ရှင်မာကုကျမ်းစာအုပ်8
1အင်းမာမာန်းရာပ်ဖူမ်ပါအာ တီတ်ဆာပရိသတ်ဖူမ်ငေါ် ကိုယ်တော်ယေရှုပါအာ စုလောကဲ့အယ် ထုတ်ချီးရီမာ့။ ဟီမ်နာပ်ကော ရောက်တီမ်အူတီမ်ဖူမ် အပေါ်ဟီယို။ အင်းမာအချိန်နယ် ကိုယ်တော်ယေရှုကော တပည့်လာပ်သယ် ကော်ကဲ့အယ်2“ဟီမ်နာပ်ကော ငါနောက်တူတူ ဆွန်းရာပ်လင်းကဲ့အယ် မဟာမ်းရောက်တီမ် အပေါ်စောမ်ကယ်မာ့ အင်းကာတီတ်ဆာဖူမ်နယ် ငါစာန်မာ့။3အင်းကာ တီတ်ဆာလာပ်ပါအာမာ့ ကြအာတီတ်ဆာလာပ်ကော ခရီး စာပါအာအယ် လီကားသယ်မာ့ ဟီမ်နာပ်ခနန်း မဟာမ်း အနော့ပ်ရယ် သာပ်ထာမ်းပါတ်သော် လမ်းမား မူးလောကဲ့အယ် တလေးဟူမ်မန်ကား” ငေါကဲ့အယ် မိန့်နောမာ့။4အင်းမာအချိန်နယ် တပည့်လာပ်ကော် ကိုယ်တော်လည် “ အင်းညယ်ငေါဝမ်ရီ အင်းကာတီတ်ဆာ အားလုံး ကျေးကွန်းနယ် ရောက်ရင်တီမ် လုံလောက်သောကား ဟမူမ်ဖူမ်နယ် အင်းကာ တီတ်ဆာအပေါ်ကာကာ့ ပေါက်ခါသာတုန်းငါးကော တပါလူရင်ဟပ်ကားသယ်” ငေါကဲ့အယ် လျှောက်တင်နောမာ့။5အင်းမာချိန်နယ် ကိုယ်တော်ကော ဟီမ်နာပ်သယ် “နီမ်ပါအာ ဟမူမ် မနေငါမ်သယ်” ငေါကဲ့အယ် စီမ်ညူစန်းနော ဟီမ်နာပ်ကော “ဟမူမ် ခုနစ်ခု ငါမာ့” ငေါကဲ့အယ် ပြန်နောကဲ့အယ် ဖြေဟာမ်းမာ့။6ကိုယ်တော်ကော တီတ်ဆာလာပ်ခနန်း ကာပါအာ ထောင်းစီမ်းကဲ့အယ် ဟမူမ် ခုနစ်ခုလည် လာကဲ့အယ် ဘုရားရှုင်ငါ ကျေးဇူးတော်လည် ချီးမွမ်းနောစီးရာမ်စန်းနော် ဟမူမ်ဖူမ်နယ် လာဆိတ်ကဲ့အယ် တီတ်ဆာလာပ်ခနန်း မန်တီမ် ဟီမ်ငါတပည့်လာပ်ခနန်း အီရာမ်မာ့။7ဟီမ်နာပ်ပါအာ သမ်းငါဆဟာဖူမ်ရီး နည်းနည်းဟာ ငါတူမ်းသယ်မာ့ ကိုယ်တော်ကော အင်းမာသမ်းငါးဖူမ်ဟနန်း ဘုရားရှင်နယ် ချီးမွမ်းနောစီးရာမ်စန်နော် အင်းမာသမ်းငါဖူမ်နယ်ရီး တီတ်ဆာလာပ်ခနန်း မန်တီမ် ဟီမ်ငါတပည့်လာပ်သယ် ငေါမာ့။8တီတ်ဆာလာပ် ကြေးကွန်းနယ် ရောက်စီးကဲ့အယ် ပိုလောကားဖူမ်နယ် တပည့်တော်လာပ် စီမ်းနောဟာမ်းစန်နော် တောင်းတုန်း ခုနစ်ဟူပ်ဖိန်းကွန်းနယ်လူမာ့။9အင်းမာနေရား တီတ်ဆာပေါင်း လေးထောင် ငါကဲ့အယ် ဟီမ်နာပ် ရောက်စီးရာမ်စန်နော် ကိုယ်တော်ကော ဟီမ်နာပ်သယ် ကျဉ်းမာသာပ်ထာမ်းမာ့။10အင်းမာနောက်သယ် ကိုယ်တော်ယေရှုကော ဟီမ်ငါတပည့်တော်လာပ်နောက်တူတူ လှေစုတ်အား ဟေကဲ့အယ် ဒလမနုသပြည် ကြွလာမ်မာ့။11ဖာရိရှဲလာပ်ကော် ကိုယ်တော်ပါအာ ထုတ်ချီးရီကယ်အယ် ကိုယ်တော်နောက် စားလောကဲ့အယ် အငြင်းအခုန် သပေါက်ချီးမာ့။ ဟီမ်နာပ်ကော ကိုယ်တော်လည် စမ်းသပ်သောကာပ်ကယ်မာ့ ဘုရားရှင်ပါအာမာ့ အန်းနောမီးကားကာ့ နိမိတ်လက္ခဏာဖူမ် ပြလောကဲ့အီတီမ် စိမ်ဟီးမာ့။12ကိုယ်တော်ကောအင့်မာ့အကြောင်းအရာလည် သပ်မူဝမ်စန်းနော စိတ်ပါန်ပန်းနောကယ်မာ့ သက်ပြင်းချလောကဲ့အယ် “ ရာမာ့ခေတ်တီတ်ဆာဖူမ်ငေါ မဟာအောမ်ကယ် ဘုရားရှင်ပါအာမာ့ နိမိတ်လက္ခဏာဖူမ်နယ် ပြလောတီမ် စိမ်ဟီးကားသယ်။ ငါအမှန်ငေါရယ်ငေါနော နီမ်နယ် မဟာနိမိတ်လက္ခဏာဟာမ် ငါပြလော့ကာဟီပ်အို” ငေါကဲ့အယ် မိန့်နောမာ့။13စီးရာပ်သော် ကိုယ်တော်ကော ဖာရိရှဲလာပ်သယ် သက်ပေးကဲ့အယ် ဟီမ်ငါတပည့်လာပ်နောက်တူတူ လှေစုတ်အား ဟေကဲ့အယ် ဝေးအိုင်တစ်ဖက်ကမ်းနာ ပလာပ်ချီရီမာ့။14ဟီမ်ငါတပည့်လာပ်ကော် ဟမူမ် လာရီတီမ် မာပ်လာမ်ကယ်မာ့ လှေစုတ်အားကော ဟမူမ် ဟူပ်အာကာပန်းနယ် ရောက်တီမ် မဟာဟာမ်းပို။15လမ်းခရီးပါအာ ကိုယ်တော်ကော ဟီမ်ငါတပည့်လာပ်သယ် “ လေးအောမ်ဟီးလိတ်။ အုပ်ချုပ်သောကားဟီမ် ဟေရုဒ်နောက် ဖာရိရှဲလာပ်ကာ တဆေး လည် သတိအောမ်ဟီးလိတ်” ငေါကဲ့အယ် သတိအီပေးမာ့။16အင်းမာချိန်နယ် တပည့်လာပ်ကော “အလေ ဟမူမ်ဖူမ် အလာရီကယ် ကိုယ်တော်ကော အင်းကာညယ် ငေါကားညာပ်ကာ” ငေါကဲ့အယ် အချန်းချန်း ဆွေးနွေးလောဟီးမာ့။17ကိုယ်တော်ယေရှုကော အင်းမာအကြောင်းနယ် မီမ်းဟော်ဝမ်စန်းနော တပည့်တော်လာပ်သယ် “နီမ်ငေါ မဟာအောမ်ကယ် ဟမူမ် အပေါ်ကာကာ အကြောင်းနယ် ငေါဟီးထော်ကာသယ်။ နီမ်ငေါ နားအလည်လော်ဟီရင်ဟအူမ်းနာန် အင်းညယ်အဟီပ်ရယ် သဘောအပေါက်သောဟီးရင်ဟအူမ်းနာန်။ အင့်ကာဟီမ်ကော နီမ်နယ် နားလည်လောကွန်နယ် ရာပ်သောကားလေး18နီမ်ငေါ မီပ်တူငါစာပ်သယ် မဟာအောမ်ကယ် အယူပ်မူဟီးကားသယ်။ ကနားရီးငါစာပ်သယ် မဟာအောမ်ကယ် အသာပ်မူဟီးကားသယ်။ နီမ်ငေါ မှတ်တိုဟီယိုနာန်။19ငါ ဟမူမ် ငါးလုံးနယ် လာဆိတ်ကဲ့အယ် တီတ်ဆာငါးထောင်နယ် အီနောပ်လီကာကာ့အချိန်နယ် နီမ်ငေါ ဟီမ်နာပ်ရောက်စီးကဲ့အယ် ပိုလောကား ဟမူမ်ဖူမ်နယ် မယ်ဟာမ်ငါ ကောမ်ဟာမ်း မနေဟာမ်း လူဟာမ်းငါးသယ်” ငေါကဲ့အယ် စီမ်ညူဝမ်စန်းနော တပည့်တော်လာပ်ကော “တစ်ဆယ့်နှစ်ဟာမ်း” ငေါကဲ့အယ် ဖြေလောဟာမ်းမာ့။20စီးရာပ်သော် ကိုယ်တော်ကော ဟီမ်နာပ်သယ် “ငါ ဟမူမ် ခုနစ်လုံးနယ် လာဆိတ်ကဲ့အယ် တီတ်ဆာလေးထောင်နယ် အီနောပ်လီကာကာ့အချိန်နယ် ဟီမ်နာပ်ရောက်စီးကဲ့အယ် ပိုလောကား ဟမူမ်ဖူမ်နယ် မယ်ဟာမ်ငါ တောင်းမနေတောင်း လူဟာမ်းတယ်” ငေါကဲအယ် စီမ်ညူဝမ်စန်းနော ဟီမ်နာပ်ကော “တောင်းခုနစ်တောင်းလူမာ့” ငေါကဲ့အယ် ပြန်နောကဲ့ဖြေလောဟာမ်းမာ့ပ်။21အင်းမာအချိန်နယ် ကိုယ်တော်ကော ဟီမ်နာပ်သယ် “နီမ်ငေါ ရာနေထုတ်အာမ်ကွန်းဟာမ်း နားလည်လော်ဟီယိုလေး” ငေါကဲ့အယ် မိန့်နောမာ့။22ကိုယ်တော်နောက် ဟီမ်ငါတပည့်လာပ်ကော ဗက်ဇဲဒမြို့ဝါး ထုတ်အာမ်ငါးကာ့ အချိန်နယ် တီတ်ဆာကြအာကော မီပ်တူ အယူပ်မူရယ် လင်းငါးကာ့တီတ်ဆာဟော်ဝါလည် ကိုယ်တော်ပါအာ ကော်ဟီးရီကယ်အယ် အင်းမာမီပ်တူအယူပ်မူကားဟီမ်နန်း ကိုယ်တော်ကာ ထော်နောက် ထာကဲ့အယ် ကုလောကဲ့ အီကွန်းနယ် တောင်းဆိုလော်ဟီမာ့။23ကိုယ်တော်ကော အင်းမာမီပ်တူ အယူပ်မူကားဟီမ်ငါထော်လည် တူမ်းကဲ့အယ် မြို့ပြာန်ငါ ကော်ဝမ်မာ့။ စီးရာပ်သော် ကိုယ်တော်ကော အင်းမာဟီမ်ငါ မီပ်တူလည် အာပ်ဝေးနောက် စူပ်တော်စီကယ်အယ် အင်းမာဟီမ်ငါ မီပ်တူလည် ထော်နောက် သာမ်ကဲ့အယ် “မဟာမဟာလည် နာန်ယူပ်မူနေး” ငေါကဲ့အယ် စီမ်ညူမာ့။24အင်းမာဟီမ်ညား မန်းကဲ့ယူညာပ်ကယ်အယ် “ငါဆူကော တီတ်ဆာလာပ်သယ် ယူပ်မူမာ့ အင်းညယ်ငေါဝမ်ရီ ရှင်းရှင်းလင်းလင်းညယ် ယူပ်မူဝိုး အင်းမာ့တီတ်ဆာလာပ်ကော ဟာညာပ်ကဲ့အယ် လင်းငါးကာ ဖောမ်းတွန်ဖူမ်နောက် တူလောမာ” ငေါကဲ့အယ် လျှောက်တင်နော်မာ။25အင်းမာစီးရာပ်သော် ကိုယ်တော်ကော ဟီမ်ငါမီပ်တူစုတ်အား ရာကာပ်ဝါ ထော်လည် သာမ်ငါမ်မာ့။ အင်းမာနောက်သယ် ဟီမ်ငေါ ပတ်ဝန်းကျင်နာ မန်းကဲ့အယ် ယူညာပ်အာမ်စန်းနော ဟီမ်ငါမီပ်တူကော် ကလန်ဟာမ်ကယ်အယ် အရာအားလုံးနယ် ရှင်းရှင်းလင်းရှင်းရယ် ယူပ်မူဝါမ်မာ့။26ကိုယ်တော်ယေရှုကော အင်းမာဟီမ်နယ် “မြို့နားဆာမ်ငါမ်စောမ်းတာပ်” ငေါကဲ့အယ် ကျဉ်းမာလာမ်ဟာမ်းစီမ်းမာ့။27အင်းမာစီးရာပ်သော် ကိုယ်တော်ယေရှုနောက် တပည့်တော်လာပ်ကော ကဲသရိဖိလိပ္ပုမြို့နောက်ထံငါးကာ ထိန်ဖူမ်ပါအာ လာမ်ငါးကာ လမ်းမား ကိုယ်တော်ကော တပည့်တော်လာပ်သယ် “ငါလည် တီတ်ဆာလာပ်ကော ဟင်ငေါကဲ့အယ် ငေါဟီးကားသယ်” ငေါကဲ့အယ် စီမ်ညူမာ့။28တပည့်လာပ်ရီ “ကိုယ်တော်လည် ကြအာကော ဝေးငဟူပ်ကာမင်္ဂလာအောမ်ငါးကာ့ ဆရာယောဟန်၊ ကြအာတီတ်ဆာလာပ်ကော ပရောဖက် ဧလိယ၊ ကြအာတီတ်ဆာလာပ်ကော အခြားပရောဖက်ဖူမ် ပါအာမာ့ တစ်ပါးငေါကဲ့အယ် သပေါက်ချီးမာ့” ငေါကဲ့အယ် ဖြေလောမာ့။29အင်းမာအချိန်နယ် ကိုယ်တော်ယေရှုကော ဟီမ်ငါတပည့်လာပ်သယ် “နီမ်ငေါ ငါလည် ဟင်မာသာပ်ကားတယ် ငေါကဲ့အယ် စီမ်ညူဝမ်စန်းနော” ပေတရုကော “ကိုယ်တော်လည် မေရှိယထာမာ့” ငေါကဲ့အယ် လျှောက်သာမ်မာ့။30အင်းမာချိန်နယ် ကိုယ်တော်ကော ဟီမ်ငါအကြောင်းနယ် ဟင်နယ်ဟာမ်း အဆောမ်းတီမ် တပည့်လာပ်သယ် သတိအီမာ့။31စီးရာပ်သော် ကိုယ်တော်ကော ဟီမ်ငါတပည့်လာပ်သယ် “တီတ်ဆာကာ့ဆာကော ဂျူးလူမျိုးခေါင်းဆောင်ဖူမ်၊ ပုရောဟိတ်အကြီးအကဲဖူမ်နောက် ကျမ်းထောကား ဆရာဖူမ်ငါ့ ညာမ်းပယ်လော်ကာလည် ခံနောထော်ကယ်အယ် ညှင်းပန်း နှိပ်စာပ်သောကားဖူမ်နယ် ခံနောထော်ကယ်အယ် ကတ်ရှီးကား ခံနောထော်ပ်ကား။ အင်းညယ်ငေါဝမ်ညီ ဆွန်းရာပ် မြောက်သောကား မာန်းရာပ်သယ် ဟီမ်ငေါ ပြန်နောကဲ့အယ် အဆာဒ်ဆိုင်းဟာမ်းကာ” ငေါကဲ့အယ် ဆောမ်နောကဲ့အယ် အီမာ့။32ကိုယ်တော်ယေရှုသပေါက်ကားကအကြောင်းအရာ ဖူမ်ငေါ အလွန် ပွင့်လင်းနော်မာ့။အင်းမာနောက်တယ်ကော ပေတရုကော