1 یوحناؔ1
1بہٕ، یوحنا چُھس لیٚکھان توٚہہِ یسوعسؔ متعلق خدایہِ سُنٛد کلام۔ سُہ اکھ یُس زندگی چُھ بخشان۔ سُے اوس موجود امہِ برونٛہہ زِ بیٚیہِ کینٛہہ آسہ ہے۔ اسہِ رسولو بوز تمسُنٛد ییٚلہِ سُہ لوٗکن تعلیم دِوان اوس۔ اسہِ وُچھ سُہ دیدمان۔ اسہِ وُچھ سُہ تہٕ اتھہٕ تہِ لوگُس۔ اوے تہِ ہیٚکو أسؠ گوٲہی دِتھ زِ سُہ اوس پٔزی انسٲنی وجود۔2اوٕ کِنؠ زِ سُہ ووٚتھ یتھ زگتِس پٮ۪ٹھ تہٕ اسہِ وُچھ دیدمان أسؠ چھِ توٚہہِ واضیح پٲٹھؠ تس سنٛز خبر دِوان۔ یُس ہمیشہٕ موجود اوس۔ یُس پننِس ببس نِش آسمانن منٛز اوس، تہٕ آو اسہِ نِش یور۔3أسؠ چھِ یژھان توٚہؠ تہِ بٔنیو سانہِ زندگی منٛز شریک۔ اوے چھِ أسؠ توٚہہِ خبر دِوان یہِ اسہِ یسوعؔ وُچھ کران تہٕ یہِ اسہِ یسوعؔ ونان بوز۔ یوٚدوے توٚہؠ تس پٮ۪ٹھ یقین دٔررٲیو، توٚہؠ تہِ گُزٲرِو سٲنؠ پٲٹھؠ پنٕنؠ زندگی سٲنس ببس خدایس سٟتؠ تہٕ تسٕنٛدِس گۅبرس یسوعسؔ مسیحؔ ہس سٟتؠ۔4بہٕ چُھس توٚہہِ لیٚکھان یِمن چیزن متٮعلق اوٕ کِنؠ زِ توٚہؠ زٲنِو یِم چیز پٔزؠ، تہٕ توٕ کِنؠ روزو أسؠ سٲری یِکوٹہٕ خوش۔5یۅسہ شیٚچھ اسہِ یسوعس نِشہ بوز تہٕ توٚہہِ چُھو تٔمِچ یہِ خبر دِوان: خدا چُھ ہمیشہٕ تی کران یہِ صحیح چُھ، تہٕ سُہ چُھنہٕ زانہٛہ تہِ کُنہِ وِزِ تہِ غلط کران۔ سُہ چُھ زنتہٕ پوٚز گاش یتھ منٛز انہِ گٹہِ ہنٛز شینکھ تہِ چھنہٕ۔6یوٚدوے أسؠ یہِ ونو زِ أسؠ چھِ خدایس سٟتؠ زندگی بٲگران، مگر چھِ بدی ہنٛز زندگی گُزاران، تیٚلہِ چھِ أسؠ اپُز ونان۔ أسؠ چھِنہٕ زُوان پزرٕ سان۔ زٲنؠ تو أسؠ چھِ تیٚلہِ انہِ گٹہِ زُوان۔7وۅنؠ گو یوٚدوے أسؠ شوژرٕ سان زندگی گزارو، یتھٕ پٲٹھؠ خدا پرٮ۪تھ کُنہِ طریقہٕ شوژ چُھ، تیٚلہِ ہیٚکو أسؠ پانہٕ وٲنؠ زندگی شراکتس منٛز گُزٲرِتھ۔ یہِ گییہِ زندگی خدایہِ سٕنٛدِس نوٗرس منٛز گزارٕنؠ۔ تیٚلہِ کرِ خدا سٲنؠ سٲری گناہ معاف تہٕ کرِ اسہِ قبول تکیازِ تسُنٛد گۅبُر یسوعؔ کھوٚت صلیبس سانہِ باپتھ۔ 8یوٚدوے أسؠ ونو زِ أسؠ چھِنہٕ گناہ کرٲنی، تیٚلہِ چھِ أسؠ پانس احمق بناوان۔ أسؠ چھِ پزرس یقین کرنس نکار کران، یُس خدا اسہِ متعلق ونان چُھ۔9مگر خدا چُھ ہمیشہٕ تی کران یہِ سُہ کرنُک ونہِ۔ تہٕ یہِ سُہ کرِ تہِ چُھ ہمیشہٕ صحیح۔ اوے ییٚلہِ أسؠ تس برونٛہہ کنہِ مانو زِ اسہِ کٔرؠ گناہ تہٕ گنہس کرو رد، سُہ کرِ اسہِ معاف سانیٚو گنہو باپتھ تہٕ سُہ دِیہ اسہِ نجاتھ تمہِ سارے 'احساسہ نِش' یُس اسہِ غلط کوٚر۔ 10اوٕ کِنؠ زِ خدا چُھ ونان زِ گناہ چھِ سٲری کران، یوٚدوے أسؠ یہِ ونو زِ اسہِ کٔرؠ نہٕ گناہ، أسؠ چھِ ونان زِ خدا چُھ اپُز ونان۔ أسؠ چھِ خدایہِ سٕنٛدِس اسہِ متعلق وننس انکار کران۔
Bridge Connectivity Solutions Pvt. Ltd.