ရှင်မာကုကျမ်းစာအုပ်7
1ရာပ်အာလည် ဂျေရုဆလင်မြို့ပါအာအယ် လီဟီးကားကာ ဖာရိရှဲဖူမ်နောက် ကျမ်းထောကား ဆရာဖူမ်ကြအာကော ကိုယ်တော်ယေရှုပါအာ စုလောဟီးရီမာ့။2အင်းမာအချိန်နယ် ကိုယ်တော်ကာ တပည့်လာပ်ကော် ထော်ဝေးအရှင်ညယ် အသန့်ရှင်းနောကား ထော်နောက် ရောက်တီမ်ဖူမ်နယ် ရောက်ကဲ့လင်းဟီးကားလည် ဟီမ်နာပ်ကော ယူပ်မူဟီးမာ့။3မဟာအောမ်ကယ်လိုးငေါနော ဖာရိရှဲလာပ်နောက် ဂျူးလူမျိုးလာပ်ကော် ဟီမ်နာပ်ကာ ဘိုးဘေးလာပ်ကာ့ သွန်သင်ချက်ဖူမ်နယ် လိုက်နာလောကအယ် ဟီမ်နာပ်ကာ့ထော်လည် အရာမ်ဆုံး အရှင်ညယ် ရောက်တီမ်ဖူမ်နယ် အရောက်ချီရယ်လင်းဟီးကယ်သယ်မာ့။4ဟီမ်နာပ်ကော မဟာရောက်တီမ်ဖူန်နယ်ဟာမ်းထာဂါက်ထာ ဈေးရားအယ် မီးရီရာမ်နော် ထော်လည် ရှင်စေစီးမားလည် ရောက်ချီးမာ့။ အင်းညယ်တိုင်းမန်း ခွက်ဖူမ်၊ ပန်းကန်ဖူမ်နယ် ဖောစေထော်ကယ်ညယ် အခြားထုံးတမ်းအစဉ်လာဖူမ်နယ်ရား ကလန်မယ် လိုက်နာလာပ်ချီမာ့။5အင်းသယ် ဖာရိရှဲလာပ်နောက် ကျမ်းထောကား ဆရာဖူမ်ငေါ ကိုယ်တော်ယေရှုလည် “နာန်ငါ တပည့်လာပ်ကော် အလေကာ အောက်ထော်အထော်လာပ်ကာ့ ထုံးတမ်းအစဉ်လာလည် မဟာအောမ်ကယ် အလိုက်နာလော်ဟီကာသယ်၊ မဟာအောမ်ကယ် ထော်အရှင်ညယ် ရောက်တီမ်ဖူမ်နယ် ရောက်ကဲ့လင်းဟီးကားသယ်” ငေါကဲ့အယ် စီမ်ညူဟီးမာ့။6အင်းမာအချိန်နယ် ကိုယ်တော်ကော ဟီမ်နာပ်သယ် “ပရောဖက် ဟေရှာယကျမ်းပါအာ တီတ်ဆာကလန်ညယ် ဟန်ဆောင်နောကားကာ့ နီမ်ငါအကြောင်းနယ် ကျမ်းစာပါအာ ကြိုလောကဲ့အယ် ဟောလောစီးရာပ်။ ဟီမ် ရေးလောပေးရီကာကော် 'အင်းမာဟီမ်နာပ်ကော ငါလည် ဟီမ်နာပ်ကာ့ ဆတူန်းနောက်ချာ ရိုသေလောကဲ့အယ် လင်းဟီးရား ဟီမ်နာပ်ကာ စိတ်နှလုံးနားကော ငါနောက် စာမာ့။7ဟီမ်နာပ်ကော တီတ်ဆာလာပ် ချမှတ်သောပေးကားကာ့ ထုံးတမ်းအစဉ်လာဖူမ်နယ် ငါကာ့ ပညတ်တော်ဖူမ် ငေါကဲ့အယ် တီတ်ဆာလာပ်သယ် ဟောပြောဆုံးမလောဟီးကားသယ်မာ့ ငါလည်ကိုးကွယ်လော်ကာကော် အလကား' ငေါကဲ့အယ် ရေးလောပေးမာ့။8နီမ်ငေါ ဘုရားရှင်ငါ ပညတ်တော်ဖူမ်နယ် ပယ်လောကဲ့အယ် တီတ်ဆာလာပ်ကာ ထုံးတမ်းအစဉ်လာလည်ဟာ လိုက်နာကျင့်သုံးနောကဲ့အယ် လင်းဟီးမာ့” ငေါကဲ့အယ် မိန့်နောမာ့။9အင်းမာစီးရာပ်သော် ကိုယ်တော်ကော ဟီမ်နာပ်သယ် “နီမ်ငေါ နီမ်ငါ ထုံးတမ်းအစဉ်အလာလည် ထိန်းသိမ်းနောတီမ် ဘုရားရှင်ငေါ် ပညတ်တော်ဖူမ်နယ် ကလန်မယ် ပြစ်ပယ်လော်ဟီရီမာ့။10ပရောဖက်မောရှေကော် ‘အော်ပ်ဝါလာပ်သယ် ရိုသေလောလိတ်’ စီးရာပ်သော် ‘အော်ပ်ဝါလာပ်သယ် စော်ကားလောကဲ့အယ် သပေါက်ကားဟီမ်ငေါ သေဒဏ်အီကား ခံနောထော်ပ်ကား’ ငေါကဲ့အယ် ငေါမာ့။11အင်းညယ်ငေါဝမ်ရီ နီမ်ငေါ တီတ်ဆာဟော်ဝါကော ဟီမ်ငါ အော်ပ်ဝါလာပ်သယ် ထောက်ပံ့နော့ကာအစား ဘုရားရှင်နယ်ဟာ လှူဒါန်းနောဟီးရာမ်းနော လူမာ ငေါကဲ့အယ် တီတ်ဆာလာပ်သယ် ဆောမ်နောဟီးမာ့။ တီတ်ဆာဟော်ဝါကော ကိုယ်ကာအော့ပ်ဝါလာပ်သယ် 'ငါနီမ်နယ် ထောက်ပံ့နောပ်ကာ ပစ္စည်းဥစ္စာဖူမ်ငေါ ဘုရားရှင်နယ် လှူလောပေးကားကာ့ ကော်ဘန် ထာဝါပ်' ရယ် ငေါဝမ်းနော လူမာ့ရယ် နီငေါ ဆောမ်နောဟီးမာ့။12အင်းမာညယ်နောက် နီမ်ငေါ အင်းမာဟီမ်နာပ်သယ် ဟီမ်နာပ်ကာ အော်ပ်ဝါလာပ်ခနန်း မဟာဟာမ်း အောမ်တီမ် ခွင့်အီစော်မန်။13နီမ်ငေါ နီမ်ငါ ဘိုးဘေးလာပ်ပါအာအယ် လက်ဆင့်ကမ်းနီကာကာ့ ထုံးတမ်းအစဉ်လာဖူမ်ငေါ ဘုရားရှင်ငါ့ ပညတ်တော်ဖူမ်နယ် ပြစ်ပယ်လောဟီကာ ထာမာ့။ အင်းမာပြာန်နယ် နီမ်ငေါ အင်းမာညယ်ကာ့ တခြားအမှုဖူမ်နယ်ရီး အောမ်ကဲ့လင်းဟီးမာ့” ငေါကဲ့အယ် မိန့်နောမာ့။14နောက်သယ်ကာပ်ဝါ ကိုယ်တော်ကော တီတ်ဆာပရိသတ်သာပ်သယ် ကော်ကဲ့အယ် ဟီမ်နာပ်သယ် “နီမ်အားလုံးရီး ငါမိန့်နောကားကာဖူမ်နယ် ကလန်မယ် သပ်ကဲ့အယ် နားလည်လော်ကွန်နယ် ကြိုးစားလောဟီးလိတ်။15တီတ်ဆာလာပ် ရောက်ကားကာဖူမ်ငေါ တီတ်ဆာလာပ်သယ် အသန့်ရှင်းနောစီမ်းကာယို။ တီတ်ဆာလာပ်ကာ စိတ်နားအယ် ပူရီကား အကလန်ငါဖူမ်ဟာ တီတ်ဆာလာပ်သယ် အသန့်ရှင်းနောစီမ်းငါး ထာမာ့။16ကနားငါကဲ့အယ် သာပ်မူရင်ငါးဟီမ်နာပ်ကော နားလည်လော်ရင်ကွန်နယ် ကြိုးစားလောဟီးလိတ်” ငေါကဲ့အယ် မိန့်နီမာ့။ 17အင်းမာစီးရာပ်သော် ကိုယ်တော်ကော တီတ်ဆာပရိသတ်သာပ်ပါအာအယ် ပူဟာမ်းကဲ့အယ် ကျဉ်းကျဉ်မာပါအာ ဆာမ်ငါးကာအချိန်နယ် တပည့်လာပ်ကော် ကိုယ်တော်လည် အင်းမာ ပုံဥပမာကာ အဓိပ္ပာယ်လည် စီမ်ညူဟီးမာ့။18ကိုယ်တော်ကော “နီမ်ရီး နားလည်လော်ဟီယိုလေး။ နီမ် ရောက်ကား ရောက်တီမ်အူတီမ်ဖူမ်ငေါ နီမ်နယ် အသန့်ရှင်းနောကွန်းနယ် အောမ်ရင်နိုး ငေါကားလည် နီမ်မီမ်းဟော်ဟီယိုလေး။19မဟာအောမ်ကယ်လိုးငေါနော အင်းမာ့ရောက်တီမ်အူတီမ်ဖူမ်ငေါ နီမ်ငါနှလုံးသားပါအာ ထုတ်အာမ်ကားအဟီပ်ရယ် နီမ်ငါအစာအိမ်ပါအာ ထုတ်အာမ်ကဲ့အယ် ခန္ဓာကိုယ်ပြာန်ငါ ထုတ်ထာမ်းငါမ်ကယ် ထာမာ့” ငေါကဲ့အယ် မိန့်နောမာ့။ ကိုယ်တော်ယေရှု အင်းကာညယ် မိန့်နောကားကော ရောက်တီမ်ဖူမ်အားလုံးငေါ သန့်ရှင်းနောမာ့ ငေါကဲ့အယ် ငေါကားထာမာ့။20အင်းမာနောက်သယ် ကိုယ်တော်ကော "နီမ်ငါ စိတ်နားအယ် ပူရီကား အကလန်ငါဖူမ်ဟာ နီမ်နယ် အသန့်ရှင်းနောစီမ်းငါး ထာမာ့။21မဟာအောမ်ကယ်လိုးငေါနော တီတ်ဆာလာပ်ကာ စိတ်နှလုံးနားအယ် ပူရီကားကာ အကလန်ငါကာ စိတ်ကူးဖူမ်၊ သမီပ်ကာ အိတ်ဆာလည် စော်ကားလောကားဖူမ်၊ ကူပ်ကားဖူမ် ၊တီတ်ဆာအဆာဒ် ကတ်ရှီးကားဖူမ်၊22အိမ်ထောင်ရေးပါအာ ဖောက်ပြန်နော်ကာဖူမ်၊ လောဘကြီးလောကားဖူမ်၊ ကောက်ကျစ်သောကားဖူမ်၊ ပက်တော်ညာပ်ကာဖူမ်၊ ရိုင်းပြလောကားဖူမ်၊ မနာလိုလောကားဖူမ်၊ စော်ကားလောကဲ့အယ် သပေါက်ကား၊ မာနကြီးလောကားဖူမ်၊ မောဟကြီးလောကားဖူမ်၊23အင်းမာဖူမ်ဟာ တီတ်ဆာလာပ်သယ် အသန့်ရှင်းနောကွန်းနယ် အောမ်ငါးထာမာ့" ရယ် ရှင်းပြလောမာ့။24အင်းမာစီးရာပ်သော် ကိုယ်တော်ယေရှုကော အင်းမာနေရားအယ် ပူရီကဲ့အယ် တုရုမြို့နောက် ထံငါကားကာ့ ဒေသဖူမ်ပါအာ ထုတ်အာမ်မာ့။ ဟီမ်ငေါ ကျဉ်းကျဉ်မာ့ပါအာ တည်းလောကဲ့အယ် အင်းမာအကြောင်းနယ် ဟင်နယ်ဟာမ်း အမီမ်းဟော်စီမ်ကာပ်ရယ်လင်းရီး ဖုံးကွယ်လော်ကယ် အလူရင်ညယ် လင်းမီမာ့။25အင်းသယ် စိတ်ဆလားဆာမ်ငါး ခံနောထော်ကာကာ့ ယာပ်ရှီဆဟာကာ အမေဟော်ဝါကော ကိုယ်တော်ကာအကြောင်းနယ် သပ်မူဝမ်စန်းနော ကိုယ်တော်ပါအာ လီကဲ့အယ် ကိုယ်တော်ကာ တာပဲရား ဝပ်တီမာ့။26အင်းမာယာပ်ရှီကော ဆီးရီးယားပြည် ဖိုနီရှီးယား ဒေသပါအာ ဟဲရီကာကာ့ ဂျူးလူမျိုးအဟီပ်ကာဟီမ်ဟော်ဝါ ထာမာ့။ အင်းမာ့ ယာပ်ရှီကော ဟီမ်ငါရှိတ်ပါအာ ဆာမ်ကဲ့လင်းငါးကာ စိတ်ဆလားလည် ငါပ်ပူကဲ့အယ် အီတီမ် ကိုယ်တော်လည် အကြိမ်ကြိမ်တောင်းပန်နီမာ့။27အင်းညယ်ငေါဝမ်ရီ ကိုယ်တော်ယေရှုကော အင်းမာ ယာပ်ရှီလည် “ဆဟာဖူမ်နယ် ကြေးကွန်းနယ် အရာမ်ဆူန်းနော့ပ်ထော်ပ်ခူမ်း။ မဟာအောမ်ကယ်လိုးငေါနော ဆဟာလာပ်ကာ့ ဟမူမ်နယ် လာကဲ့အယ် ကြည်ဟနန်း အီနော့ပ်ကားကော အသင့်တော်လော်ကယ်” ရယ် မိန့်နောမာ့။28အင်းမာ့ ယာပ်ရှီကော “မှန်နောမာ့အရှင်၊ အင်းညယ်ငေါဝမ်ညီ စားပွဲတော့မ်နားငါးကားကာ့ ကြည်လာပ်ချာန်း ဆဟာလာပ် ရောက်ကဲ့ကျန်နောကား အကြွင်းအကျန်ဖူမ်နယ် ရောက်ထော်မာ့” ငေါကဲ့အယ် ပြန်နောကဲ ဖြေလောမာ့။29ကိုယ်တော်ကော အင်းမာ ယာပ်ရှီလည် “နာန်အင်းညယ် ဖြေလောဟာမ်းကယ်မာ့ ကျဉ်းမာ လာမ်ဟာမ်းရင်ပါပ်၊ စိတ်ဆလားကော နာန်ငါရှိတ်ပါအာအယ် ပူဝါပ်” ငေါကဲ့အယ် မိန့်နောမာ့။30အင်းမာစီးရာပ်သော် အင်းမာယာပ်ရှီကော ကျဉ်းမားလာမ်ဟာမ်းစန်းနော ဟီမ်ငါရှိတ်ပါအာ စိတ်ဆလားအပေါ်စောမ်ညယ် အက်ဆက်ဝါး အက်တလေးကဲ့အယ် လင်းငါးကာလည် ယူပ်မူဝမ်မာ့။31အင်းမာနောက်သယ် ကိုယ်တော်ယေရှုကော