ရှာန်မာကု8
1အန်ဘင်းမာန်းရာတ်တေမှါခ့်ခါ သမီဆာကလောင်းတုံန်းတာတ်ကား ကိုယ်တော်ယေရှုပါ ပြန်သဘန်း ထုတ်ခါန်းကြီးရီမှာ။ မာန်းရာတ်အစစ်ဆာ မှါတ်ရီမှါခ့်ခါ အန်တာတ်ပေ ယုတ်တင်အူဒင်တေ အဘိုဘန်းဟွန် ကိုယ်တော်ယေရှုကား ဟိန်တပယ့်တော်တာတ်တေ ကော်ဘန်းနာ2“အဘင်းသမီဆာတေကား ငါရောက်အတူတူ ဆွန်းရာတ်ထုတ်ကွန်း ငှါနင်းကြီးရီဘန်းနာ အန်တာတ်ပေ ယုတ်တင်အူဒင်တေ အဘိုဘန်းဟွန် အန်တာတ်တေ ငါအစန်မှာ။3အန်တာတ်နောင်းဟက် သမီဆာစယ်ယာကား လမ်းစာဟက် ဒီကြီးထှာဘင်းအတွာတ် အန်တာတ်တေ ယုတ်တင်အူဒင်အနွောပ်ညယ် ကျေမ်းပါတာတ်ခါန်းငါန်ဘန်းကား အန်တာတ်ကား လမ်းဘေ ဆတီးမတ်ပန်း ပေါ်နင်းကြီးဆွန်နာန်ကူ” ညယ် မိန့်တော်မူသမှာ။4အန်နိမ်စါန်းငှေါဒီ ကိုယ်တော်ဘင်း တပယ့်တော်တာတ်ကား “အဘင်းသမီဆာထုတ်လားစစ်ပင်းအရပ်ပေ အဘင်းသမီဆာဆွန်ကွန်းဒေ ကွန်းဂွန်းနွောပ်ရန်ကူဘင်း ပေါင်မုန့်ဒေ ဟာဟမဲကား သန်ရန်ကူဒေ” ညယ် ပြန်သဘန်း လျှောက်တာန်သဟာန်းကြီးမှာ။5ကိုယ်တော်ယေရှုကား “ဟနိမ်ဘေ ပေါင်မုန့်ဟာနယ်ငှါဒေ” ညယ်စိန်ယူမှါခ့်ခါ အန်တာတ်ရီးဒါး “ပေါင်မုန့်စစ်ဟုတ် ငှါမှာ” ညယ် ဖြေသဟာန်းကြီးမှာ။6စီးမှါခ့်ခါ ကိုယ်တော်ကား သမီဆာကလောင်းတုံန်းဒေ ကာစောက်ပေ ထုံးကြီးဒင် မိန့်တော်မူသမှာ။ ကိုယ်တော်ကား ပေါင်မုန့်ဆစ်ဟုတ်တေလာဘန်း ဘုရားရှာန်ဘင်း ကျေးဇူးတော်ဒေ ချီးမွမ်းသဘန်းနာ ပေါင်မုန့်ဒေဘိုက်ပန်း သမီဆာတာတ်နင်း မန်အီဒင် ဟိန်တပယ့်တော်တာတ်တေ အီရာန်မှါခ့်ခါ တပယ့်တော်တာတ်ရီးဒါး မန်အီကြီးရာန်မှာ။7အန်တာတ်ပေ တာန်းငှါနနူရှာတေ အစစ်ဆာ ငှါနင်းယုတ်ပင်းအတွာတ် ကိုယ်တော်ကား အန်ဘင်းတာန်းငှါတေအတွာတ် ဘုရားရှာန်ဘင်း ကျေးဇူးတော်ဒေချီးမွမ်းသဘန်း အန်ဘင်းတာန်းငှါရှရှာတေဒေရီးဒါး သမီဆာကလောင်းတုံန်းဒေ မန်အီဒင် တပယ့်တော်တာတ်တေ မိန့်တော်မူသမှာ။8သမီဆာ၌တိုင်းရီဒါး ကျဲကွန်း ယုတ်ကြီးလူမှာ။ စီးမှါခ့်ခါ တပယ့်တော်တာတ်ကား