ရှင်မာကုကျမ်းစာအုပ်10
1စီးရာပ်သော် ကိုယ်တော်ကော ကပေရနောင်မြို့ဝါးအယ် ပူရီကဲ့အယ် ဂျော်ဒန်မြစ် တစ်ဖက်ကမ်းနာကာ့ ယုဒပြည်ပါအာ ကြွလီမာ့။ တီတ်ဆာသာမ်ဖူမ်ရီ ကိုယ်တော်ငါကားကာနေရား ရာကာပ်ဝါ ထုတ်အာပ်ချီးရီကယ်အယ် ကိုယ်တော်ကော ခါတိုင်းအောမ်ကယ်ညယ် ဟီမ်နာပ်ခနန်း ဟောပြောသွန်သင်နောကဲ့အီမာ့။2အင်းမာချိန်နယ် ဖာရိရှဲကြအာကော ကိုယ်တော်ယေရှုပါအာ ထုတ်ချီးရီကယ်အယ် ကိုယ်တော်လည် စမ်းသပ်သောကာပ်ကယ်မာ့ “ ဟလားကော အိတ်သယ် ကွာရှင်းနောကားကော ပညတ်တော်နောက် ညီလောနေး” ငေါကဲ့အယ် လျှောက်တင်နာန်မာ့။3အင်းမာချိန်နယ် ကိုယ်တော်ကော ဟီမ်နာပ်သယ် “မောရှေကော် နီမ်နယ် မညယ် ပညတ်သောပေးကားသယ်” ငေါကဲ့အယ် ပြန်နောကဲ့အယ် စီမ်ညူဟာမ်းမာ့။4အင်းမာတီတ်ဆာလာပ်ကော “ဟလားကော အိတ်သယ် ကွာရှင်းနောကားကာ့ စာချုပ်အားလက်မှတ်ထိုးလောကဲ့အယ် ကွာရှင်းနောကားလူမာ့ ငေါကဲ့အယ် မောရှေကော် ခွင့်ပြုလောပေးမာ့” ငေါကဲ့အယ် ဖြေလောဟာမ်းမာ့။5အင်းမာချိန်နယ် ကိုယ်တော်ယေရှုကော ဟီမ်နာပ်သယ် “နီမ်ငါ နီမ်ငါအလိုလည် လုပ်ဆောင်နောကအယ် ဘုရားရှင်ပါအာ နာခံခြင်းအပေါ်စောရယ် မောရှေကော် အင်းမာညယ် အင်းမာ့ ပညတ်တော်လည် ရေးလီကာ ထာမာ့။6အင်းညယ်ငေါဝမ်ရီ ဘုရားရှင်ငေါ် ပထဦးဆုံး အရာအားလုံးနယ် ဖန်ဆင်းနီကာအခါလည် တီတ်ဆာဟော်လောဝါနောက် တီတ်ဆာယာပ်ရှီလည် ဖန်ဆင်းနီမာ့။7အင်းသယ်မာ လက်ထပ်သောစီးရာပ်သော် ဟော်လောဝါကော် ဟီမ်ငါအောပ်ဝါလာပ်သယ် သက်ပေးကဲ့အယ် ဟီမ်ငါ အိတ်နောက်တူတူ လင်းမောက်ချီးမာ့။8အင်းသယ် ဟီမ်နာပ်ကယ်ဟောကော တီတ်ဆာ ဟောဝါဟာ ထာဝမ်မာ့။အင်းတယ်မာ့ သီးသန့်ငါကဲ့လင်းငါးကာ တီတ်ဆာကယ်ဟော အဟီပ်စော်မ်ရယ် ဟော်ဝါဟာညယ်ဟာ ပေါင်းနောဟီးရာမ်မာ့။9အင်းသယ် ဘုရားရှင် တွဲလောကဲ့အီပေးကားကာ တီတ်ဆာဟောလောဝါနောက် တီတ်ဆာယာပ်ရှီ လည် ဟင်ဟာမ်း ခွဲလောသင့်နိုး” ငေါကဲ့အယ် မိန့်နောမာ့။10စီးရာပ်သော် ကိုယ်တော်နောက် တပည့်ဖူမ် ကျဉ်းနား