2 پطرس3
1ایماندار سٲتھیو یِمن بہٕ لول بران چُھس، یہِ نامہٕ یُس بہٕ توٚہہِ وۅنؠ لیٚکھان چُھس چُھ میون دوٚیِم نامہٕ یُس مےٚ توٚہہِ لیٚوکھ۔ مےٚ لیٚکھؠ یِم دوٚنوے نامہٕ توٚہہِ ژٮ۪تس پاونہٕ باپتھ تِم چیز یِم تُہنٛد خلوص وول دماغ برونٛٹھےٕ زانان چُھ۔2مےٚ لیٚکھؠ یِم نامہٕ توٚہہِ ژٮ۪تس پاونہٕ باپتھ تِم زنوانہٕ یِم پاک نبیو برونٛٹھے کرِمژٕ چھےٚ۔ بہٕ چُھس سٟتی یِتہِ یژھان توٚہہِ ژٮ۪تس پاوُن یہِ اسہِ پٮ۪ٹھ راج تاج کرن وٲلؠ تہٕ اسہِ نجات بخشن وٲلؠ توٚہہِ حکم کوٚرُو پننیٚو رسولو ہنٛزِ تعلیمہ سٟتؠ یِم اسہِ توٚہہِ کُن سوزؠ۔3یہِ زانُن چُھ تُہنٛدِ باپتھ اہم زِ ٹھٹھٕ مذاق کرن وٲلؠ کرن ٹھٹھٕ مذاق یسوع سنٛدِس دُبارٕ یِنس تتھ وقتس دوران یُس یسوعؔ سنٛدِس یِنس نکھہٕ آسہ۔ تِم لوٗکھ روزن کران یہِ کینژھا تِم یژھن۔4یِم مسخر ونن، "یسوعؔ سنٛدِ ینُک وعدٕ چُھ ٹَر۔ أسؠ چھِ یہِ زانان تکیازِ ینہٕ اسرائیل ین ہنٛدؠ جد مودؠ، تنہٕ بدلیو نہٕ کہین۔ ینہٕ خداین یہِ دنیا بنوو تنہٕ چُھ تی چلان!"5تِم ونن یہِ تکیازِ تِم چھِ زٲنِتھ مٲنِتھ یہِ کتھ مشراوان زِ خداین أنؠ وجودس آسمان سٮ۪ٹھا کالہٕ برونٛہہ پننہِ حکمہٕ سٟتؠ، تہٕ تٔمؠ أنؠ زمین آبہٕ منٛزٕ وجودس تہٕ کھٲجِن ہیٚور اتھ یہِ بننُک حکم کٔرِتھ۔6تہٕ خداین کوٚر پننہِ حکمہٕ تہٕ آبہٕ سٟتؠ تمہِ وقتہٕ موجود دنیا بُرباد۔ تٔمؠ کوٚر یہ زمینہِ آبہٕ یُپ أنِتھ۔7وۅنؠ گو خداین کٔر پننہِ امی حکمہٕ دۅشوے زمین تہٕ آسمان بیوٚن بیوٚن یِم وۅنؠ نارٕ باپتھ موجود چھِ۔ خدا چُھ یِمن کُنہِ وقتہٕ باپتھ تھٲوِتھ ییٚلہِ سُہ عدالت لاگہِ تہٕ کمین گی کرن والیٚن برباد کرِ۔8ایماندار سٲتھیو یِمن بہٕ لول بران چُھس، یہِ اکھ پزر مہٕ مشرٲیو: خدایہِ سنٛدِس حوالس منٛز چھنہٕ ژھوٚٹ کال زیٹھِ کالہٕ نِشہ بدون کینٛہہ۔9خداوند چُھنہٕ لۅتہِ لۅتہِ یسوعؔ سنٛدِ واپس یِنُک وعدٕ پوٗرٕ کران۔ کینژن لوٗکن ہُنٛد چُھ یی خیال۔ امہِ بجایہ چُھ خدا توٚہہِ سٟتؠ صٲبر، تکیازِ سُہ چُھنہٕ یژھان زِ توٚہہِ منٛز کٲنٛسہِ تہِ میلہِ ہمیشہٕ ہمیشہٕ باپتھ سزا۔ بلکہِ چُھ یژھان سارنےٕ ہُنٛد توبہٕ کرُن۔10یِمن ٹھٹھٕ کرن والیٚن ہنٛدِس وننس بجایہ واتہِ خداوند سنٛدِ یِنُک وق اچانک۔ تٔمہِ وقتہٕ وۅتھہِ تھدِ شور آسمانن راوِ آسنُے۔ خدا زالہِ نار پرٮ۪تھ فطری چیزٕکؠ ژکہِ عنصر۔ پتہٕ کر خدا زمین ظٲہر تہٕ تہِ سورےٕ یہِ اتھ منٛز بناونہٕ آمُت آسہ۔