ရှင်မာကုကျမ်းစာအုပ်12
1စီးရာပ်သော် ကိုယ်တော်ကော ပုံဥပမာဖူမ်နောက် ဂျူးဘာသာရေးခေါင်းဆောင်ဖူမ်နယ် ဟောပြောလောကားကော “တီတ်ဆာဟော်ဝါကော စပျစ်ခြံနယ် စေါက်ကဲ့အယ် ခြံစည်းရိုးဖူမ်နောက် ခတ်သောပေးမာ။ စပျစ်ရှီစ်ရှီပါအာအယ် စပျစ်ဝေး ညှစ်သောတီမ် ထွာမ်ထူကဲ့အယ် စပျစ်ခြံနယ် ယူထက်တီမ် မျှော်စင်နယ် စာပေးမာ။ စီးရာပ်သော် အင်းမာ စပျစ်ခြံနယ် စပျစ်ခြံအငှားသားဖူမ်နယ် ငှားလောပေးစီးကဲ့အယ် အခြားနိုင်ငံပါအာ ခရီးပူပေးရီမာ့။2စပျစ်ရှီဖူမ် ပေါ်လောကား အချိန်ထုတ်ပီပ်သော် အင်းမာစပျစ်ခြံပိုင်ရှင်ငေါ ဟီမ်ငါ စပျစ်ခြံပါအာကာ့ အကျိုးမြတ်ကြအာဖူမ်နယ် လာတီမ် ဟီမ်ငါဆူဟော်ဝါလည် ခြံအငှားသားဖူမ်ပါအာ သာပ်လီမာ့။3အင်းညယ်ငေါဝမ်ညီ စပျစ်ခြံအငှားသားဖူမ်ငေါ် အင်းမာဆူလည် လင်(မ်)ကဲ့အယ် သမ်းကနာစီမာလည် မဟာဟာမ်း အအီရယ် သာပ်ထာမ်းငါမ်မာ့။4စပျစ်ခြံပိုင်ရှင်ငေါ အခြားဆူ ဟော်ဝါလည် အင်းမာ ခြံအငှားသားလာပ်ပါအာ ထပ်သောကဲ့အယ် သာပ်ထာမ်းငါမ်စန်နော် ဟီမ်နာပ်ကော အင်းမာဆူလည်ရီး အင်းမာဆူ ဟလာမ်းဟူပ်သယ် သမ်းကနာကယ်အယ် မန်းကတန်ကွန်နယ် အောမ်ဟီးမာ့။5အင်းမာနောက်တယ်ကော ပိုင်ရှင်ငေါ နောက်သယ် ဟော်ဝါလည် သာပ်ထာမ်းစန်းနော် အင်းမာဆူလည် ခြံအလုပ်သမားဖူမ်ငေါ် ကတ်ရှီးဟီးရာမ်မာ့။ အင်းမာနောက်သယ် ခြံပိုင်ရှင်ငေါ အခြားနံတင်းငါးကာ ဆူဖူမ်နယ် ကုန်းကျိရယ်နိပ်စက်သောမာ့ ။ အင်းမာဟီမ်နာပ်ကော ဆူကြအာလည် သမ်းကနာညာပ်ကယ်အယ် ကြအာလည်ကော် ကတ်ရှီးဟူမ်မာန်မာ့။6နောက်ဆုံးငေါက်သော် ဟီမ်ငေါ ခြံအငှားသားဖူမ်ပါအာ သာပ်ထာမ်းတီမ် တီတ်ဆာကော ဟီမ်မူမ်းတင်းငါးကာ့ ဟီမ်ငါဆာဟော်ဝါဟာနိက်ပန်း ကျန်နောကား။ ခြံပိုင်ရှင်ငေါ 'ငါကာဆာလည်ကော ဟီမ်နာပ် ရိုသေလေးစားလောဟိကာညယ်' ငေါကဲ့အယ် ဟီမ်ငါဆာလည် သာပ်လာမ်မာ့။7အင်းညယ်ငေါဝမ်ညီ အင်းမာအငှားသားလာပ်ကော် ခြံပိုင်ရှင်ငါ ဆာလီကားကာလည် ယူပ်မူစန်းနော 'အင်းမာဟီမ်ငေါ အင်းကာခြံနယ် အမွေဆက်ခံနောထော်ပ်ကား ဟီမ်ထာမာ့။ အင်းသယ် အလေကော် ဟီမ်နယ် ကတ်ရှီးဟီးရာမ်မယ်။ အင်းညယ်မားလည် ဟီမ်လုကား အမွေဖူမ်နယ် အလေလူဟိကာ' ငေါကဲ့အယ် အချန်းချန်းငေါဟီးမာ့။8စီးရာပ်သော် ဟီမ်နာပ်ကော စပျစ်ခြံပိုင်ရှင်ငါဆာလည် လင်(မ်)ကလယ်စီရာပ်သော် ကတ်ရှီးကဲ့အယ် ဟီမ်ငါအလောင်းနယ် စပျစ်ခြံပြာန်ငါ သက်ပေးဟီးရာမ်မာ့” ရယ် ဟောပြောလောမာ့။9စီးရာပ်သော် ကိုယ်တော်ကော ဆက်သောကဲ့အယ် 'အင်းမာညယ်ငေါက်သော် စပျစ်ခြံပိုင်ရှင်ငေါ မညယ် အောမ်ဟပ်ကားသယ်။ ဟီမ်ငေါ ခြံနားလီကဲ့အယ် ခြံအငှားသားဖူမ်နယ် ကက်ရှီးစီးရာပ်မာ့။ စီးရာပ်သော အင်းမာခြံနယ် တခြားတီတ်ဆာလာပ်ခနန်း လွဲပြောင်းနောကဲ့အယ် အီရာမ်ကား။10"ကျဉ်းစာကားကာ့ တီတ်ဆာဖူမ် အသုံးအဝင်နိုရယ် သက်ပေးကားကာ့ သလောင်ဆီကော အဆောက်အဦးစာပါအာ အရေးကြီးလောဟန်ဆုံး ထောင့်ချုပ်သောကား သလောင်ဆီဖူမ်ထာရီမာ့။11အင်းကာအရာဖူမ်ငေါ ဘုရားရှင်အောမ်ပေးကား အရာဖူမ်ထာကယ်မာ့ တီတ်ဆာလာပ်ကာ အမြင်နာကော် အန်းနောမီးကားဖူမ်ထာရီမာ့' ငေါကားကာ့ ကျမ်းချက်ဖူမ်နယ် နီမ်ကြေဟီမာန်မာ့ဟီယိုလေး" သေချာလောမာ့ ငေါကဲ့အယ် မိန့်နောမာ့။12အင်းမာအချိန်နယ် ဂျူးဘာသာရေးခေါင်းဆောင်ဖူမ်ငေါ ဆိုးလောတင်းငါးက ဟီမ်နာပ်အောမ်မှီကားဖူမ်နောက်ပတ်သက်သောကအယ် ကိုယ်တော် အီကားကာ့ အင်းကာ့ ပုံဥပမာကော ဟီမ်နာပ်သယ် ရည်ညွှန်းနောကဲ့အယ် မိန့်နောကားလည် မီမ်းဟော်ကယ်မာ့ ကိုယ်တော်လည် လင်(မ်)ပေးဟီးကာပ်မာ့။ အင်းညယ်ငေါရီး အကလန်ရယ်အောမ်ပါတ်သော တီတ်ဆာ ပရိသတ်ဖူမ်ပြန်နောကအယ် အောမ်ဟမ်းကားလည် ကစာပ်ကယ်မာ့ ကိုယ်တော်လည် သက်ပေးကဲ့အယ် ပူဟာမ်းဟီးရာမ်မာ့။13အင်းမာနောက်သယ် ဂျူးဘာသာရေးခေါင်းဆောင်ဖူမ်ငေါ ကိုယ်တော် သပေါက်ကားနေရား အမှားကြအာကြအာ ထောင်ချောက်ဆင်နောမူကွန်နယ် ဖာရိရှဲကြအာဖူမ်နောက် အုပ်ချုပ်သောကားဟီမ် ဟေရုဒ်ကာ့ တီတ်ဆာကြအာဖူမ်နယ် ကိုယ်တော်ပါအာ သာပ်လီမာ့။14အင်းမာဟီမ်နာပ်ကော ကိုယ်တော်ပါအာ ထုတ်ချီးရီကယ်အယ် “ဆရာကော် ရိုးသားဖြောင့်မတ်သောကာဟီမ် ထာကယ်အယ် ဟင်နယ်ဟာမ်း မီပ်မန်းအလိုက်သောရယ် တီတ်ဆာအားလုံးနယ် တန်းတူညီမျှဆက်ဆံနော်ကယ်အယ် ဘုရားရှင်ငါ လမ်းစဉ်ဖူမ်နယ် အမှန်တိုင်း ဟောပြောသွန်သင်နောကားလည် အလေဆူ မီမ်းဟော်မာ။ အင်းသယ် ဘုရင်ကြီး လည် အခွန်ဖူမ် ဆက်သလောကားကော ပညတ်တော်နောက် ညီလောနေး။ အလေဆူလာပ်ကော အခွန်ဆက်သလောသင့်နောနာန်၊ ဆက်သသင့်နိုးနာန်” ငေါကဲ့အယ် လျှောက်တင်နော်မာ့။15အင်းညယ်ငေါဝမ်ရီ ကိုယ်တော်ကော ဟီမ်နာပ် တီတ်ဆာကလန် ဟန်ဆောင်နောကားလည် မီမ်းဟော်ကယ်မာ့ ဟီမ်နာပ်သယ် “နီမ်ငေါ ငါလည် မဟာအောမ်ကယ် စမ်းသပ်သောဟီးကားသယ်။ ငါယူတီမ် ဒေနာရီဒင်္ဂါး ပါတ်အာလည် လာဟီးရီလိတ်” ငေါကဲ့အယ် မိန့်နောမာ့။16ဟီမ်နာပ်ကော ဒေနာရီဒင်္ဂါး ပါတ်အာလည် လာရီစန်းနော ကိုယ်တော်ကော “အင်းကာဖူးဒင်္ဂါးပါအာ ဟင်ငါပုံနောက် ဟင်ငါ နံမယ် ပါလောကားသယ်” ငေါကဲ့အယ် ဟီမ်နာပ်သယ် စီမ်ညူမာ့။ အင်းမာဟီမ်နာပ်ရီး “ဘုရင်ကြီးကာ ပုံနောက် ဟီမ်ငါနံမယ် ပါလောမာ” ငေါကဲ့အယ် ဖြေလာမ်မာ့။17အင်းမာချိန်နယ် ကိုယ်တော်ကော “ဘုရင်ကြီးနောက် ဆိုင်နောကားကာဖူမ်နယ် ဘုရင်ကြီးဟနန် အီလိတ်။ ဘုရားရှင်နောက် ဆိုင်နောကားဖူမ်နယ်ရီး ဘုရားရှင်ဟနန်း ဆက်သလောဟီးလိတ်” ငေါကဲ့အယ် မိန့်နောကယ်မာ့ အင်းမာဟီမ်နာပ်ရီး အန်းနောဟီးရာမ်မာ့။18အင်းမာစီးရာပ်သော် ရှီးစီးကဲ့အယ် အဆာဒ်ဆိုင်းဟာမ်းငါးလည် အယုံကြည်လောကားကာ့ ဇဒ္ဒုကဲအဖွဲ့ရားမာ့ တီတ်ဆာလာပ်ကြအာကော ကိုယ်တော်ပါအာစီမ်ညူကာ့ကယ်မာ့ လီဟီးမာ့။19အင်းမာဟီမ်နာပ်ကော ကိုယ်တော်လည် “ဆရာ၊ မောရှေကာတကယ်ရယ် တီတ်ဆာဟောဝါကော ရှိတ်ဆာအပေါ်ရယ် ရှီးရာပ်သော ဟီမ်ငါ နရှီကော ရှီးရာကာ့ အန်းချန်ငါ အိတ်သယ် လက်ထပ်သောသင့်နောမာ့။ တကယ်လည် အင်းမာကယ်ဟောကော ရှီတ်ဆာဟဲရီသော တီတ်ဆာဖူမ်ငေါ ဆဟာလည် ရှီရာန်ငါက အန်းချန်ငါဆာငေါကအယ်သတ်မှတ်သောပေးမှရယ်ရေးလော ပေးမာ့။20အင်းညယ်ငေါက်သော် တစ်ခါလည် အန်းချန်နရှီ ခုနစ်ယောက် ငါကဲ့အယ် အန်းချန်တုန်ငေါ် ကျေးမီပ်စေါက်စီးကဲ့အယ် ရှိတ်ဆာ အလူကြီစ်သယ် ရှီးပေးရာမ်မာ။21အင်းသယ် ဒုတိယ တုန်းဟန်ဆုံးဟီမ်ငေါ ဟီမ်ငါအန်းချန်ငါ အိတ်သယ် လာကဲ့အယ် ဟီမ်ညီး ရှိတ်ဆာ အလူရီရယ် ရှီးဟာမ်းမာ့။ အင်းသယ်မာ တတိယ တုန်းစဟန်ဆုံးဟီမ်ညီး အင်းမာတိုင်းမန်း ရှီးရာပ်ထာမ်းမာ့။22အင်းမာနောက်သယ် အန်းချန်နရှီ ခုနစ်ယောက်စလုံး အင်းမာနည်းအတိုင်း အင်းမာယာပ်ရှီနောက် လာဟီးကဲ့အယ် ရှိတ်ဆာအပေါ်ရယ် ရှီးရာမ်စန်နော် နောက်ဆုံးငါးကော အင်းမာယာပ်ရှီရီး ရှီးရာမ်မာ။23အင်းညယ်ငေါဝမ်ရီ ရှီးကား တီတ်ဆာလာပ်အားလုံး အဆာဒ်ဆိုင်းဟာမ်းငါး အချိန်နယ် အန်းချန်နရှီ ခုနစ်ယောက်စလုံးနောက် လက်ထပ်သောပေးကားကာ့ ယာပ်ရှီကော ဟင်ငါအိတ် ထာ့ကားသယ်” ငေါကဲ့အယ် လျှောက်သောဟီးမာ့။24အင်းမာချိန်နယ် ကိုယ်တော်ကော “နီမ်ငေါ အင်းမာ့အကြောင်းအရာနောက်ပတ်သက်သောကဲ့အယ် ရေးလောပေးကားကာ့ ကျမ်းစာလည် အနားလည်လို။အင်းမာအပြင် တီတ်ဆာဖူမ်ငေါ အဆာပ်ဆိုင်းဟန်းကွန်းနယ် အောမ်ကဲ့အယ် အီဟန်းရင်ငါကာ့ ဘုရားရှင်ငါ တန်ခိုးတော်လည်ရီး အမီမ်းဟော်ကယ်မာ့ အင်းကာညယ် အယူဆလွဲမှားလောကား ထာမာ့။25ရှီးရာန်ငါကအားလုံးဖူမ်နယ် ရှီးကနေရာပါအာနယ် အဆာဒ်ဆိုင်းဟေစနော ဟလောဝါဖူန်နာပ်ရီး ယာပ်ရှီလာပ်တယ် လက်ထပ်သောကားဟန်းထာကာ့ထာ ယာပ်ရှီလာပ်ကော ဟောလောဝါလာပ်တယ် လက်ထပ်သောကားဟန်းထာကာ့ထာ အောမ်ဟာကားကာ့အစား ရွှေမြို့တော်ပါအာ ငါကားကာ့ ဟမန်းနာပ်ညယ် လက်ထပ်သောကားဖူမ်၊ အီရောက်ကားဖူမ် အောမ်ဟီစော်မန်။ ပေးစားလောကားဖူမ်ညီး