ရှင်မာကုကျမ်းစာအုပ်9
1ကိုယ်တော်ယေရှုကော တီတ်ဆာပရိသတ်ဖူမ်နောက် ဟီမ်ငါတပည့်လာပ်သယ် “နီမ်နယ် ငါအမှန်ငေါထော်ဝမ်နော် အင်းကာ့ တီတ်ဆာဖူမ်ပါအာမာ့ ကြအာကော တန်ခိုးတော်ဖူမ်နောက်တူတူ ဘုရားရှင်ငါ သာသနာတော်ပေါ်လီကာလည် အယူပ်မူရယ်ကော ရှီးမုကားယို” ငေါကဲ့အယ် မိန့်နောမာ့။2အင်းမာနောက်သယ် ခြောက်ရက် မာပ်အာမ်စန်းနော ကိုယ်တော်ကော ပေတရု ၊ယာကုပ် ၊ယောဟန်နာပ်နောက်တူတူ ဟင်ဟာမ်းအပေါ်ရယ် လင်းငါးကာ့ စုတ်တင်းငါးကာ တောင်စုတ်အား ဟေဟီးရာမ်မာ့။ အင်းမာစီးရာပ်သော် ကိုယ်တော်ယေရှုကော တပည့်လာပ်ကာ့ မန်းနား အဆင်းသဏ္ဍာန်ပြောင်းနာန်မာ့။3ကိုယ်တော်ကာ ဝတ်ရုံငေါ် ကမ္ဘာပေါ်ဝါးမာ့ ဟင်ဟာမ်း အဟီရင်စာပ်အာမ်ကွန်းနယ် လူန်းတင်းကဲ့အယ် တောက်ပြောင်နာန်မာ့။4အင်းမာစီးရာပ်သော် ပုရောဖက် ဧလိယနောက် မောရှေလာပ်ကော ဟီမ်နာပ်ကာမန်းနား ရုတ်တရာပ် ပေါ်လီကယ်အယ် ကိုယ်တော်ယေရှုနောက် သပေါက်ကဲ့အယ် လင်းဟီးရီမာ။5အချိန်နည်းနည်းဟာ မတ်အမ်စောနော ပေတရုကော ကိုယ်တော်လည် “ဆရာ ၊ အင်းကာ့အရပ်ကော အလေနန်း တအားကြီးလင်းတီမ်နေရာ ကလန်ငါက အရပ်ထာကယ်မာ့ အလေဆူကော ကိုယ်တော်နန်း တဲဟူပ်အာ၊ မောရှေနန်း တဲဟူပ်အာနောက် ဧလိယနန် တဲဟူပ်အာရယ် တဲဆွန်းဟူစ် စာကဲ့အယ် အီကာပ်မာ့” ငေါကဲ့အယ် လျှောက်တင်နောမာ့။6ပေတရှနောက် အခြားတပည့်ကယ်ဟောလာပ်ကော တအားကစာပ်ကဲ့အယ် လင်းဟီးကယ် ပေတရုကော မညယ်လျှောက်သောထော်ပ်ကား အမီမ်းဟော်စောမ်ကယ် အင်းမာညယ် လျှောက်သာမ်ငါ ထာမာ့။7အင်းမာအချိန်နယ် ဟလာမ်းဟီပ်တုန်ကြအာ ပေါ်လီကယ်အယ် ဟီမ်နာပ်ကာစုတ်အား အုပ်သောပေးစာပ်ရယ် ဟလာမ်းဟီပ်ပါအာအယ် ဘုရားရှင်ကောတပည့်တော်လာပ်တယ်“အင်းကတီတ်ဆာကော ငါမူမ်းငါးကာ့ ငါကာဆာ ထာမာ့။ ဟီမ်သပေါက်ကားဖူမ်နယ် သပ်ချီးလိတ်” ငေါကဲ့အယ် မိန်းနီမာ့။8စီးရာပ်သော် တပည့်တော်ဆွန်းဟောလည် ချက်ချင်း