ရှင်မာကုကျမ်းစာအုပ်6
1ကိုယ်တော်ယေရှုကော ကပေရနောင်မြို့ပါအာနယ် ပူကဲ့အယ် ဟီမ်ဟဲရီကာကာ့ နာဇရက်မြို့ပါအာ တပည့်လာပ်နောက်တူတူ ကြွဟာမ်းမာ့။2ကိုယ်တော်ယေရှုကော စားလောကဲ့အယ် ဟောပြောသွန်သင်နောမာ့။ ကိုယ်တော်ဟောပြောသွန်သင်နောကားလည် သပ်လာပ်ချီးကားကာ့ တီတ်ဆာဖူမ်ငေါ အန်းနောဟီးကဲ့အယ် “ ဟီမ်ငေါ အင်းကာ့ အကြောင်းအရာဖူမ်နယ် တပါအယ် ဆောမ်နီကာသယ်။ အင်းကာ အသိပညာဖူမ် ဟီမ်နန်း ဟင်အီပေးကားသယ်။ အင်းကာညယ် အန်းနောမီးကားကာ့ အရာဖူမ်နယ် ဟီမ်ငေါ မညယ်အောမ်ရင်ငါးသယ်။3ဟီမ်ငေါ လက်သမား ဟီပ်မာ့ယိုလေး။ မာရိကာ ဆာထာကယ်အယ် ယာကုပ်၊ ယောသေ ၊ ယုဒနောက် ရှိမုန်နာပ်ကာ့ အန်းချန်ဟီပ်ယိုလေး။ ဟီမ်ငါစန်းနာပ်ရီ အင်းကာမြို့ဝါး အလေနောက်တူတူ လင်းဟီးကားယိုလေး” ငေါကဲ့အယ် ကိုယ်တော်လည် အလိုမကျ ထာကဲ့လင်းဟီးမာ့။4အင်းညယ်ငေါဝမ်ညီ ကိုယ်တော်ယေရှုကော ဟီမ်နာပ်သယ် “ပရောဖက်ကော ဟီမ်ဟဲရီကာ့ မြို့ဝါးကာ တီတ်ဆာလာပ်၊ မိသားစုဖူမ်၊ ရွှေမျိုးလာပ်ကာ့ပန်းနယ် ကျန်နောကားကာ့ နေရာတိုင်းပါအာကာ့ တီတ်ဆာဖူမ်ငါ့ လေးစားလောကားခံနောထော်မာ့” ငေါကဲ့အယ် မိန့်နောမာ့။5ကိုယ်တော်ကော အင်းမာနေရားမာ့ ကနာဟာကားတီတ်ဆာကြအာလည်ဟာ မီမ်ဟာမ်းကွန်းနယ် ထော်သာမ်ကဲ့အယ် ကုလီကာပြာန်နယ် တခြားအန်းနောမီးကားဖူမ်နယ် မဟာမ်းအောမ်မီရင်နိုး။6ကိုယ်တော်ကော ဟီမ်နာပ်ကာ ယုံကြည်မှုအပေါ်ကာလည် အန်းနောကဲ့လင်းမာ့။ စီးရာပ်သော် ကိုယ်တော်ကော အင်းမာထိန်နဲ့အယ် ထံငါးကာ တခြားထိန်ဖူမ်ပါအာ ဆက်သောကဲ့အယ် ဟောပြောသွန်သင်နီမာ့။7အင်းမာစီးရာပ်သော် ကိုယ်တော်ယေရှုကော သာဝကဆယ့်နှစ်ယောက်သယ် ကော်ကဲ့အယ် ဘုရားရှင်ကသတင်းစကားလည် တီတ်ဆာလာပ်ပါအာ ငေါဝါတီမ် ကယ်ဟောတစ်တွဲစီ တွဲလောကဲ့အယ် မြို့ဖူမ်၊ ထိန်ဖူမ်ပါအာ သာပ်လာမ်ကာ့အကြောင်းနယ်မိန်းနီမာ့။ အင်းမာ့ချိန်နယ် ကိုယ်တော်ကော စိတ်ဆလားဖူမ်နယ် ငေါပ်ပူတီမ် အခွင့်အာဏာလည် ပေးအပ်တီမာ့။8အင်းမာချိန်နယ်ကိုယ်တော်ကော ဟီမ်နာပ်သယ် “ခရီးလာမ်မန်းနော