သမီဆတာတ် အယုတ်လူနွန်းဘင်း ပေါင်မုန့်ယောက် တာန်းငှါတေဒေ စုတာန်မှါခ့်ခါ ကုန်ဟာန်း စစ်ဟုတ် ဖိန်းကွန်းလူကြီးမှာ။9အန်ဘင်းနေရာဘေ သမီဆာပီးထောင်ငှါမှာ။ အန်ဘင်းသမီဆတာတ် ယုတ်စီးကြီးမှါခ့်ခါ ကိုယ်တော်ကား အန်တာတ်တေ ကျေမ်းပါ တာတ်ခါန်းငါန်မှာ။10စီးမှါခ့်ခါ ချတ်ချန်း ကိုယ်တော်ယေရှုကား ဟိန်တပယ့်တော်တာတ်ယောက်အတူတူ လှေစောက်ပေဟယ်ဘန်း ဒလမနုသအရပ်ပါ ကြွတော်မူသမှာ။11စီးမှါခ့်ခါ ဖာရိရှဲတာတ်ကား ကိုယ်တော်ထုတ်နင်းမှာငှေါဘင်း အကြောင်းဒေ သက်ပူမှါခ့်ခါ ကိုယ်တော်ပါ ထုတ်ကြီးရီဘန်း ကိုယ်တော်ယောက် စသဘန်းငြာမ်းသကြီးမှာ။ အန်တာတ်ကား ကိုယ်တော်ဒေ စမ်းသပ်သကြီးကာတ်ပင်းအတွာတ် ဘုရားရှာန်ဟက် အံ့ဩသထာတ်မဲဘင်း နိမိတ်လက္ခဏာတေဒေကာဒင် ကိုယ်တော်ဒေ စိန်ကြီးမှာ။12ကိုယ်တော်ကား သက်ပြင်းဒေ ပြင်းပြင်းချသဘန်း “အရာတ်ခေတ်ပင်းသမီဆတာတ်ကား ဟမာန်တွာတ် နိမိတ်လက္ခဏာတေဒေ စိန်ကြီးဒေ။ ဟနိမ်ဒေ ငါချီလားဒေငှေါထှာဘန်းကား အရာတ်ခေတ်ပင်း သမီဆတာတ်တေ ဟာဘင်းနိမိတ်လက္ခဏာစဲ ကာကလားအချီရား” ညယ် မိန့်တော်မူသမှာ။13စီးမှါခ့်ခါ ကိုယ်တော်ကား အန်ဘင်းဆိတ်တာတ်တေ ပဘဲဘန်း ဟိန်တပယ့်တော်တာတ်ယောက်အတူတူ လှေစောက်ပေဟယ်ဘန်း ဝဲအာမ်းအန်းကမ်းပါ ရာပ်ကြီးရီမှာ။14အန်နိမ်စါန်းငှေါဒီ တပယ့်တော်တာတ်ကား ယုတ်တင်အူဒင်တေ လာရီဒင် မတ်ကြီးရီမှာ။ လှေစောက်ပေ အန်တာတ်အတွာတ် ပေါင်မုန့်ဟုတ်အာ၌ငှါလား။15အန်၌မှါခ့်ခါ ကိုယ်တော်ကား ဟိန်တပယ့်တော်တာတ်တေ “ဆတီးပဲကြီး။ အုပ်ချုပ်သဘင်းဆိတ် ဟေရုဒ်ယောက် ဖာရိရှဲတာတ်တဆေးဒေ အထူးဆတီးပဲကြီး” ညယ် ဆတီးအီမှာ။16အန်၌မှါခ့်ခါ တပယ့်တော်တာတ်ကား “အလေကား ဟာဘင်းပေါင်မုန့်ဒေစဲ အလာရီဘင်းအတွာတ် ကိုယ်တော်ကား အန်နိမ်မိန့်သလားထှာကူ” ညယ် အချန်းချန်း ငှေါနင်းကြီးမှာ။17ကိုယ်တော်ယေရှုကား အန်တာတ်ငှေါနင်းကြီးဘင်းနာတေဒေ မိန်းရှာတ်ခါမှာ။ အမှာတွာတ် ကိုယ်တော်ကား အန်တာတ်တေ “ဟနိမ်ကား ပေါင်မုန့်အဘိုဘင်းအကြောင်းဒေ ဟမာန်ငြား ငှေါနင်းကြီးဒေ။ ဟနိမ်အရာတ်အောင်းထုတ် သဘောပေါက် အနားလည်သကြီးနွန်းရဲ။ ဟနိမ်ဟမာန်ငြား နားလည်သဒင်အတွာတ် ငြာမ်းသနင်းကြီးဒေ။18ဟနိမ်ကား မိတ်တူရှီငှါစါတ် အကတုံန်ကြီးရားရယ်။ ဟနိမ်ကား ကနားငှါဘန်း အသက်ပူကြီးရားရယ်။ ဟနိမ် အမှတ်မိသကြီးနွန်းရယ်။19ငါပေါင်မုန့်ဟာဟုတ်တေလပိုက်ပန်း သမီဆာဟာထောင်တေ နွောပ်ယုတ်အီမှါခ့်ခါ ဟနိမ်ကား ပေါင်မုန့်တေဒေ ကုန်ဟာန်းဟာ၌ဟုတ်ယောက် ကွန်ကြီးရီဒေ” ညယ်မိန့်သမှါခ့်ခါ တပယ့်တော်တာတ်ရီးဒါး “ကုန်ဟာန်းရှစ်နူဘန်းကလိန်းဟုတ်” ညယ် ပြန်သဘန်း လျှောက်တာန်သကြီးမှာ။20စီးမှါခ့်ခါ ကိုယ်တော်ကား “ပေါင်မုန့်ဆစ်ဟုတ်တေ နွောပ်နီမှါခ့်ခါ ဟနိမ်ကား ပေါင်မုန့်တေဒေ ကုန်ဟာန်းဟာ၌ဟုတ်ယောက် ကွန်ကြီးရီဒေ” ညယ် မိန့်တော်မူသမှါခ့်ခါ တပယ့်တော်တာတ်ရီးဒါး “ကုန်ဟာန်းဆစ်ဟုတ်” ညယ် ပြန်သဘန်း လျှောက်တာန်သကြီးမှာ။21ကိုယ်တော်ယေရှုကား အန်တာတ်တေ “ဟနိမ် အရာတ်အောင်းထုတ်ကွန်း အနားလည်သကြီးနွန်းရဲ” ညယ် မိန့်တော်မူသမှာ။22စီးမှါခ့်ခါ ကိုယ်တော်ယေရှုယောက် ဟိန်တပယ့်တော်တာတ်ကား ဗက်ဇဲဒမြို့ပါ ထုတ်ကြီးရီမှာ။ သမီဆာစယ်ယာကား မိတ်အကတုံန်ဘင်းဆိတ်ဟော်ဝါဒေ ကိုယ်တော်ယေရှုပါ ကော်ကြီးရီဘန်း အန်ဘင်း မိတ်အကတုံန်ဘင်းဆိတ်တေ ထိသအီဒင်အတွာတ် ကိုယ်တော်ဒေ တောင်းပါန်သကြီးမှာ။23ကိုယ်တော်ရီးဒါး အန်မိတ်အကတုံန်ဘင်းဆိတ်ပင်းသဟူးဒေ တွန်းဘန်း မြို့ပြာန်ပါ ကော်လာန်ဘဲမှာ။ စီးမှါခ့်ခါ ကိုယ်တော်ကား အန်မိတ်အကတုံန်ဘင်းဆိတ် မိတ်တူရှီစောက်ပေ အာတ်ဝဲဒေထောက်အာန်ဘန်းနာ အန်မိတ်အကတုံန်ဘင်းဆိတ်စောက်ပေ သဟူးဒေတာန်သဘန်း “နာန်စားနူစားနာဒေ ကတုံန်လည်း” ညယ် စိန်ယူရာန်မှာ။24အန်ဘင်းဆိတ်ရီးဒါး လှည့်သောယူဝါန်ဘန်း “ငါ သမီဆာတာတ်တေ ကတုံန်လူနင်းဒီဒါး အန်တာတ်ကား လမ်းဟာပန်းနင်းကြီးဘင်း ဖွုန်းကလွုန်တေနိမ် ထှာနင်းမှာ” ညယ် ပြန်သဘန်း