မန်းကဲ့အယ် ယူညာပ်အာမ်စန်းနော တခြားတီတ်ဆာကယ်ဟောကော အပေါ်စောမ်ညယ် ကိုယ်တော်ယေရှုတစ်ပါးဟာ ဟီမ်နာပ်နောက်တူတူ ငါကဲ့လင်းငါးကာလည် ယူပ်မူဟီးရာမ်မာ့။9စီးရာပ်သော် ဟီမ်နာပ် တောင်စုတ်အားအယ် ဆာပ်ထေကာ အချိန်နယ် ကိုယ်တော်ကော တပည့်လာပ်သယ် တီတ်ဆာကာ့ဆာ ရှီးစီးကဲ့အယ် ဆိုင်းဟေကာ အချိန်အထုတ်ကြီစ်သယ် ဟီမ်နာပ်ယူပ်မူကားဖူမ်နယ် ဟင်နယ်ဟာမ်း အငေါတီမ် မာလောပေးမာ့။10အင်းမာနောက်သယ် တပည့်တော်လာပ်ကော အင်းမာအကြောင်းနယ် ဟင်နယ်ဟာမ်းငေါရီယိုငေါရီး ကိုယ်တော်ငေါကားကာ့ “တီတ်ဆာကာဆာ ရှီးစီးပါအာအယ် ပြန်နောကဲ့အယ် ဆိုင်းဟေပ်ကား” ငေါကားကာ့ စကားအဓိပ္ပာယ်နောက် ပတ်သက်သောကဲ့အယ် အချန်းချန်း ဆွေးနွေးလောကဲ့ လင်းဟီးမာ့။11တပည့်တော်လာပ်ကော ကိုယ်တော်လည် “ပရောဖက် ဧလိယကော အရာမ်ဆုံးလီထော်ပ်ကား ငေါကဲ့အယ် ကျမ်းထောကား ဆရာလာပ်ကော မဟာအောမ်ကယ် ငေါဟီးကားသယ်” ငေါကဲ့အယ် စီမ်ညူဟီးမာ့။12အင်းမာချိန်နယ် ကိုယ်တော်ကော ဟီမ်နာပ်သယ် “ဧလိယကော အရာမ်ဆုံးလီကဲ့အယ် အရာအားလုံးနယ် ပြုပြင်နော်ကယ်အယ် အိကားရယ် ဟီမ်နာပ် ငေါကားမှန်နောမာ့။ အင်းမာပြာန်နယ် ကျမ်းစာပါအာကော် တီတ်ဆာကာ့ဆာကော ဒုက္ခဝေဒနာဖူမ်နယ် ခံနောထော်ကယ်အယ် တီတ်ဆာလာပ်ကာ့ ပစ်ပယ်လော်ကာ ခံနောထော်ပ်ကား ငေါကဲ့အယ် မဟာအောမ်ကယ် ရေးလောပေးကားသယ်။13နီမ်နယ် ငါငေါရယ်ငေါနော ဧလိယကော လီစီးရာပ် ထာမာ့။ အင်းမာပြာန်နယ် ကျမ်းစာပါအာ ဟီမ်ငါအကြောင်းနယ် ရေးလောပေးကားကာအတိုင်း တီတ်ဆာလာပ်ကော ဆန္ဒငါကယ်ညယ် ဟီမ်နယ် အောမ်စီးဟီးရာပ်” ငေါကဲ့အယ် မိန့်နောမာ့။14စီးရာပ်သော် ကိုယ်တော်နောက် တပည့်တော်ဆွန်းဟောကော အခြားကျန်နောကားကာ့ တပည့်ဖူမ်ငါကားကာ့နေရား ထုတ်ထေစန်နော် တီတ်ဆာသာမ်းငေါ ဝိုင်းနောကဲ့ လင်းဟီးစာပ်ရယ် အင်းမာတပည့်လာပ်ကော် ကျမ်းထောကား