မီမ်တူးကာပန်းနယ် ရှီပ်ထောင်၊ ရောက်တီမ်အူတီမ်ဖူမ်၊ ဖူးဖူမ် မဟာမ်းလာဝါမ်ငါ့။9ဟက်တီမ်းနယ်ကော် စီးလောလိတ်။ အင်းညယ်ငေါရီး အဝတ်စားဖူမ်နယ်ကော ပိုလောကဲ့အယ် လာဟီရာမ်ငါ့။10အင်းမာပြာန်နယ် တမာအရပ်လာဟာမ်ငေါရား ကျဉ်းကျဉ်မာ့ပါအာ ဆာမ်မန်းနော အင်းမာအရပ်လာအယ် အလာမ်ဟာမ်းနိက်ရှီ အင်းမာကျဉ်းမားဟာ တည်းလောဟီးလိတ်၊11အင်းညယ်ငေါဝမ်ညီ တမာ့အရပ်လားဟာမ်းငေါရီး နီမ်နယ် လက်အခံနော်ဝမ်နော် အင်းညယ်အဟီပ်ရယ် နီမ်သပေါက်ကားကာ့ အသပ်ပန်းနော အင်းမာအရပ်လာအယ် ပူဟေကာအချိန်နယ် ဘုရားရှင်ငေါ် အင်းမာဟီမ်နာပ်သယ် အပြစ်အိကားငေါကားလည် သတိအီကားကာ့ အနေနဲ့အယ် နီမ်ငါ သဖာပါအာကာ့ ဖုန်ဖူမ်နယ် ခါလောလက်ပေးဟီးရီလိတ်” ငေါကဲ့အယ် မိန့်နောမာ့။ 12ကိုယ်တော်ယေရှုကတပည့်ဖူမ်နယ် ယောက်တစ်တွဲစီမြို့နောက် ထိမ်ပါအာ ပူဟီးရီကယ်အယ် တီတ်ဆာဖူမ်နယ် အပြစ်ဒုစရိုက်ဖူမ်ပါအာအယ် နောင်တသံဝေဂ လူကဲ့အယ် ဘုရားရှင်ငါဘက်လာ မန်းဟီးရီကွန်နယ် ဟောပြောဟီးရီမာ့။13အင်းမာစီးရာပ်သော် ဟီမ်နာပ်ကော တီတ်ဆာလာပ်ပါအာ ဆာမ်ကဲ့လင်းဟီးကားကာ့ စိတ်ဆလားဖူမ်နယ် ငါပ်ပူကဲ့အယ် ကနာဟာကားကာ့ ဟီမ်နာပ်သယ်ရီး သံလွင်ဆလောနောက် မောကဲ့အယ် အနာရောဂါဖူမ်နယ် ကုလောကဲ့အယ်အီမာ့။14အင်းမာအချိန်နယ် ကိုယ်တော်ယေရှုကာ ဂုဏ်သတင်းငေါ တီတ်ဆာဖူမ် မီမ်းဟော်ဟီတင်ကယ်အယ် တီတ်ဆာဖူမ်ညီး ကိုယ်တော်ကာအကြောင်းနယ် ငေါကဲ့လင်းဟီးကယ်မာ့ အုပ်ချုပ်သောကားဟီမ် ဟေရုဒ် ရီး ကိုယ်တော်အောမ်ငါးကာ အန်းနောမီးကားဖူမ်နယ် သပ်မူဝမ်မာ့။ ကြအာတီတ်ဆာဖူမ်ညီး ကိုယ်တော်ယေရှုလည် “ဟီမ်ငေါ ဝေးငဟူပ်ကာမင်္ဂလာ ဆရာယောဟန် ရှီးစီးကဲ့အယ် ဆိုင်းဟေကာ ထာရင်နာ့။ အင်းသယ်သမာ့ မကာညယ် အန်းနောမီးကားဖူမ်အောမ်ရင်ငါး” ငေါကဲ့အယ် ငေါဟီးမာ့။15ကြအာတီတ်ဆာလာပ်ရီး "ဟီမ်ငေါ ပရောဖက်ဧလိယထာမာ့" ရယ် ငေါဟီးကဲ့အယ် ကြအာတီတ်ဆာလာပ်ကော "ဟီမ်ငေါ မယားမားလည် ငါရီကားကာ ပရောဖက်ဖူမ်ညယ် ပရောဖက်တစ်ပါး