ရှာန်မာကု14
1အရာတ်အချိန်ကား ပသခါပွဲတော်ယောက် တဆေးအပါသညယ် အွန်ယုတ်ပင်းမုန့်ပွဲတော် အွန်ဒင်ကား ကလိန်းရာတ်၌ လိုသဘန်းလား။ ဂျူးပုရောဟိတ်ဟလာန်းစါတ်တုံန်းတာတ်ယောက် ကျမ်းကျိန်းပေါ့ပင်း အိုးဆကြီးတာတ်ကား ကိုယ်တော်ယေရှုတေ ရင်ဘန်း သာန်းရှီးဒင် နည်းလမ်းသန်နင်းမှာ။2အန်နိမ်စါန်းငှေါဒီ အန်တာတ်ကား “အလေ ပွဲတော်အတွာန်းတုံန်းဘေ အန်နိမ်အွန်လားအလူရား။ အန်နိမ်အွန်ဘန်းကား သမီဆာတာတ်ကား ဆတူးတက်ဆွန်နီကူ” ညယ် ငှေါနင်းကြီးမှာ။3အန်ကားအချိန်ဘေ ကိုယ်တော်ယေရှုကား ဗေသနိထိန်ဘေ ကမာတုံန်းရောဂါ ကယာကွန်း ကုသအီရီပတ်ပင်း ရှိမုန်ကျေမ်းဘေ ငှါဘန်းနင်းမှာ။ ကိုယ်တော်ယေရှုကား ယုတ်ပန်းအူဘန်းနင်းမှါခ့်ခါ အီးရှီဟော်ဝါကား အကြီးကျယ်တန်ဖိုးတုံန်းဘင်း သွန်းဘင်းနာဒုဆလောစစ်စစ်တေ စါန်းဘန်းပဲဘင်း လုံးဘင်းလုံးကရှီယောက် အွန်ဘန်းပဲဘင်း ပလာန်းဟုတ်အာဒေ လာဘန်း ကျေမ်းနောင်းပါ ဆာန်ရီမှာ။ ဟိန်ကား ပလာန်းဒေဖွာမ်းသဘန်း ကိုယ်တော်ယေရှု ဟလာန်းစောက်ပေ အန်ဘင်းသွန်းဘင်းဆလောဒေ လုပ်အာန်မှာ။4အမှာတွာတ် အန်ဘင်းဘေငှါဘင်း သမီဆာစယ်ယာကား ဒေါသပူဘန်း “ဟမာန်ငှါး သွန်းဘင်းဆလောဒေ ဖြုန်းသထှာတေ။5အန်ဘင်းသွန်းဘင်းဆလောဒေ ဒေနာရီဖူးဒင်္ဂါး ဆန်းပါတ်ကျော်ယောက် မာဘန်း ဖူးဒေ ဆာန်းရဲဆားတာတ်တေ လှူဒါန်လားအချီရား” ညယ် အချန်းချန်းငှေါနင်းကြီးမှာ။ အန်တာတ်ကား အန်ဘင်းအီးရှီဒေ အပြစ်တာန်သနင်းကြီးမှာ။6အန်နိမ်စါန်းငှေါဒီ ကိုယ်တော်ယေရှုကား “ဟိန်ဒေ အပြစ်တာန်သနင်းဘင်းနာဒေ ရပ်သကြီးရာန်။ ဟမာန်တွာတ် ဟိန်ဒေ နောက်ယှက်သနင်းဒေ။ ငါစောက်ပေ ဟိန်အွန်ဘင်းနာကား အကြီးကျယ်မဲမှာ။7ဟနိမ်ယောက်အတူတူ ဆာန်းရဲဆားတာတ်ကား အမြဲတမ်းငှါနင်းကြီးကူထှာဘန်း ဟနိမ်လိုသဘင်းအချိန်တိုင်း အန်တာတ်တေ ကူညီသရန်မှာ။ အန်နိမ်စါန်းငှေါဒီ ငါကား ဟနိမ်ပိုက်ပေ အမြဲငှါနင်းရန်ကလားအချီရား။8ဟိန်ကား ဟိန်တတ်နိုင်သဘင်းနာဒေ အွန်လားထှာမှာ။ ဟိန်ကား ငါဒေနွတ်တင် ကြိုတာန်ပြာန်ဆာန်သဒင်အတွာတ် ငါလာန်စောက်ပေ သွန်းဘင်းဆလောဒေ လုပ်အီလားထှာမှာ။9ဟနိမ်ဒေ ငါချီလားဒေငှေါထှာဘန်းကား မာန်းဂလာဆတာန်းဒေ တစ်ကမ္ဘာတစ်လုံးဘင်း ဟာဘင်းနေရာဘေစါန်းငှေါဒီ ဟောသကာကြီးဘန်းကား သမီဆာတာတ်ကား ဟိန်အွန်နီဘင်းနာတေဒေ ငှေါကြီးကူထှာဘန်း ဟိန်ဒေ ဆတီးလူကြီးကူထှာမှာ” ညယ် မိန့်သမှာ။10စီးမှါခ့်ခါ သာဝကရှစ်နူဘန်း ကလိန်းဟူးနောင်းဟက် ဟော်ဝါထှာဘင်း ယုဒရှာကာရုတ်ကား ဂျူးပုရောဟိတ်ဟလာန်းစါတ်တုံန်းတာတ်ပါ လာန်ဘန်း “ကိုယ်တော်ယေရှုတေ ရင်ဒင်အတွာတ် ဟနိမ်ဒေ ငါကူညီသအီကူ” ညယ်ငှေါမှာ။11အန်တာတ်ကား အန်ဘင်းတူးဒေ သက်ပူမှါခ့်ခါ အကြီးကျယ်မွန်းကြီးဘန်း ဟိန်ဒေ ဖူးအီဒင်ရီးဒါး ကတိအီကြီးရာန်မှာ။ အမှာတွာတ် ယုဒရှာကာရုတ်ကား ကိုယ်တော်ဒေ အန်တာတ်သဟူးနောင်းဘေ အပ်သရန်ကူဘင်း အခွာမ်းအရေးမလဲဒေ စသဘန်းသန်နင်းမှာ။12တဆေးအပါသဘင်းမုန့်ပွဲတော် ပထမမာန်းရာတ်ထှာဘင်း ပသခါသိုးရှရှာဒေ ပူဇော်သထှာဘင်း မာန်းရာတ်မှါခ့်ခါ ကိုယ်တော်ယေရှုဘင်း တပယ့်တော်တာတ်ကား ကိုယ်တော်ဒေ “ပသခါပွဲတော်ဒေ ကိုယ်တော်ယုတ်တင်အတွာတ် အလေ ဟာဘင်းနေရာဘေ လာန်ဘန်းပြာန်ဆာန်သစိန်းကာတ်တေ” ညယ် စိန်ယူကြီးမှာ။13အမှာတွာတ် ကိုယ်တော်ယေရှုကား ဟိန်တပယ့်တော်တာတ်နောင်းဟက် ကလိန်းဟူးဒေ “ဂျေရုဆလင်မြို့နောင်းပါလာန်။ ဟနိမ်ကား ဝဲတိပ်ရှီဖဲရီဘင်း ဟလောဝါဟော်ဝါဒေ ကတုံန်လူကူ။ ဟိန်ဟလိန်းပါ လာန်ငါတ်ကြီး။14စီးမှါခ့်ခါ ဟိန်ဆာန်ငါန်ဘင်း ကျေမ်းအဆိတ်တေ ‘အလေအိုးဆကြီးကား နာန်ဒေ ဟိန်ယောက် ဟိန်တပယ့်တော်တာတ် ပသခါပွဲယုတ်ကြီးကူဘင်း အခန်းကား ဟာဘင်းအခန်းထှာတေညယ် စိန်ယူစိန်းယုတ်အီမှာ’ ညယ်ငှေါကြီး။15အန်၌မှါခ့်ခါ ဟိန်ကား ဟနိမ်ဒေ အပေါ်ထပ်ပေ အဆာန်တာန့် ပြာန်ဆာန်သပဲဘင်း ဘာတ်ပင်းအခန်းတစ်ခန်းဒေ ကာအီကူ။ အလေအတွာတ် ပသခါပွဲယုတ်ပင်းပွဲဒေ အန်ဘင်းနေရာဘေ ပြာန်ဆာန်သကြီး” ညယ် မိန့်တော်မူသမှာ။16စီးမှါခ့်ခါ တပယ့်တော်ကလိန်းဟူးရီးဒါး မြို့နောင်းပါ လာန်ကြီးမှါခ့်ခါ အန်တာတ်တေ ကိုယ်တော်ယေရှု မိန့်တော်မူသဘင်းအတိုင်း အကုန်လုံးဒေ ကတုံန်ကြီးလူမှာ။ အမှာတွာတ် အန်တာတ်ကား