ရှာန်မာကု9
1စီးမှါခ့်ခါ ကိုယ်တော်ယေရှုကား သမီဆတာတ်ယောက် တပယ့်တော်တာတ်တေ “ဟနိမ်ဒေ ငါချီလားဒေငှေါထှာဘန်းကား အရာတ် အဘင်းနာဘေငှါဘင်း သမီဆာတာတ်နောင်းဟက် စယ်ယာကား တန်ခိုးတေယောက် ပေါ်ဒီကူဘင်း ဘုရားရှာန်ဘင်းသာသနာတော်တေ အကတုံန်လူညယ် ရှီးကြီးထှာကူအချီရား” ညယ် မိန့်တော်မူသမှာ။2ဟုတ်ရာတ်မှါခ့်စီးမှါခ့်ခါ ကိုယ်တော်ယေရှုကား ပေတရု၊ ယာကုပ်ယောက် ယောဟန်တာတ်တေ ဟိန်ယောက်အတူ ဟာဟမဲစဲအဘိုဘင်း မြန့်သဘင်းကယာစောက်ပါ ကော်လာန်ဘဲမှာ။ စီးမှါခ့်ခါ ကိုယ်တော်ယေရှုကား တပယ့်တော်တာတ်မန်းဘေ ပုံစံပြောင်းသလာန်ဘဲမှာ။3ကိုယ်တော်ဘင်း ဆာန်ဆုန်ကား အကြီးကျယ်လုံးဘန်း ရားနင်းနာန်မှာ။ ကမ္ဘာစောက်ပေငှါဘင်း ဟာဟမဲစဲ အန်နိမ်လုံးဘန်း ရားနင်းကွန်း အချီရန်နား။4စီးမှါခ့်ခါ ဗြုန်းစားတုံန်း ပရောဖက်ဧလိယယောက် မောရှေတာတ်ကား အန်တာတ်မန်းဘေ ပေါ်ဒီဘန်း ကိုယ်တော်ယေရှုယောက် တူးသပေါက်ပန်းနင်းကြီးမှာ။5အန်၌မှါခ့်ခါ ပေတရုကား ကိုယ်တော်တေ “အိုးဆကြီး ၊ အလေ အဘင်းဘေငှါနင်းထှာဘင်းကား အကြီးကျယ်မဲမှာ။ အမှာတွာတ် အလေကား ကိုယ်တော်အတွာတ် တဲဟုတ်အာ၊ မောရှေအတွာတ် တဲဟုတ်အာယောက် ဧလိယအတွာတ် တဲဟုတ်အာ စာပန်းအီကူ” ညယ်လျှောက်သမှာ။6ပေတရုယောက် တခြားတပယ့်တော်တာတ်ရီဒါး အကြီးကျယ် စါတ်ပန်းနင်းကြီးဘင်းအတွာတ် ပေတရုကား ဟာနိမ်လျှောက်သထှာကူညယ် အမိန်းရှာတ်ခါဘန်းဘင်းအတွာတ် အန်နိမ် လျှောက်တာန်လားထှာမှာ။7အန်ကားအချိန်မှါခ့်ခါ ဟာန်းချီတုံန်းပေါ်ဒီဘန်း အန်တာတ်စောက်ပေ အုပ်သဘန်းနာ ဟာန်းချီနောင်းဟက် “အန်ဘင်းဆိတ်ကား ငါမစ်ထှာဘင်း ငါဆာထှာမှာ။ ဟိန်တူးဒေ နာခံသကြီး” ညယ် ဆကလားကား ပူရီမှာ။8စီးမှါခ့်ခါ အန်တာတ်ကား ချတ်ချန်း လှည့်သဘန်းယူဝါမ်မှါခ့်ခါ အန်တာတ်ကား ဟာဟမဲဒေစဲ အကတုံန်ဘန်းနာ ကိုယ်တော်ယေရှု တစ်ပါးတည်းဆာ အန်တာတ်ယောက်အတူ ငှါနင်းဘင်းနာတေ ကတုံန်ငါန်မှာ။9ကိုယ်တော်ယေရှုယောက် တပယ့်တော်တာတ်ကား ကယာစောက်ဟက် ဆပ်နီမားအချိန်ဘေ ကိုယ်တော်ကား တပယ့်တော်တာတ်တေ သမီဆာ ဆာ ကား