ငါကဲ့လင်းငါးအချိန်နယ် တပည့်တော်လာပ်ကော အင်းမာဟောလီကာ အကြောင်းနောက် ပတ်သက်သောကဲ့အယ် ကိုယ်တော်လည် စီမ်ညူဟီးမာ့။11ကိုယ်တော်ကော ဟီမ်နာပ်သယ် “ဟော်လောဝါဟော်ဝါကော ဟီမ်ငါအိတ်သယ် ကွာရှင်းနောကဲ့အယ် တခြားယာပ်ရှီ ဟော်ဝါလည် လက်ထပ်သောကားကော ပထမအိက်သယ် အိမ်ထောင်ရေး ဖောက်ပြန်နော်ကာလည် ကျူးလွန်နော်ကာ ထာမာ့။12အင်းမာတိုင်းမန်း ယာပ်ရှီ ဟော်ဝါရီး ဟီမ်ငါ ဟလားလည် ဖါက်ကဲ့အယ် တခြားဟော်လောဝါလည် လက်ထပ်သောကားကော အိမ်ထောင်ရေးဖောက်ပြန်နောကားလည် ကျူးလွန်နော်ကာ ထာမာ့” ငေါကဲ့အယ် မိန့်နောမာ့။13တီတ်ဆာဖူမ်ငေါ ဟီမ်နာပ်ကာ အယ်ဟာဆဟာဖူမ်နယ် ကိုယ်တော်ကာ ထော်နောက် ထာကယ်အယ် ဘုရားရှင်ပါအာမာ့ ကလန်ငါအရာဖူမ် လူကွန်းနယ် ဆုစိမ်တီမ် ကိုယ်တော်ပါအာ ကော်ဟီးရီမာ့။ အင်းညယ်ငေါဝမ်ညီ ကိုယ်တော်ကာ တပည့်ဖူမ်ငေါ် ကိုယ်တော်လည် အနောက်ယှက်သောရယ် လင်းကွန်းနယ် တားမြစ်သောပေးဟီးမာ့။14ကိုယ်တော်ယေရှုကော အင်းမာညယ် အောမ်ငါးကာလည် ယူပ်မူဝမ်စန်းနော ရှေရှောကဲ့အယ် ဟီမ်ငါတပည့်လာပ်သယ် “အယ်ဟာဆဟာဖူမ်နယ် ငါပါအာ လီစီမ်းနိတ် ၊တားလောပေးဟီးရာပ် မဟာအောမ်ကယ်လိုးငေါနော ဘုရားရှင်ငါ သာသနာတော်ပါအာ လင်းမာပ်ထော်ပ်ကားကာ့ တီတ်ဆာဖူမ်ငေါ အင်းမာအယ်ဟာဆဟာလာပ်ညယ် အပြစ်ကင်းစင်နော်ကယ်အယ် ယုံကြည်မှုငါကား ဟီမ်နာပ်ထာမာ့။15နီမ်နယ် ငါအမှန်နယ် ငေါ့နာပ်။ အင်းမာအယ်ဟာဆဟာလာပ်ညယ် ယုံကြည်လက်ခံမှုအပေါ်ကာကာ့ ဘုရားရှင်ငါ သာသနာတော်ပါအာ တိုက်မာဟာမ်း ဆာမ်ငါပ်မုကားယို”။16စီးရာပ်သော် ကိုယ်တော်ကော အယ်ဟာဆဟာလာပ်သယ် ဖင်စာပ်ရယ် ဟီမ်နာပ်ကာကိုယ်ဝါး ထော်လည် သာမ်ကဲ့အယ် ဟီမ်နာပ်ခနန်း ကလန်ငါဖူမ် အီကွန်းနယ် ဘုရားရှင်ငေါ် ကလန်ငါအရာဖူမ်နယ် အီစီမ်းဂါက်ကယ် ဆုစိမ်ကဲ့အယ် အီမာ့။17အင်းမာနောက်သယ် ကိုယ်တော်ကော တပည့်တော်ဖူမ်နောက် အင်းမာနေရားအယ် စားလောကဲ့အယ် ပူဝမ်ငါးကာ အချိန်နယ် တီတ်ဆာဟော်ဝါကော ကာပ်လီကဲ့အယ် ကိုယ်တော်ကာ ရှေ့ရား ဒူးထောက်သောစီးရာမ်စန်နော် “ဖြောင့်မတ်သောကဲ့အယ် မှန်ကန်နောကား ဆရာ ၊နိစ္စထာဝရအဆာဒ်သယ် လူကွန်းနယ် ငါဆူကော မညယ်အောမ်ထော်ပ်ကားသယ်” ငေါကဲ့အယ် လျှောက်တင်နာန်မာ့။18အင်းမာချိန်နယ် ကိုယ်တော်ကော အင်းမာဟီမ်နယ် “နာန်ငေါ ငါလည် မဟာအောမ်ကယ် ဖြောင့်မတ်မှန်ကန်နောမာ့ ငေါထော်ကာသယ်။ ဟင်ဟာမ်း ဖြောင့်မတ်သောရယ်ကော အပို။ ဘုရားရှင် တစ်ပါးဟာနိုက် ဖြောင့်မတ်မှန်ကန်နောကားဟီမ်နယ်။19ဘုရားရှင်ငါ ပညတ်တော်ဖူမ်နယ် နာန်မီမ်းဟော်မာ့။ အင်းမာဖူမ်ငေါ 'သမီပ် အဆာဒ်သယ် ကတ်ရှီးရာ့ ၊အိမ်ထောင်ရေး ဖောက်ပြန်နော်ဝါပ် ၊သမီပ်ကာ ပစ္စည်းလည် ကူပ်အာပ် ၊ပက်သော်ညာပ်ကယ်အယ် သပေါက်အာပ် ၊သမီပ်သယ် လှည့်စားလောဝါပ် ၊နာန်ငါ အောပ်ဝါလာပ်သယ် ရိုသေလေးစားလောလိတ်' အင်းညယ်ထာမာ့” ငေါကဲ့အယ် မိန့်နောမာ့။20အင်းမာချိန်နယ် အင်းမာတီတ်ဆာကော “ဆရာ၊ ငါဆူကော အယ်ဟာဆဟာမားအယ် အင်းမာပညတ်ဖူမ်နယ် လိုက်နာလော်မာ့” ငေါကဲ့အယ် ဖြေလောမာ့။21အင်းမာချိန်ငါ ကိုယ်တော်ကော ဟီမ်နယ် မေတ္တာနောက် ယူကဲ့အယ် “နာန်အောမ်တီမ် ကြအာဟာနိက်ပန်း ကျန်နောကား။ နာန်ပါအာ ငါကားကာ့ ပစ္စည်းဥစ္စာဖူမ်နယ် လာမ်ကဲ့အယ် ငဟေကယ်အယ် လူကားကာ ဖူးဖူမ်နောက် အပေါ်ဟာကားကာ့ တီတ်ဆာလာပ်ခနန်း လှူလောဝမ်းနော ရွှေမြို့တော်ပါအာ ဆုလာဒ်ဖူမ် နာန်လုကား။ စီးရာပ်သော် လီကဲ့အယ် ငါနောက်အား ရာပ်တိတ်” ငေါကဲ့အယ် မိန့်နောမာ့။22အင်းမာဟီမ်ငေါ တအားချမ်းသာလော်ကာကာ့ တီတ်ဆာထာကယ်မာ့ ကိုယ်တော်ကာ စကားလည် သာပ်မူဝမ်စန်းနော ဟီမ်ငါ မျက်နာညိုးလောကဲ့အယ် ဝမ်းနည်းလောကဲ့ ပူဟာမ်းပေးရာမ်မာ့။23စီးရာပ်သော် ကိုယ်တော်ကော ဟီမ်ငါတပည့်လာပ်ကာဘက်လာ မန်းကဲ့အယ် “ဆွာမ်းငါးကာ တီတ်ဆာဖူမ်ငေါ ဘုရားရှင်ငါ သာသနာတော်နား ဆာမ်တီမ် တအား ခက်ခဲလောမာ့” ငေါကဲ့အယ် မိန့်နာန်မာ့။24တပည့်တော်ဖူမ်ငေါ ကိုယ်တော်ကာ စကားလည် အန်းနောဟီးရာမ်မာ့။ အင်းညယ်ငေါဝမ်ညီ ကိုယ်တော်ကော ရာကာပ်ဝါ့ ဟီမ်နာပ်သယ် “တပည့်ဖူမ်၊ တီမှတ်ဆာလာပ်ကော ဘုရားရှင်ငါ သာသနာတော်နား ဆာမ်တီမ် တအား ယာက်သောတင်းမာ့ ။25ဆွာမ်းငါးတီတ်ဆာဟော်ဝါကော ဘုရားရှင်ငါ သာသနာတော်နား ဆာမ်ဟပ်ကားထက်သယ် ကုလားအုတ်နူဝါကော မီစ်ထည်ပေါက်နား ဆာမ်ငါးဟာမ်း ပိုလောကဲ့အယ် လွယ်လောဟန်မာ” ငေါကဲ့အယ် မိန့်နောမာ့။26တပည့်တော်လာပ်ကော် ပိုလောကဲ့အယ် အန်းနောဝါမ်ကယ်အယ် "အင်းညယ်ငေါက်သော် ဟင်ငေါ ကယ်တင်နောကား ခံနောထော်ပ်ကားသယ်" ငေါကဲ့အယ် အချန်းချန်း သပေါက်ချီးမာ့။27ကိုယ်တော်ကော တပည့်လာပ်သယ် ယူကဲ့အယ် “တီတ်ဆာလာပ်ကော ကိုယ်ကကိုယ်လည် ကယ်တင်နောတီမ် ထာရင်နိုးငေါရီး ဘုရားရှင်ကော တီတ်ဆာလာပ်တယ်ကယ်တင်နောတီမ်ထာရင်နာပ်။ မဟာအောမ်ကယ်လိုးငေါ ဘုရားရှင်နန်းငေါအရာအားလုံး ထာရင်နာပ်” ငေါကဲ့အယ် မိန့်နောမာ့။28အင်းမာချိန်နယ် ပေတရုကော “အလေဆူလာပ်ကော ကိုယ်တော်ကာ နောက်အား လာပ်တီမ် အရာအားလုံးဖူမ်နယ် စွန့်လွှတ်သောစီးရာပ်” ငေါကဲ့အယ် လျှောက်တင်နော်မာ့။ 29အင်းမာချိန်နယ် ကိုယ်တော်ကော “နီမ်နယ် ငါငေါနာပ်၊ ငါနန်းဟာမ်းငေါရီး၊ မင်္ဂလာသတင်းကလန်နန်းဟာမ်းငေါရီး ကျဉ်း၊ အန်းချန်နရှီ၊ အော်ပ်ဝါလာပ်၊ ရှိတ်ဆာလာပ်၊ လက်ပါးမြေယာဖူမ်နယ် စွန့်လွှတ်သောကားဟီမ်ငေါ30အင်းကာ ကာလပါအာ ကျဉ်းဖူမ်၊ အန်းချန်နရှီဖူမ်၊ အော်ပ်ဝါဖူမ်၊ ရှိတ်ဆာဖူမ်၊ လက်ပါးမြေယာဖူမ် အဆပေါင်းတစ်ရာနေဟန်ညယ် လူဟာမ်းဟိကာ။ အင်းမာပြာန်နယ် ငါကာတွက်နဲ့အယ် တီတ်ဆာလာပ်ကာ ညှင်းပန်းနှိပ်စာပ်သောကားခံနောထော်ကာဟီမ်နာပ်ကော နောင်ကာလငေါက်သော် နိစ္စထာဝရအဆာဒ်သယ် လူဟိကာ။31ရာအချိန်ငါ ကြီးမြတ်သောကားဟီမ်နာပ်ကော နောင်တစ်ချိန်ငါ နှိမ့်ချခံနောထော်ကယ်အယ် ရာအချိန်နယ် နှိမ့်ချခံနောထော်ကာဟီမ်နာပ်ကော