ရှာန်မာကု15
1နောက်မာန်းရာတ် အတိုင်စောင်းရှီမှါခ့်ခါ ဂျူးပုရောဟိတ်ဟလာန်းစါတ်တာတ်၊ ဂျူးသမီဆာဟလာန်းစါတ်တုံန်းတာတ်၊ ကျမ်းကျိန်းပေါ့ပင်း အိုးဆကြီးတာတ်ယောက် ဂျူးတရားလွှတ်တော် တစ်ဖွဲ့လုံးကား ကိုယ်တော်ယေရှုတေ ဟာနိမ် စီရာန်သကူဘင်းဒေ ဆုံးဖြတ်သကြီးရီမှာ။ စီးမှါခ့်ခါ အန်တာတ်ကား ကိုယ်တော်ယေရှုတေ ဆိန်ကလာတ်ရာန်ဟာတ်တေယောက် ဟွတ်ပန်း ပိလတ်ရှာန်းပလာန်ရှာပါ အပ်သဒင် ကော်လာန်ဘဲကြီးမှာ။2အမှာတွာတ် ပိလတ်ရှာန်းပလာန်ရှာရီးဒါး ကိုယ်တော်ယေရှုတေ “နာန်ကား ဂျူးသမီဆတာတ်ပင်း ရှာန်းပလာန်ချီလဲ” ညယ် စိန်ယူမှါခ့်ခါ ကိုယ်တော်ရီဒါး “နာန်ငှေါဘင်းအတိုင်း ချီမှာ” ညယ် ပြန်သဘန်းငှေါမှာ။3ဂျူးပုရောဟိတ်ဟလာန်းစါတ်တာတ်ရီးဒါး ကိုယ်တော်ယေရှုတေ အကြောင်းအရာ ကလောင်းတုံန်းယောက် စွပ်စွဲသဘန်း ငှေါကြီးမှာ။4အမှာတွာတ် ပိလတ်ရှာန်းပလာန်ရှာရီးဒါး ကိုယ်တော်ယေရှုတေ “နာန်ကား ဟာဘင်းနာဒေစဲအဖြေသညယ် နင်းကလဲ။ အန်တာတ် နာန်ဒေ စွပ်စွဲသဘန်း ငှေါနင်းဘင်းနာတေကား ဟာနယ်တုံန်းလွောန်မှာ ငှေါဘင်းနာဒေ ယူရာန်” ညယ်ပြန်သဘန်းငှေါမှာ။5အန်နိမ်စါန်းငှေါဒီ ကိုယ်တော်ယေရှုကား ဟာဟမဲဒေစဲ အငှေါညယ် နင်းဘင်းအတွာတ် ပိလတ်ရှာန်းပလာန်ရှာရီးဒါး အံ့ဩသနင်းမှာ။6ပသခါပွဲတော် ထုတ်အီမှါခ့်ခါ၌တိုင်း ရှာန်းပလာန်ရှာတာတ်ကား သမီဆတာတ်စိန်ဘင်း အကျဉ်းဆားဟော်ဝါဒေ တာတ်အီဘင်း ဓလေ့ငှါမှာ။7အန်ကားအချိန်ဘေ ဗာရဗ္ဗညယ် ကော်ဘင်းဆိတ်ဟော်ဝါကား ရောမအစိုးရဒေ ဆန့်ကျင်သဘန်း တော်လှန်ပုန်ကန်သကြီးဘင်း အချိန်မှါခ့်ခါ သမီဆာသာန်းရှီးပတ်ကြီးရီဘင်း တခြားဘင်းဆိတ်တာတ်ယောက်အတူတူ ထောင်အက်ပန်းနင်းမှာ။8စီးမှါခ့်ခါ သမီဆာကလောင်းတုံန်းကား ပိလတ်ရှာန်းပလာန်ရှာပါ ထုတ်ကြီးရီဘန်း အန်တာတ်အတွာတ် ကူပီး