ရှီးလားဟက် အဆာတ်စားဟာန်းရီဘင်း အချိန်ထုတ်ကွန်း အန်တာတ် ကတုံန်ရီဘင်းနာတေဒေ ဟာဟမဲတေစဲ အငှေါဆာညယ် မိန့်တော်မူသမှာ။10အမှာတွာတ် တပယ့်တော်တာတ်ကား အန်ဘင်းအကြောင်းဒေ အငှေါကြီးဒီဒါး “ရှီးလားဟက် အဆာတ်စားဟာန်းရီကူ” ငှေါဘင်းနာကား ဟာဘင်းဒေ ငှေါကာတ်တေညယ် အချန်းချန်း စိန်ယူနင်းကြီးမှာ။11စီးမှါခ့်ခါ အန်တာတ်ကား ကိုယ်တော်ယေရှုတေ “ဧလိယကား မေရှိယအရှာန်ထာတ် အရာန်ဒီထှာကူညယ် ကျမ်းကျိန်းပေါ့ပင်း အိုးဆကြီးတာတ်ကား ဟမာန်တွာတ် ငှေါကြီးဒေ” ညယ် စိန်ယူကြီးမှာ။12ကိုယ်တော်ရီးဒါး “အရာအားလုံးဒေ အဆာန်တာန့်ပြာန်ဆာန်သဒင်အတွာတ် ဧလိယကား အရာန်ကြွဒီကူငှေါဘင်းနာကား အဟုတ်မလပ်ထှာမှာ။ အန်နိမ်စါန်းငှေါဒီ ကျမ်းကျိန်းနောင်းဘေ သမီဆာ ဆာ ကား ဒုက္ခဝေဒနာတေခံသထှာဘန်းနာ ငြာမ်းပယ်သလားဒေ ခံသထှာကူညယ် ဟမာန်တွာတ်ရေးသပဲဒေ။13ဟနိမ်ဒေ ငါငှေါကူဘင်းနာကား ဧလိယကား ကြွသစီးရီဘန်းထှာဘန်း ကျမ်းကျိန်းနောင်းဘေ ဟိန်အကြောင်းဒေ ရေးသပဲနိမ် သမီဆတာတ်ရီးဒါး အန်တာတ် အလိုငှါဘင်းအတိုင်း ဟိန်ဒေ အွန်စီးကြီးရီဘန်းထှာမှာ” ညယ်မိန့်သမှာ။14စီးမှါခ့်ခါ အန်တာတ်ကား တခြားဘင်းတပယ့်တော်တာတ်ငှါလားပါ ဒီဟာန်းကြီးမှါခ့်ခါ သမီဆာကလောင်းတုံန်းတာတ်ရီးဒါး တပယ့်တော်တာတ် ပတ်ပတ်လည်ဘေ ဝိုင်းသဘန်းနင်းကြီးဘန်းနာ ကျမ်းကျိန်းပေါ့ပင်း အိုးဆကြီးတာတ်ကား တပယ့်တော်တာတ်ယောက် ငြာမ်းသဘန်းနင်းကြီးဘင်းနာဒေ ကတုံန်ကြီးရာန်မှာ။15သမီဆာကလောင်းတုံန်းတာတ်ကား ကိုယ်တော်ယေရှုတေ ကတုံန်ကြီးမှါခ့်ခါ အကြီးကျယ် အံ့ဩသကြီးရာန်ဘန်း ကိုယ်တော်ပါ ကာတ်ကြီးရီဘန်းနာ ကိုယ်တော်ဒေ နှုတ်ဆာတ်တာန်မှာ။16ကိုယ်တော်ယေရှုကား ကျမ်းကျိန်းပေါ့ပင်း အိုးဆကြီးတာတ်တေ “ဟနိမ်ကား အန်တာတ်ယောက် ဟာဘင်းအကြောင်းအရာဒေ ငြာမ်းသဘန်းနင်းကြီးဒေ” ညယ် စိန်ယူရာန်မှာ။17သမီဆာကလောင်းတုံန်းနောင်းဟက် ဟော်ဝါကား “အိုးဆကြီး၊ ငါဆာဒေ ကိုယ်တော်ပါ ကော်ရီမှာ။ ဟိန်ကား အမဲဘင်းနနူကပ်ပန်းနင်းဘန်း အန်ဘင်းအမဲဘင်းနနူကား ဟိန်ဒေ တူးအသပေါက်ခါကွန်း