Áfuriduni20
Diisi Gumadi
1Aba ladimurehan Bungiu, aba lariñaguni sun burí dimurei le:2Au Aburemeibei le Bubungiute, le asagarubalibu Ehiptugiñe, le meha ñein lubéi idamuni ban.3Mabungiutebá amu nuéi.4Madügabá guáriua ni liyawa ni kata le yágütati sielu, ni le ubouaguti, ni le baranahati lábugiñe múa.5Mabuluchaguabá hagibugiñe, máhuduraguaba giñe houn, ladüga au Bubungiutebei, Bungiu emeiditi, ani ábürügüda numuti hariban agübürigu ha iyereehabúbaña nun hawagun hasaanigu, habañan hama hálawagu;6ánhaña ha hínsiñehabubaña nun, óusera numutiña lau ínsiñeni dagá hamoun milu adügawaguni.7Mayusurabéi liri Bubungiute wuriba, ladüga sun le ayusuruti liri Bungiu wuriba, labeichubei.8Haritaguabá luagu luéyuri emeraaguni lun bederegeruni lun Bungiu.9Nadagimeinbá sisi weyu, adügabéi sun le lunbei badügüni lidan sisi weyu ligía,10ánheinti lisedün weyu, luéyuri Bungiu, lunti lemeraawagun. Madügabá ni murusun wadagimanu lidan weyu ligía, ni biráü, ni bidamun, ni bibiñanigu ni terencha le aganóubei buma.11Ladüga lidan sisi weyu ladügei Bungiu sielu, múa, barana luma sun katei le lídanbei, aba lemeraagun luagu lisedün weyu. Ligía labinirunbaliña Wabureme gürigia ha emeraagubaña lidan luéyuri emeraaguni, aba líchuguni kei weyu sagüráuti.12Ruba inebesei lun búguchi luma tun búguchu, migife láamuga bibagari ligibuagu ubóu.13Máfarahaba.14Magamaridabá würi to maríeitu luma amu wügüri.15Míweruhaba.16Meyeehabá luagu gürigia bíledi.17Mawamadatá luban gürigia bíledi bun, mawamadatá lúmari bun, ni lidamun, ni lilügün bágasu, ni lilügün burigü, ni amu katei le lumegen.Hasandirun Ísüraelina anufudei luéi Bungiu
18Gefentiña sun Ísüraelina luagu wayuhuru le adürürühabei luma luagu labirihaniga, luagu tumalali fidu luma luagu gumuleli le abuinchubalin Sinaí, gama lumoun hanufudetiña, aba herederun dise.19Aba lubeiti hariñagun lun Moisesi:—Buguyalá adimureha wagunfulirame; gama lumoun madimurehalá Bungiu woun, hilaguawañein.20Aba lóunabun Moisesi:
—Manufudeda humá. Liábiña Bungiu óuchaguawa luma lun inebe lan hun, mafigouhan humaamuga.21Sunti añaha lan gürigia díseñu, aba layarafadun Moisesi luagun dúeri búrigati le ñein lubéi Bungiu.
Lúrudu lun latarü
22Aba lariñagun Bungiu lun Moisesi:«Ariñagabéi katei le houn Ísüraelina: «Ariha humaali luagu adimurehaadina lan huma siélugiñe.23Madüga humá guáriua láutiña golu o pülata lun háhuduragun houn kamá hamuga nun.24Adüga humá aban latarü lauti múa nun, ábame hadagaragüdüniña hilügüniña hama hibiñanigu luagu keisi adagaragüdüni le gudawarügüti luma adagaragüdüni lánina arandaruni. Niábinba, ábame nabinirunün lidan kada fulasu le ñein lumuti nabusenra laritawagún luagu niri.25Anhein hadüga latarü lauti dübü nun, mamalá lauti dübü le nadagimeiwaali, ladüga anhein nadagimeiwaali lubéi dübü tau furumiñeguarügü tulu madünaalime lun ladügǘniwa latarü lau.26Moun lumuti giñe ñein lan esütépu luagu nani latarü, luéi larihíniwa hábugiñe danme le hawarirun luagun».
Bible Society of Honduras