ရှာန်မာကု7
1မာန်းရာတ်ရအာမှါခ့်ခါ ဂျေရုဆလင်မြို့ဟက် ဒီကြီးဘင်း ဖာရိရှဲတာတ်ယောက် ကျမ်းကျိန်းပေါ့ပင်း အိုးဆကြီးစယ်ယာကား ကိုယ်တော်ယေရှုပိုက်ပါ စုသဘန်းထုတ်ကြီးရီမှာ။2စီးမှါခ့်ခါ ကိုယ်တော်ယေရှုဘင်း တပယ့်တော်စယ်ယာတာတ်ကား ဂျူးသမီဆတာတ် ဓလေ့အတိုင်း သဟူးတေဒေအဆင်ညယ် ညစ်ပတ်သဘင်း သဟူးတေယောက် ယုတ်တင်အူဒင်တေ ယုတ်ပန်းနင်းကြီးဘင်းနာဒေ အန်တာတ် ကတုံန်ကြီးရာန်မှာ။3ဖာရိရှဲတာတ်ယောက် ဂျူးသမီဆာတာတ်ကား အန်တာတ် အုတ်တာတ်အတော်တာတ်ပင်း ဓလေ့ထုံးတမ်းအစဉ်အလာအတိုင်း အန်တာတ်သဟူးတေဒေ မလဲကလဲအဖောညယ် ယုတ်တင်အူဒင်တေဒေ အယုတ်ကြီးရား။4အန်တာတ်ကား ဈေးဟက် ယုတ်တင်အူဒင် စယ်ယာမီးရီမှါခ့်ခါရီးဒါး အန်တာတ်ကား သဟူးဒေအဆေင်ညယ် အန်ဘင်းယုတ်တင်အူဒင်ဒေ အယုတ်ကြီးရား။ အန်တာတ်ကား တိပ်ရှီ၊ ခွာပ်၊ ကကန်းတေဒေ ဖောထှာဘင်းယောက်ဆိုင်သဘင်း တခြားဓလေ့ထုံးတမ်းတာတ်တေရီးဒါး ဂရုတစိုက်လိုက်နာသကြီးမှာ။ 5အမှာတွာတ် ဖာရိရှဲတာတ်ယောက် ကျမ်းကျိန်းပေါ့ပင်း အိုးဆကြီးတာတ်ကား ကိုယ်တော်ယေရှုတေ “နာန်တပယ့်တော်တာတ်ကား အုတ်တာတ်အတော်တာတ်ပင်း ဓလေ့ထုံးတမ်းတာတ်တေ အလိုက်နာသကြီးညယ် ညစ်ပတ်သဘင်းသဟူးယောက် ယုတ်ပန်း အူဘန်းနင်းကြီးဒေ” ညယ် စိန်ယူကြီးရာန်မှာ။6အန်၌မှါခ့်ခါ ကိုယ်တော်ကား အန်ဘင်းဆိတ်တာတ်တေ “သမီဆာမလဲနိမ် အယောင်ဆောင်သနင်းဘင်း ဟနိမ်အကြောင်းဒေ ပရောဖက်ဟေရှာယကား‘အန်ဘင်းဆိတ်တာတ်ကား အန်တာတ်တူးယောက် ငါဒေရိုသေသကြီးဒီဒါးအန်တာတ် အဆေင်တေကား ငါယောက် လမ်းစာဘန်းနင်းမှာ။7အန်တာတ်ကား ငါဘင်း ပညတ်တော်တေအစား အန်တာတ်သတ်မှတ်သပဲဘင်း စည်းမျဉ်းစည်းကမ်းတေဒေ၌ဆာ ဆွောန်သကြီးဘင်းအတွာတ်အန်တာတ်ငါဒေ ဝိုင်သကြီးဘင်းနာကား အချည်းနှီးထှာမှာ’ ညယ် ကြိုတာန်သဘန်း နိမိတ်ဖတ်ငှေါရီဘင်းနာကား မှန်ကန်သမှာ။8ဟနိမ်ကား ဘုရားရှာန်ဘင်း ပညတ်တော်တေဒေ စွန့်သဘန်း သမီဆတာတ် ဓလေ့ထုံးတမ်းတာတ်တေ လိုက်နာသနင်းကြီးမှာ” ညယ် မိန့်တော်မူသမှာ။9စီးမှါခ့်ခါ ကိုယ်တော်ယေရှုကား ဆာတ်သဘန်း “ဟနိမ်ကား ဟနိမ်ဘင်း ဓလေ့ထုံးတမ်းတာတ်တေ ထိန်းသိမ်းသဒင်အတွာတ် ဘုရားရှာန်ဘင်း ပညတ်တော်တေဒေ ငြာမ်းပယ်သကြီးရာန်မှာ။10ဟမာန်တွာတ်ငှေါဘန်းတာတ်ငှေါ မောရှေကား ‘ဟနိမ်အမယ်အဝါဒေ ရိုသေသကြီး’ ယောက် ‘ဟနိမ်ကား ဟနိမ်အမယ် အန်နိမ်အချီ ဟနိမ်အဝါဒေ စော်ကားသဘန်းငှေါဘန်းကား ရှီးဘင်းဒဏ်ခံသထှာကူ’ ညယ် ငှေါဘန်းပဲမှာ။11အန်နိမ်စါန်းငှေါဒီ ဟနိမ်ကား သမီဆတာတ်တေ အန်တာတ်အမယ်အဝါတာတ်တေ ‘ငါဟက် ဟနိမ်လူကူဘင်းနာတေကား ဘုရားရှာန်ဒေ လှူသပဲဘင်းပစ္စည်း ကော်ဘန်ထှာမှာ’ ညယ် ငှေါဘင်းကား ချီမှာညယ် ဆွောန်သကြီးမှာ။12စီးမှါခ့်ခါ ဟနိမ်ကား သမီဆာတာတ်တေ အန်တာတ်အမယ် အန်နိမ်အချီ အဝါဒေ ဟာဘင်းနာစဲ ကူညီအထောက်ပံ့သစိန်းဘန်း။13အန်ဘင်းနည်းယောက် ဟနိမ် လက်ဆင့်ကမ်းဒီဘင်း ဓလေ့ထုံးတမ်းတာတ်ယောက် ဘုရားရှာန်ဘင်း နှုတ်ကပါတ်တော်တေဒေ ဖြာတ်သနင်းကြီးလားထှာမှာ။ ဟနိမ်ကား အန်နိမ်အမျိုးတေဒေ အွန်နင်းကြီးလားထှာမှာ” ညယ် မိန့်တော်မူသမှာ။14စီးမှါခ့်ခါ ကိုယ်တော်ယေရှုကား သမီဆာကလောင်းတုံန်းဒေ ဟိန်ပါကော်ဘန်း “ဟနိမ်အားလုံး ငါငှေါဘင်းတူးတေဒေ သက်ပန်း နားလည်သကွန်း ကြိုးစားသကြီး။15ပြာန်ဟက်ဟနိမ်နောင်းပါဆာန်ဘန်း ဟနိမ်ဒေ ညစ်ပတ်သကွန်း အွန်လားလူဘင်းနာညယ် အဘိုဝါး။ ဟနိမ်အဆေင်နောင်းဟက် ပူရီဘင်း အမဲဘင်းနာတေ၌ဆာ ဟနိမ်ဒေ ညစ်ပတ်သစိန်းလားထှာမှာ။16ကနားငှါဘန်း သက်ပူဟာဘင်း ဟာဟမဲစါန်းငှေါဒီ အာရုံစိုက်သဘန်း သက်ကြီး” ညယ် မိန့်တော်မူသမှာ။17စီးမှါခ့်ခါ ကိုယ်တော်ယေရှုကား သမီဆာတာတ်ဟက် ပူရီဘန်း ကျေမ်းကျေမ်းနာ ပါဆာန်မှါခ့်ခါ ဟိန်တပယ့်တော်တာတ်ကား ကိုယ်တော်ဒေ အန်ဘင်းဥပမာဘင်း အဓိပ္ပာယ်ဒေ စိန်ယူကြီးမှာ။18ကိုယ်တော်ရီးဒါး အန်တာတ်တေ “ဟနိမ်ရီးဒါး နားအလည်သကြီးရားရဲ။ ဟနိမ် ယုတ်ပန်းနင်းဘင်း ယုတ်တင်အူဒင်တေကား ဟနိမ်ဒေ အညစ်ပတ်သစိန်းငှါးငှေါဘင်းနာဒေ ဟနိမ်အမိန်းရှာတ်ခါကြီးရားရဲ။19ဟမာန်တွာတ်ငှေါဘန်းတာတ်ငှေါ အန်ဘင်းနာတေကား ဟနိမ်အဆေင်နောင်းပါ ထုတ်အာန်လားအချီညယ် ဟနိမ်အစာအိမ်နောင်းပါ ထုတ်ပန်း လာန်ဘင်းပြာန်ပါ လပူဟာန်းကြီးရာန်ဘင်းအတွာတ်ထှာမှာ” ညယ် မိန့်တော်မူသမှာ။ ကိုယ်တော်ယေရှု အန်နိမ်မိန့်သထှာဘင်းနာကား