အွန်ဘန်းပဲမှာ။18အမဲဘင်းနနူကား ဟိန်ဘေကပ်မှါခ့်ခါ၌တိုင်း ဟိန်ဒေ ကာစောက်ပေ လပေါ်ဝါမ်မှာ။ ဟိန်ကား ဆွားတေကြစ်ပန်း ဆတွန်းဟက် ဆပေါ့တေပူရီဟာဘန်း လာန်တစ်ကိုယ်လုံးရီးဒါး အလှုပ်သညယ် တောင့်သဘန်းနင်းနာန်ဟာမှာ။ ငါကား ကိုယ်တော်ဘင်းတပယ့်တာတ်တေ အမဲဘင်းနနူဒေ ငါတ်ပူစိန်းဒီဒါး အန်တာတ် အငါတ်ပူရန်နား” ညယ်လျှောက်တာန်သမှာ။19အမှာတွာတ် ကိုယ်တော်ယေရှုကား သမီဆာကလောင်းတုံန်းဒေ “ယုံကြည်သလားအဘိုကြီးဘင်းဆိတ်တာတ်၊ ငါကား ဟနိမ်ယောက်အတူ ဟာ၌မှါတ်ကွန်း နင်းရန်ကူဒေ။ ဟနိမ်တေ ငါဟာနယ်ထုတ်ကွန်း သည်းခံသနင်းထှာကူဒေ။ ဟလောဝါရှာဒေ ငါပါကော်ရီ” ညယ် မိန့်တော်မူသမှာ။20အမှာတွာတ် အန်တာတ်ကား ဟလောဝါရှာဒေ ကိုယ်တော်ယေရှုပါ ကော်ကြီးရီမှာ။ အမဲဘင်းနနူကား ကိုယ်တော်ယေရှုတေ ကတုံန်မယောက် ဟလောဝါရှာဒေ အကြီးကျယ် ဆန်သစိန်းမှာ။ ဟလောဝါရှာရီးဒါး ကာစောက်ပေ ပေါ်ဝါမ်ဘန်း ဆတွန်းဟက် ဆပေါ့တေပူရီဘန်း လူးလှိမ့်သနင်းမှာ။21ကိုယ်တော်ယေရှုကား ဟလောဝါရှာအဝါဒေ “ဟိန်အန်နိမ်ထှာနင်းလားကား ဟာနယ်မှါခ့်ပန်းဒေ” ညယ် စိန်ယူမှာ။ ဟလောဝါရှာအဝါရီးဒါး “နူရှိတ်ခါးမှာဟက်ထှာမှာ။22အမဲဘင်းနနူကား ဟိန်ဒေ သာန်းရှီးဒင်အတွာတ် ဝါမ်နောင်း အန်နိမ်အချီ ဝဲနောင်းပါ အမှါတ်အမှါတ်ငှေါနိမ် တက်အက်ခါမှာ။ အန်နိမ်စါန်းငှေါဒီ ကိုယ်တော် အွန်အီရန်ဘန်းကား အလေဒေ အစန်ဘန်း ကူညီသအီယုတ်” ညယ်လျှောက်တာန်သမှာ။23ကိုယ်တော်ယေရှုရီးဒါး “နာန်ကား ငါဒေ ‘အွန်အီရန်ဘန်းကား’ ညယ်ငှေါထှာလဲ။ ယုံကြည်သဘင်းဆိတ်တာတ်အတွာတ် အရာအားလုံးကား အွန်ရန်မှာ” ညယ် မိန့်တော်မူသမှာ။24ဟလောဝါရှာအဝါရီးဒါး ချတ်ချန်းငှေါနိမ် “ငါကား ယုံကြည်သောဒီဒါး အကွန်းနွန်း။ ငါဒေ ပိုသောယုံကြည်ဒီကွန်း ကူညီသအီယုတ်” ညယ် ဝါတ်ဆလာတ်တုံန်း လျှောက်တာန်သမှာ။25ကိုယ်တော်ယေရှုရီးဒါး အန်ဘင်းနေရာပါ နောက်ထပ် သမီဆာကလောင်းတုံန်း ကာတ်ကြီးရီဘင်းနာဒေ ကတုံန်မှါခ့်ခါ အမဲဘင်းနနူဒေ “ဟလောဝါရှာဒေ ကနားအသက်ပူဟာကွန်း အန်နိမ်အချီ တူးအသပေါက်ခါကွန်း အွန်ဘန်းပဲဘင်း အမဲဘင်းနနူ၊ ဟိန်ဟက်ပူရီဘန်း အနားပန်းနူ ဟာ၌မှါခ့်ခါစဲ ဟိန်ဘေအဆာန်ကွန်း နာန်ဒေ ငါအမိန့်အီမှာ” ညယ် ပြင်းပြင်းထန်ထန် အမိန့်အီမှာ။26အန်၌မှါခ့်ခါ အမဲဘင်းနနူကား ဟာတ်ပန်း ဟလောဝါရှာဒေ ပြင်းပြင်းထန်ထန် ဆန်သစိန်းစီးမှါခ့်ခါ ဟလောဝါရှာဟက် ပူလာန်ဘဲမှာ။ ဟလောဝါရှာကား သမီဆာရှီးနိမ် ငှါနင်းဘင်းအတွာတ် သမီဆတာတ်ကား “ဟိန်ကား ရှီးပါန်” ညယ်ငှေါကြီးမှာ။27အန်နိမ်စါန်းငှေါဒီ ကိုယ်တော်ယေရှုကား ဟလောဝါရှာဒေ သဟူးဟက်ငါတ်ပန်း မသအီရာန်မှါခ့်ခါ ဟလောဝါရှာရီးဒါး ရဲဘန်းစပ်နာန်မှာ။28စီးမှါခ့်ခါ ကိုယ်တော်ယေရှုရီးဒါး ကျေမ်းနောင်းဘေဆာန်မှါခ့်ခါ တပယ့်တော်တာတ်ရီးဒါး ကိုယ်တော်ဒေ “အလေ ဟမာန်ငှါး အန်ဘင်းအမဲဘင်းနနူဒေ အငါတ်ပူရန်ကြီးဒေ” ညယ် သပ်သပ်လျှောက်တာန်သကြီးမှာ။29ကိုယ်တော်ယေရှုရီးဒါး “အန်နိမ် အမဲဘင်းနနူအမျိုးဒေ ဆုစိန်ဘင်းနာယောက်၌ဆာ ငါတ်ပူရန်မှာ” ညယ် မိန့်တော်မူသမှာ။30ကိုယ်တော်ယေရှုယောက် ဟိန်တပယ့်တော်တာတ်ကား အန်ဘင်းအရပ်ဟက် ပူရီဘန်း ဂါလိလဲပြေဒေဖြတ်သဘန်း ခရီးပူကြီးရီမှာ။ ကိုယ်တော်ကား အန်တာတ် ဟာဘင်းနေရာဘေ ငှါနင်းကြီးဘင်းနာဒေ ဟာဟမဲဒေစဲ အမိန်းရှာတ်ခါစိန်းကာတ်အား။31ဟမာန်တွာတ်ငှေါဘန်းတာတ်ငှေါ ကိုယ်တော်ကား ဟိန်တပယ့်တော်တာတ်တေ ဟောသကာ ဆွောန်သကာနင်းဘင်းအတွာတ်ထှာမှာ။ ကိုယ်တော်ကား အန်တာတ်တေ “သမီဆာ ဆာ ကား သမီဆတာတ် သဟူးနောင်းပါ အပ်သလားခံသထှာကဘန်းထှာမှာ။ သမီဆတာတ်ကား ဟိန်ဒေ သာန်းရှီးကြီးရာန်ကူထှာဘန်း ဆွန်းရာတ်ထုတ်မားမာန်းရာတ်ပေ ဟိန်ကား အဆာတ်စားဟာန်းရီကူထှာမှာ” ညယ် မိန့်တော်မူသမှာ။32တပယ့်တော်တာတ်ကား ကိုယ်တော်ဘင်း တူးတေဒေ အနားလည်သကြီးဒီဒါး အန်ဘင်းအကြောင်းအရာဒေ ကိုယ်တော်ဒေ စိန်ယူဒင် စါတ်ပန်းနင်းကြီးမှာ။33စီးမှါခ့်ခါ ကိုယ်တော်ယေရှုယောက် ဟိန်တပယ့်တော်တာတ်ကား ကပေရနောင်မြို့ပါ ထုတ်ကြီးရီမှာ။ အန်တာတ်ကား ကျေမ်းကျေမ်းနာဘေ ဆာန်ကြီးမှါခ့်ခါ ကိုယ်တော်ကား ဟိန်တပယ့်တော်တာတ်တေ “ဟနိမ် လမ်းဘေ ဟာဘင်းအကြောင်းအရာဒေ ငြာမ်းသဘန်းနင်းကြီးဒေ” ညယ် စိန်ယူမှာ။34အန်နိမ်စါန်းငှေါဒီ အန်တာတ်ကား ယူရှီရှီနင်းကြီးမှာ။ ဟမာန်တွာတ်ငှေါဘန်းတာတ်ငှေါ အန်တာတ်ကား လမ်းဘေ ဟာဟမဲကား အကြီးမြတ်ဆုံးထှာဒေ ငှေါဘင်းအကြောင်းဒေ ငြာမ်းသကြီးရီဘင်းအတွာတ်ထှာမှာ။35ကိုယ်တော်ယေရှုရီးဒါး ထုံးငါန်ဘန်း သာဝကရှစ်နူဘန်း ကလိန်းဟူးဒေကော်ဘန်း “အကြီးမြတ်ဆုံးထှာကာတ်ပင်း ဟာဟမဲစါန်းငှေါဒီ နိမ်ချသဘင်းဆိတ် ထှာထှာကူထှာဘန်း အားလုံးဘင်းအစေခံရီး ထှာထှာကူ” ညယ် မိန့်တော်မူသမှာ။36စီးမှါခ့်ခါ ကိုယ်တော်ယေရှုကား ရှရှာဟော်ဝါဒေကော်ဘန်း အန်ဘင်းရှရှာဒေ အန်တာတ်မန်းဘေ စပ်စိန်းယုတ်မှာ။ ကိုယ်တော်ကား ဟိန်သဟူးဒေ ရှရှာစေါက်ပေ တာန်သဘန်း ဟိန်ဘင်း တပယ့်တော်တာတ်တေ37“ငါအတွာတ်ဟွန် အန်နိမ်ရှရှာနိမ် သမီဆာဒေ လက်ခံသဘင်းဟာဟမဲစါန်းငှေါဒီ ငါဒေ လက်ခံသလားထှာမှာ။ ငါဒေလက်ခံသဘင်း ဟာဟမဲစါန်းငှေါဒီ ငါဒေဆာ လက်ခံသလားအချီညယ် ငါဒေတာတ်နီဘင်း ဘုရားရှာန်ဒေရီးဒါး လက်ခံသလားထှာမှာ” ညယ် မိန့်တော်မူသမှာ။38စီးမှါခ့်ခါ ယောဟန်ကား ကိုယ်တော်ယေရှုဒေ “အိုးဆကြီး၊ အလေကား အိုးဆကြီးနာမယ်ယောက် အမဲဘင်းနနူတေဒေ ငါတ်ပူနင်းဘင်း သမီဆာဟော်ဝါဒေ ကတုံန်ရီမှာ။ ဟိန်ကား အလေအဖွဲ့နောင်းဟက် အချီဘင်းအတွာတ် ဟိန်ဒေ အလေ တားဒီယုတ်မှာ” ညယ်လျှောက်တာန်သမှာ။39အန်နိမ်စါန်းငှေါဒီ ကိုယ်တော်ယေရှုကား “ဟိန်ဒေ အတားသကြီးဆာ။ ဟမာန်တွာတ်ငှေါဘန်းတာတ်ငှေါ ငါနာမယ်ဘင်း အခွာမ်းအာဏာတေနပ်ပန်း အံ့ဩသထာတ်မဲဘင်း နိမိတ်လက္ခဏာဒေ အွန်စီးဘန်းဘင်းဆိတ်ကား အမှါတ်ကြီ ငါဒေ အမဲငှေါကူဘင်းဆိတ်အချီရား။40အလေဒေ အဆန့်ကျင်သဘင်း ဟာဟမဲစါန်းငှေါဒီ အလေပါဘင်းဆိတ်ထှာမှာ။41ဟနိမ်ဒေ ငါချီလားဒေငှေါထှာဘန်းကား ဟနိမ်ကား မေရှိယဘင်း တပယ့်ထှာဘင်းအတွာတ် ငါဘင်းနာမယ်အနေယောက် ဟနိမ်ဒေ ဝဲခွာပ်အာအီဘင်းဆိတ် ဟာဟမဲစါန်းငှေါဒီ အန်တာတ်ပင်း ဆုလာဒ်တေ ဆုံးရှုံးသထှာကလားအချီရား။42ငါဒေယုံကြည်သဘန်း နှိမ့်ချသဘင်း ဆိတ်တာတ်နောင်းဟက် ဟော်ဝါဒေ အပြစ်အွန်စိန်းဘင်းဆိတ် ဟာဟမဲစါန်းငှေါဒီ အန်တာတ်ကတုတ်ပေ အကြီးကျယ်တုံန်းဘင်း