ဆရာလာပ်နောက် ညာမ်းနောကဲ့အယ် လင်းဟီးကားကာလည် ယူပ်မူဝမ်မာ့။15ချက်ချင်းရယ် တီတ်ဆာဖူမ်ငေါ ကိုယ်တော်လည် ယူပ်မူဝါမ်စန်းနော တအား အန်းနောဟီးကဲ့အယ် ကိုယ်တော်ပါအာ ကာပ်ကဲ့အယ် ကြိုဆိုလောဟီးမာ့။16ကိုယ်တော်ကော ဟီမ်နာပ်သယ် "နီမ်ငေါ မဟာလည် ညာမ်းနောကဲ့အယ် လင်းဟီးကားသယ်" ငေါကဲ့အယ် စီမ်ညူဝမ်မာ့။17အင်းမာအချိန်နယ် တီတ်ဆာအုပ်အားမာ့ ဟော်ဝါကော “ဆရာ၊ ငါဆူကာ ဆာလည် စိတ်ဆလားဆာမ်ကဲ့အယ် အသပေါက်ခါကွန်နယ် အောမ်ပေးကားသယ်မာ့ ဟီမ်နယ် ဆရာပါအာ ငါဆူကော်ရီကား။18အင်းမာစိတ်ဆလားကော ဟီမ်ပါအာ ဆာမ်ငါးကာအချိန်တိုင်း ကာစုတ်အား တလေးလက်ကဲ့အယ် ဟီမ်ငါ ဆတူန်းနားအယ်ရီး ဆပေါ့ဖူမ် ပူစီမ်းမာ့။ စီးရာပ်သော် ဆွားဖူမ်ကြိတ်သောကဲ့အယ် ဟီမ်ငါ တစ်ကိုယ်လုံးညီး စာပ်ဆူမ်ဟူမ်မန်မာ့။ အင်းသယ်မာ့ ကိုယ်တော်ကာ တပည့်လာပ်သယ် အင်းမာစိတ်ဆလားလည် ငါပ်ပူကဲ့အီတီမ် တောင်းပန်နော်စာပ်သယ်ရား ဟီမ်နာပ်ကော ငါပ်ပူဟီးရင်နို” ငေါကဲ့အယ် လျှောက်တင်နော်မာ့။19အင်းသယ် ကိုယ်တော်ယေရှုကော တပည့်လာပ်ယ် “နီမ်ငေါ ယုံကြည်မှုအပေါ်ကာကာ့ ဟီမ်နာပ်ထာမာ့။ ငါကော နီမ်နောက်တူတူ မနေတုန်မာပ်ကွန်းနယ် လင်းမောက်ထော်ပ်ကားသယ်။ နီမ်နယ် ငါကော မနေတုန်မာပ်ကွန်းနယ် သည်းခံနော်ထော်ပ်ကားသယ်။ အင်းမာဆဟာလည် ငါပါအာ ကော်ဟီးရီလိတ်” ငေါကဲ့အယ် မိန့်နောမာ့။20အင်းသယ် ဟီမ်နာပ်ကော အင်းမာဆဟာလည် ကိုယ်တော်ပါအာ ကော်ဟီးရီမာ့။ အင်းမာဆဟာပါအာ ဆာမ်ကဲ့လင်းငါးကာ စိတ်ဆလားကော အင်းမာဆဟာကာ ခန္ဓာကိုယ်လည် လာမဟက်ကယ်မာ့ ဆဟာကော ကာစုတ်အား တလေးလက်ကဲ့အယ် ဆတူန်းနားရီး ဆပေါ့ဖူမ်နောက် ကျီန်နော်ညာပ်ကယ်အယ် လင်းမာ့။21ကိုယ်တော်ကော အင်းမာဆဟာက အဝါလည် “ဟီမ်အင်းကာညယ် ထာကယ်အယ်လင်းငါး မနေမာပ်ပန်းသယ်” ငေါကဲ့အယ် စီမ်ညူဝမ်မာ့။ ဟီမ်ငါအဝါရီး “အယ်ဟာဆဟာမားအယ် ထာကယ်အယ်လင်းငါး။22စိတ်ဆလားကော ဟီမ်နယ်အောမ်ရာပ်စန်ဟာ အဟီပ်ရယ် ဝမ်နား အင်းညယ်အဟီပ်ရီ ဝေးနား အကြိမ်ကြိမ် သက်ဆာမ်ကယ်အယ် ကတ်ရှီးတီမ် ကြိုးစားလေ့ငါမာ့။ ကိုယ်တော် ကြအကြအတတ်ရင်မန်နော် ငါဆူလာပ်သယ် စာန်ငါကာ အနေနဲ့အယ် ကူညီလောကဲ့ အီစာမ်းဆွမ်” ငေါကဲ့အယ် လျှောက်တင်နော်မာ့။23ကိုယ်တော်ရီး “တတ်ရင်မန်နော် ငေါသင့်နိုး။ ယုံကြည်လောကားကာ့ တီတ်ဆာနန်းငေါက်သော် မဟာဟာမ်း ထာရင်နာ့” ငေါကဲ့အယ် မိန့်နောမာ့။24အင်းမာချိန်နယ် ချက်ချင်းရယ် ဆဟာကာအဝါကော “ငါဆူ ယုံကြည်လောမာ့။ ငါဆူ ပိုလောကဲ့အယ် ယုံကြည်လောတင်းကွန်းနယ် ကူညီလောကဲ့အယ် ဆွမ်” ငေါကဲ့အယ် ရမ်းကဲ့အယ် လျှောက်တင်နောမာ့။25ကိုယ်တော်ပါအာ ကာပ်ချီးရီကာကာ့ ပိုလောကဲ့အယ် နံတင်းငါးကာ တီတ်ဆာသာမ်းတုန်းနယ် ယူပ်မူဝါမ်စန်းနော ကိုယ်တော်ကော စိတ်ဆလားလည် “တီတ်ဆာလည် ကနားတီစ်ကဲ့အယ် အသပေါက်ရင်ကွန်နယ် အောမ်ပေးကားကာ့ စိတ်ဆလား အင်းက ဆဟာပါအာအယ် ပူဝမ်စာ့။ ဟီမ်ပါအာ တိုက်မာဟာမ်း လီဟာမ်ငါ့” ငေါကဲ့အယ် ပြင်းပြင်းထန်ထန် အမိန့်အီရာမ်မာ့။26အင်းမာချိန်နယ် စိတ်ဆလားကော ရမ်းကဲ့အယ် ဆဟာလည် အားကြီစ်ရယ် ဆိုင်ဆန်နောစီမ်းစီးမားလည် ဟီမ်ပါအာအယ် ပူဟာမ်းမာ့။ ဆဟာရီး စိတ်ဆလားပူဟာမ်းစီးရန်စန်နော် မဟာမ်း အမယ်ဟက်ရယ် တီတ်ဆာရှီးညယ် တလေးကဲ့အယ်လင်းကယ်မာ့ တီတ်ဆာလာပ်ကော “ဟီမ်ငေါ ရှီးရာပ်” ငေါကဲ့အယ် သပေါက်ချီးမာ့။27အင်းညယ်ငေါဝမ်ရီ ကိုယ်တော်ကော ဆဟာကာထော်လည် အောမ်းကဲ့အယ် လာယုတ်အာမ်စန်နော် အင်းမာဆဟာကော စာပ်ကဲ့အယ် လင်းမာန်မာ့။28စီးရာပ်သော် ကိုယ်တော်ယေရှုကော ကျဉ်းကျဉ်မာပါအာ ဟီမ်ငါတပည့်လာပ်နောက်တူတူ ဆာမ်ငါမ်ကဲ့အယ် သီးသန့်လင်းဟီးကားအချိန်နယ် တပည့်လာပ်ကော် ကိုယ်တော်လည် “အလေဆူလာပ်ကော မဟာအောမ်ကယ် ဆဟာပါအာမာ့ စိတ်ဆလားလည် အငါပ်ပူရင်ငါးသယ်” ငေါကဲ့အယ် လျှောက်တင်နောဟီးမာ့။29အင်းမာချိန်နယ် ကိုယ်တော်ယေရှကော “ဆုစိမ်ငါးပန်းနယ် အခြားမဟာနောက်ချန် အင်းကာညယ် စိတ်ဆလားလည် ငါပ်ပူရင်နိုး” ငေါကဲ့အယ် မိန့်နောမာ့။ 30စီးရာပ်သော် ကိုယ်တော်ယေရှုကော ဟီမ်ငါတပည့်လာပ်နောက်တူတူ အင်းမာနေရားအယ် ပူရီစီးရာပ်သော် ဂါလိလဲပြည်လည် ပလာပ်ကယ်အယ် ခရီးဆက်တီမာ့။ အင်းညယ်ငေါဝမ်ရီ ကိုယ်တော်ကော ဟင်နယ်ဟာမ်း ဟီမ်နာပ် ငါကားနေရာလည် မီမ်းဟော်စီမ်ကာပ်အို။31မဟာအောမ်ကယ်လိုးငေါနော ကိုယ်တော်ကော ဟီမ်ငါတပည့်တော်လာပ်သယ်ဟာ သွန်သင်နောကာပ်ကယ် ထာမာ့။ ကိုယ်တော်ကော တပည့်လာပ်သယ် “ဟော်ဝါဟော်ဝါကော ဘုရားရှင် သာပ်လီကဲ့အယ် တီတ်ဆာကာ့ဆာလည် အကလန်ငါ တီတ်ဆာလာပ်ကာ့ထော်ဝါး အပ်သော့ကာ။ အင်းမာတီတ်ဆာလာပ်ကော ငါလည် သေဒဏ်အီဟိကာ။ အင်းညယ်ငေါဝမ်ညီ ငါကော ရှီးစီးကဲ့အယ် ဆွန်းရာပ်မြောက်သောကားကာ့ မာန်းရာပ်သယ် အဆာဒ်ဆိုင်းဟာမ်းကာ” ငေါကဲ့အယ် မိန့်နောမာ့။32အင်းညယ်ငေါဝမ်ညီ တပည့်လာပ်ကော် အင်းမာစကားကာ့ အဓိပ္ပာယ်လည် နားလည်လော်ဟီယိုငေါရီး ကိုယ်တော်လည် အစီမ်ညူစာပ်ရယ် လင်းဟီးမာ့။33စီးရာပ်သော် ကိုယ်တော်နောက် တပည့်တော်လာပ်ကော ကပေရနောင်မြို့ပါအာ ထုတ်အာမ်စန်းနော ကျဉ်းကျဉ်မာပါအာ ဆာမ်ငါမ်မာ့။ ကိုယ်တော်ကော တပည့်လာပ်သယ် “လမ်းတုန်းငါးမားလည် နီမ်ငေါ မဟာအကြောင်းနယ် ငြင်းခုံနော်ကယ်အယ် လင်းဟီးကားသယ်” ငေါကဲ့အယ် တပည့်လာပ်သယ် စီမ်ညူဝမ်မာ့။34အင်းညယ်ငေါဝမ်ညီ တပည့်လာပ်ကော် ဆီမ်ရှင်းရှင်း လင်းဟီးရာမ်မာ့။ မဟာအောမ်ကယ်လိုးငေါနော ဟီမ်နာပ်ကော လမ်တုန်းငါး ဟီမ်နာပ်ပါအာ တမာဟီမ်ငေါ ကြီးမြတ်ထာမ်ဆုံးထာမာ့ ငေါကားကာလည် အချန်းချန်း ညာမ်းနောဟီးရီကာသယ်မာ့။35အင်းမာချိန်နယ် ကိုယ်တော်ကော သာဝက တစ်ဆယ့်နှစ်ယောက်သယ် ကော်ကဲ့အယ် “ကြီးမြတ်ထာမ်ဆုံး တီတ်ဆာထာကာပ်ကားကာဟီမ်ငေါ ကိုယ်ကာနောက်ကိုယ် တခြားတီတ်ဆာအားလုံးငါ နောက်ဆုံးညယ် သတ်မှတ်သောကဲ့အယ် တီတ်ဆာလာပ်ကာ့ ဆူညယ် လင်းထော်ပ်ကား” ငေါကဲ့အယ် မိန့်နောမာ့။36အင်းမာစီးရာပ်သော် ကိုယ်တော်ကော ဆဟာဟော်ဝါလည် ကော်ကဲ့အယ် ဟီမ်နာပ်ကာ့ အလယ်ရာ စာပ်စီမ်းစီးရာပ်သော် ဆဟာလည် ဖင်ကဲ့အယ် သာဝကလာပ်သယ် ၊37“ငါကာအတွက်နောက် အင်းကာညယ်ကာ ဆာလည် လက်ခံကြိုဆိုလောကားကာ့ ဟီမ်ငေါ ငါလည် လက်ခံနောကဲ့အယ် ကြိုဆိုလောကားဟီမ် ထာမာ့။ ငါလည် လက်ခံကြိုဆိုလောကားကာ့ တီတ်ဆာကော ငါလည် သာပ်ကားဟီမ်နယ် လက်ခံကြိုဆိုလောကားကာဟီမ်ထာမာ့” ရယ် မိန့်နောမာ့။38အင်းမာစီးရာပ်သော် ယောဟန်ငေါ် ကိုယ်တော်လည် “ဆရာ၊ အလေဆူကော ဆရာကာ နံမယ်လည် သုံးနောကဲ့အယ် စိတ်ဆလားလာပ်သယ် ငါပ်ပူကဲ့လင်းငါးကာ့ တီတ်ဆာဟော်ဝါလည် ယူပ်မူရီမာ့။ အင်းညယ်ငေါဝမ်ညီ အင်းမာဟီမ်ငေါ အလေဆူကာ အဖွဲရားကတီတ်ဆာဟီပ်ယို သယ်မာ့ ဟီမ်နယ် အင်းမာညယ် အအောမ်တီမ် တားလောပေးရီမာ့” ငေါကဲ့အယ် လျှောက်တင်နော်မာ့။39အင်းမာချိန်နယ် ကိုယ်တော်ကော ဟီမ်နာပ်သယ် “တားလောဟီးရာ့ ၊ငါကာ နံမယ်လည် သုံးနောကဲ့အယ် အန်းနောမီးကားဖူမ်နယ် အောမ်ငါးကာ ဟီမ်ငေါ တအောင်းဟာ အတွင်းနား ငါကာ အကလန်ငါကာ အကြောင်းနယ် ငေါ့ကာယို၊40အလေလည် အဆန့်ကျင်နော်ကာကာ့ တမာဟီမ်ဟာမ်းငေါရီး အလေကာ ဘက်လာကာဟီမ်ထာမာ့။41နီမ်နယ် ငါအမှန်ငေါထော်ဝမ်နော် တီတ်ဆာဟော်ဝါဟော်ဝါကော နီမ်နယ် မေရှိယကာ့ တပည့်ထာကယ်မာ့ ဝေးခွက်လာ တိုက်သောစာမ်းဟာဟာမ် အင်းမာဟီမ်ငေါ ဆုလာဒ်ဖူမ် လုကားသေချာလောမာ့။42အင်းညယ်ငေါဝမ်ရီ ဟော်ဝါဟော်ဝါကော ငါလည်ယုံကြည်လောကားကာ့ တီတ်ဆာဖူမ်ပါအာမာ့ ဟော်ဝါလည်ဟာ အပြစ်ကြအာကြအာ အောမ်ပါတ်ကွန်းမယ် အောမ်မန်းနော အင်းမာညယ် အောမ်ငါးကာဟီမ်နယ် ကတောက်အာ နီပ်ကာကာ့ သလောင်ဆီ ကျိပ်ကဲ့အယ် ပင်လယ်ပါအာ သက်ဆာမ်ငါမ်ငါးဟာမ်း ဟီပ်နန်း ပိုလောကဲ့အယ် မီးဟန်ဟပ်ကား။43နာန်ငါထော်ပီပ်နူန်ငေါ် အပြစ်ကျူးလွန်နော်ကွန်နယ် အောမ်မန်းနော