Deuteronomy29
1ई सभे ऊहे वचन हे जौन यहोवा मूसा के मोआब के देश में इस्राएली लोग से कहेला आज्ञा देलन हल, जौन ऊ वाचा में जोड़ल गेल हे, जे उनका से ओखनी से होरेब में बान्धलन हल। 2मूसा सभे इस्राएलियन के बोल के ओखनी से कहलन, जौन कुछ यहोवा मिस्र देश में फिरौन आउर ओकर सभे कर्मचारी आउर ओकर पूरा देश में तोरा सामने कईलन ऊ सभे तूँ देख लऽ हे।3बड़का-बड़का दुःख, आउर चिन्ह, आउर बड़का-बड़का चमत्कार के काम, जौन तूँ अपन आँख से देख लऽ हल।4बाकि यहोवा आज तक तोरा जाने लागी मन, आउर देखे लागी आँख, आउर सुने लागी कान नऽ देलन हे। 5ऊ ओखनी से एहु कहलन, हम तोरा जंगल में चालीस साल तक ले अईली; तोर कपड़ा पुराना नऽ होल, आउर तोर गोड़ के जूती भी पुराना नऽ होल।6तूँ नऽ तऽ रोटी खईलऽ आउर नऽ दाखमधु चाहे दोसर मदिरा पिलऽ, जेकरा से तूँ जान लऽ कि हम तोर परमेश्वर यहोवा ही।7जब तूँ ई जगह पर अईवऽ, तब हेशबोन के राजा सीहोन आउर बाशान के राजा ओग हमर सामने लड़े ला निकसलन, आउर हम ओकरा मार देली हे।8आउर हम उनकर देश ले लेली, आउर ओकरा रुबेनी, गादी, आउर मनश्शे के लोग के आधा गोत्र के निज भाग कर के दे देली।9येहिसे ई वाचा के बात मानिहऽ, आउर ओकर पालन करिहऽ, कि जे कुछ तूँ करवऽ ओकरा में तूँ सफल हो जईबऽ।10आज तोहनी सभे अपन परमेश्वर यहोवा के सामने खड़ा होवऽ; तोर प्रधान, तोर गोत्र, तोर पुरनिया, आउर तोर हाकिम, इस्राएल के सभे आदमी,11आउर तोर बाल-बच्चा, आउर तोर मेहरारू, आउर तोर बीच में जौन परदेशी डेरा में हे, ओखनी से लेके लकड़ी काटे वाला से लेके पानी भरे वाला तक।12तूँ हियाँ येहिसे अईलऽ हे, कि अपन परमेश्वर यहोवा तोरा साथे जौन वाचा बाँधऽ हथिन, आउर जौन शपथ तोर परमेश्वर यहोवा आज तोरा खिलावऽ हथिन, ओकरा में सामिल हो जा।13जेकरा से ऊ तोरा साथे जौन शपथ खईलन, ओकर मोताबिक ऊ अब्राहम, इसहाक, आउर याकूब, तोर पुरखा लोग से किरिया खा के कहलन, कि आज तोरा अपन निज प्रजा बना लेतन, आउर ऊ खुद तोर परमेश्वर ठहरतन।14काहेकि हम ई वाचा आउर शपथ खाली तोरा साथे नऽ बाँधली हे,15ओखनी सभे से जौन आज हमर परमेश्वर यहोवा के सामने हमरा साथे खड़ी हथिन, यहाँ तक कि ओखनी पर भी जौन आज हियाँ हमरा साथे नऽ हे।16तूँ जानऽ हऽ, कि हम मिस्र देश में कईसे रहऽ हली, आउर जौन जाति में से होके तूँ गेलऽ हे ओखनी के बीच से हम कईसे अईली हे।17तूँ ओखनी के लकड़ी, पत्थर, चाँदी आउर सोना के घिनामन मूर्तियन के देख लऽ, जौन ओखनी के बीच में हल।18आउर ई देख लऽ, कि तोरा में से कोई आदमी, चाहे औरत, चाहे कुल, चाहे गोत्र अईसन नऽ हे जेकर मन आज हमर परमेश्वर यहोवा से मुड़ के ऊ जाति के देउतवन के दण्डवत आउर सेवा करे लगत। ई तय करऽ कि तोर बीच में कोई अईसन जड़ी नऽ होवे जौन बिष आउर कड़वा नागदौन पैदा करऽ हे। 19जब ऊ आदमी ई श्राप के बात सुनतन, तब अपन मन में धन्य होके कहतन, चाहे हम अपन मन के हठ पर चलम, तईयो हमरा शान्ति मिलत। एकरा से भींगल आउर सुखल भी नाश हो जईतन।20यहोवा ओकरा मांफ नऽ करतन, बाकि यहोवा के गोस्सा आउर जलन ऊ आदमी पर भड़क उठत, आउर जेतना श्राप ई किताब में लिखल हे ऊ सभे ओकरा आ पड़त, आउर यहोवा ओकर नाम धरती पर से मिटा देतन। 21यहोवा ओकरा व्यवस्था के ई किताब में लिखल वाचा के सभे श्राप के मोताबिक इस्राएल के सभे गोत्र में से विपत्ति लागी अलगे करतन। 22आवे वाला पीढ़ी के लोग, मतलब कि तोर बाद जौन लड़कन होतन, आउर जौन परदेशी दूर देश से अईतन, ऊ ई देश में विपत्ति आउर यहोवा एकरा जौन रोग से बीमार कईलन हे, ओकरा देखके बोलतन।23आउर जब ओखनी देखलन, कि समूचे देश गंधक आउर जल के निमक हो गेल हे, जहाँ नऽ कुछ रोपल जा हे आउर नऽ फल लगऽ हे, जहाँ कोई घास नऽ उग हे, जईसे सदोम आउर अमोरा, अदमा आउर सबोयीम नगर के नाश कईल गेल, जेकरा यहोवा अपन गोस्सा आउर जलजलाहट से नाश कर देलन हल; 24ऊ सभे समाज के लोग मिल के कहतन, 'यहोवा ई देश से अईसन काहे कईलन हे? ई महान गोस्सा के आग के का मतलब हे?,25तब लोग कहतन, ई येहिसे होल, कि ओखनी अपन पितर के परमेश्वर यहोवा के ऊ वाचा के त्याग देलन, जौन ऊ ओखनी मिस्र देस से निकसते घड़ी उनका से बांधलन हल।26आउर ओखनी जा के पराया देऊता के उपासना कईलन, आउर ओकरा दण्डवत कईलन, जेकरा ऊ नऽ जानऽ हलन, आउर नऽ यहोवा उनका देलन हल।27ई चलते यहोवा के कोप ई देश पर भड़कल हे, आउर ई किताब में लिखल सभे श्राप एकरा पर भड़कईलन हे।28आउर यहोवा कोप, आउर बड़ी जलजलाहट में आके ओखनी के उनकर देश में से उखाड़ देलन, आउर आज के जईसन दूसरा देश में फेंक देलन हे। 29छिपल बतियन तऽ हमर परमेश्वर यहोवा के काबू में हे; बाकि जौन बतिया प्रगट होल हे ऊ सभे हमेशा हमर आउर हमर वंश के रहत, येहिसे कि हम ई व्यवस्था के सभे बतिया पर चल सकम।
Bridge Connectivity Solutions Pvt. Ltd.