ငှေါဟာန်းမှာ။25ပန်းနူ ကိုယ်တော်ကား ဟိန်သဟူးတေ အန်ဘင်းဆိတ်ပင်း မိတ်တူရှီစောက်ပေ တာန်ဒါန်မှာ။ စီးမှါခ့်ခါ အန်ဘင်းဆိတ်ကား မိတ်တူရှီဒေ ဖွာမ်းတာန်မှါခ့်ခါ ဟိန်ကား အမြင်အာရုံလူဟာန်းဘန်း အရာအာလုံးတေ ရှာန်းရှာန်းလာန်းလာန်း ကတုံန်ဟာန်းငါန်မှာ။26ကိုယ်တော်ကား အန်ဘင်းဆိတ်တေ “မြို့နောင်းပါ အဆာန်ဆာ” ညယ်ငှေါဘန်း ဟိန်ကျေမ်းပါ လာန်ဟာန်းစိန်းယုတ်အာန်မှာ။ 27စီးမှါခ့်ခါ ကိုယ်တော်ယေရှုယောက် တပယ့်တော်တာတ်ကား ဆီဇာရီးယား ဖိလိပ္ပုမြို့ပိုက်ပင်း ထိန်တေပါ ကြွတော်မူသမှာ။ လမ်းဘေ ကိုယ်တော်ကား ဟိန်တပယ့်တော်တာတ်တေ “သမီဆာတာတ်ကား ငါတေ ဟာဟမဲထှာမှာညယ် ငှေါနင်းကြီးဒေ” ညယ် စိန်ယူဝါမ်မှာ။28တပယ့်တော်တာတ်ရီးဒါး “စယ်ယာကား ကိုယ်တော်ဒေ ဝဲငွတ်ပင်းမာန်းဂလာအွန်အီဘင်း အိုးဆကြီးယောဟန်၊ စယ်ယာကား ပရောဖက်ဧလိယညယ် ငှေါကြီးဘန်းနာ စယ်ယာတာတ်ကား ပရောဖက်တာတ်နောင်းဟက် ဟော်ဝါညယ် ငှေါပန်းနင်းကြီးမှာ” ညယ် ပြန်သဘန်း လျှောက်တာန်သကြီးမှာ။29အန်၌မှါခ့်ခါ ကိုယ်တော်ကား အန်တာတ်တေ “အန်နိမ်စါန်းငှေါဒီ ဟနိမ်ရီးဒါး ငါဒေ ဟာဟမဲထှာမှာညယ် ငှေါကြီးကူဒေ” ညယ်စိန်ယူမှါခ့်ခါ ပေတရုကား “ကိုယ်တော်ကား မေရှိယအရှာန်ထှာမှာ” ညယ် ပြန်သဘန်း လျှောက်တာန်သမှာ။30ကိုယ်တော်ယေရှုကား ဟိန်အကြောင်းဒေ ဟာဟမဲဒေစဲအငှေါကွန်း တပယ့်တော်တာတ်တေ အမိန့်အီမှာ။31စီးမှါခ့်ခါ ကိုယ်တော်ယေရှုကား ဟိန်တပယ့်တော်တာတ်တေ “သမီဆာ ဆာ ကား ဒုက္ခဆာန်းရဲတေ ကလောင်းတုံန်း ခံသထှာကူထှာဘန်း ဂျူးသမီဆာဟလာန်းစါတ်တာတ်၊ ဂျူးပုရောဟိတ်ဟလာန်းစါတ်တာတ်ယောက် ကျမ်းကျိန်းပေါ့ပင်း အိုးဆကြီးတာတ် ငြာမ်းသလားဒေ ခံသထှာကူထှာမှာ။ ဟိန်ကား သာန်းရှီးခံသထှာစီးဘန်း ဆွန်းရာတ်ထုတ်မားမာန်းရာတ်ပေ အဆာတ်ပြန်သဘန်းစားဟာန်းရီမှာ” ညယ် စသဘန်း ဟောသကာဆွောန်သကာမှာ။32ကိုယ်တော်ကား အန်ဘင်းအကြောင်းတေဒေ ဟိန်တပယ့်တော်တာတ်နင်း