Deuteronomy30
1मूसा इस्राएली से कहलन, जब ई सभे बतिया मतलब कि जौन आशीष आउर श्राप हम तोरा सामने रख देली हे, ऊ सभे तोरा पर आ पड़त, आउर तूँ सभे जाति के बीच में जेज्जा-जेज्जा से तोर परमेश्वर यहोवा तोरा निकास ले अईलन हे ऊ बतियन याद करिहऽ।2आउर जब तूँ अपन परमेश्वर यहोवा भीर लौटवऽ, आउर उनकर बतिया मानवऽ, आउर जे-जे आज्ञा हम आज तोरा सुनावऽ ही ऊ सभे के तूँ अपन बाल-बच्चा के साथ अपन पूरा मन आउर पूरा जी-जान से मानिहऽ,3तब तोर परमेश्वर यहोवा तोरा बंधुआई से लौटा लईतन, आउर तोरा पर दया करतन; ऊ लौट अईतन आउर तोर ऊ सभे लोग के जमा करतन जहाँ तोर परमेश्वर यहोवा तोरा तितर-बितर कर देलन हल।4जदि तोर बंधुआई में से कोई आसमान के नीचे दूर-दूर जगह में हे, तऽ तोर परमेश्वर यहोवा तोरा उहाँ से जमा करतन, आउर उहाँ से तोरा ले अईतन। 5तोर परमेश्वर यहोवा तोरा ऊ देश में से पहुँचईतन जेकरा तोर पुरखा अपन अधिकार में कर देलन हे, आउर तूँ ओकरा पर अधिकार रखवऽ; ऊ तोर भलाई करतन, आउर तोरा तोर पुरखा से जादे बढ़ईतन।6तोर परमेश्वर यहोवा तोरा आउर तोर वंश के मन के खतना करतन, आउर तूँ अपन परमेश्वर यहोवा से अपन पूरा मन आउर पूरा जी-जान से प्रेम रखिहऽ, जेकरा से तूँ जिन्दा रहवऽ। 7तोर परमेश्वर यहोवा ई सभे श्राप तोर दुश्मन के, आउर जौन तोरा से दुश्मनी रखऽ हे, मतलब कि तोर सतावे वाला पर डालतन।8तूँ लौटके यहोवा के बात मानिहऽ, आउर उनकर सभे आज्ञा जौन हम आज तोरा सुनावऽ ही ओकरा मानिहऽ।9तोर परमेश्वर यहोवा तोरा तोर सभे काम में, आउर तोर बाल-बच्चा के, आउर जनावर के बच्चा में, आउर जमीन के उपज के भरपूरी से बढ़ईतन, आउर तोर भलाई करतन, काहेकि यहोवा फिन तोर भलाई पर ओईसहीं खुश होतन, जईसे ऊ तोर पुरखावन पर खुश हलन।10जदि तूँ अपन परमेश्वर यहोवा के बात मानवऽ, आउर व्यवस्था के ई किताब में लिखल उनकर आज्ञा आउर नियम के पालन करवऽ, आउर अपन परमेश्वर यहोवा दने अपन पूरा मन आउर पूरा जी-जान से लौटतन, तऽ ऊ अईसन करतन।11काहेकि ई आज्ञा जे हम सुनावऽ ही ऊ तोरा ला कड़ा नऽ हे, आउर तोरा लागी बड़ी दूर नऽ हे। 12ऊ स्वर्ग में नऽ, येहिसे तूँ कहवऽ, कौन हमरा ला स्वर्ग पर चढ़तन, आउर ओकरा हमरा भीर लईतन, आउर हमरा सुनईतन, कि हम अईसन करम?13आउर ऊ ऊ समुद्र के पार नऽ हे, कि तोरा कहे पड़त कि, कौन हमरा ला समुद्र के पार जा के उनका हमरा भीर लईतन, आउर हमरा सुनईतन, कि हम ओकरा मानम?14बाकि वचन तोर मुँह आउर हृदय में बड़ी भीतर रहऽ हे, येहिसे कि तूँ ओकरा पर चलिहऽ। 15देखऽ, आज हम तोर सामने जीवन आउर भलाई, आउर मौत, आउर बुराई रख देली हे।16जदि तूँ अपन परमेश्वर यहोवा के ऊ सभे विधि के पालन करवऽ, जेकर बारे में हम आज तोरा आज्ञा दे ही, कि अपन परमेश्वर यहोवा से प्रेम रखऽ, आउर उनकर राह पर चलऽ, आउर उनकर आज्ञा, नियम, आउर विधि मानते रहवऽ. तऽ तूँ जिन्दा रहवऽ, आउर बढ़वऽ, आउर जौन देश के अधिकारी होवे लागी तूँ जा रहलऽ हे ओकरा में तोर परमेश्वर यहोवा तोरा आशीर्वाद देतन।17बाकि जदि तोर मन मुड़ जाइ, आउर नऽ सुनवऽ, हियाँ तक कि पराया देऊता सब के आगे झुक के ओकरा दण्डवत आउर सेवा करे लगवऽ,18तऽ हम आज तोरा से कहऽ ही, कि तूँ जरुर नाश हो जईवऽ; जेकरा से देश में जाय आउर ओकर अधिकारी होवे के तूँ यरदन नदी के पार जाय वाला हऽ ओकरा में तूँ जादे दिन तक रह नऽ पईवऽ।19हम आज आसमान आउर धरती के तोर सामने गोवाह होवेला बोलईली हे, कि हम जीवन आउर मौत, आशीष आउर श्राप के तोर सामने रखली हे; येहिसे जीवन के चुन लऽ, कि तूँ आउर तोर वंश जिन्दा रहतन।20अईसन करऽ, कि तूँ अपन परमेश्वर यहोवा से प्रेम रखऽ, आउर उनकर बात मानऽ, आउर उनका से लिपटल रहऽ। काहेकि ओही तोर जीवन आउर तोर लम्बा उमर हे; अईसन करऽ कि जेकरा से तूँ कनान देश में रह सकवऽ जेकरा देवे के किरिया तोर यहोवा तोर पुरखन अब्राहम, इसहाक, आउर याकूब से खईलन हल।
Bridge Connectivity Solutions Pvt. Ltd.