လုံးကရှီဒေကြိပ်ပန်း ပါမ်လယ်နောင်းပါ တက်အက်လား ခံသထှာဘင်းကား အန်တာတ်အတွာတ် ပိုသောစဲ မဲယုတ်ကူ။43အမှာတွာတ် ဟနိမ်ဘင်းသဟူးကား နာန်ဒေ အပြစ်အွန်စိန်းဘန်းကား အန်ဘင်းဒေ တွတ်တူရာန်။ တဟူးကလိန်းပိုက်ယောက် ဟာ၌မှါခ့်ခါစဲ အရှီးဘင်း ငရဲပါ လာန်ထှာဘင်းထာတ် သဟူးပယ်အားအဘိုညယ် ဘုရားရှာန်ဘင်း သာသနာတော်ဘေ နင်းထှာဘင်းကား ပိုသောမဲမှာ။44အန်ဘင်းငရဲဘေ အန်တာတ်တေ ယုတ်ပန်းနင်းဘင်း ကတုံန်တေကား ဟာ၌မှါခ့်ခါစဲ အရှီးနိမ် အန်တာတ်တေ ဟူဘန်းနင်းဘင်း ဝါမ်ရီးဒါး ဟာ၌မှါခ့်ခါစဲ မေ့စ်ကလားအချီရား။ 45အန်နိမ် နာန်ဘင်းတာပယ်အာကား နာန်ဒေ အပြစ်အွန်စိန်းဘန်းကား အန်ဘင်းဒေ တွတ်တူဝါမ်။ တာကလိန်းပိုက်ယောက် ငရဲပါ တက်အက်လား ခံသထှာဘင်းထာတ် တာပယ်အာ အပါသောညယ် ဘုရားရှာန်ဘင်း သာသနာတော်ဘေ နင်းထှာဘင်းကား ပိုသောမဲမှာ။46အန်ဘင်းငရဲဘေ အန်တာတ်တေ ယုတ်ပန်းနင်းဘင်း ကတုံန်တေကား ဟာ၌မှါခ့်ခါစဲ အရှီးနိမ် အန်တာတ်တေ ဟူဘန်းနင်းဘင်း ဝါမ်ရီးဒါး ဟာ၌မှါခ့်ခါစဲ မေ့စ်ကလားအချီရား။ 47နာန်မိတ်တူရှီဟုတ်အာကား နာန်ဒေ အပြစ်အွန်စိန်းဘန်းကား အန်ဘင်းဒေ ကွယ်ပူရာန်။ မိတ်တူရှီ ကလိန်းဟုတ်ယောက် ငရဲပါ တက်အက်လား ခံသထှာဘင်းထာတ် မိတ်တူရှီဟုတ်အာ အပါသောညယ် ဘုရားရှာန်ဘင်း သာသနာတော်ဘေ နင်းထှာဘင်းကား ဟနိမ်အတွာတ် ပိုသောမဲမှာ။48အန်ဘင်းငရဲဘေ အန်တာတ်တေ ယုတ်ပန်းနင်းဘင်း ကတုံန်တေကား ဟာ၌မှါခ့်ခါစဲ အရှီးနိမ် အန်တာတ်တေ ဟူဘန်းနင်းဘင်း ဝါမ်ရီးဒါး ဟာ၌မှါခ့်ခါစဲ မေ့စ်ကလားအချီရား။49ငါအန်နိမ်ငှေါထှာဘင်းနာကား ပူဇော်သထှာကူဘင်း နနူဒေ စွန်ယောက် ဖောထှာနိမ် သမီဆ၌တိုင်းရီးဒါး ဝါမ်ယောက် ဖောလားခံသထှာကူ။ 50စွန်ကား မဲဒီဒါး ဟိန်ဘင်းဆွန်းဟာဘင်းဓါတ် ကယာရာန်ဘန်းကား အန်ဘင်းစွန်ဒေ ပြန်သဘန်း ဆွန်းဟာန်းရီကွန်း ဟနိမ်ဟာနိမ် အွန်ရန်ကူဒေ။ ဟနိမ်ဘေရီးဒါး စွန်နိမ်မဲဘင်း အရည်အသွေးတေ ငှါထှာကူထှာဘန်း အချန်းချန်းတည့်သကွန်း နင်းကြီး” ညယ် မိန့်တော်မူသမှာ။
Empower Asia Bible Translation Movement