ဟိန်အွန်နေကျအတိုင်း အွန်အီဒင် စိန်ကြီးမှာ။9ပိလတ်ရှာန်းပလာန်ရှာရီးဒါး “ငါဒေ ဟနိမ်အတွာတ် ဂျူးသမီဆာတာတ်ပင်း ရှာန်းပလာန်ဒေ တာတ်အီစိန်းကာတ်လဲ” ညယ် စိန်ယူမှာ။10ဂျူးပုရောဟိတ်ဟလာန်းစါတ်တာတ်ကား ကိုယ်တော်ယေရှုတေ ယူးနီကြီးဘင်းအတွာတ် အရာတ်နိမ် ဟိန်သဟူးပါ အပ်သကြီးဘင်းဒေ ပိလတ်ရှာန်းပလာန်ရှာကား မလဲကလဲမိန်းရှာတ်ခါမှာ။11အန်နိမ်စါန်းငှေါဒီ ဂျူးပုရောဟိတ်ဟလာန်းစါတ်တာတ်ကား ကိုယ်တော်ယေရှုအစား ဗာရဗ္ဗဒေ တာတ်အီဒင် ပိလတ်ရှာန်းပလာန်ရှာဘေ စိန်ဒင်အတွာတ် သမီဆတာတ်တေ စည်းရုံးသမှာ။12ပိလတ်ရှာန်းပလာန်ရှာရီးဒါး သမီဆာတာတ်တေ ပြန်သဘန်း “အန်နိမ်ငှေါဘန်းကား ဂျူးသမီဆာတာတ်ပင်း ရှာန်းပလာန်ညယ် ဟနိမ်ကော်နင်းဘင်း အဘင်းသမီဆာဒေ ငါဟာနိမ်အွန်ထှာကူဒေ” ညယ် စိန်ယူမှာ။13အမှာတွာတ် သမီဆာတာတ်ရီးဒါး “ဟိန်ဒေ တာပ်ပါးကပ်ပင်းတိုင်စောက်ပေ တာန်သဘန်း သာန်းရှီးရာန်” ညယ် ဟာတ်ပန်းငှေါနင်းကြီးမှာ။14ပိလတ်ရှာန်းပလာန်ရှာရီးဒါး အန်တာတ်တေ “ဟမာန်တွာတ်ဟွန်ကား။ အဘင်းဆိတ်ကား ဟာနိမ်အပြစ်တေ အွန်နီဒေ” ညယ် စိန်ယူမှာ။ အန်နိမ်စါန်းငှေါဒီ အန်တာတ်ကား “ဟိန်ဒေ တာပ်ပါးကပ်ပင်းတိုင်စောက်ပေ တာန်သဘန်း သာန်းရှီးရာန်” ညယ် ပိုသောဝါတ်ဆလာတ်တုံန်း ဟာတ်ကြီးမှာ။15အမှာတွာတ် ပိလတ်ရှာန်းပလာန်ရှာကား သမီဆာတာတ်တေ အဆေင်ကျေနပ်သစိန်းဒင် အန်တာတ်အတွာတ် ဗာရဗ္ဗဒေ တာတ်အီရာန်မှာ။ ဟိန်ကား ကိုယ်တော်ယေရှုတေ ဝိုင်းကလာတ်ယောက် သာန်းဘန်း တာပ်ပါးကပ်ပင်းတိုင်စောက်ပေ တာန်သဘန်းနာ သာန်းရှီးဒင် စစ်ဆားစယ်ယာဘင်း သဟူးပါအပ်တာန်မှာ။16စီးမှါခ့်ခါ စစ်ဆားတာတ်ရီးဒါး ကိုယ်တော်ယေရှုတေ ရှာန်းပလာန်ရှာ ကျေမ်းဝါမ်းနောင်းပါ ကော်လာန်ဘဲပန်း ကျန်သဘင်း စစ်ဆားတာတ်တေရီးဒါး ကော်ဘန်း