ထာ့ကား" ရယ် ငေါညာပ်ချီမာ့။16အင်းညယ်ငေါဝမ်ရီ အုပ်ချုပ်သောကားဟီမ် ဟေရုဒ်ကော ကိုယ်တော်ယေရှုကာ့အကြောင်းနယ် သပ်မူကအယ် မီမ်းဟောဝမ်စန်းနော "ငါကိုယ်တိုင် ဟလာမ်းဟူပ်သယ် တက်တူစ်စီမ်စီရီကာ ဝေးငဟူပ်ကာမင်္ဂလာ ဆရာယောဟန်ငေါ် ရာ အဆာဒ်ဆိုင်းဟာမ်းဟေရာမ်" ရယ် ငေါမာ့။17အင်းမာညယ်ငေါထော်ကာကော် အုပ်ချုပ်သောကားဟီမ် ဟေရုဒ်ကော ဟီမ်ငါနရှီ ဖိလိပ္ပုကာ အိက် ဟေရောဒိလည် လက်ထပ်သောကားကာ ကိစ္စနောက်ပတ်သက်သောကဲ့အယ် ယောဟန်နယ် လင်(မ်)တီမ် အမိန့်အီကဲ့အယ် ထောင်ငါး ချုပ်နှောင်နော်ပေမာ့။18ယောဟန်ငေါ် ဘုရင်ဟေရုဒ်သယ် "နာန်ငါ အန်းချန်ငါ အိတ်သယ် လက်ထပ်သောကားကော ပညတ်တော်နောက်ညီလို" ငေါကဲ့အယ် အကြိမ်ကြိမ် ငေါပေးရီမာ့။ 19အင်းသယ်မာ ဟေရောဒိကော ယောဟန်နယ် ရန်ညိုးပေးကဲ့အယ် ကတ်ရှီးဂါက်ကယ်အယ် လင်းမီရီကက်ရှီးတီမ် ခွင့်လူရီယိုး။20မဟာအောမ်ကယ်လိုးငေါနော ယောဟန်ငေါ် ဖြောင့်မတ်မှန်ကန်နောကဲ့အယ် မြင့်မြတ်သောကားဟီမ် ထာမာ့ငေါကားကာလည် အုပ်ချုပ်သောကားဟီမ် ဟေရုဒ်ကော မီမ်းဟော်ကယ်မာ့ ဟီမ်နယ် လေးစားလောကဲ့အယ် ကာကွယ်လောပေးရီကာ။ ဟီမ်ငေါ ယောဟန် သပေါက်ကားဖူမ်နယ် သာပ်မူကားအခါတိုင်း စိတ်ပင်ပန်းနောမာ့ငေါရီး သပ်လာပ်မူကာလည် နှစ်သက်သောမာ့။21အင်းညယ်ငေါဝမ်ညီ ရာပ်အာလည် ဟေရောဒိကော ယောဟန်နယ် ကက်ရှီးတီမ် အခွင့်ကလန် ထုတ်အီမာ့။ အင်းမာမာန်းရာပ်ကော် အုပ်ချုပ်သောကားဟီမ် ဟေရုဒ် ဟဲကား မာန်းရာပ် ထာကယ်မာ့ မှူးမတ်သာပ်၊ စစ်သူကြီးလာပ်နောက် ဂါလိလဲပြည်ပါအာမာ့ ကျော်ကြားလောကား တီတ်ဆာလာပ်သယ် ဖိတ်သောကဲ့အယ် ဟီမ် ဟဲကား မာန်းရာပ်ပွဲလည် အောမ်မီမာ့။22အင်းမာ ရောက်ကားအူကားပွဲပါအာ ဟေရောဒိကာ ရှိတ်ကော ဆာမ်ညီကဲ့အယ် ကားလောကဲ့ပြလောမာ့။ ဟီမ်ကားလောကဲ့ ပြလောကားကာလည် အုပ်ချုပ်သောကားဟီမ် ဟေရုဒ်နောက် ဟီမ်ငါ နှာမ်ဖူမ်ငေါ သဘောကျလောကယ်မာ့ အုပ်ချုပ်သောကားဟီမ် ဟေရုဒ်ကော “နာန်လိုလောကားကာ့စိမ်နိတ် ၊ နာန်နန်း ငါအီနာပ်၊23နာန် စီမ်ငါးကာ့ မဟာလည်ဟာမ်းငေါရီး