အင်းမာထော်လည် တက်တူစ်ဝါမ်နိတ်။ ထော်ကယ်ပီပ်နောက် တိုက်မာဟာမ်း ဝမ်အမက်ကာ ငရဲပြည်ရာ လာမ်ဟပ်ကားကာ့ ထက်သယ် ထော်ပီပ်နူန်နောက် ရွှေမြို့တော်ဝါ လာမ်ငါးကော ပိုလောကဲ့အယ် မီးမာ့။44 အင်းမာ ငရဲရားမာ့ ကတောင်ဖူမ်ငေါ ဟီမ်နာပ်သယ် အမြဲတမ်း ရောက်ချီးကဲ့အယ် ဝမ်ငေါ ဟီမ်နာပ်သယ် အမြဲတမ်း ဟူကဲ့အယ် လင်းဟပ်ကာ။45အင်းမာတိုင်းမန်း နာန်ငါ တာပီပ်နူန်ငေါ် အပြစ်ကျူးလွန်နော်ကွန်နယ် အောမ်မန်းနော အင်းမာတာလည် တက်တူစ်ဝါမ်နိတ်။ တာကယ်ပီပ်နောက် ငရဲပြည်ရာ သက်ဆာမ်ငါ ခံနောထော်ပ်ကား ထက်သယ် တာပီပ်နူန်နောက် ရွှေမြို့တော်ဝါ လာမ်ငါးကော ပိုလောကဲ့အယ် မီးမာ့။46အင်းမာ ငရဲရားမာ့ ကတောင်ဖူမ်ငေါ ဟီမ်နာပ်သယ် အမြဲတမ်း ရောက်ချီးကဲ့အယ် ဝမ်ငေါ ဟီမ်နာပ်သယ် အမြဲတမ်း ဟူကဲ့အယ် လင်းဟပ်ကာ။ 47နာန်ငါ မီပ်တူ တူဝါကော အပြစ်ကျူးလွန်နော်ကွန်နယ် အောမ်မန်းနော အင်းမာ မီပ်တူလည် ဖောက်သာမ်နိတ်။ မီပ်တူ ကယ်တူနောက် ငရဲပြည်ရာ လာမ်ဟပ်ကားကာ့ ထက်သယ် မီပ်တူ တူဝါနောက် ဘုရားရှင်ငါ သာသနာတော်ပါအာ ဆာမ်မူကားကော ပိုလောကဲ့အယ် မီးမာ့။48အင်းမာ ငရဲရားမာ့ ကတောင်ဖူမ်ငေါ ဟီမ်နာပ်သယ် အမြဲတမ်း ရောက်ချီးကဲ့အယ် ဝမ်ငေါ ဟီမ်နာပ်သယ် အမြဲတမ်း ဟူကဲ့အယ် လင်းဟပ်ကာ။ 49တီတ်ဆာလာပ်ကော ရောက်တီမ်အူတီမ်ဖူမ်နယ် စူမ်စာန်းကဲ့အယ် မုက်ကယ်ညယ် ဆင်းရဲဒုက္ခဖူမ်နောက် ကြုံနောဟီးထော်ပ်ကား။ 50စူမ်ငေါ အသုံးဝင်နောမာ့။ အင်းညယ်ငေါဝမ်ညီ ဟီမ်ငါ ဆောမ်းငါးကာဓါတ် ဆွန်ပါတ်သော် အင်းမာလည် ဆောမ်းဟာမ်းကွန်းမယ် အောမ်ဟီးရင်ဟပ်ကားယို။ နီမ်ပါအာ စူမ်ညယ် ကလန်ငါအရာဖူမ် ငါကွန်းနယ် အောမ်ကဲ့အယ် အခြားတီတ်ဆာလာပ်နောက် အချန်းချန်း သင့်မြတ်သောကွန်းနယ် လင်းဟီးလိတ်တပည့်လာပ်သယ်တပည့်လာပ်သယ်” ငေါကဲ့အယ် မိန့်နောမာ့။
Empower Asia Bible Translation Movement