စုသစိန်းယုတ်အာန်မှာ။17စစ်ဆားတာတ်ရီးဒါး ကိုယ်တော်ယေရှုတေ ခရမ်းရောင်ဆာန်ဆုန်ဒေ တော်အီကြီးဘန်း စောဟားကလိုင်းယောက် အွန်ဘန်းပဲဘင်း သရဖူဒေ ကိုယ်တော်ဟလာန်းစောက်ပေ ဖူးအီပဲကြီးမှာ။18စီးမှါခ့်ခါ အန်တာတ်ကား ကိုယ်တော်ယေရှုတေ “ဂျူးသမီဆာတာတ်ပင်းရှာန်းပလာန် အဆာတ်ရာကျော် စောက်စိန်းကိုင်ယုတ်” ညယ်ငှေါဘန်း နီးကြီးဘန်းနာ နှုတ်ဆက်သကြီးမှာ။19အန်တာတ်ကား ကိုယ်တော်ယေရှုဟလာန်းဒေ ဒုတ်တူကာတ်ယောက် သာန်းကြီးဘန်း လာန်စောက်ပေ အာတ်ဝဲတေရီး ထောက်ကြီးမှာ။ အန်တာတ်ကား သထူထောက်သကြီးရာန်ဘန်း ကိုယ်တော်ဒေ ဝိုင်သကြီးမှာ။20အန်တာတ်ကား ကိုယ်တော်ဒေ နီစီးကြီးမှါခ့်ခါ ခရမ်းရောင်ဆာန်ဆုန်ဒေဟွပ်ပန်း ကိုယ်တော်ဒေ ဟိန်ဆာန်ဆုန်တေဒေ ပြန်သဘန်း တော်အီဟာန်းရာန်မှာ။ စီးမှါခ့်ခါ အန်တာတ်ကား ကိုယ်တော်ဒေ တာပ်ပါးကပ်ပင်းတိုင်စောက်ပေ တာန်သဘန်း သာန်းရှီးကူဘင်းနေရာပါ ကော်လာန်ပဲကြီးမှာ။21လမ်းဘေ အန်တာတ်ကား အလက်ဇန္ဒြားယောက် ရုဖုတာတ်အဝါထှာဘင်း ကုရေနေမြို့ဆား ရှိမုန်ဒေ ကတုံန်ငါန်မှာ။ ဟိန်ကား ထိန်ဟက် မြို့ပါဒီနင်းလားထှာမှာ။ စစ်ဆားတာတ်ကား ဟိန်ဒေ ကိုယ်တော်ယေရှုဘင်း တာပ်ပါးကပ်ပင်းတိုင်ဒေ အတာန်းဖဲစိန်းယုတ်ကြီးမှာ။22အန်တာတ်ကား ကိုယ်တော်ယေရှုတေ “ဟလာန်းအုတ်ခွံနေရာ” ညယ် အဓိပ္ပာယ်လူဘင်း ဂေါလဂေါသအရပ်ပါ ကော်လာန်ဘဲကြီးမှာ။23စီးမှါခ့်ခါ အန်တာတ်ကား ကိုယ်တော်ယေရှုတေ မုရန်ယောက် ကရော်ပဲဘင်းဝိုင်ဒေ တိုက်သမှါခ့်ခါ ကိုယ်တော်ကား အအူရီရား။24စစ်ဆားတာတ်ကား ကိုယ်တော်ယေရှုတေ သာန်းရှီးဒင်အတွာတ် တာပ်ပါးကပ်ပင်းတိုင်စောက်ပေ တာန်သဘန်း ဆိန်ကလာတ်ယောက် သာန်းကပ်သကြီးရာန်မှာ။ အန်တာတ်ကား ကိုယ်တော်ဘင်း ဆာန်ဆုန်တေဒေ ဟာဟမဲကား ဟာဘင်းဆာန်ဆုန်ဒေ လူမှာညယ် မိန်းရှာတ်ခါရာတ် မဲနုတ်ပန်းမန်ကြီးမှာ။25ကိုယ်တော်ယေရှုတေ အန်တာတ် တာပ်ပါးကပ်ပင်းတိုင်စောက်ပေ တာန်သဘင်းအချိန်ကား အတိုင်ကိုးနာရီထှာမှာ။26စစ်ဆားတာတ်ကား “ဂျူးသမီဆာတာတ်ပင်းရှာန်းပလာန်” ညယ်ရေးသပဲဘင်း ဆိုင်းဘုတ်တေ တာပ်ပါးကပ်ပင်းတိုင်ဘင်း ကိုယ်တော်ယေရှု ဟလာန်းစောက်ပေ ဝယ်ပဲကြီးမှာ။27အန်တာတ်ကား ကိုယ်တော်ယေရှုယောက်အတူတူ ဓားပြကလိန်းဟူးတေရီးဒါး တာပ်ပါးကပ်ပင်းတိုင်စောက်ပေ သာန်းရှီးကြီးမှာ။ အန်တာတ်ကား ဓားပြဟော်ဝါဒေ ကိုယ်တော်ယေရှုဘင်း ညာပါဘေပဲဘန်း ကျန်သဘင်း ဓားပြဟော်ဝါဒေ ကိုယ်တော်ယေရှုဘင်း ဘယ်ပါဘေပဲမှာ။28အန်နိမ်ယောက် “ဟိန်ကား ရာဇဝတ်ဆားတာတ်စရာန်းဘေ စါန်းလားခံသထှာကူ” ညယ် ကျမ်းကျိန်းနောင်းဘေ ရေးသပဲဘင်း ကျမ်းချက်ကား ပြေ့စုံဒီဘန်းထှာမှာ။ 29အန်ဘင်းပိုက်ဟက် ဖြတ်သလာန်ပဲကြီးဘင်း သမီဆာတာတ်ရီးဒါး အန်တာတ်ဟလာန်းတေဒေ ရမ်းသဘန်း ကိုယ်တော်ယေရှုတေ “ဟေ့၊ ဗိမာန်တော်ဒေ ဖြတ်ဆီးသဘန်း ဆွန်းရာတ်အတွာန်း ပြန်သဘန်းစာဟာန်းကူဘင်းဆိတ်။30အရာတ် တာပ်ပါးကပ်ပင်းတိုင်စောက်ဟက် ဆပ်နီဘန်း ကိုယ်ကာတ်ကိုယ် ကယ်ဒါန်” ညယ် စော်ကားသဘန်း ငှေါကြီးမှာ။31အန်ဘင်းအတိုင်း ဂျူးပုရောဟိတ်ဟလာန်းစါတ်တာတ်ယောက် ကျမ်းကျိန်းပေါ့ပင်း အိုးဆကြီးတာတ်ရီးဒါး “ဟိန်ကား တခြားဘင်းသမီဆာတာတ်တေ ကယ်တာန်သောဒီဒါး ဟိန်ကောက်ဟိန်ကား အကယ်သရန်နား။32အစ္စရေးသမီဆာတာတ် ရှာန်းပလာန်ထှာဘင်း အဘင်းမေရှိယအရှာန်ကား တာပ်ပါးကပ်ပင်းတိုင်စောက်ဟက် အရာတ်ဆပ်နီဘင်းနာဒေ အလေယူကြီးထှာမှာ။ အန်နိမ်ကတုံန်လူဘန်းကား အလေကား ဟိန်ဒေ ယုံကြည်သကူ” ညယ် အချန်းချန်း ငှေါဘန်း ကိုယ်တော်ယေရှုတေ နီးကြီးမှာ။ ကိုယ်တော်ယေရှုယောက်အတူတူ သာပ်ပါးကပ်ပင်းတိုင်စောက်ပေ တာန်သဘန်း သာန်းရှီးခံသထှာဘင်းဆိတ် ကလိန်းဟူးရီးဒါး