ယုတ်တင်အူဒင်အားလုံးတေကား ယုတ်တင်အတွာတ် သင့်တော်သမှာညယ် ငှေါကာတ်လားထှာမှာ။20စီးမှါခ့်ခါ ကိုယ်တော်ကား ဆာတ်သဘန်း “ဟနိမ်အဆေင်နောင်းဟက် ပူရီဘင်းနာတေ၌ဆာ ဟနိမ်တေ ညစ်ပတ်သစိန်းလားထှာမှာ။21ဟမာန်တွာတ်ငှေါဘန်းတာတ်ငှေါ ဟနိမ်အဆေင်နောင်းဟက် အမဲဘင်းအကြံအစည်တေ၊ ကူဘင်းနာတေ၊ သမီအဆာတ်တေသာန်းရှီးဘင်းနာတေ၊ သမီဘင်း ဆာဆအိတ်တာတ်တေ ပြစ်မှားသဘင်းနာတေ၊ အိမ်ထောင်ရေးဖောက်ပြန်သဘင်း၊22လောဘတုံန်းဘင်း၊ ယုတ်ညံ့သဘင်း၊ ကြိတ်ပင်း၊ ရာန်းစာန်းသဘင်း၊ အနာလိုသဘင်း၊ အတာန်းငှေါဘင်း၊ မာနတုံန်းဘင်းယောက် မိုက်မဲသဘင်းနာတေကား ပူကြီးရီဘင်းအတွာတ်ထှာမှာ။23အန်ဘင်းအမဲဘင်းနာတေအားလုံးကား ဟနိမ်နောင်းဟက်ပူရီဘန်း ဟနိမ်ဒေ ညစ်ပတ်သစိန်းလားထှာမှာ” ညယ် မိန့်တော်မူသမှာ။24စီးမှါခ့်ခါ ကိုယ်တော်ယေရှုကား အန်ဘင်းနေရာဟက် ပူရီဘန်း တုရုမြို့ပိုက်ပင်း အရပ်ပါ ကြွတော်မူသမှာ။ ကိုယ်တော်ကား ကျေမ်းကျေမ်းနာပါဆာန်ဘန်း အန်ဘင်းကျေမ်းဘေ တည်းသဘန်းနင်းဘင်းနာဒေ ဟာဟမဲတေစဲ အမိန်းရှာတ်ခါစိန်းကာတ်သည်ဒါး သမီဆာတာတ်ကား မိန်းရှာတ်ခါကြီးရာန်မှာ။25အမဲဘင်းနနူ ကပ်ခံသထှာဘင်း အီးရှီရှာဟော်ဝါအမယ်ကား ကိုယ်တော်ယေရှုအကြောင်းဒေ သက်ပူမှါခ့်ခါ ချတ်ချန်း ကိုယ်တော်ပါထုတ်အီဘန်း ကိုယ်တော်တာပိုင်းဘေ သထူထောက်တာန်မှာ။26အန်ဘင်းအီးရှီကား ဆီးရီးယားပြေအတွာန်းဘင်း ဖိုနီးရှီးယားညယ် ကော်ဘင်းအရပ်ပေ ပန်ဘင်း ဂျူးသမီဆာအချီဘင်းဆိတ်ထှာမှာ။ အန်ဘင်းအီးရှီကား ဟိန်ဆအိတ်ပေ ကပ်ပန်းနင်းဘင်း အမဲဘင်းနနူတေ ငါတ်ပူအီဒင်အတွာတ် ကိုယ်တော်ယေရှုတေ တောင်းပါန်သမှာ။27အန်နိမ်စါန်းငှေါဒီ ကိုယ်တော်ယေရှုကား “အရာန်ဦးဆုံး ငါမိသားစုတာတ်ထှာဘင်း ဂျူးသမီဆာ ရှရှာတာတ်တေ အန်တာတ်လိုသနယ် နွောပ်နာန်ယုတ်ကူ။ ရှရှာတာတ်ဟက် ယုတ်တင်ဒေလာဘန်း ကြည်တာတ်နင်း နွောပ်တင်ကား အမှန်သဝါး” ညယ် မိန့်တော်မူသမှာ။28အန်၌မှါခ့်ခါ အန်ဘင်းအီးရှီကား “အရှာန်၊ စားပွဲတွန်ဘေငှါဘင်း ကြည်တေစဲ ရှရှာတာတ်ပင်း ယုတ်ကျန်အူကျန်တေဒေ ယုတ်ကြီးလူမှာ” ညယ် ပြန်သဘန်းငှေါမှာ။29အမှာတွာတ် ကိုယ်တော်ယေရှုကား