ငါအိနာပ်။ ငါကာတိုင်းပြည်တစ်ဝက်ချန်းငေါရီး ငါအိနာပ်” ငေါကဲ့အယ် ခိုင်ခိုင်မာမာရယ် ကတိအီမာ့။24အင်းညယ် ငေါစီးရာနောက် ဟီမ်ငေါ ဟီမ်ငါအမေပါအာ လာမ်ကဲ့အယ် “မဟာလည် စိမ်သင့်နောမ်းသယ်” ငေါကဲ့အယ် စီမ်ညူဝမ်စန်းနော ဟီမ်ငါအမေကော “ဝေးငဟူပ်ကာမင်္ဂလာအီကားကာ့ ဆရာယောဟန်ငါ ဟလာမ်းဟူပ်သယ် စိမ်နိတ်” ငေါကဲ့အယ် ငေါဝမ်မာ့။25ရာဟာမ်းရာ ဟီမ်ငေါ အုပ်ချုပ်သောကားဟီမ် ဟေရုဒ်ပါအာ ကစစ်ကစစ် လာမ်ကဲ့အယ် “ဝေးငဟူပ်ကာမင်္ဂလာ ဆရာယောဟန်ငါ ဟလာမ်းဟူပ်သယ် လင်ဗန်းစုတ်အား သာမ်ကဲ့အယ် ငါနန်း ရာဟာမ်းရာ အီစီမ်းကာပ်မာ့” ငေါကဲ့အယ် လျှောက်တင်နော်မာ့။26အုပ်ချုပ်သောကားဟီမ် ဟေရုဒ်ကော ဟီမ်အီပေးရီကာ ကတိလည် တအားရယ် စိတ်အကလန်ရယ် လင်းမာန်မာ့ငေါရီး နှာမ်နာပ်ကာမန်းနား ဟီမ်ကိုယ်တိုင် အီရီကား ကတိကြောင့်နယ် ဟီမ်နယ် ညာမ်းနောရင်နီယိုး။27အင်းသယ်မာ့ ဘုရင်ဟေရုဒ်ကော ချက်ချင်း စစ်သားဟော်ဝါလည် သာပ်ကဲ့အယ် ယောဟန်ငါ ဟလာမ်းဟူပ်သယ် တက်တူစ်ကဲ့အယ် လာရီတီမ် မိန့်နာန်မာ့။ အင်းမာ စစ်သားကော ထောင်ငါးလာမ်ကဲ့အယ် ယောဟန်ငါ ဟလာမ်းဟူပ်သယ် တက်တူစ်လာမ်မာ့။28စီးရာပ်သော် ယောဟန်ငါ ဟလာမ်းဟူပ်သယ် လင်ဗန်းနားသာမ်ကဲ့အယ် လာရီစီးရာပ်သော် အင်းမာယာပ်ရှီနန်းအီရာမ်မာ့။ စီးရာပ်သော် အင်းမာယာပ်ရှီကော ဟီမ်ငါအမေ ဟေရောဒိနန် အီရာမ်မာ့။29အင်းမာသတင်းနယ် သပ်မူဝမ်စန်းနော ယောဟန်ငါ တပည့်လာပ်ကော် ဟီမ်ငါအလောင်းနယ် လီကဲ့အယ် သယ်လောဟီးရာမ်ကယ်အယ် ဆိုင်းကြဉ်းသာဂူဝါးနား စာန်းဟီးရာမ်မာ့။30ကိုယ်တော်ယေရှုသာပ်လာမ်ငါးကာ သာဝကတစ်ဆယ့်နှစ်ယောက်ကော ထုတ်ထေဟီစန်နော် ဟီမ်နာပ်အောမ်မီကားဖူမ်နောက် ဟောပြောလီကာဖူမ်အားလုံးနယ် ကိုယ်တော်ပါအာ လျှောက်တင်နော်ဟီမာ့။31ကိုယ်တော်ကော တပည့်လာပ်သယ် “တီတ်ဆာလာပ် အပေါ်ကာကာ့ အရပ်လာ လာမ်ကဲ့အယ် နီမ်နိုက်ချာ လာမ်ကဲ့အယ် တအောင်းဟာ ရှောလောဟီးရာလိတ်” ငေါကဲ့အယ် ငေါမာ။ ကိုယ်တော် အင်းညယ် မိန့်နောထော်ကာကော် ဟီမ်နာပ်ခနန်း