နောင်တစ်ချိန်ငေါက်သော် ကြီးမြတ်သောကားဟီမ်နာပ် ထာရီပ်ကား” ငေါကဲ့အယ် မိန့်နောမာ့။32ကိုယ်တော်နောက် ဟီမ်ငါတပည့်လာပ်ကော် ဂျေရုဆလင်မြို့ဝါး လာမ်ငါးကာ လမ်းမာ ကိုယ်တော်ကော ဟီမ်ငါတပည့်လာပ်သယ် အရာမ် မန်းနာ ကြွလောဖာန်းကယ်မာ့ တပည့်တော်လာပ်ကော အန်းလောကဲ့အယ် လင်းဟီးရာမ်မာ။ တပည့်လာပ်ကာ နောက်အားရာပ်ချီးကားကာ တီတ်ဆာဖူမ်ညီး ကစာပ်ကယ်အယ် လင်းဟီးမာ့။ ရာကာပ်ဝါ ကိုယ်တော်ကော သာဝကဆယ့်နှစ်ယောက်သယ် ဟီမ်ပါအာ ကော်ကဲ့အယ် ဟီမ်မညယ်ထာရီထော်ပ်ကား ငေါကားအကြောင်းနယ် မိန့်နောမာ့။33ကိုယ်တော်ကော “သာပ်လာပ်ချီးလိတ်၊ ရာ အလေကော် ဂျေရုဆလင်မြို့ဝါး လာမ်ငါးကာ လမ်းငါး ထုတ်ကဲ့လင်းဟီးကားထာမာ့။ အင်းမာမြို့ဝါး ထုတ်ပါတ်သော် တီတ်ဆာကာ ဆာကော ပုရောဟိတ်အကြီးအကဲဖူမ်နောက် ကျမ်းထောကား ဆရာဖူမ်ပါအာ အပ်သောကား ခံနောထော်ပ်ကား။ အင်းမာဟီမ်နာပ်ကော တီတ်ဆာကာ့ဆာလည် သေဒဏ်စီရင်နောကဲ့အယ် ဂျူးလူမျိုးအဟီပ်ကာ ဟီမ်နာပ်ပါအာ အပ်သောကား ခံနောထော်ပ်ကား။34အင်းမာတီတ်ဆာလာပ်ကော ဟီမ်နယ် လှောင်ပြောင်နောဟီး၊ အာပ်ဝေးနောက် ထောက်စာပ်ချီးကဲ့အယ် ကြိမ်လုံးနောက် သမ်းကနာကယ်အယ် ကတ်ရှီးဟီးရာမ်ကား။ အင်းညယ်ငေါဝမ်ညီ ဆွန်းရာပ်မြောက်သောကားကာ့ မာန်းရာပ်သယ် ဟီမ်ငေါ အဆာဒ်ဆိုင်းဟာမ်းကာ” ငေါကဲ့အယ် မိန့်နောမာ့။35အင်းမာနောက်သယ် ဇေဗေဒဲကာ ဆာဖူမ်ထာကာကာ့ ယာကုပ်နောက် ယောဟန်ငေါ် ကိုယ်တော်ပါအာ လီကဲ့အယ် “ဆရာ၊ အလေဆူလာပ်ကော စိမ်ငါးလည် အောမ်ကဲ့အီစီမ်းကာပ်မာ့” ငေါကဲ့အယ် လျှောက်တင်နော်မာ့။36ကိုယ်တော်ကော ဟီမ်နာပ်သယ် “နီမ်ငေါ မဟာလည် အောမ်ကဲ့အီစီမ်းကာပ်ကာသယ်” ငေါကဲ့အယ် မိန့်နောမာ့။37ဟီမ်နာပ်ကော “ကိုယ်တော်ကော ဘုန်းတန်ခိုးတော်နောက် အုပ်စိုးလော့ကာ အချိန်ထုတ်ပါပ်သော် ကိုယ်တော်ကာ လက်ဝဲနောက် လက်ယာပါအာ အလေဆူလာပ်သယ် ထောင်းစီမ်းကဲ့အယ် ဆွမ်” ငေါကဲ့အယ် လျှောက်တင်နော်မာ့။38အင်းသယ် ကိုယ်တော်ကော ဟီမ်နာပ်သယ် “နီမ်ငေါ နီမ်မဟာလည် စိမ်မာ့ငေါကားလည် နီမ်မီမ်းဟော်ဟီယို။ ငါအူထော်ပ်ကားကာ ဒုက္ခဆင်းရဲခြင်း ငေါကားကာ ခွက်သယ် နီမ်အူဟီးရင်နေး။ ငါခံနောထော်ပ်ကားကာ့ ဒုက္ခဆင်းရဲခြင်းငေါကားကား ဝေးငဟူပ်ကာမင်္ဂလာလည် နီမ်ခံနောရင်နေး” ငေါကဲ့အယ် စီမ်ညူမာ့။39အင်းမာချိန်နယ် ဟီမ်နာပ်ကော ကိုယ်တော်လည် “အလေဆူ ခံနောရင်နာ့” ငေါကဲ့အယ် ဖြေလောကယ် ကိုယ်တော်ကော “ငါအူထော်ပ်ကား ခွက်သယ် နီမ်ရီး အမှန်တကယ်ဟာမ် အူထော်ပ်ကား။ ငါခံနောထော်ပ်ကားကာ့ ဒုက္ခဝေဒနာလည် နီမ်ညီး ခံနောဟီးထော်ပ်ကား။ ငါရှီးထော်ပ်ကားကာ ပုံစံညယ် နီမ်ရှီးဟီးထော်ပ်ကား။40အင်းညယ်ငေါဝမ်ညီ ငါကလက်ယာဘက်လာနောက် လက်ဝဲဘက်လာ ဟင်ထောင်းထော်ပ်ကားငေါကားကာလည် ဆုံးဖြတ်သောကား အခွင့်အာဏာကော ငါအပါအပို။ ဘုရားရှင်ငေါ် ဟီမ်ရွေးလောပေးကားဟီမ်နာပ်ခနန်း အင်းမာနေရာဖူမ်နယ် ပြင်ဆင်နောပေးကား ထာမာ့” ရယ် မိန့်နောမာ့။41အင်းမာညယ် ငေါကဲ့လင်းဟီးကားလည် သာပ်မူဝါပ်ချီးကားကာ့ အခြားတပည့်ဆယ်ယောက်ကော ယာကုပ်နောက် ယောဟန်နယ် ရှေရှောကဲ့လင်းဟီးမာ့။42အင်းသယ် ကိုယ်တော်ကော တပည့်ဖူမ်အားလုံးနယ် ဟီမ်ငါနဘေးရားကော်ကဲ့အယ် “ဂျူးလူမျိုးအဟီပ်ကာတီတ်ဆာလာပ်ကာ ဘုရင်နာပ်ကော ဟီမ်နာပ်ကာ့ ပြည်သူလာပ်သယ် အာဏာပြလောမူကာလည် လာဂါက်ချီးကဲ့အယ် အကြီးအကဲလာပ်ကော် ပြည်သူလာပ် နာခံနောဟီးကွန်းနယ် အာဏာ သုံးနောထော်ကာလည် လာဂါက်ချီးမာ့ ငေါကားလည် နီမ်မီမ်းဟော်ဟီမာ့။43အင်းညယ်ငေါဝမ်ညီ နီမ်ငေါ အင်းမာညယ် အောမ်မာပ်ချီးရာ့ နီမ်ပါအာမာ့ အကြီးအကဲထာဂါက်ကား တီတ်ဆာကော ဆူညယ် လင်းထော်ပ်ကား။44အင်းမာပြာန်နယ် ခေါင်းဆောင်ထာကာပ်ကား တီတ်ဆာကော တီတ်ဆာလာပ်အားလုံးနယ် ဆူညယ် အလုပ်ကျွေးပြုလောထော်ပ်ကား။45မဟာအောမ်ကယ်လိုးငေါ တီတ်ဆာကာ့ဆာကော တီတ်ဆာလာပ် အလုပ်အကျွေးပြုလောကားလည် ခံနောတီမ် ကြွလီကာယို ၊တီတ်ဆာလာပ်သယ် အလုပ်ကျွေးပြုလောတီမ်နောက် ဟီမ်ငါအဆာဒ်သယ် စွန့်နောကဲ့အယ် တီတ်ဆာလာပ်သယ် ရွေးနှုတ်ကယ်တင်နောတီမ် ကြွလီကာထာမာ့” ငေါကဲ့အယ် မိန့်နောမာ့။46အင်းမာနောက်သယ် ကိုယ်တော်နောက် တပည့်တော်လာပ်ကော ယေရိခေါမြို့ဝါး ထုတ်ချီးရီမာ့။ အင်းမာမြို့ဝါးအယ် တီတ်ဆာသာမ်းတုန်းနောက် ပူဟာမ်းရီစန်နော် တိမဲကာဆာ ဗာတိမဲ ကော်ကားကာ့ မီပ်တူ အယူပ်မူကားကာဟီမ်ငေါ လမ်းတုန်းနဘေးရား ထောင်းကဲ့အယ် စိမ်ရောက်ညာပ်ကဲ့ လင်းမာ့။47အင်းမာဟီမ်ငေါ နာဇရက်မြို့သား ယေရှုကြွလီကာလည် မီမ်းဟော်ဝမ်စန်းနော ဟီမ်ငေါ “ဒါဝိဒ်ကာဆာ ယေရှု ၊ငါဆူလည် စာန်ကဲ့အယ်ဆွမ်” ငေါကဲ့အယ် ရမ်းကဲ့အယ် သပေါက်မာ့။48တီတ်ဆာလာပ်ကော ဟီမ်နယ် 'ဆီမ်ရှင်းရှင်း လင်းနိတ်' ငေါကဲ့အယ် စန်းဟီးရား ဟီမ်ငေါ “ဒါဝိဒ်ကာဆာ ယေရှု၊ ငါဆူလည် စာန်ကဲ့အယ်ဆွမ်” ငေါကဲ့အယ်ဟာ ပိုလောကဲ့အယ် ကလူပ်ကဲ့အယ် ရမ်းမာ့။49အင်းမာလည် သပ်မူကယ်မာ့ ကိုယ်တော်ယေရှုကော ရပ်သောကဲ့အယ် အင်းမာ တီတ်ဆာလည် ဟီမ်ပါအာ ကော်ရီတီမ် မိန့်နာန်မာ့။ အင်းသယ် တီတ်ဆာလာပ်ကော အင်းမာမီပ်တူ အယူပ်မူကားကာဟီမ်နယ် “သတ္တိငါလိတ်။ ယုတ်စာပ်။ ကိုယ်တော်ကော နာန်နယ် ကော်ကား” ငေါကဲ့အယ် ငေါဟီးမာ့။50အင်းမာချိန်နယ် မီပ်တူ အယူပ်မူကားဟီမ်ငေါ ဟီမ်ငါ ဝတ်ရုံနယ် ဆက်ကဲ့အယ် ကမာတ်လာမ်စီးရာပ်သော် ကစစ်ကစစ် ယုတ်ကဲ့အယ် ကိုယ်တော်ပါအာ လီမာ့။51စီးရာပ်သော် ကိုယ်တော်ကော ဟီမ်နယ် “နာန်ဟနန်း ငါမဟာအောမ်ကဲ့အီထော်ပ်ကားသယ်” ငေါကဲ့အယ် စီမ်ညူဝမ်စန်းနော အင်းမာ မီပ်တူအယူပ်မူကားဟီမ်ငေါ “ဆရာ ၊ငါဆူကော မီပ်တူ ယူပ်မူဟာမ်းကာပ်မာ့” ငေါကဲ့အယ် လျှောက်တင်နောမာ့။52ကိုယ်တော်ယေရှုကော “လာမ်ဟာမ်းစာပ်၊ နာန်ငါ ယုံကြည်မှုကော နာန်ငါမီပ်တူလည် လားစီမ်းဟာမ်းပါပ်” ငေါကဲ့အယ် မိန့်နောစီးရာနောက် အင်းမာဟီမ်ငါ မီပ်တူကော် ယူပ်မူဟာမ်းကဲ့အယ် ကိုယ်တော်လာမ်ငါးကာ လမ်းတစ်လျှောက် လာပ်မာ့။
Empower Asia Bible Translation Movement