de au nzwa lie, RAMPAUBE penai hangna na de pe nai miak kebaa peu bam kelane.14Magade hegwangpei kegahbe de kesangbe teu eh hetutiak liecai, pe hegwangbam kelungta ziemne tei luzie.15Tsingrang nah ledeu kegai au maci peula, dede hename de peu pesuira tei cai pe pui de tei hengam beula.16Kesiame kengkieng teu luge, kemau ketei kiee dila, dede kemzuime au kesiame kekau de ngau zie. 17N napei de ledeu lu ciciu de pa ncu kerelui peu zie; pa n teilung gage suiyi peu zie.18Caihakeci miakngau kegah ga au minadung penui zaira tei eh pak la, dede hezaibe mzai kelume au samlam pung lei.19Kilame ge de samdung le ledeu gai lak, pa cilu liede, samli be bam lak.20Mige pe samdung nzet kela gede ngau ni? Pe ziemne swa au kemangme ziemne be keregui kie.21Mige pe kilabe de pe henane gade mzai kelame, kekam le gwang de keherei kecu dau zie.22Rata kau ge kesamlim kera teu kerui la nah lunghop mpaube kemaudung kekiee ge tei bamla.23Ngang kelame de tei hena dila, dede kehena rabe pe da kelame de au kerüt peu zie. 24Keregame de mzang kelabe au pekatei pe teilung de ngkau la; pa reset de siu dede magede rang lama.25Mina de kehing au hebai ge tei dila, dede RAMPAUBE de nlum kelame de gum luzie.26Mina kekiee ge kedime zu peei la, dede RAMPAUBE dade mina kemzui ngau lula.27Mzeukemakbe de au makesangme ngkau la, nah kenlienbe makesangme de ngkau la.
Bridge Connectivity Solutions Pvt. Ltd.