ရောက်တီမ် အူတီမ်အချိန်ဟာမ် အပေါ်ရယ် လင်းစာပ်အာမ်ကွန်းနယ် တီတ်ဆာပရိတ်သတ်ဖူမ်ငေါ် ဟီမ်နာပ်ပါအာ လီဟီးရာမ် ၊လာမ်ဟာမ်းငါမ် လင်းဟီးကယ်သယ်မာ။32အင်းသယ် ကိုယ်တော်နောက် တပည့်ဖူမ်ငေါ် တီတ်ဆာလာပ် အပေါ်ကာကာ့ အရပ်လာ ဟီမ်နာပ်ချာ လှေနောက် လာမ်ဟီးမာ့။33အင်းညယ်ငေါဝမ်ညီ နံတင်းငါးကာ တီတ်ဆာဖူမ်ငေါ ကိုယ်တော်နောက် တပည့်လာပ် ပူပေးရာမ်ငါကာလည် ယူပ်မူဟီးစန်းနော် ဟီမ်နာပ်သယ် မှတ်တော်ဟီမာ့။ အင်းသယ်မာ့ ထံငါးကာ့ မြို့ဖူမ်ပါအာမာ့ တီတ်ဆာဖူမ်ငေါ ဟီမ်နာပ်လာမ်ငါးနေရား ခြေကျင် ကာပ်ချီးရာမ်ကယ်အယ် ဟီမ်နာပ်လာမ်ငါးနေရား ဟီမ်နာပ်သယ်အရာမ် ထုတ်ချီးရာမာ့။34ကိုယ်တော်နောက်တပည့်တော်ဖူမ်ငေါ လှေစုတ်အားအယ် ဆာပ်လာမ်စန်းနော တီတ်ဆာလာပ်ကော သိုးထိန်းအပေါ်ကာကာ့ သိုးသာမ်းနောက်တူလောကားကာလည် ယူပ်မူဝမ်ကယ်မာ့ စာန်ကယ်အယ် ဟီမ်နာပ်သယ် နံတင်းငါးအကြောင်းရာဖူမ်နယ် စားလောကဲ့အယ် ဟောပြောသွန်သင်နောကဲ့အယ် အီမာ့။35နာန်ကြည်ဟန် ထုတ်အီကယ်မာ့ တပည့်လာပ်ကော် ကိုယ်တော်ပါအာ လီကဲ့အယ် “အင်းကနေရာကော တီတ်ဆာလာပ် အပေါ်ကာကာ့ အရပ် ထာကယ်အယ် အချိန်ရီနောက်ကျလောဝါပ်။36အင်းသယ် အင်းကာတီတ်ဆာဖူမ်နယ် အင်းကာနေရာနောက်ထံငါးကာ လက်ပါးဖူမ်နောက် ထိန်ဖူမ်ပါအာ လာမ်ကဲ့အယ် ရောက်တီမ်အူတီမ်ဖူမ် မီးရာရင်ကွန်းနယ် သာပ်လာမ်နိတ်” ငေါကဲ့အယ် လျှောက်တင်နော်ဟီမာ့။37အင်းမာအချိန်နယ် ကိုယ်တော်ကော တပည့်လာပ်သယ် “ဟီမ်နာပ်ခနန်းနီမ်ပါအာမာ့ ရောက်တီမ် ကြအာကြအာ အီရာမ်နိတ်” ငေါကဲ့အယ် ငေါဝမ်စန်နော် တပည့်လာပ်ကော် “အလေဆူကော ဒေနာရီဒင်္ဂါးနှစ်ရာနောက် ညီလောကားပေါင်မုန့်ဖူမ်နယ် မီးရာကယ်အယ် ဟီမ်နာပ်ခန်း ရောက်တီမ် အီထော်ပ်ကားလေး” ငေါကဲ့အယ် လျှောက်တင်နော်မာ။38အင်းမာအချိန်နယ် ကိုယ်တော်ကော ဟီမ်နာပ်သယ် “နီမ်ပါအာ ပေါင်မုန့်မနေငါမာ့ ငေါကားကာလည် ယူဟီးရာလိတ်” ငေါကဲ့အယ် မိန့်နာန်စန်နော် တပည့်တော်လောပ်ကော ယူဝါကဲ့အယ် ကိုယ်တော်လည် “ပေါင်မုန့် ငါးကြပ်နောက် သမ်းငါ ကယ်မာဟာနိက် ငါကားဆွမ်” ငေါကဲ့အယ် ပြန်နောကဲ့အယ် လျှောက်တင်နော်ဟီမာ့။39ကိုယ်တော်ကော တီတ်ဆာလာပ်သယ် လိပ်စာပ်တွန်စုတ်အား အုပ်စုလိုက် ခွဲလောကဲ့အယ် ထောင်းစီမ်းတီမ် ဟီမ်ငါတပည့်လာပ်သယ် အမိန့်အီမာ။40တီတ်ဆာလာပ်ရီး အယောက်တစ်ရာ၊ အယောက်ငါးဆယ် အင်းညယ် အုပ်စုလိုက် ခွဲလောကဲ့အယ် ထောင်းဟီးရာမ်မာ့။41စီးရာပ်သော် ကိုယ်တော်ကော အင်းမာပေါင်မုန့်ငါးလုံးနောက် သမ်းငါ ကယ်မာလည် လာကဲ့အယ် ရွှေမြို့တော်လည် မျှော်မှန်းနောကဲ့အယ် ဘုရားရှင်ငါ ကျေးဇူးတော်လည် ချီးမွမ်းနောစီးရာမ်စန်နော် ပေါင်မုန့်ဖူမ်နယ် ဆိတ်အာစီအောမ်ကဲ့အယ် တီတ်ဆာလာပ်ခနန်း မန်ကဲ့အယ် အီတီမ် တပည့်တော်လာပ်ခနန်းအီရာမ်မာ။ သမ်းငါ ကယ်မာလည်ရီး အင်းမာညယ်အတိုင်းညယ် အောမ်ကဲ့အယ် တီတ်ဆာလာပ်ခနန်း မန်တီမ် အီရာမ်မာ့။42တီတ်ဆာလာပ်အားလုံးရီး ကြေးကွန်းနယ် ရောက်ချီးမူမာ့။43အင်းမာနောက်သယ် တပည့်လာပ်ရီ ပိုလောကားကာ ပေါင်မုန့်နောက် သမ်းငါဖူမ်နယ် မယ်ဟာမ်စန်နော် ကောမ်ဟာမ်း ဆယ့်နှစ်ဟာမ်း ဖိန်းတင်းနာန်မာ့။44အင်းမာနေရားရောက်ချီးကားကာဖူမ်ပါအာမာ့ ဟော်လောဝါဦးရေဟာ ငါးထောင်ငါမာ့ ။45အင်းမာစီးရာပ်သော် ကိုယ်တော်ကော တပည့်လာပ်သယ် ချက်ချင်း လှေစုတ်အား ဟေစီမ်းကဲ့အယ် ဝေးအိုင်ငါ့ အိုးပါကမ်းနာ ငါကားကာ့ ဗက်ဇဲဒမြို့ဝါး အရာမ် လာမ်ဖာန်းစီမ်းမာ့။ ကိုယ်တော်ကော တီတ်ဆာပရိတ်သတ်သာပ်သယ် သာပ်ထာမ်းတီမ် အင်းမာနေရား ကျန်နောပေးရီမာ့။46တီတ်ဆာပရိတ်သတ်သာပ်သယ် သာပ်ထာမ်းစီးရာမ်စန်နော် ကိုယ်တော်ကော ဆုစိမ်တီမ် တောင်ပေါ်ဝါး ကြွလာမ်မာ့။47နာန်ကြည်ဟန်ထုတ်အာမ်စန်းနော တပည့်လာပ်ကာ လှေကော အိုင်ငါ အလယ်ရာ ထုတ်ကဲ့အယ် ကိုယ်တော်ကော ကုန်းစုတ်အား ဟီမ်ဆွမ်းတစ်ပါးဟာ ငါကဲ့လင်းမာ့။48အင်းမာစီးရာပ်သော် တပည့်လာပ်ကော် လေလည် ဆန်နောကဲ့အယ် ယတ်သောတင်းတင်းညယ် လှေ လှော်လောကဲ့လင်းဟီးကားကာလည် ကိုယ်တော်ကော ယူပ်မူဝမ်မာ့။ ဟလာမ်းအလားဟော်ကာအချိန်နယ် ကိုယ်တော်ကော ဝေးစုတ်အား