11اوٕ کِنؠ زِ خدا کرِ فناہ یِم سٲری چیز یہُنٛد مےٚ وُنؠ وُنؠ ذِکر کوٚر یمہِ آیہِ مےٚ ذکر کوٚر، توٚہہِ پزِ بڈٕ راستبٲزی سان ویوہار کرُن تہٕ تہِ کرُن یہِ خدایس پسنٛد چُھ۔12یِم چیز کٔرِو توقع سان تہٕ یسوعؔ سنٛدِ یِنہٕ باپتھ وُژھ کٔرِتھ۔ تمہِ دوٚہہ کِنؠ کرِ خدا آسمانن فناہ نارٕ سٟتؠ تہٕ ملاوِ فطرت کٮ۪ن بنیٲدی عنصرن تاوٕ تژرٕ سٟتؠ13یوٚدوے زن تہِ سورےٕ سپدِ، أسؠ چھِ نوٮ۪ن آسمانن تہٕ نوِ زمینہِ ہُنٛد توقع کران یِم خداین بارسس اننُک وعدٕ کوٚرمُت چُھ۔ تتھ نٔوِس کایناتس منٛز آسہ پرٮ۪تھ کانٛہہ راستباز۔14اوٕ کِنؠ زِ یہِ چُھ پوٚز! ایماندار سٲتھیو یِمن بہٕ لول بران چُھس، ییٚلہِ زن توٚہؠ یہِ سپدنس پراران چُھو، تنہٕ منہٕ لگیٚو پان شیرنس یہِ یقینی بناونہٕ باپتھ زِ یُتھنہٕ یسوعؔ توٚہہِ وُچھِ گناہ گار زندگی زُوان۔ توٚہؠ روزیٚو خدایس سٟتؠ امنہٕ سان جورِتھ۔15تہٕ یتھ پٮ۪ٹھ سونٛچِو: سون خداوند یسوعؔ چُھ صٲبر تاکہِ ژٔرؠ ژٔرؠ لوٗکھ پراون نجات۔ پولُسؔ، اکھ ایماندار سٲتھی یمِس أسؠ لول چھِ بران، تہِ چُھ یی لیٚکھِتھ تہٕ ؤنِتھ گوٚمُت توٚہہِ۔ تٔمؠ لیٚوکھ خدایہِ سنٛدِ بخشمژِ دانٲیی سان۔16پننٮ۪ن تمام نامن منٛز یِم پولُسنؔ لیٚکھؠ، تٔمؠ لیٚچھِ یِمہٕ کتھہٕ تہِ یِم مےٚ وُنؠ وُنؠ ونیٚو۔ یِمن تمسنٛدٮ۪ن نامن منٛز چھےٚ کینٛہہ کتھہٕ بڈٕ مُشکل سمجھنہِ۔ یِمن لوٗکن علمچ تہٕ قرارچ ویٚژھے چھےٚ تِم چھِ اتھ مشکل تعلیمہ تہٕ باقے صحیفن غلط تٲویل کران۔ خدا دِیہ تِمن امہِ باپتھ سزا۔17اوٕ کِنؠ زِ یِم سٲری چیز چھِ پٔزؠ۔ ایماندار سٲتھیو یِمن بہٕ لول بران چُھس تہٕ بیٚیہِ توٚہؠ یِم برونٛٹھےٕ یِمن چیزن متعلق زانان چھِ، پنُن پان رٔٹِو الگ۔ تہٕ تِمن غلط تعلیمن پٮ۪ٹھ مہٕ روزیٚو یِم توٚہہِ گنہن کُن نِن زنتہٕ کانٛہہ قانون چُھنہٕ تہٕ توٚہؠ روزیٚو تابعدار زندگی زُو نہٕ نِش مُچھہِ۔18بلکہِ روز زُوان تِتھٕ پٲٹھؠ زِ توٚہؠ ژٮ۪ترٲیو زیادٕ کھۅتہٕ زیادٕ مہربٲنی پننس حٲکم یسوعؔ مسیحؔ سنٛز تہٕ یمؠ توٚہہِ نجات بخُش۔ تہٕ تِتھٕ پٲٹھؠ گُذٲرِو زندگی زِ توٚہؠ زٲنِو ژوٚر ژوٚر تمِس متعلق۔
بہٕ چُھس دُعا کران زِ پرٮ۪تھ کانٛہہ پرٮ۪زلاوِ یسوعسؔ وُنکٮ۪س تہٕ پرٮ۪تھ وقتہٕ۔ آمین یہِ سپدِن!
بہٕ چُھس دُعا کران زِ پرٮ۪تھ کانٛہہ پرٮ۪زلاوِ یسوعسؔ وُنکٮ۪س تہٕ پرٮ۪تھ وقتہٕ۔ آمین یہِ سپدِن!
Bridge Connectivity Solutions Pvt. Ltd.