Áfuriduni18
Lidin Heturó ebeluha lumoun Moisesi
1Aba laganbuni Heturó, le fádiri Madián, límedamuru Moisesi sun le ladügübei Bungiu lun Moisesi luma houn Ísüraelina, luma giñe luagu lasagaruniña Ehiptugiñe.2Óunaha laaru buga Moisesi Séfora to lúmari, aba leresibirunu Heturó3hau sun bián tisaanigu. Aban hádangiñe Gerüsón líribei, ladüga meha lariñagun Moisesi: «Aganawaadina kei terencha lidan fulasu terenchati»,4le aban Elieserü líribei, ladüga meha lariñagun Moisesi: Ñǘbuinti Lubungiute núguchi íderaguana, aba lesefurunina tuéi lefeinte urúei.5Aba lidin Heturó tau sun lúmari Moisesi hau hasaanigu, anihein bugati Moisesi lidan fulasu mageirawati, lubadu láraabute Bungiu.6Aba lóunahan Heturó ariñaga lun Moisesi:—Niábiña arihabu, au tau búmari hama bián birahüñü.7Aba láfuridun Moisesi eresibirei límedamuru, aba labusurun lun lau aban chuti; lásurun habusuragun hámagua aba hebelurun tidoun kianpu.8Aba labahüdagun Moisesi lun límedamuru luagu sun le ladügübei Bungiu lun urúei luma houn Ehiptuna luagu hafulesein Ísüraelina, luma luagu sun lénrengunga le hásügürübei ǘmada, luma luagu ligaburi lasalbaruniña Bungiu.9Aba lagundaarun Heturó luagu lareini Bungiu le larufudubei houn Ísüraelina lau lasalbaruniña luéi habafu Ehiptuna,10aba lariñagun:
—Biniwalá Bungiu le asalbarubalün, huguya lumutuniña Ísüraeli, luéi lubafu urúei luma hawéi Ehiptuna; salba laadün lídangiñe hamudiragunün11luma lídangiñe luriban hóuserunün. Guentó afiñeedina luagu weiri lan Wabureme hawéi sun búngiugu.12Aba lanügün Heturó aban animaalu lun ladagaragüdün lun Bungiu luma amu burí idewesei. Lárigiñe aba lidin Aarón hama sun wéiyaaña mutu Ísüraelina eiga luma Moisesi labu luma límedamuru liñúarürugu Bungiu.
Líchugun Moisesi amu aguseragüdütiña
13Larugan, aba lañuurun Moisesi lun laransehani turobuli le gádanbaliña Ísüraelina, ha araramubaña ñein sun weyu ligibugiñe.14Dan larihinbalin límedamuru Moisesi katei le ladügübei, lariñaga lun:—Ka san le badügübei hau gürigia ha? Ka uagu buguyarügüñein lubéi aguseragüda, ani sun hagía eredera rara sun weyu?15Aba lóunabuni Moisesi:
—Ladüga hayabiña numoun lun hálügüdahan luma Bungiu.16Dan le anihein lan katei lun haranseruni hámagua, aba hayabin numoun lun nariñaguni ka lan hádangiñe richabei; ábati nasubudiragüdüni lilurudun Bungiu houn luma larufudahan.17Lariñaga Heturó lun:
—Mabuidunti le badügübei,18ladüga, ítara, buchati buagu, buchá hawagu gürigia ha búmabaña. Hǘrüyati dasi le bun, siñabei badügüni bábugua.19Aganbabéi eweridiruni le lunbei níchuguni bun buidu, íderagualabu Bungiu. Lunti bidin ligibugiñe Bungiu heweñegua gürigia ha lun badimurehan haweigiñe.20Arufudahabei gumadi luma arufudahani houn, subudigüdabeime houn ida luba lan habagaridun, luma ka lan lunbei hadügüni.21Anuadahabá wügüriña ha gayaraatiña, ha inebehabutiña lun Bungiu, wügüriña ha máluahantiña agañeiruni le marumanti, bíchigame hádangiñe lun harihin hau milu gürigia, híbiri hau san, híbiri hau dimí-san, híbiri hau diisi.22Hagíaba aransehei hani gürigia turobuli sun dan; hanügeime burí turobuli le wéinamuti bun, hetenirame lun le ñǘbüriti. Ítara luba bagidaruni ihürügu le buáriua, ábame híderagunibu anügei.23Anhein badüga ítara, ani anhein ítara liña lubéi lariñaguni Bungiu bun, bawanduba; ábame houdin gürigia hábiñoun lau ugundani.24Aba ladügün Moisesi gasu lau límedamuru aba ladügüni sun le lariñagubei lun:25Aba lanúadiruniña gürigia ha gabafutimabaña hadan Ísüraelina, aba líchugun ubafu houn híbiri hawagu milu gürigia, híbiri hawagu san, híbiri hawagu dimí-san, híbiri hawagu diisi.26Hagíati aransehabalin hani gürigia turobuli sun dan; turobuli burí le hénrenguti aba hanügüni lun Moisesi, ánheinti le huáliti, hagía guánarügü aransehabalin.27Lárigiñe, aba lafanreinragun Moisesi luma límedamuru, aba lagiribudun Heturó lageiroun.
Bible Society of Honduras