ဟာကဲ့အယ် ဟီမ်ငါတပည့်လာပ်ကာ လှေပါအာ ကြွလီကယ်အယ် ဟီမ်နာပ်သယ် လာမ်ဖာန်းမင်စာ အောမ်မာန်မာ့။49အင်းညယ်ငေါဝမ်ညီ ကိုယ်တော်ယေရှု ဝေးစုတ်အား ဟာကဲ့အယ် လီကားကာလည် ယူပ်မူဝမ်စန်းနော တစ္ဆေရယ် မသာပ်ချီးကယ်မာ့ ကစာပ်ကယ်အယ် ရမ်းဟီးမာ့။50တပည့်လာပ်ကော် ကိုယ်တော်လည် ယူပ်မူဝါမ်စန်းနော ကစာပ်ကယ်အယ် နီပ်ချီးရာမ်ကယ်မာ ကိုယ်တော်ကော ချက်ချင်း ဟီမ်နာပ်သယ် “သတိငါဟီးလိတ်၊ ငါထာမာ့၊ ကစာပ်ချီရာ့” ငေါကဲ့အယ် မိန့်နောမာ့။51အင်းမာစီးရာပ်သော် ကိုယ်တော်ကော ဟီမ်နာပ်ကာ လှေစုတ်အားထုတ်အာမ်ငါးနောက် ဟလာမ်းမူန်တင်းငါးကာရီ ရပ်သာမ်ကယ်မာ့ တပည့်တော်ဖူမ်ငေါ အင်းမာအဖြစ်ပြက်ဖူမ်နယ် အန်းနောကဲ့ လင်းဟီးရာမ်မာ့။52မဟာအောမ်ကယ်လိုးငေါနော ဟီမ်နာပ်ကာ စိတ်နှလုံးငေါ ပြောင်းလဲလောရင်နိုသယ်မာ့ ပေါင်မုန့်နောက်ပက်သက်သောကဲ့အယ် အန်းနောမီးကားဖူမ်နယ် နားလည်လော်ဟီယိုသယ်မာ့ ထာမာ့။53အင်းမာစီးရာပ်သော် ကိုယ်တော်နောက် တပည့်လာပ်ကော် အိုင်နယ် ပလာပ်စီရာမ်စန်နော် ဂင်နေသရက်ပြည်ပါအာမာ့ ကမ်းစပ်ပါအာ ထုတ်အီကဲ့အယ် လှေလည် ဆိုက်သောပေးရာမ်မာ့။54ဟီမ်နာပ် လှေစုတ်အားအယ် ဆာပ်လီစန်းနော အင်းမာနေရားမာ့ တီတ်ဆာလာပ်ကော ကိုယ်တော်လည် ယူပ်မူမာ့ ယူပ်မူချာန်း မှတ်သော်ဟီမာ့။55အင်းသယ် တီတ်ဆာလာပ်ကော ကိုယ်တော် ငါကားနေရာလည် ဆောမ်းတီမ် ပတ်ဝန်းကျင်တစ်ခွင်လုံးပါအာမာ့ တီတ်ဆာလာပ်ပါအာ ကာပ်ချီးရာမ်မာ့။ အင်းမာနောက်သယ် အဇလာကာ တီတ်ဆာဖူမ်နယ် ဆလောင်းစုတ်အား သာမ်ကဲ့အယ် ကိုယ်တော်ငါမာ့ရယ် သာပ်မူကားနေရာပါအာ ကော်ဟီးရီမာ့။56ကိုယ်တော်ကြွလောကားမြို့တိုင်း၊ ထိန်တိုင်းနောက် ကျေးလက်တိုင်းပါအာမာ့ တီတ်ဆာလာပ်ကော ကနာဟာကားဟီမ်နာပ်သယ် ဈေးငါကားနေရာဖူမ်ပါအာ ချလောပေးဟီးကဲ့အယ် အင်းမာ အဇလကာဟီမ်နာပ်သယ် ကိုယ်တော်ကာ ဝတ်ရုံ ထာခွင့်အီတီမ် စိမ်ဟီးမာ့။ အင်းမာညယ် ထာခွင့်လူကား တီတ်ဆာတိုင်းရီး ဇလားဟာမ်းဟီးရီမာ့။
Empower Asia Bible Translation Movement