တုရုမြို့နောက် ထံငါးကာ အရပ်ဒေသပါအာအယ် ပူဟာမ်းကဲ့အယ် ဇိဒုန်မြို့လည် ပလာပ်ကယ်အယ် ဒေကာပေါလိပြည်ပါအာအယ် တစ်ဆင့် ဂါလိလဲအိုင်ငါး ထုတ်အာမာ့။32အင်းမာစီးရာပ်သော် တီတ်ဆာကြအာကော ကနားတီစ်ကယ်အယ် သပေါက်ကား အပီလော်ဟာရယ် လင်းငါးကာ တီတ်ဆာဟော်ဝါလည် ကိုယ်တော်ပါအာ ကော်ရီကဲ့အယ် ကိုယ်တော်ကာ ထော်နောက် ထာကယ်အယ် ကုလောကဲ့အီတီမ် ကိုယ်တော်လည် တောင်းပန်နော်ဟီမာ့။33ကိုယ်တော်ကော အင်းမာ တီတ်ဆာလည် အခြားတီတ်ဆာလာပ်နောက် စာကားကာ သီးသန့်နေရာ ကြအာပါအာ ကော်ကဲ့အယ် အင်းမာဟီမ်ငါ ကနားကယ်ပိတ်သယ် ကိုယ်တော်ကာ ထော်လက်ညိုးနောက် ထာဝမ်မာ့။ အင်းမာနောက်သယ် လက်ညိုးလည် အာပ်ဝေးနောက် စူစ်သော်ကယ်အယ် အင်းမာဟီမ်ငါ ရှလီးပါအာ ထာဝမ်မာ့။34အင်းမာစီးရာပ်သော် ကိုယ်တော်ကော ရွှေမြို့တော်ဘက်လာ မျှော်မှန်းနောကဲ့အယ် သက်ပြင်းချလောစီးရာမ်စန်နော် “ဧဖသ” ငေါကဲ့အယ် မိန့်နာန်မာ့။ "ဧဖသ" ကာ အဓိပ္ပာယ်ကော် “ပွင့်နာန်နိတ်” ငေါကဲ့အယ် ထာမာ့။35အင်းညယ် ငေါဝမ်ငါနောက် အင်းမာဟီမ်ငါ ကနားကော သာပ်မူဟာမ်းကဲ့အယ် ဟီမ်ငါ ရှလီးရား မဟက်ထေရင်ကယ်မာ့ ပီပီသသရယ် သပေါက်ထေရင်ဟာမ်းမာ့။36ကိုယ်တော်ကော တီတ်ဆာဖူမ်နယ် ဟီမ်အောမ်မီကားကာ့ အားလုံးနယ် ဟင်နယ်ဟာမ်း ပြန်နောကဲ့အယ် အငေါရယ် လင်းကွန်းနယ် မိန့်နောမာ့။ အင်းညယ်ငေါဝမ်ရီ ကိုယ်တော် အင်းမာညယ် မိန့်နောနား ဟီမ်နာပ်ကော ငေါဟီးနားရယ် ထာရီမာ့။37တီတ်ဆာလာပ်ရီး တအား အန်းနောတင်းဟီးကဲ့အယ် “ကိုယ်တော်ကော အရာအားလုံးနယ် ကလန်မယ် အောမ်မီစီးရာပ်၊ ကနားတီစ်ကာ တီတ်ဆာလာပ်သယ် သာပ်မူဟာမ်းမူကွန်နယ် အောမ်ကဲ့အီရီကဲ့အယ် ၊အသပေါက်ခါရယ် လင်းငါးကာ တီတ်ဆာလာပ်သယ်ရား သပေါက်ခါဟာမ်ကွန်နယ် အောမ်ကဲ့အီစီးရာပ်” ငေါကဲ့အယ် ငေါဟီးမာ့။
Empower Asia Bible Translation Movement