ကိုယ်တော်ဒေ စော်ကားသဘန်း ငှေါကြီးမှာ။33အန်ဘင်းမာန်းရာတ် မွန်းတည့်သဘင်း အချိန်ဟက်စသဘန်း ညနေဆွန်းနာရီထုတ်ကွန်း မြေပြင်တစ်ခုလုံး ထာန်းဘန်းနင်းနာန်မှာ။34ညနေသုံးနာရီအချိန်အမှါခ့်ခါ ကိုယ်တော်ယေရှုကား ဆကလားဝါတ်ဆလာတ်တုံန်းယောက် “ဧလိ၊ ဧလိ၊ လာမရှာဗာခသနိ” ညယ် ဟာတ်အာန်မှာ။ အဓိပ္ပာယ်ကား “ငါဘင်း ဘုရားရှာန်၊ ငါဘင်း ဘုရားရှာန်၊ ငါဒေ ဟမာန်တွာတ် တက်နာန်ဒေ” ညယ်ထှာမှာ။35အန်ဘင်းပိုက်ပေ စပ်ပန်းနင်းဘင်း သမီဆာစယ်ယာရီးဒါး အန်ဘင်းဒေသက်ပူမှါခ့်ခါ “သက်ကြီး၊ ဟိန်ကား ပရောဖက်ဧလိယဒေ ကော်နင်းမှာ” ညယ် ငှေါကြီးမှာ။36စီးမှါခ့်ခါ ဟော်ဝါဟော်ဝါကား ဝဲစွတ်ရန်ဘင်းဖော့ဒေ ချီးဘင်းဝိုင်ယောက် မြန်မြန်ကပ်လာန်ဘန်း ပန်းနာန်မှာ။ စီးမှါခ့်ခါ အန်ဘင်းဖော့ဒေ ဒုတ်တူကာတ်ပိုင်းဘေ တပ်သဘန်း ကိုယ်တော်ဒေ အူစိန်းဘန်း “ယူကြီး။ ဧလိယကား ဟိန်ဒေ တာပ်ပါးကပ်ပင်းတိုင်စောက်ဟက် ချသအီဒင် ဒီကူသမား အလေယူကြီးထှာမှာ” ညယ် ငှေါမှာ။37စီးမှါခ့်ခါ ကိုယ်တော်ယေရှုကား ဆကလားဝါတ်ဆလာတ်တုံန်း ဟာတ်ပန်း အဆာတ်စွန့်တော်မူသမှာ။38ချတ်ချန်းတုံန်း ဗိမာန်တော်နောင်းဘင်း ကန့်လန့်ကာတုံန်းကား တွန်ဟက်စောက်ထုတ်ကွန်း ကလိန်းပိုက် ဆိုက်လာန်ဘဲမှာ။39ကိုယ်တော်ယေရှုဘင်း မန်းဟက် စပ်ပန်းနင်းဘင်း ရောမတပ်မူးကား ကိုယ်တော်ဟာနိမ် အဆာတ်စွန့်တော်မူသဘင်းနာဒေ ကတုံန်မှါခ့်ခါ “အဘင်းဆိတ်ကား အဟုတ်မလပ် ဘုရားရှာန်ဘင်းဆာ သေချာသမှာ” ညယ်ငှေါမှာ။40အီးရှီစယ်ယာရီးဒါး လမ်းအစာလားဟက်နင်းဘန်း ယူနင်းကြီးမှာ။ အန်ဘင်းအီးရှီတာတ်နောင်းဘေ မာဂဒလမြို့ဘင်းအီးရှီ မာရိ၊ ဟလောဝါရှာ ယာကုပ်ယောက် ယောသပ်တာတ် အမယ်ထှာဘင်း မာရိယောက် ရှာလုံတာတ် ပါသကြီးမှာ။41အန်တာတ်ကား ကိုယ်တော်ယေရှု ဂါလိလဲပြေဘေ ငှါနင်းမှါခ့်ခါဟက် ကိုယ်တော်ဟလိန်းဘေ ဒီရာတ်ကြီးဘန်း ကိုယ်တော်ဒေ အလုပ်အကြွေး အွန်အီကြီးဘင်း ဆိတ်တာတ်ထှာမှာ။ ကိုယ်တော်ယောက်အတူတူ ဂျေရုဆလင်မြို့ပါ ဒီရာတ်ကြီးဘင်း အီးရှီးကလောင်းတုံန်းရီးဒါး အန်ဘင်းဘေ ငှါနင်းကြီးမှာ။42အန်ဘင်းမာန်းရာတ်ကား ပြာန်ဆာန်သဘင်း မာန်းရာတ်ထှာဘန်းနာ ညနေရီး စောင်းဒီဘန်းထှာမှာ။43တရားလွှတ်တော်အဖွဲ့ဘေ ရိုသေလေးစားသလားခံသထှာဘင်း အဖွဲ့ဝင်ဟော်ဝါထှာဘန်း ဘုရားရှာန်ဘင်းသာသနာတော်ဒေ ဒဲဘန်းနင်းဘင်းဆိတ် ဟော်ဝါရီးထှာဘင်း အရိမဿဲမြို့ဆား ယောသပ်ကား ပိလတ်ရှာန်းပလာန်ရှာပါ အရဲတာန့်သဘန်းလာန်ဘန်း ကိုယ်တော်ယေရှုအလောင်းဒေ စိန်မှာ။ 44ပိလတ်ရှာန်းပလာန်ရှာကား ကိုယ်တော်ယေရှုရှီးပါန် ငှေါဘင်းအကြောင်းဒေ သက်ပူမှါခ့်ခါ အံ့ဩသလာန်ဘဲမှာ။ အမှာတွာတ် ဟိန်ကား ရောမတပ်မူးဒေ ကော်ဘန်း ကိုယ်တော်ယေရှု ရှီးရာန်ဘင်းနာကား ချီလည်း အချီရားရယ်ညယ် စိန်ယူမှာ။45ပိလတ်ရှာန်းပလာန်ရှာရီးဒါး ကိုယ်တော်ယေရှု ရှီးပါန်ငှေါဘင်းနာဒေ ရောမတပ်မူးဟက် သက်ပူလူမှါခ့်ခါ ဟိန်ကား ယောသပ်တေ ကိုယ်တော်ယေရှုအလောင်းဒေ လာဒင် အခွာမ်းအီရာန်မှာ။46အမှာတွာတ် ယောသပ်ကား ပိတ်စတေမီးရီဘန်း ကိုယ်တော်ယေရှုအလောင်းဒေ တာပ်ပါးကပ်ပင်းတိုင်စောက်ဟက် ချသဘန်း ပိတ်ယောက် ပတ်သဘန်းနာ ကျောက်ဆောင်တုံန်းတေ ထွာန်းသပဲဘင်း ဆာန်းကျိုင်းဂူဘေ လာန်ဘန်းပဲမှာ။ စီးမှါခ့်ခါ ဟိန်ကား တခြားဘင်းဆိတ်တာတ်ယောက်အတူတူ အကြီးကျယ်တုံန်းဘင်း လုံးကရှီတုံန်းဒေ လှိမ့်သဘန်း ဆာန်းကျိုင်းဂူပေါက်ဝဘေ ပိတ်သပဘဲမှာ။47မာဂဒလမြို့သူ မာရိယောက် ယောသပ်အမယ်ထှာဘင်း မာရိတာတ်ရီးဒါး ကိုယ်တော်ယေရှုအလောင်းဒေ ဟာဘင်းဘေ ပဲဘင်းနာဒေ ယူနင်းကြီးမှာ။
Empower Asia Bible Translation Movement