ရှာန်မာကု10
1စီးမှါခ့်ခါ ကိုယ်တော်ယေရှုကား ကပေရနောင်မြို့ဟက်ပူရီဘန်း ယုဒပြေယောက် ဂျော်ဒန်မြစ်ကမ်းပယ်အာဘင်း အရပ်ပါ ကြွတော်မူသမှာ။ သမီဆာကလောင်းတုံန်းတာတ်ရီးဒါး ကိုယ်တော်ပါ ပြန်သဘန်း ထုတ်ခါန်းကြီးရီဘန်း ကိုယ်တော်ရီးဒါး ထုံးစံအတိုင်း အန်တာတ်တေ ဟောသကာဆွောန်သကာဘန်းနင်းမှာ။2ဖာရိရှဲစယ်ယာရီးဒါး ထုတ်ကြီးရီဘန်း ကိုယ်တော်ဒေ စမ်းသကာတ်ပင်းအတွာတ် “ဟလားကား ဟိန်အိတ်တေ ဖာတ်အာန်ဒင် ပညတ်တော်ကား အခွာမ်းအီပဲလဲ” ညယ်လျှောက်သကြီးမှာ။3ကိုယ်တော်ကား “မောရှေကား ဟနိမ်ဒေ ဟာနိမ် ပညတ်သပဲဒေ” ညယ်မိန့်သမှာ။4အန်တာတ်ရီးဒါး “မောရှေကား ဟလားထှာဘင်းဆိတ်တေ ဖာတ်ပင်းစာချုပ်ပေ လက်မှတ်တို့ပ်ပန်း ဟိန်အိတ်ထှာဘင်းဆိတ်တေ ဖာတ်တင်အခွာမ်းအီပဲမှာ” ညယ် ပြန်သဘန်း လျှောက်တာန်သကြီးမှာ။5အန်၌မှါခ့်ခါ ကိုယ်တော်ယေရှုကား အန်တာတ်တေ “ဟနိမ်ကား ငှေါယုတ်ရားဘင်းအတွာတ် မောရှေကား ဟနိမ်အတွာတ် အန်ဘင်းပညတ်တော်ဒေ ရေးဒီလားထှာမှာ။6အန်နိမ်စါန်းငှေါဒီ ကျမ်းကျိန်းနောင်းဘေ ငှေါပဲဘင်းအတိုင်း ဘုရားရှာန်ကား ကမ္ဘာတုံန်းဒေ စသဘန်း ဖန်ဆင်းသမှါခ့်ခါဟက် ဘုရားရှာန်ကား ဟလောဝါယောက် အီးရှီဒေ ဖန်ဆင်းဒီလားထှာမှာ။7အမှာတွာတ် ဟလားထှာဘင်းဆိတ်ကား ဟိန်အမယ်ယောက် အဝါဒေ ပဘဲရီထှာကူထှာဘန်း ဟိန်အိတ်ယောက် အတူတူ နင်းကြီးထှာကလားထှာမှာ။8အန်တာတ်ကလိန်းဟူးကား သမီဆာကလိန်းဟူးအချီညယ် သမီဆာဟော်ဝါ၌ ထှာရာန်ဘဲမှာ။9အမှာတွာတ် ဘုရားရှာန်ကား အတူငှါမောက်နင်းစိန်းဘင်း ဟလောဝါယောက် ဟိန်အီးရှီဒေ ဟာဟမဲစဲ အဘိုက်သင့်သဝါး” ညယ် မိန့်တော်မူသမှာ။10စီးမှါခ့်ခါ ကိုယ်တော်ယေရှုကား ဟိန်တပယ့်တော်တာတ်ယောက်၌ဆာ ကျေမ်းနောင်းဘေ ငှါနင်းမှါခ့်ခါ တပယ့်တော်တာတ်ကား ဖာတ်ပင်းအကြောင်းဒေ ကိုယ်တော်ဒေ စိန်ယူကြီးမှာ။11အမှာတွာတ် ကိုယ်တော်ယေရှုကား အန်တာတ်တေ “ဟာဟမဲစါန်းငှေါဒီ ကိုယ်ဘင်းအိတ်တေ ဖာတ်ပန်း တခြားဘင်းအီးရှီဒေ လာရာန်ဘန်းကား ကိုယ်အိတ်စောက်ပေ အိမ်ထောင်ရေး ဖောက်ပြန်သဘင်းအမှုဒေ ကျူးလွန်သလားထှာမှာ။12အန်ဘင်းအတိုင်း အီးရှီဟော်ဝါကား ဟိန်ဟလားဒေဖာတ်ပန်း တခြားဘင်းဟလောဝါဟော်ဝါဒေ လာဘန်းရီးဒါး ဟိန်ကား အိမ်ထောင်ရေး ဖောက်ပြန်သလားဒေ ကျူးလွန်သလားထှာမှာ” ညယ် မိန့်တော်မူသမှာ။13မာန်းရာတ်ရအာမှါခ့်ခါ သမီဆာစယ်ယာကား အန်တာတ်ရှရှာတေဒေ ကိုယ်တော်ယေရှုသဟူးယောက် ထိသဘန်း မန်းအီလားခံသထှာဒင် ကိုယ်တော်ပါ ကော်ကြီးရီမှာ။ အန်နိမ်စါန်းငှေါဒီ တပယ့်တော်တာတ်ကား အန်တာတ်တေ ကိုယ်တော်ယေရှုတေ အနှောက်ယှက်သကွန်း တားသကြီးမှာ။14ကိုယ်တော်ယေရှုကား အန်ဘင်းနာဒေ ကတုံန်မှါခ့်ခါ ဒေါသပူဘန်း ဟိန်တပယ့်တော်တာတ်တေ “ရှရှာတေဒေ ငါပါဒီစိန်းငါန်။ အန်တာတ်တေ အတားသကြီးဆာ။ ဟမာန်တွာတ်ငှေါဘန်းတာတ်ငှေါ ဘုရားရှာန်ဘင်းသာသနာတော်နောင်းဘေ နင်းထှာကူဘင်းဆိတ်တာတ်ကား အန်နိမ်ရှရှာတေနိမ် ယုံကြည်သဘင်းဆိတ်တာတ်ထှာမှာ။15ဟနိမ်တေ ငါချီလားဒေငှေါထှာဘန်းကား ဘုရားရှာန်ဘင်းသာသနာတော်ဒေ အန်နိမ် ရှရှာတာတ်နိမ် လက်အခံသဘင်း ဟာဟမဲစါန်းငှေါဒီ ဘုရားရှာန်ဘင်းသာသနာတော်နောင်းပါ ဟာ၌မှါခ့်ခါစဲ ဆာန်ကြီးလူကလားအချီရား” ညယ် မိန့်တော်မူသမှာ။16စီးမှါခ့်ခါ ကိုယ်တော်ယေရှုကား ရှရှာတာတ်တေ ကော်ဘန်း ဟော်ဝါစီစောက်ပေ ဟိန်သဟူးဒေတာန်သဘန်း ဘုရားရှာန် မန်းအီလားခံသထှာစိန်းဒင် ဆုစိန်အီမှာ။17စီးမှါခ့်ခါ ကိုယ်တော်ယေရှုယောက် ဟိန်တပယ့်တော်တာတ်ကား ခရီးစသဘန်း ပူနင်းစါတ် သမီဆာဟော်ဝါကား ကတ်နီဘန်း ကိုယ်တော်မန်းဘေ သဒူထောက်သဘန်း “မဲဘင်းအိုးဆကြီး၊ ဟာ၌မှါခ့်ခါစဲအရှီးဘင်းအဆာတ်တေ လူဒင် ငါကား ဟာဘင်းနာဒေ အွန်ထှာကူဒေ” ညယ် စိန်ယူကြီးမှာ။18အမှာတွာတ် ကိုယ်တော်ယေရှုကား “နာန်ကား ငါဒေ ဟမာန်ငှါး မဲမှာညယ် ငှေါထှာဒေ။ ဘုရားရှာန် တစ်ပါးတည်းဟက်လွှဲသဘန်း ဟာဟမဲစဲအမဲရား။19‘သမီအဆာတ်တေ အသာန်းရှီးဆာ၊ အိမ်ထောင်ရေးအဖောက်ပြန်သလူဝါး၊ အကူလူဝါး၊ ဟာဟမဲဒေစဲ အချီညယ်အငှေါလူဝါး၊ ဟာဟမဲဒေစဲ အပက်သလူဝါးယောက် နာန်အမယ်အဝါတာတ်တေ ရိုသေသကြီး’ ညယ်ငှေါဘင်း ပညတ်တော်တေဒေ နာန်မိန်းရှာတ်ခါမှာ” ညယ် မိန့်တော်မူသမှာ။20အန်၌မှါခ့်ခါ အန်ဘင်းဆိတ်ကား ကိုယ်တော်ယေရှုတေ “အိုးဆကြီး၊ ငါကား နူရှိတ်ခါးမာဟက် အန်ဘင်းပညတ်တော်တေဒေ လိုက်နာဒီမှာ” ညယ် လျှောက်တာန်သမှာ။21ကိုယ်တော်ယေရှုရီးဒါး ဟိန်ဒေ အစန်ဘင်း မန်းယောက်ယူဘန်း “နာန် စားနူစားနာအွန်ဒင် ငှါယုတ်မှာ။ နာန်ဘေ ငှါဘင်းနာတေဒေ မာဘန်း လူရီဘင်းဖူးတေဒေ ဆာန်းရဲဆားတာတ်တေ လှူတာန်။ အန်နိမ်အွန်ဘန်းကား နာန်ကား ရွှေမြို့တော်ဘေ ဆုတော်လာဒ်တော်တေ လူကူထှာမှာ။ စီးဘန်းကား ငါဟလိန်းဘေ ဒီရာတ်” ညယ် မိန့်တော်မူသမှာ။22အန်ဘင်းဆိတ်ရီးဒါး အကြီးကျယ်ဆွာမ်းဘင်းဆိတ် ထှာဘန်းသာငှေါ အန်ဘင်းအကြောင်းဒေ သက်ပူမှါခ့်ခါ အန်ဘင်းဆိတ်ကား မန်းပြာတ်သဘန်းနာ အဆင်အမဲထှာဘန်း လမ်းစာလားပါ ပူလာန်ဘဲမှာ။23စီးမှါခ့်ခါ ကိုယ်တော်ယေရှုကား သမီဆာတာတ်တေ လှည့်သဘန်းယူဝါမ်ဘန်း ဟိန်တပယ့်တော်တာတ်တေ “ဘုရားရှာန်ဘင်းသာသနာတော်နောင်းပါ ဆာန်ရန်ကွန်း ဆွာမ်းဘင်းသမီဆတာတ်အတွာတ် အကြီးကျယ်ခါတ်ခဲသမှာ” ညယ် မိန့်တော်မူသမှာ။24တပယ့်တော်တာတ်ကား အန်ဘင်းတူးဒေ သက်ပူမှါခ့်ခါ အကြီးကျယ် အံ့ဩသကြီးရာန်မှာ။ အန်နိမ်စါန်းငှေါဒီ ကိုယ်တော်ယေရှုကား “တပယ့်တော်တာတ်၊ ဘုရားရှာန်ဘင်းသာသနာတော်နောင်းပါ ဆာန်ဒင်ကား အကြီးကျယ် ခါတ်ခဲသမှာ။25ဆွာမ်းဘင်းဆိတ်ဟော်ဝါကား ဘုရားရှာန်ဘင်းသာသနာတော်နောင်းပါ ဆာန်ရန်ကူဘင်းနာထာတ် ကုလားအုတ်နူဝါကား မီထယ်ကနားအပေါက်နောင်းဘေ ဆာန်ဘင်းနာကား ပိုသောကားစယ်မှာ” ညယ် ပြန်သဘန်းမိန့်သမှာ။26အန်၌မှါခ့်ခါ တပယ့်တော်တာတ်ကား ပိုသောအံ့ဩသကြီးရာန်ဘန်း “အန်နိမ်ငှေါဘန်းကား ဟာဟမဲကား ကယ်တာန်သလားခံသထှာကူဒေ” ညယ် အချန်းချန်းငှေါနင်းကြီးမှာ။27ကိုယ်တော်ယေရှုရီးဒါး အန်တာတ်တေ ယူဝါမ်ဘန်း “အန်ဘင်းနာကား သမီဆတာတ်အတွာတ် အထှာရန်ဒီဒါး ဘုရားရှာန်အတွာတ်ကား အန်နိမ်အချီရား။ ဘုရားရှာန်အတွာတ်ကား အကုန်လုံးထှာရန်နာ” ညယ် မိန့်တော်မူသမှာ။28အန်၌မှါခ့်ခါ ပေတရုကား “အလေကား ကိုယ်တော်ဟလိန်းဘေ လာန်ငါတ်လူကွန်းအတွာတ် အရာအားလုံးဒေ စွန့်ဒီမှာ” ညယ်လျှောက်တာန်သမှာ။29ကိုယ်တော်ယေရှုရီးဒါး “ဟနိမ်တေ ငါချီလားဒေငှေါထှာဘန်းကား ငါအတွာတ်ယောက် မာန်းဂလာဆတာန်းတေဒေ ဟောသကာဒင်အတွာတ် ကျေမ်းတေ၊ အမူးနရှီတေ၊ အသေးနရှီတေ၊ အမယ်၊ အဝါ၊ ရှရှာတေယောက် လပါးတေဒေ စွန့်ဒီဘင်းဆိတ်ကား30အရာတ်ဘဝဘေ ငါတပယ့်တော်ထှာဘင်းအတွာတ် သမီဆတာတ် နှိပ်စါတ်သလားဒေ ခံသထှာဘန်းနာ ကျေမ်းတေ၊ အမူးနရှီတေ၊ အသေးနရှီတေ၊ အမယ်တေ၊ ရှရှာတေယောက် လပါးတေဒေ အဆတေကလောင်းတုံန်း လူကြီးကူထှာဘန်း ဟိန်ကား အနားမန်းပါ ဟာ၌မှါခ့်ခါစဲအရှီးဘင်းအဆာတ်တေ လူကူထှာမှာ။31အန်နိမ်စါန်းငှေါဒီ အရာတ် ပထမဆုံးထှာဘင်းဆိတ်တာတ်ကား အနားမန်းပါ အနောက်ဆုံးဘင်း သမီဆာတေ ထှာကြီးကူထှာဘန်း အရာတ် နောက်ဆုံးထှာဘင်းဆိတ်တာတ်ကား အနားမန်းပါ ပထမဆုံးဘင်းသမီဆာတေ ထှာကြီးရီကူထှာမှာ” ညယ် မိန့်တော်မူသမှာ။32စီးမှါခ့်ခါ ကိုယ်တော်ယေရှုယောက် တပယ့်တော်တာတ်ကား ဂျေရုဆလင်မြို့ပါ ပူကြီးရီဘန်းနာ လမ်းဘေ ကိုယ်တော်ကား မန်းဟက်ဦးဆောင်သဘန်း ကြွတော်မူသမှာ။ တပယ့်တော်တာတ်ရီးဒါး အံ့ဩသနင်းကြီးဘန်း ဟလိန်းဟက် ဒီရာတ်ကြီးဘင်းဆိတ်တာတ်ရီးဒါး စါတ်ပန်းနင်းကြီးမှာ။ ကိုယ်တော်ကား သာဝကရှစ်နူဘန်း ကလိန်းဟူးဒေ ဟိန်ပိုက်ပါကော်ဘန်း ဟိန်ဘေထှာရီကူဘင်းနာတေဒေ အန်တာတ်နင်း ပြန်သဘန်း မိန့်တော်မူသမှာ။33ကိုယ်တော်ကား “သက်ကြီး။ အလေကား ဂျေရုဆလင်မြို့ပါ လာန်နင်းကြီးဘန်းထှာမှာ။ သမီဆာ ဆာ ကား ဂျူးပုရောဟိတ်ဟလာန်းစါတ်တုံန်းတာတ်ယောက် ကျမ်းကျိန်းပေါ့ပင်း အိုးဆကြီးတာတ် သဟူးနောင်းပါ အပ်သလားခံသထှာကဘန်းထှာမှာ။ အန်တာတ်ကား သမီဆာ ဆာဒေ ရှီးဘင်းဒဏ်အီဘန်း ဂျူးအချီဘင်းဆိတ်တာတ် သဟူးနောင်းပါ အပ်သကြီးကူထှာမှာ။34အန်ဘင်းဆိတ်တာတ်ကား သမီဆာ ဆာဒေ နီးကြီးဘန်းနာ အာတ်ဝဲတေယောက် ထောက်ပန်း သာန်းဘန်းနာ သာန်းရှီးကြီးရာန်ကူထှာဒီဒါး ဆွန်းရာတ်မှါတ်မှါခ့်ခါ သမီဆာ ဆာ ကား အဆာတ်စားဟာန်းရီကူထှာမှာ” ညယ် မိန့်တော်မူသမှာ။35စီးမှါခ့်ခါ ဇေဗေဒဲဘင်းဆာတေထှာကြီးဘင်း ယာကုပ်ယောက် ယောဟန်တာတ်ကား ကိုယ်တော်ပါ ဒီကြီးမှာ။ အန်တာတ်ကား “အိုးဆကြီး၊ အလေစိန်ဘင်းမှန်တမျှဒေ အလေအတွာတ် အွန်အီယုတ်” ညယ် လျှောက်တာန်သကြီးမှာ။36ကိုယ်တော်ယေရှုရီးဒါး