အီးရှီဒေ “မဲဘင်းအဖြေထှာမှာ။ နာန်ဆအိတ်ဟက် အမဲဘင်းနနူကား ပူလာန်ဘဲဘန်းထှာဘင်းအတွာတ် အရာတ် နာန်ကျေမ်းပါလာန်ဟာန်းစိတ်” ညယ် မိန့်သမှာ။30စီးမှါခ့်ခါ အီးရှီကား ကျေမ်းပါလာန်ဟာန်းမှါခ့်ခါ ဟိန်ဆအိတ်ကား အမဲဘင်းနနူပူလာန်ဘဲပန်း အေ့ပ်ဆေစ်နောင်းဘေ ပေါ်ဘန်းနင်းဘင်းနာဒေ ကတုံန်ငါန်မှာ။31စီးမှါခ့်ခါ ကိုယ်တော်ယေရှုကား တုရုမြို့ပိုက်ဟက် ပူရီဘန်း ဇိဒုန်မြို့ဒေ ဖြတ်သဘန်း ဒေကာပေါလိပြေဘင်း ဂါလိလဲအာမ်းပါ ကြွတော်မူသမှာ။32ကိုယ်တော်ကား အန်ဘင်းအရပ်ပါထုတ်မှါခ့်ခါ သမီဆာစယ်ယာကား ကနားအသက်ပူဟာဘန်း တူးအသပေါက်ဟာဘင်းဆိတ်ဟော်ဝါဒေ ကိုယ်တော်ပါကော်ရီဘန်း ကိုယ်တော်ဘင်း သဟူးဒေ အန်ဘင်းဆိတ်စောက်ပေ တာန်သအီဒင် ကိုယ်တော်ဒေ တောင်းပါန်သကြီးမှာ။33အမှာတွာတ် ကိုယ်တော်ယေရှုကား အန်ဘင်းဆိတ်တေ သမီဆာကလောင်းတုံန်းဟက် လမ်းစာလားပါ သပ်သပ်ကော်ရီဘန်း အန်ဘင်းဆိတ် ကနားနောင်းပါ ဟိန်ဘင်း တာတ်ရှီဒေ စါန်းငါန်မှာ။ စီးမှါခ့်ခါ ကိုယ်တော်ကား ဟိန်တာတ်ရှီဒေ အာတ်ဝဲဆွတ်ပန်း အန်ဘင်းဆိတ်ဆလီးဒေ ထိတာန်မှာ။34စီးမှါခ့်ခါ ကိုယ်တော်ကား ဟမုခ်စောက်ပါ မျှော်သဘန်းနာ သက်ပြင်းချသဘန်း “ဧဖသ” ညယ် မိန့်တော်မူသမှာ။ အန်ဘင်းအဓိပ္ပာယ်ကား “ပွါမ်းတာန်” ညယ်ထှာမှာ။35ချတ်ချန်းငှေါနိမ် အန်ဘင်းဆိတ်ကနားတေကား သက်ပူဟာရီဘန်း အန်ဘင်းဆိတ်ကား တူးဒေပီပီသသ စသဘန်းငှေါဟာန်းရန်နီမှာ။36စီးမှါခ့်ခါ ကိုယ်တော်ကား သမီဆတာတ်တေ ဟိန်အွန်နီဘင်းနာတေဒေ ဟာဟမဲဒေစဲအငှေါကွန်း အမိန့်အီမှာ။ အန်နိမ်စါန်းငှေါဒီ ကိုယ်တော်ကား သမီဆတာတ်တေအငှေါကွန်း အမိန့်အီလေလေ သမီဆတာတ်ကား အန်ဘင်းအကြောင်းအရာတေဒေ ပိုသောငှေါလေလေထှာမှာ။37အန်ဘင်းအကြောင်းဒေ သက်ပူကြီးလူဘင်း သမီဆာအားလုံးတာတ်ရီးဒါး အကြီးကျယ်အံ့ဩသကြီးဘန်း “ဟိန်အွန်ဘင်းမှန်သမျှကား အံ့ဩသထာတ်မဲမှာ။ ဟိန်ကား ကနားအသက်ပူဘင်းဆိတ်တေ ကနားသက်ပူကွန်း အွန်ရန်လားဆာအချီညယ် တူးအသပေါက်ရန်ဘင်းဆိတ်တေရီးဒါး တူးသပေါက်ရန်ကွန်း အွန်ရန်နာ” ညယ်ငှေါကြီးမှာ။
Empower Asia Bible Translation Movement