ငါစောမ်းဟပ်ကာယို။26အင်းမာပြာန်နယ် ရှီးစီးကားဟီမ်နာပ် ဆိုင်းဟာမ်းငါးနောက် ပတ်သက်သောကဲ့အယ် မောရှေကာ ပညတ်တော်ပါအာ ဘုရားရှင်ငေါ် ဝမ်လူပ်ကဲ့လင်းငါကာ ချုံပုပ်အကြောင်း ကျိန်းရေးလောပေးကား စာပိုဒ်ပါအာ ဘုရားရှင်ငေါ် 'ငါကော အာဗြဟံငါ ဘုရား ၊ဣဇက် ကာဘုရား ၊ယာကုပ်ကာ ဘုရားထာမာ့' ငေါကဲ့အယ် မောရှေလည် မိန့်နီကာကာလည် ကြေဟီမာန်ငိုလေး။ 27အင်းသယ် ဘုရားရှင်ငေါ် ရှီးစီးကား ဟီမ်နာပ်ကာ့ ဘုရားအဟီပ်ရယ် အဆာဒ်ဆိုင်းငါးကာ့ ဟီမ်နာပ်ကာ ဘုရားထာမာ့။ အင်းသယ် နီမ်ငေါ တအားတုန်းရယ်ဟာမ် အယူအဆမှားလောကဲ့အယ် လင်းဟီးမာ့” ငေါကဲ့အယ် မိန့်နောမာ့။28အင်းမာနေရားမာ့ ကျမ်းထောကား ဆရာဟော်ဝါကော ဇဒုက္ကဲနောက် ကိုယ်တော်ယေရှုလာပ် ဆွေးနွေးလောကဲ့လင်းဟီးကားကာလည် သပ်ကဲ့အယ် ကိုယ်တော်ကော ဟီမ်နာပ်ကာ မေးခွန်းနယ် ကလန်မယ် ဖြေလောဟာမ်းငါးလည် ယူပ်မူဝမ်စန်းနော ကိုယ်တော်ပါအာ ထံကဲ့အယ် “ပညတ်တော်အားလုံးပါအာ တမာ့ပညတ်တော်ကော် အရေးကြီးလောဟန်ဆုံးသယ်” ငေါကဲ့အယ် လျှောက်သာမ်မာ့။29ကိုယ်တော်ကော “အရေးကြီးဆုံး ပညတ်တော်ကော် 'အစ္စရေးလူမျိုးလာပ်အားလုံး သပ်ချီးလိတ်။ အလေကာ အရှင်ထာကာကာ့ ဘုရားရှင်ငေါ် တစ်ပါးဟာ ငါကားကာ့ အရှင်ထာမာ့။30နီမ်ငါ အရှင်ထာကာကာ့ ဘုရားရှင်နယ် နီမ်ငါ ကိုယ်၊ စိတ်၊ နှလုံး သုံးပါစလုံးနောက် မူမ်းထော်ပ်ကား။31ဒုတိယအရေးကြီးလောဟန်ဆုံး ပညတ်တော်ကော် နာန်ငါ ကျဉ်းဖာန်ကျဉ်းဟက်သယ် နာန်နောက်နာန် မူမ်းကယ်ညယ် မူမ်းထော်ပ်ကားထာမာ့။ အင်းကာ ပညတ်ဖူမ်ထက်သယ် တခြားအရေးကြီးလောကားကာ့ ပညတ်တော်ဖူမ် အပို' ငေါကဲ့အယ် ကျမ်းထောကားကာ ဆရာလည် ပြန်နောကဲ့အယ် ဖြေဟာမ်းမာ့။32အင်းမာဟီမ်ရီး ကိုယ်တော်လည် 'ဟီပ်မာ့ ဆရာ၊ ဘုရားရှင်ငေါ် တစ်ပါးဟာ ငါကဲ့အယ် အင်းမာဘုရားရှင်ငါ ပန်းနယ် တခြားဘုရားအပို ငေါကဲ့အယ် ဆရာမိန့်နောကားကော မှန်နောမာ့။33အလေဆူလာပ်ကော ဘုရားရှင်နယ် ကိုယ်၊ စိတ်၊ နှလုံး သုံးပါးစလုံးနောက် မူမ်းထော်ပ်ကား။ ကိုယ်ကာနောက်ကိုယ် မူမ်းကယ်ညယ် သမီပ်သယ်ရီး မူမ်းဟီးထော်ပ်ကား။ အင်းကာပညတ်တော်ဖူမ်ငေါ တခြားကျန်နောကားကာ့ ပူဇော်လောကားဖူမ် အောမ်ငါးထက်သယ် ပိုလောကဲ့အယ် အရေးကြီးလောဟန်ဆုံးထာမာ့' ငေါကဲ့အယ် ပြန်နောကဲ့အယ် လျှောက်တင်ဟာမ်းမာ့။34အင်းမာဟီမ် ဉာဏ်ပညာနောက် ပြန်နောကဲ့အယ် ဖြေဟာမ်းငါးကာဖူမ်နယ် ကိုယ်တော်ယေရှု သာပ်မူစန်းနော ကိုယ်တော်ကော 'နာန်ငေါ ဘုရားရှင်ငါ သာသနာတော်နောက် စာကားကာဟီမ် ဟီပ်ယို'” ငေါကဲ့အယ် မိန့်နောမာ့။ အင်းမာချိန်မာအယ် စားလောကဲ့အယ် ကိုယ်တော်ယေရှုလည် ဟင်ဟာမ်း မေးခွန်းဖူမ် စီမ်ညူဟီးစာပ်စော်မန်။35ရာပ်အာလည် ကိုယ်တော်ယေရှုကော တီတ်ဆာပရိသတ်သာပ်သယ် ဗိမာန်တော်ဝါမ်းငါ ဟောပြောသွန်သင်နောကားအချိန်နယ် ကျမ်းထောကား ဆရာလာပ်ကော “မေရှိယလည် ဘုရင်ဒါဝိဒ်ကာ မျိုးဆက်ထာမာ့ရယ်ငေါဟီးမာ့။အင်းမာ့အကြောင်းအရာနောက်ပတ်သက်သောကဲ့အယ် နီမ်ငေါ မာ့ညယ်မာတါပ်တယ်။36မဟာအောမ်ကယ်လိုးငေါနော ဘုရင်ဒါဝိဒ် ကိုယ်တိုင်ငေါ ဉာဏ်အလင်းတော်နောက် ငေါရီကာကော် 'ဘုရားရှင်ငေါ် "နာန်ငါ ရန်သူလာပ်သယ် နာန်ငါ သာသဖာတောမ်နား စီးကွန်းနယ်အထိရှုံးနောစီမ်းကာ အချိန်ထုတ်ကွန်းနယ် ငါကာလက်ယာဘက်လာ ထောင်းကဲ့လင်းနိတ်" ငေါကဲ့အယ် ငါကာ အရှင်နယ် မိန့်နောမာ့' ငေါကဲ့အယ် ထာမာ့။37ဘုရင်ဒါဝိဒ် ကိုယ်တိုင်ငေါ ကယ်တင်ရှင်မေရှိယလည် ‘အရှင်’ ငေါကဲ့အယ် ကော်ဝမ်းနော ၊ကယ်တင်ရှင် မေရှိယကော ဘုရင်ဒါဝိဒ်ကာ့မျိုးဆက် မညယ်ထာရင်ဟပ်ကားသယ်” ငေါကဲ့အယ် မိန့်နောမာ့။ နံတင်းငါးက တီတ်ဆာဖူမ်ညီး ကိုယ်တော်ယေရှု ဟောပြောသွန်သင်နောကားဖူမ်နယ် သာပ်လာပ်မူကာ နှစ်သက်သောဟီးမာ့။38ကိုယ်တော်ကော ဆက်သောကဲ့အယ် “ကျမ်းထောကား ဆရာလာပ်သယ် သတိအောမ်နိတ်၊ ဟီမ်နာပ်ကော တန်ဖိုးကြီးလောကား ဝတ်ရုံစုတ်ဝီစ်ဝီစ်သယ် ဖူမ်မူကားဖူမ်၊ တီတ်ဆာလာပ်ကော ဟီမ်နာပ်သယ် ဈေးရား တလေးတစားနှုတ်ဆက်သောကားဖူမ်၊39ဓမ္မာရုံဖူမ်ပါအာ အရှေ့ဆုံးထိုင်ခုံငါး ထောင်းမူကာဖူမ်၊ ဧည့်ခံပွဲဖူမ်ပါအာ ဖိတ်သောကား ခံနောထော်ကာ အချိန်နယ် အရေးကြီးလောကားကာ နှာမ်နှပ်ချာ ထောင်းမူကာကာ့ အထူးထိုင်ခုံဖူမ်ပါအာ ထောင်းမူကာဖူမ်နယ် တအားတုန်းညယ် နှစ်သက်သောဟီးမာ့။40အင်းမာဟီမ်နာပ်ကော မုဆိုးမလာပ်ကာ ပစ္စည်းဥစ္စာနောက် ကျဉ်းဖူမ်နယ် အလူကာလည် လူကွန်းနယ် သိမ်းနောကဲ့အယ် တီတ်ဆာကလန်ညယ် ဟန်ဆောင်နောကဲ့အယ် စုတ်ဝီစ်ဝီရယ် ဆုစိမ်ကဲ့အယ် အီဟီးဟာမာ့။ အင်းသယ် ဟီမ်နာပ်ကော ပိုလောကဲ့ပြင်းနောတင်းငါးကာ အပြစ်စီရင်နောကားလည် ခံနောထော်ပ်ကား” ငေါကဲ့အယ် မိန့်နောမာ့။41ကိုယ်တော်ကော ဗိမာန်တော်ဝါမ်းငါး အလှူခံသေတ္တာဘက်လာ မန်းကဲ့အယ် ထောင်းကဲ့အယ် တီတ်ဆာလာပ်ကော အင်းမာ အလှူခံသေတ္တာနား အလှူဖူး စာမ်းကဲ့လင်းဟီးကားကာလည် ယူကဲ့လင်းငါး။ ဆွာမ်းငါးကာ တီတ်ဆာအများစုကော အလှူဖူး နံဟန်ဆုံး စာမ်းကဲ့အယ် လှူဒါန်းနောဟီးမာ့။42အင်းမာနောက်သယ် ဆင်းရဲလောတင်းငါးကာ့ မုဆိုးမဟော်ဝါရီး လီကဲ့အယ် တအား တန်ဖိုးနည်းလောတင်းငါးကာ အဿရိဒင်္ဂါးကယ်ပါတ်သယ် စာမ်းကဲ့အယ် လှူဒါန်းနောမာ့။43အင်းမာချိန်နယ် ကိုယ်တော်ကော ဟီမ်ငါတပည့်လာပ်သယ်ကော်ကဲ့အယ် “နီမ်နယ်ငါအမှန်ငေါနာပ်။ အင်းကာ ဆင်းရဲလောတင်းငါးကာ့ မုဆိုးမ ဟော်ဝါကော အလှူခံသေတ္တာပါအာ တခြားတီတ်ဆာ အားလုံးထက်သယ် ပိုလောကဲ့အယ် လှူဒါန်းနီကာ ထာမာ့။44မဟာအောမ်ကယ်လိုးငေါနော တီတ်ဆာလာပ်ကော ဟီမ်နာပ်ပါအာမာ့ ပိုလောကားဖူမ်နယ်ဟာ လှူဒါန်းနောဟီးဟာမာ့။ အင်းညယ်ငေါဝမ်ညီ အင်းမာ မုဆိုးမကော အင်းကာညယ်တုန်း မဟာမ်းအပေါ်ဟာကားကိုယ်ဟာမ်း ဟီမ်လိုလောကားဖူမ် မီးတီမ် နှပ်ရင်ငါးကာ ဖူးအားလုံးနယ် လှူဒါန်းနောကယ် ထာမာ့” ငေါကဲ့အယ် မိန့်နာန်မာ့။
Empower Asia Bible Translation Movement