Áfuriduni19
Hachülürün Ísüraelina Sinaín
1Luagu lǘrüwan hati lúmagiñe háfuridun Ísüraelina Ehiptugiñe, ligía hachülürün lidan fulasu mageirawati le gíribei Sinaí.2Lárigiñe háfuridun Refidímügiñe aba hachülürün Sinaí, aba hemeraagun ñeinmeme ligibugiñe wübü.3Aba lamudeirun Moisesi lun ladunragun luma Bungiu, ladüga wati Bungiu lun luéigiñe wübü, lariñaga lun:—Ariñagabéi dimureimeme burí le houn ladügawagun Hakobu, houn Ísüraelina:4“Ariha humaali le nadügübei houn Ehiptuna, luma ida liña lan nanügünün le ñeinhin nubéi, kamá hamuga aban ágila anügübalün.5Nani sun gürigia ha ubouagubaña. Anhaün lubeiti ñüdün lau le nubeibei lidan sun katei, gúnfuli huguyame luma nidaradun, huguyaba numutuniña ha hínsiñetimabaña nun hádangiñe sun gürigia.6Fádirigubadün nun, gürigia deregeguatiña houngua nun”. Ariñagabéi sun le houn Ísüraelina7Aba lidin Moisesi aba lagúarun houn wéiyaaña mutu Ísüraelina, aba lariñaguni sun le lariñagubei Bungiu lun, houn.8Ábati hóunabun Ísüraelina úara, hariñaga:
—Wadügübei sun le lariñagubei Bungiu.
Ábati lariñaguni Moisesi le hariñagubei Ísüraelina lun, lun Bungiu,9aba lariñagun Bungiu lun:
—Narufudaguba nungua bigibugiñe lidan aban dúeri, lun haganbuni gürigia nadimurehan buma, afiñe hamaamuga buagu súnwandan.
Aba lariñaguni Moisesi hóunabagüle gürigia lun Bungiu,10aba lariñagun Bungiu lun:
—Aransebaña gürigia uguñe luma haruga lun háhuduragun nun. Gasu haruma tan hadaüragun,11aranse hagíame lubá gumugu weyu haruga, ladüga naragachuba au le Habureme gumugu weyu haruga luagun wübü Sinaí ligibugiñe hagu sun gürigia.12Makübéi lébeha geyegua lau wübü luéi hásügürün gürigia, bariñagame giñe houn lun inebe lan wübü houn, lun mamudeirun hamá luagun, mayarafadun hagíame lun, ladüga sun le ayarafaduti, lasiadirúba lun lounwen.13Gama lumoun moun lumuti láfaruni ni aban lau lúhabu, lauba dübü lafarúa o tau lan gimara, gayaraati gürigia lan o animaalu lan, migirúnwabei lau ibagari. Dánrügüba le laganbún linwinrúniwa liganchun mudún ligíarügüba gayara lan hamudeirun gürigia luagun wübü.14Aba laragachun Moisesi luéigiñe wübü lun laranseruniña gürigia lun háhuduragun lun Bungiu. Aba hachibunu gürigia hadaüragun,15aba lariñagun Moisesi houn:
—Aranse humá lubá gumugu weyu haruga, mayusuralá lubeiti wügüri würi lubaragiñe dan ligía.16Dan le larugadunbei luagu lǘrüwan weyu, ñeinñein labirihaniga luma wayuhuru, aba liabin aban dúeri dagumeti adagara lábulugu wübü. Aba laganbúniwa aban tinwinrúniwa fidu le héreti, sunti ha tídanbaña kianpu-agei aba hadadagarun lau anufudei.17Ábati lanügüniña Moisesi gürigia bóugudin tuéi kianpu-agei lun hadunragun luma Bungiu, aba herederagun ǘnabu libiti wübü.18Aba lígiragüdün sun wübü Sinaí gumuleli ladüga laragachun Bungiu luagun labadinagua watu gemeti. Aba lamudeirun gumuleli kamá lídangiñe aban régigi, aban ladadagarun wübü lau anarimeni.19Aba éredeinatima lan tumalali fidu; anihán Moisesi adimureha, anihán Bungiu óunabahei lau lumalali wayuhuru.20Aba lamudeirun Bungiu luagun fulasu le íñutimabei luagu Sinaí, aba lariñagun lun Moisesi lun lamudeirun lidoun fulasu ligía. Aba lamudeirun Moisesi,21lariñaga Bungiu lun:
—Rariba bariñagame houn gürigia lun mánhiñuragun hamani baríeiru, mouchun hagíame harihinina, hilagua hañéin saragu hádangiñe.22Íbini fádirigu ha gayaraabei hayarafadun nun, gasu harumadun, luéi nagünrinchaguniña.23Aba lariñagun Moisesi lun Bungiu:
—Mamudeirunbaña gürigia luagun Sinaí ladüga ariñagatibu woun lun wíchugun baríeiru lau, ani lun wanügüni kei katei sánduti.24Lariñaga Bungiu lun:
—Rariba, lárigiñeme, ábame bamudeirun luma Aarón. Ánhañati fádirigu hama híbiri gürigia, moun lumuti hánhiñuraguni baríeiru lun hamudeirun le ñeinhin nubéi, luéi nadügün günringuaü hadan.25Aba laragachun Moisesi, aba lariñaguni katei le houn Ísüraelina.
Bible Society of Honduras