Deuteronomy19
1मूसा इस्राएली से कहलन, जब तोर परमेश्वर यहोवा ऊ सभे जाति के, जेकर देश तोर परमेश्वर यहोवा तोरा दे हथिन ओकरा नाश करतन, आउर तूँ उनकर देश के अधिकारी होके उनकर नगर आउर घर में बसे लगवऽ,2आउर जौन देश तोर परमेश्वर यहोवा तोर अधिकार में दे हथिन ओकर बीच में अपना ला तीन नगर चुन लिहऽ।3आउर जौन जमीन के तोर परमेश्वर यहोवा तोरा सौंपऽ हथिन, ओकरा में सड़क बनईहऽ, आउर अपन देश के सीमा के तीन हिस्सा में बाँट दिहऽ, ताकि जे कोई केकरो खून करत ऊ उहाँ भाग जाइ।4जौन दूसरा के घात कर के अपन जान बचावे ला उहाँ से भाग जा हे, ओकर बारे में एही सिच्छा हे, मतलब जौन दुर्घटना के समय अपन पड़ोसी से दुश्मनी नऽ कर के ओकरा अनजाने में मार डालऽ हथिन।5उदाहरण लागी, जदि कोई आदमी अपन पड़ोसी के साथे लकड़ी काटेला जंगल में जाय, आउर कोई पेड़ के काटे लागी कुल्हाड़ी उठावे, आउर कुल्हाड़ी के नोक हाथ से छूटके ओकर पड़ोसी के लग जाय आउर ओकरा मार देवे, तऽ ऊ आदमी ओकरा ई शहर में से कोई एगो में भाग जाय के चाही आउर अपन जान बचा लेवे के चाही।6अईसन नऽ होवे कि खून के बदला लेवे वाला कोई जान लेवे वाला के जान लेवे ला पीछा करे, आउर गोस्सा के आग में आके ओकरा पकड़ लेवे, आउर जदि दूरी बड़ी जादे रहे, तऽ ओकरा पर हमला कर के ओकरा मार देवे, चाहे ऊ आदमी मरे के लायक नऽ हल, काहेकि ऊ पहिले से अपन पड़ोसी से नफरत नऽ कईलन हल।7येहिसे हम तोरा आज्ञा दे ही, कि अपना रहे ला लागी तीनगो नगर चुन लऽ।8आउर जदि तोर परमेश्वर यहोवा ऊ शपथ के मोताबिक जौन ऊ तोर पुरखावन से खईलन हल, तोर सीमा के बढ़ावे, आउर ऊ समूचे देश जेकरा ऊ तोर पुरखावन के देवे के प्रतिज्ञा कईलन हल, ऊ तोरा दे देतन;9जदि तूँ ई सभे आज्ञा के मान के ओकर पालन करवऽ, जौन हम आज तोरा सुनावऽ ही, मतलब अपन परमेश्वर यहोवा से प्रेम रखिहऽ, आउर हमेशा उनकर राह पर चलते रहिहऽ, तऽ ई तीनो नगर के अलावे आउर तीनगो नगर बनईहऽ।10अईसन करिहऽ, कि जौन देश तोर परमेश्वर यहोवा तोरा अपन हिस्सा कर के देलन हे, ओकरा में कोई बेकसूर के खून नऽ बहावल जाय, आउर तोर सिर पर खून के दोष नऽ लगे।11बाकि जदि कोई अपन पड़ोसी से दुश्मनी रखतन, आउर ओकरा मारे के दाऊ में लगतन, ओकरा पर चढ़ाई करतन, आउर ओकरा अईसन मार देतन कि ऊ मर जाय, आउर फिन ई सभे नगर में से कोई में भाग जाइ,12जदी अईसन होबऽ तऽ ओकर नगर के पुरनियन कोई के भेज के उनका उहाँ से वापस ले अईतन, आउर खून के बदला लेवे वाला के हाँथ में सौंप देतन, कि ऊ मार देवल जाइ।13तूँ ओकरा पर दया न करिहऽ; एकर बदले तोरा इस्राएल से खून के अपराध मिटा देवे के चाही, ताकि ई तोरा साथे बढियां हो सकत। 14आउर जौन जमीन तोर परमेश्वर यहोवा तोरा दे हथिन, ऊ जमीन के जे तोर पड़ोसी तोर निज हिस्सा में, आउर जौन तोर परमेश्वर यहोवा तोरा दे हथिन ओकरा में बड़ी समय से बनावल गेल चिन्ह के नऽ हटईहऽ। 15कोई आदमी के खिलाफ कोई अधर्म चाहे पाप के बारे में, चाहे ऊ कोई भी कईसनो पाप रहे; कोई भी मामला के साबित दुगो गवाह के मुँह से, चाहे तीन गो गवाह के मुँह से कईल जाय के चाही। 16मान लऽ, कोई अधर्मी गवाह कोई आदमी के खिलाफ अधर्म के गवाही देवे लागी खड़ा होवे।17तब ऊ दुन्नो आदमी जेकरा बीच में झगड़ा होवऽ हे, यहोवा के सामने मतलब कि ऊ समय के याजक आउर न्यायी के सामने खड़ा करल जाय।18न्यायी के मेहनत कर के बढ़ियाँ से पूछताछ करे के चाही; देख, जदि ऊ साक्षी झूठा होवे, आउर ऊ अपन भाई के खिलाफ झूठा गवाही देलन हे,19तऽ जईसन ऊ अपन भाई से करे ला चाहलन ओईसहीं तूँ भी ओकरा साथे करिहऽ; आउर तूँ अपन बीच में से बुराई के दूर करवऽ।20तब जौन बचल रहतन ऊ सुन के डरतन, आउर ओकर बाद तोर बीच में अईसन बुराई नऽ करतन।21तोर आँख एकदम दया नऽ देखावे; जान के बदले जान, आँख के बदले आँख, दाँत के बदले दाँत, हाथ के बदले हाथ, गोड़ के बदले गोड़ के सजा दिहऽ।
Bridge Connectivity Solutions Pvt. Ltd.