ကိုယ်တော်လည် အခြားတပည့်ဖူမ်နောက် နည်းနည်းဟာ စာကားနေရား ကော်ကဲ့အယ် အင်းမာညယ် သပေါက်ကားလည် တားလောပေးရာမ်မာ့။33အင်းမာအချိန်နယ် ကိုယ်တော်ကော တပည့်လာပ်ကာ့ဘက်လာ မန်းကဲ့အယ် ယူကဲ့အယ် ပေတရုလည် “မာရ်နတ်၊ ငါပါအာအယ် ပူပေးရာမ်စာ့။ နာန်ငါ စိတ်နားကော ဘုရားရှင်ပါအာ လီကားဟီယို။ အင်းမာအစား နာမ်ငေါ တီတ်ဆာလာပ်တွေးတောလောကညယ် တွေးတောလောဟီးမာ့” ငေါကဲ့အယ် ဆုံးမလောမာ့။34စီးရာပ်သော် ကိုယ်တော်ကော ဟီမ်ငါတပည့်လာပ်နောက် တီတ်ဆာပရိသတ်သာပ်သယ် ဟီမ်ပါအာ ကော်ကဲ့အယ် ဟီမ်နာပ်သယ် “ဟင်ဟာမ်းထာဂါက်ထာ ငါကာတပည့် ထာကာပ်မာ့ငေါက်သော် အင်းမာဟီမ်ငေါ ကိုယ်ကျိုးလည် စွန့်နောကဲ့အယ် ကိုယ်ကာ လက်ဝါးကပ်တိုင်နယ် ဖေး ကဲ့အယ် ငါနောက်အား ရာပ်ရင်ငါကာ ဟီမ် ထာထော်ပ်ကား။35မဟာအောမ်ကယ်လိုးငေါနော ကိုယ်ကာ အဆာဒ်သယ် ကယ်တင်နောကာပ်ကာ တီတ်ဆာဖူမ်ငေါ နိစ္စထာဝရအဆာဒ်သယ် ဆုံးရှုံးနောထော်ပ်ဟာမ်းငေါဝမ်ရီ ငါနန်းနောက် မင်္ဂလာသတင်းကလန်ဟနန်း ကိုယ်ကာ အဆာဒ်သယ် စွန့်နောကား ဟီမ်ငေါ နိစ္စထာဝရအဆာဒ်သယ် လူဟိကာ။36တီတ်ဆာဟော်ဝါကော အင်းကာ ကမ္ဘာလောကပါအာမာ့ အရာအားလုံးနယ် ပိုင်ဆိုင်နောမူမာ့ငေါရီး နိစ္စထာဝရအဆာဒ်သယ် ဆုံးရှုံးနောဝါပ်သော် ဟီမ်ဟနန်း မဟာအကျိုးငါကားသယ်။37တီတ်ဆာဟော်ဝါကော နိစ္စထာဝရအဆာဒ်သယ် လူကွန်းနယ် ဘုရားရှင်ပါအာ မဟာဟာမ်း အီကဲ့အယ် လူရင်ဟပ်ကားယို။38နီမ်ပါအာမာ့ ဟင်ဟာမ်းထာဂါက်ထာ နီမ်ငေါ ရာမာ့ခေတ် ဘုရားရှင်နယ် ယုံကြည်မှုအပေါ်ကာတီတ်ဆာလာပ်နောက် အပြစ်ဒုစရိုက်သမားဖူမ်နယ် ကစာပ်ကယ်မာ့ ငါနောက် ငါကာ သွန်သင်မှုဖူမ်နယ် လိုက်နာလော်တီမ် ညာမ်းပယ်လော်ဝမ်နော် တီတ်ဆာကာ့ဆာကော မြင့်မြတ်သောကားကာ့ ဟမန်းဖူမ်နောက်တူတူ အဝါဘုရားရှင်ငါ ဘုန်းတန်ခိုးတော် နောက် အင်းကာ ကမ္ဘာမြေပါအာ ကြွဟေကာအချိန်နယ် နီမ်နယ် ငါကာတပည့်တော် အဖြစ်လားအယ် ညာမ်းပယ်လော်ပ်ကာ” ငေါကဲ့အယ် မိန့်နောမာ့။
Empower Asia Bible Translation Movement