အန်တာတ်တေ “ငါဒေ ဟနိမ်အတွာတ် ဟမာန်ဒေ အွန်စိန်းကာတ်တေ” ညယ်မိန့်သမှာ။37အန်၌မှါခ့်ခါ အန်တာတ်ကား “ကိုယ်တော်ကား ဘုန်းတန်ခိုးတုံန်းဘင်း သာသနာတော်ဘေ စသဘန်း အုပ်ချုပ်သမှါခ့်ခါ အလေဒေ ကိုယ်တော်ဘင်း ညာပါဟော်ဝါ၊ ဘယ်ပါဟော်ဝါ ထုံးဘင်းအခွာမ်းအီယုတ်” ညယ် လျှောက်တာန်သကြီးမှာ။38ကိုယ်တော်ယေရှုရီးဒါး အန်တာတ်တေ “ဟနိမ်ကား ဟာဘင်းနာဒေ စိန်ဘန်းနင်းမှာငှေါဘင်းနာဒေ အမိန်းရှာတ်ခါကြီးရား။ ငါကတုံန်ထှာကူဘင်း ဒုက္ခဆာန်းရဲဒေ ဟနိမ် ခံသကြီးရန်လည်း။ ငါကား ဆာန်းရဲဒုက္ခငှေါဘင်း ဝဲငွတ်ပင်းမာန်းဂလာဒေ ခံသထှာကူထှာဘန်း ဟနိမ်ရီးဒါး အန်ဘင်း ဝဲငွတ်ပင်းမာန်းဂလာဒေ ခံသကြီးရန်လည်း” ညယ် စိန်ယူမှာ။39အန်၌မှါခ့်ခါ အန်တာတ်ရီးဒါး ကိုယ်တော်ဒေ “အလေခံသရန်နာ” ညယ် လျှောက်တာန်သကြီးမှာ။ ကိုယ်တော်ယေရှုကား အန်တာတ်တေ “ဟနိမ်ကား ငါကြုံသထှာကူဘင်း ဒုက္ခဆာန်းရဲဒေ ကြုံသကြီးထှာကူထှာဘန်း ငါခံသထှာကူဘင်း ဆာန်းရဲဒုက္ခငှေါဘင်း ဝဲငွတ်ပင်းမာန်းဂလာဒေရီးဒါး ခံသကြီးထှာကူထှာဒီဒါး40ငါဘင်း ဘယ်ပါယောက် ညာပါဘေ ဟာဟမဲ ထုံးထှာကူဘင်းနာဒေ မယ်ရန်ဘင်း အခွာမ်းအာဏာကား ငါဘေအဘိုဝါး။ ဟမာန်တွာတ်ငှေါဘန်းတာတ်ငှေါ ဘုရားရှာန်ကား အန်ဘင်းနေရာတေဒေ ဟိန်မယ်ဘန်းပဲဘင်း ဆိတ်တာတ်အတွာတ် ပြာန်ဆာန်သပဲစီးဘန်းဘင်းအတွာတ် ထှာမှာ” ညယ် မိန်တော်မူသမှာ။41အန်ဘင်းအကြောင်းဒေ တခြားဘင်းသာဝက ရှစ်နူတာတ်ကား သက်ပူကြီးမှါခ့်ခါ ယာကုပ်ယောက် ယောဟန်တာတ်တေ တင်းဟောပ်ကြီးမှာ။42အမှာတွာတ် ကိုယ်တော်ယေရှုကား အန်တာတ်ဆွန်ကွန်းဒေ ဟိန်ပါကော်ဘန်း “ဂျူးအချီဘင်းဆိတ်တာတ်တေ အုပ်ချုပ်သဘင်းဆိတ်တာတ်ကား အန်တာတ်သမီဆာတာတ်စောက်ပေ အခွာမ်းအာဏာအပြေ့ယောက် အုပ်ချုပ်သရန်ဘင်း သတ္တိတေငှါဘင်းဒေ ဟနိမ်မိန်းရှာတ်ခါမှာ။43အန်နိမ်စါန်းငှေါဒီ ဟနိမ်ကား အန်နိမ် အအွန်းကြီးဆာ။ အန်ဘင်းအစား ဟနိမ်နောင်းဟက် ဟလာန်းစါတ် ထှာကာတ်ပင်းဆိတ်ကား တခြားဘင်းဆိတ်တာတ်ပင်း အစေခံနိမ် ထှာထှာကူ။44ဟလာန်းစါတ် ထှာကာတ်ပင်းဆိတ် ဟာဟမဲစါန်းငှေါဒီ သမီဆာအားလုံးဘင်း အစေခံနိမ် ထှာထှာကူထှာမှာ။45သမီဆာ ဆာ စဲဒါး သမီဆာတာတ် အလုပ်အကြွေးအွန်ခံသဒင် ကြွဒီလားအချီးညယ် သမီဆတာတ်တေ အလုပ်အကြွေးအွန်ဒင်ယောက် ဟိန်အဆာတ်တေတက်ပန်း သမီဆာကလောင်းတုံန်းဒေ မယ်ဘန်းကယ်တာန်သဒင် ကြွဒီလားထှာမှာ” ညယ် မိန့်တော်မူသမှာ။46စီးမှါခ့်ခါ ကိုယ်တော်ယေရှုယောက် ဟိန်တပယ့်တော်တာတ်ကား ဂျေရိခေါမြို့ပါ ထုတ်ကြီးရီမှာ။ ကိုယ်တော်ယေရှုယောက် တပယ့်တော်တာတ်ကား သမီဆာကလောင်းတုံန်းယောက်အတူတူ မြို့ဟက်ပူရီမှါခ့်ခါ တိမဲဆာထှာဘင်း ဗာတိမဲညယ်ကော်ဘင်း မိတ်ကျယ်နင်းဘင်း စိန်ယုတ်ပင်းဆိတ်ဟော်ဝါကား လမ်းပိုက်ပေ ထုံးဘန်းနင်းမှာ။47ဟိန်ကား နာဇရက်မြို့ဆား ကိုယ်တော်ယေရှု ဟိန်ပိုက်ဟက်ဖြတ်သဘန်း လာန်ပဲဘင်းဒေ သက်ပူမှါခ့်ခါ “ဒါဝိဒ်ပင်းဆားတော်ယေရှု၊ ငါဒေ အစန်ယုတ်” ညယ် စသဘန်းဟာတ်အာန်မှာ။48သမီဆတာတ်ကား ဟိန်ဒေ ယူရှီရှီနင်းကွန်း ငှေါကြီးဒီဒါး ဟိန်ကား ပိုသောဝါတ်ပင်း ဆကလားတုံန်းယောက် “ဒါဝိဒ်ပင်းဆားတော်၊ ငါဒေ အစန်ယုတ်” ညယ် ဟာတ်အာန်မှာ။49ကိုယ်တော်ယေရှုရီးဒါး ဟိန်ဟာတ်နင်းဘင်း ဆကလားဒေ သက်ပူမှါခ့်ခါ လမ်းတယ်နင်းလားဟက် ရပ်တာန်ဘန်း “ဟိန်ဒေကော်ရီ” ညယ် မိန့်သမှာ။ အမှာတွာတ် အန်တာတ်ရီးဒါး မိတ်ကျယ်ဘင်းဆိတ်တေ ကော်ဘန်း “အားအငယ်သဆာ။ ရဲရာန်။ ကိုယ်တော်ကား နာန်ဒေ ကော်နင်းဘန်း” ညယ် ငှေါကြီးမှာ။50အမှာတွာတ် ဟိန်ကား ဟိန်ဘင်း ပြာန်ဘင်းဆာန်ဆုန်ဒေ တက်ပဘဲဘန်းနာ ခပ်မြန်မြန်ရဲဘန်း ကိုယ်တော်ပါ လာန်မှာ။51ကိုယ်တော်ယေရှုရီးဒါး ဟိန်ဒေ “နာန်အတွာတ် ငါ ဟမာန်အွန်အီထှာကူဒေ” ညယ် စိန်ယူမှာ။ မိတ်ကျယ်ဘင်းဆိတ်ရီးဒါး “အိုးဆကြီး၊ ငါ မိတ်တူရှီကတုံန်ကာတ်မှာ” ညယ် လျှောက်တာန်သမှာ။52အမှာတွာတ် ကိုယ်တော်ယေရှုကား “နာန်လာန်ရန်ဘန်း။ နာန်ယုံကြည်သဘင်းနာကား နာန်ဒေ မဲဟာန်းစိန်းဘန်း” ညယ် မိန့်တော်မူသမှာ။ ချတ်ချန်းငှေါနိမ် ဟိန်မိတ်တူရှီ ကတုံန်လူဘန်း လမ်းတစ်လျှောက် ကိုယ်တော်ယေရှုဘင်း ဟလိန်းဘေ လာန်ငါတ်ပဲမှာ။
Empower Asia Bible Translation Movement