ရှင်မာကုကျမ်းစာအုပ်11
1စီးရာပ်သော် ကိုယ်တော်နောက် တပည့်တော်လာပ်ကော ဂျေရုဆလင်မြို့နောက် ထံမီကဲ့အယ် သံလွင်တောင်နောက် ထံငါးကာ ဗက်ဖာဂေထိန်နောက် ဗေသနိထိန်ငါး ထုတ်ချီးရီစန်နော် ကိုယ်တော်ကော တပည့်ကယ်ဟောလည် အရာမ်ဆုံး သာပ်လာမ်မာ့။2အသာပ်လာမ်ကြီစ်သယ် ကိုယ်တော်ကော ဟီမ်နာပ်သယ် “နီမ်ငေါ နီမ်ငါရှေ့ရားက ထိန်ပါအာ လာမ်ဟီးလိတ်။ နီမ်အင်းပါ ထုတ်ပါပ်သော် ဟင်ဟာမ်း အစီးလောမာန်ငါကာ မြည်းဆဟာ နူဝါ ဟော်ပ်ပေးကားလည် ဟော့ပ်တော့ကာ။ အင်းမာမြည်းဆဟာလည် ဆယ်ဟပ်ကဲ့အယ် ငါပါအာ ကော်ရီလိတ်။3တီတ်ဆာဟော်ဝါကော နီမ်နယ် 'မဟာအောမ်ကယ် အင်းညယ် အောမ်ထော်ကားသယ်' ငေါကဲ့အယ် စီမ်ညူဝမ်းနော နီမ်ငေါ 'အင်းကာ မြည်းလည် အရှင် လိုလောကယ် ထာမာ့။ အရှင်ငေါ အမာပ်စာပ်ရယ် အင်းကနေရား ဆာတ်ထေ့ကား' ရယ် ပြန်နောကဲ့ ဖြေလောလိတ်” ငေါကဲ့အယ် မိန့်နောမာ့။4တပည့်ကယ်ဟောရား အင်းမာထိန်ငါးလာမ်ကဲ့အယ် လမ်းပါအာ တံခါးပြာန်ငါ ဆည်ဟော်ပ်ပေးကားကာ မြည်းဆဟာလည် ယူပ်မူကယ်မာ့ ဆယ်လည် ဟပ်ချီးမာ့။5အင်းမာချိန်နယ် အင်းမာနေရား စာပ်ကဲ့လင်းငါးကာ တီတ်ဆာကြအာကော ဟီမ်နာပ်သယ် “နီမ်ငေါ အင်းကာ မြည်းဆဟာကာ့ဆည်လည် ဟပ်ကဲ့အယ် မဟာအောမ်ကယ်အယ်သယ်” ငေါကဲ့အယ် စီမ်ညူဟီးမာ့။6တပည့်ကယ်ဟောရား ကိုယ်တော်ယေရှု ဆောမ်းနာန်ကာအတိုင်း သပေါက်ချီးကယ်မာ့ အင်းမာ့ ဟီမ်နာပ်ရီး မြည်းဆဟာလည် လာတီမ် ခွင့်ပြုလာမ်မာ့။7အင်းမာစီးရာပ်သော် တပည့်လာပ်ကော် အင်းမာမြည်းလည် ကိုယ်တော်ပါအာ ကော်ရီကဲ့အယ် ဟီမ်နာပ်ကာ ဝတ်ရုံဖူမ်နယ် မြည်းဆဟာကာ့ ကဆာမ်းစုတ်အား ကမ်းကဲ့အယ် အီဟီးကဲ့အယ် ကိုယ်တော်ကော အင်းမာမြည်းစုတ်အား ထောင်းငါမ်မာ့။8ကိုယ်တော်ကော မြည်းလည် စီးလောကဲ့လီစန်းနော တီတ်ဆာလာပ်ရီး ဟီမ်နာပ်ကာ ဝတ်ရုံဖူမ်နောက် လမ်းတုန်းငါး ခင်းနောကအယ်အီမာ့။ လမ်းမားကစိန်ငါး သက်တူစ်လီကားကာ သလာပ်သလဲဖူမ်နယ် ကိုယ်တော်လီကားလမ်းမာ ကမ်းကဲ့အယ် အီမာ့။9ကိုယ်တော်ယေရှုကာ မန်းနားဟာကား တီတ်ဆာဖူမ်နောက် ကိုယ်တော်ကာနောက်အာအယ် ဟာကား တီတ်ဆာဖူမ်ငေါ “ဟောရှဏ္ဏ ၊ ဘုရားရှင်ငေါ် ဟီမ်ငါနံမယ်နောက် ကြွလီကာဟီမ်နယ် ကလန်ငါဖူမ် အောမ်ကဲ့အီမာ့။10အဝါဘုရားရှင်ငါ အခွင့်အာဏာနောက် ပေါ်လိကားကာ့ အလေကာဘိုးဘေး ဒါဝိဒ်ကာ သာသနာတော်ကော ချီးမွမ်းထုက်သောမာ့။ စုတ်ခန်ဆုံး ရွှေမြို့တော်ပါအာ ငါကားက ဘုရားရှင်နယ် ချီးမွမ်းနောမာ့” ငေါကဲ့အယ် ရမ်းကဲ့သပေါက်ချီးမာ့။11ကိုယ်တော်ယေရှုကော ဂျေရုဆလင်မြို့ဝါး ထုတ်အာကဲ့အယ် ဗိမာန်တော်ဝါမ်းငါး ဆာမ်ကဲ့အယ် အရာအားလုံးနယ် ယူညာပ်မာ့။ အင်းမာနောက်သယ် ဟလာမ်းနာပ်ခပ်ပမ်းသယ်မာ့ သာဝကတပည့်ဆယ့်နှစ်ယောက်နောက်တူတူ ဗေသနိထိန်ငါး ပူဟီးရီမာ့။12နောက်သယ်ကာ မာန်းရာပ်သယ် ဟီမ်နာပ်ကော ဗေသနိထိန်ငါးအယ် လီဟာမ်းငါးကာ အချိန်နယ် ကိုယ်တော်ကော သားရောက်ခေါပ်ကဲ့လင်းမာ့။13စီးရာပ်သော် ကိုယ်တော်ကော သလတ်သလဲဖူမ် အောပ်ကဲ့အယ် လင်းငါးက ဆငြီမ်းတွန်နယ် စာပါအာအယ် ယူပ်မူဝမ်ကယ်မာ့ ဆငြီမ်းရှီ သမ်တီမ် လာမ်ကဲ့ယူဝါမာ့။ အင်းညယ်ငေါဝမ်ညီ ဆငြီမ်းတွန်ငါကားကာနေရား ကိုယ်တော် ထုတ်အာစန်းနော ဆငြီမ်းရှီ မီမ်းငါးကာ အချိန်ထုတ်ခပ်အူမ်းသယ်မာ့ ဆငြီမ်းရှီ အပေါ်ရယ် သလပ်ဖူမ်နယ်လွဲလောကအယ် မဟာကလဲ့ဟမ်း ယူပ်မူရီယိုး။14အင်းသယ် ကိုယ်တော်ကော အင်းမာတွန်နယ် “နောင်တစ်ချိန်ငါငေါက်သော် နာန်ပါအာမာ့ ရှီစ်ရှီလည် ဟင်ဟာမ်း ရောက်ချီးမုကားယို” ငေါကဲ့အယ် မိန့်နာန်ငါကာလည် တပည့်လာပ်ကော် သာပ်မူဝါပ်ချီးမာ့။15ကိုယ်တော်ယေရှုကော ဂျေရုဆလင်မြို့ဝါး ထုတ်အာမ်စန်းနော် ဗိမာန်တော်ဝါမ်းငါး ဆာမ်ငါမာ့။ စီးရာပ်သော် ဗိမာန်တော်ဝါမ်းငါး အရောင်းအဝယ် အောမ်ငါးကာ တီတ်ဆာဖူမ်နယ် ငါပ်ပူဝမ်မာ့။ ဖူးလဲလှည်လော်ကယ်အယ် လင်းဟီးကား တီတ်ဆာလာပ်ကာ စားပွဲဖူမ်နောက် တကူးကူးနူစ်နူ ငဟေဟီကာတီတ်ဆာလာပ်ကာ ခုံတန်းဖူမ်နယ်ရား လာမှောက်သောပေးဟူမ်မန်မာ့။16စီးရာပ်သော် ကိုယ်တော်ကော ဗိမာန်တော်ဝါမ်းနား မဟာပစ္စည်းဖူမ်နယ်ဟာမ်း လာရီစီမ်းငိုး။17ကိုယ်တော်ကော တီတ်ဆာဖူမ်နယ် “ကျမ်းစာပါအာ ဘုရားရှင်ငေါ် 'ငါကာကျဉ်း ငေါ လူမျိုးတကာဖူမ်နာပ်ကာ ဆုစိမ်ကဲ့အယ် ဝတ်ပြုလောကားကာ ကျဉ်းငေါကဲ့အယ် ကော်ဟီးမယ်' ငေါကဲ့အယ် ရေးလောပေးကား ဟီပ်ယိုလေး။ အင်းညယ်ငေါဝမ်ညီ ရာကော နီမ်ငေါ ဘုရားရှင်ငါ ကျဉ်းနယ် သူခိုးဓမြဖူမ် အီးယူစ်ကာကာ့ နေရာထာကွန်နယ် အောမ်ပေးဟီးမာ့” ငေါကဲ့အယ် သွန်သင်နောမာ့။18ဂျူးပုရောဟိတ်အကြီးအကဲဖူမ်နောက် ကျမ်းထောကား ဆရာဖူမ်ငေါ အင်းမာအကြောင်းနယ် သာပ်မူဝမ်စန်းနော ကိုယ်တော်လည် ကတ်ရှီးတီမ် နည်းလမ်းနယ် စားလောကဲ့အယ် သမ်ဟီးမာ့။ မဟာအောမ်ကယ်လိုးငေါနော တီတ်ဆာဖူမ်ငေါ ကိုယ်တော် ဟောသွန်သင်နောကားလည် တအား အန်းနောဟီးတင်းကယ်မာ့ ဟီမ်နာပ်ကော ကိုယ်တော်လည် ကစာပ်ချီကယ် ထာမာ့။19စီးရာပ်သော် နန်ကြည်ဟန် ထုတ်အာမ်ကယ် ကိုယ်တော်နောက် တပည့်ဖူမ်ငေါ် မြို့ဝါးအယ် ပူဟာမ်းဟီးရီမာ့။20နောက်သယ်ကာ မာန်းရာပ် သယ်လည်စောဆီလည် ကိုယ်တော်နောက် ဟီမ်ငါတပည့်လာပ်ကော် လမ်းလျှောက်သောမယ် လီဟီးစန်းနော သရှန်းပါအာအယ် ညှိုးလောကဲ့အယ် ရှီးလောပ်ကာ ဆငြီမ်းတွန်နယ် ယူပ်မူဟီးရာမ်မာ့။21အင်းမာချိန်နယ် ပေတရုရီး ကိုယ်တော် မိန့်နောပေးကားကာလည် သတိလူရီကယ်မာ့ “ဆရာ ဆငြီမ်းတွန်နယ် ယူဝမ်စာမ်း။ ဆရာ မိန့်နောပေးရီကာကာ့ ဆငြီမ်းတွန်ငေါ် ညှိုးလောကဲ့အယ် ရှီးလောပ်ပါပ်” ငေါကဲ့အယ် ကိုယ်တော်လည် လျှောက်တင်နော်မာ့။22အင်းမာချိန်နယ် ကိုယ်တော်ကော တပည့်လာပ်သယ် “ဘုရားရှင်နယ် ယုံကြည်မှု ငါဟီးလိတ်။23နီမ်နယ် ငါအမှန်ငေါထော်ဝမ်နော် တီတ်ဆာဟော်ဝါကော အင်းကာ့တောင်နယ် အင်းကနေရားကြွလီကယ်အယ် ပင်လယ်ရား လက်ဆာမ်ငါမ်နိတ်ရယ် ငေါကဲ့အယ် ကိုယ်ကာစိတ်အား သံသယအပေါ်ရယ် ဘုရားရှင်ငေါ် ဟီမ်ငေါကားအတိုင်း ထာကွန်နယ် အောမ်ကဲ့အိကား ငေါကဲ့အယ် ယုံကြည်လောဝမ်းနော ဘုရားရှင်ငေါ် ဟီမ်ငေါကားအတိုင်း ထာကွန်နယ် အောမ်ကဲ့အိကား။24အင်းသယ်မာ့ နီမ်နယ်ငါ မိန့်နောကာပ်ကာကော် နီမ် ဆုစိမ်ငါးအခါလည် နီမ် စိမ်ငါးလည် ဘုရားရှင်ငေါ် အီနာပ်ရယ် ယုံကြည်လောဝမ်းနော ဘုရားရှင်ငေါ် နီမ်စီမ်ငါးလည် အမှန်တကယ် အိကား။25နီမ်ငေါ ဘုရားရှင်ပါအာ စာပ်ကဲ့အယ် ဆုစိမ်ငါး အချိန်တိုင်း အရာမ်ဦးဆုံး အင်းမာဟီမ်ငေါ နီမ်နယ် အောမ်မီကားဖူမ်နယ် ခွင့်လွတ်သောကဲ့အယ် အီဟီးလိတ်။ အင်းညယ်မားလည် ရွှေမြို့တော်ပါအာ ငါကားက အဝါဘုရားရှင်ရီ နီမ်ငေါ အကလန်တင်ငါက အပြစ်ဖူမ်နယ် ခွင့်လွှတ်သောကဲ့အယ် အိကား။26တကယ်လို့ နီမ်ငေါ သမီပ်သယ် ခွင့်လွတ်သောကဲ့အယ် အအီရယ် လင်းမန်းနော ရွှေမြို့တော်ပါအာ ငါကားကာ့ အဝါဘုရားရှင်ရီ နီမ်ငါ ဒုစရိုက်အပြစ်ဖူမ်နယ် ခွင့်လွှတ်သောကဲ့အိကားယို” ငေါကဲ့အယ် မိန့်နောမာ့။ 27ရာကာပ်ဝါပ် ကိုယ်တော်ယေရှုနောက် တပည့်ဖူမ်ငေါ် ဂျေရုဆလင်မြို့ဝါ ထုတ်ချီးရီမာ့။ ကိုယ်တော်ယေရှု ဗိမာန်တော်ဝါမ်းငါး လမ်းလျှောက်သောကဲ့လင်းငါး အချိန်နယ် ပုရောဟိတ်အကြီးအကဲလာပ်၊ ကျမ်းထောကား ဆရာဖူမ်နောက် ဂျူးလူမျိုးခေါင်းဆောင်နာပ်ကော ကိုယ်တော်ပါအာ ထုတ်ချီးရီမာ့။28ဟီမ်နာပ်ကော ကိုယ်တော်လည် “နာန်ပါအာ မဟာအခွင့်အာဏာငါကယ် အင်းကာဖူမ်နယ် အောမ်ထော်ကားသယ်။ အင်းကာအခွင့်အာဏာလည် နာန်နန်း ဟင်အီပေးကားသယ်” ငေါကဲ့အယ် စီမ်ညူဟီးမာ့။29အင်းမာချိန်နယ် ကိုယ်တော်ကော “နီမ်နယ်ရီး ငါမေးခွန်းကြအာစီမ်ညူနာပ်။ အင်းကာ မေးခွန်းနယ် နီမ်ဖြေလောစီးရာပ်သော် အင်းကာဖူမ်နယ် အောမ်တီမ် အခွင့်အာဏာလည် ဟင်ပါအာအယ် လူကားငေါကားကာလည် ငါငေါ့နာပ်။30'တီတ်ဆာလာပ်ခနန်း ဝေးငဟူပ်ကာမင်္ဂလာအောမ်တီမ် ယောဟန်နန်း ဟင်အခွင့်အာဏာအီပေးကားသယ်။ ဘုရားရှင်ပါအာအယ် လူကားနာန် ၊တီတ်ဆာလာပ်ပါအာအယ် လူကားနာန်၊ ဖြေလောလိတ်' ငေါကဲ့အယ် စီမ်ညူမာ့။31အင်းမာဟီမ်နာပ်ကော အင်းမာမေးခွန်းနယ် ဖြေလောတီမ် ဟီမ်နာပ်အချန်းချန်း ဆွေးနွေးလောကဲ့ လင်းဟီးမာ့။ ဟီမ်နာပ်ကော" တကယ်လို့ 'ဘုရားရှင်ပါအာအယ်' ငေါကဲ့အယ် ဖြေလောဝါပ်သော် ယေရှုကော 'အင်းညယ်ငေါက်သော် နီမ်ငေါ မဟာအောမ်ကယ် ယောဟန်နယ် အယုံနော်ဟီကာသယ်' ငေါကဲ့အယ် ငေါ့ကာ။32အင်းညယ်ငေါဝမ်ရီ ‘တီတ်ဆာလာပ်ပါအာအယ်’ ငေါကဲ့အယ်ရာ ဖြေလောကဲ့အယ် လူဝိုငေါကဲ့အယ် အချန်းချန်း သပေါက်ချီးမာ့။ မဟာအောမ်ကယ်လိုးငေါနော တီတ်ဆာလာပ်ကော ယောဟန်နယ် ပရောဖက် ငေါကဲ့အယ် ယုံကြည်လောဟီးကယ်မာ့ ဟီမ်နာပ်ကော တီတ်ဆာလာပ်သယ် ကစာပ်ချီကယ် ထာမာ့။33အင်းသယ် ဟီမ်နာပ်ကော ကိုယ်တော်လည် 'အလေဆူကော မီမ်းဟို' ငေါကဲ့အယ် ဖြေလောဟာမ်းမာ့။ အင်းမာချိန်နယ် ကိုယ်တော်ကော ဟီမ်နာပ်သယ် 'အင်းညယ်ငေါက်သော် ငါရီး အင်းကာဖူမ်နယ် မဟာအခွင့်အာဏာနောက် အောမ်မာ့ ငေါကားလည် ဖြေလော့ကာဟီပ်အို'” ငေါကဲ့အယ် မိန့်နောမာ့။
Empower Asia Bible Translation Movement