ပွာမ်းပွာမ်းလာန်းလာန်း မိန့်တော်မူသည်မှာ။ အမှာတွာတ် ပေတရုကား ကိုယ်တော်ဒေ ဟိန်ပိုက်ပါကော်ဘန်း အန်ဘင်းအကြောင်းအရာတေဒေ အမိန့်သကွန်း တားသပဲမှာ။33အန်နိမ်စါန်းငှေါဒီ ကိုယ်တော်ယေရှုကား ဟိန်ဘင်း တပယ့်တော်တာတ်ငှါလားပါ လှည့်သောယူဝါန်ဘန်း ပေတရုတေ “မာရ်နတ်၊ ငါယောက် လမ်းစာလားပါ ပူလာန်ဘဲ။ နာန်အဆေင်နောင်းဘေ ဘုရားရှာန်ယောက် ဆိုင်သဘင်းနာတေ အဘိုဘန်းနာ သမီဆာတာတ်ယောက် ဆိုင်သဘင်းနာတေ၌ဆာ ငှါနင်းမှာ” ညယ် ဆုံးမတော်မူသမှာ။34စီးမှါခ့်ခါ ကိုယ်တော်ကား ဟိန်တပယ့်တော်တာတ်ယောက်အတူတူ သမီဆာကလောင်းတုံန်းဒေ ဟိန်ပါကော်ဘန်း “ဟာဟမဲစါန်းငှေါဒီ ငါဘင်းတပယ့်တော် ထှာကာတ်ပန်းကား ကိုယ်ဘင်း အလိုဆန္ဒတေဒေ ငြာမ်းပယ်သထှာကူထှာဘန်း ကိုယ်ဘင်း တာပ်ပါးကပ်ပင်းတိုင်ဒေ ဖဲဘန်းနာ ငါဟလိန်းပါ ဒီရာတ်ထှာကူ။35ဟမာန်တွာတ်ငှေါဘန်းတာတ်ငှေါ ကိုယ့်အဆာတ်တေ ကယ်သကာတ်ပင်း ဟာဟမဲစါန်းငှေါဒီ အန်တာတ်ပင်းအဆာတ်တေ ဆုံးရှုံးသထှာကူငှေါဒီဒါး ငါယောက် မာန်းဂလာဆတာန်းအတွာတ် ကိုယ်အဆာတ်တေ ဆုံးရှုံးသထှာဘင်း ဟာဟမဲစါန်းငှေါဒီ ဟာ၌မှါခ့်ခါစဲအရှီးဘင်းအဆာတ်တေ လူကူထှာမှာ။36သမီဆာဟော်ဝါကား ကမ္ဘာလောကတုံန်းတေ ပိုင်ဆိုင်သလူဒီဒါး ကိုယ့်အဆာတ်ဝိညာဉ်ဒေ ဆုံးရှုံးသထှာဘန်းကား ဟာဘင်း အကျိုးငှါကူဒေ။37သမီဆတာတ်ကား အန်တာတ်ပင်း အဆာတ်ဝိညာဉ်ဒေ ပြန်သဘန်းလူဟာန်းစိန်းကွန်း ဟာဘင်းနာယောက်စဲ အီဟာန်းကြီးရန်ကလား အချီရား။38ဘုရားရှာန်ဒေ အယုံကြည်သဘန်း အမဲဘင်းသမီဆတာတ်ယောက် ဖိန်းဘန်းနင်းဘင်း အရာတ်ခေတ်ပေ ငါယောက် ငါဘင်း ဟောသကာ ဆွောန်သကာဘင်းနာတေဒေ ငြာမ်းပယ်သဘင်း ဟာဟမဲဒေစါန်းငှေါဒီ သမီဆာ ဆာ ကား မြင့်မြတ်သဘင်း မဲဘင်းဟမန်းတာတ်ယောက်အတူတူ ဟိန်အဝါဘင်း အရောင်အဝါတေယောက် ပြန်သဘန်း ကြွဒီဟာန်းမှါခ့်ခါ အန်ဘင်းဆိတ်တာတ်တေ ငြာမ်းပယ်သကူထှာမှာ” ညယ် မိန့်တော်မူသမှာ။
Empower Asia Bible Translation Movement