ပသခါပွဲအတွာတ် ပြာန်ဆာန်သကြီးမှာ။17ညနေစောင်းထုတ်မှါခ့်ခါ ကိုယ်တော်ယေရှုကား သာဝကရှစ်နူဘန်း ကလိန်းဟူးယောက်အတူတူ အန်ဘင်းနေရာပါ ထုတ်ကြီးရီမှာ။18အန်တာတ်ကား စားပွဲဘေ အတူတူထုံန်းဘန်း ယုတ်နင်းကြီးမှါခ့်ခါ ကိုယ်တော်ယေရှုကား “ဟနိမ်တေ ငါချီဘင်းအတိုင်း ငှေါထှာဘန်းကား ဟနိမ်နောင်းဟက် ဟော်ဝါကား ငါဒေ သစ္စာဖောက်သကူထှာမှာ။ အန်ဘင်းဆိတ်ကား အရာတ်စဲ ငါယောက်အတူတူ ယုတ်ပန်းနင်းမှာ” ညယ် မိန့်တော်မူသမှာ။19အန်၌မှါခ့်ခါ တပယ့်တော်တာတ်ကား အဆေင်အမဲငှါရာန်ဘန်း “ကိုယ်တော် ငါဒေငှေါနင်းလားအချီရားအချီနော်” ညယ် ဟော်ဝါစီးဟော်ဝါ ငှေါကြီးမှာ။20ကိုယ်တော်ယေရှုကား အန်တာတ်တေ “အန်ဘင်းဆိတ်ကား သာဝက ရှစ်နူဘန်းကလိန်းဟူးနောင်းဟက်ထှာဘန်း ငါယောက်အတူတူ ဆပါတ်ဆာခွာပ်အာ၌ မုန့်ဒေနှစ်သဘန်း ယုတ်နင်းဘင်းဆိတ်ထှာမှာ။21သမီဆာ ဆာ ကား ကျမ်းကျိန်းနောင်းဘေ ရေးသကာပဲဘင်းအတိုင်း ရှီးထှာကူငှေါဒီဒါး သမီဆာ ဆာဒေ သစ္စာဖောက်သကူဘင်းဆိတ်အတွာတ်ကား အကြီးကျယ်ဆိုးသကူထှာမှာ။ အန်ဘင်းဆိတ်ကား အပန်နီရီဘင်းနာဆဲ ဟိန်အတွာတ် ပိုသောမဲယုတ်မှာ” ညယ်မိန့်သမှာ။22အန်တာတ်ယုတ်နင်းမှါခ့်ခါ ကိုယ်တော်ယေရှုကား ပေါင်မုန့်ဒေလာဘန်း ဘုရားရှာန်ဘင်း ကျေးဇူးတော်ဒေ ချီးမွမ်းသစီးမှါခ့်ခါ ပေါင်မုန့်ဒေ ဘိုက်ပန်းနာ ဟိန်တပယ့်တော်တာတ်နင်းအီဘန်း “အဘင်းပေါင်မုန့်ဒေ လာကြီး။ အဘင်းပေါင်မုန့်ကား ငါလာန်ထှာမှာ” ညယ်မိန့်သမှာ။23စီးမှါခ့်ခါ ကိုယ်တော်ယေရှုကား စပျစ်ဝိုင်ခွာပ်တေလာဘန်း ဘုရားရှာန်ဘင်း ကျေးဇူးတော်ဒေ ချီးမွမ်းသစီးဘန်း တပယ့်တော်တာတ်နင်း အီမှါခ့်ခါ အန်တာတ်ရီးဒါး အန်ဘင်းခွာပ်ဟက် စပျစ်ဝိုင်ဒေ အူကြီးမှာ။24ကိုယ်တော်ယေရှုကား “အဘင်းစပျစ်ဝိုင်ကား သမီဆတာတ်အတွာတ် ဘုရားရှာန် သဘောတူသပဲဘင်း စာချုပ်နယားဒေ လုပ်အီဘင်း ငါဘင်းဆယ်ထှာမှာ။25ဟနိမ်တေ ငါချီလားဒေငှေါထှာဘန်းကား ငါကား ဘုရားရှာန်ဘင်းသာသနာတော်နောင်းဘေ စပျစ်ဝိုင်နယားဒေ အူကူဘင်းမာန်းရာတ် အထုတ်မချန်း စပျစ်ဝိုင်ဒေ အနားပန်းနူ ငါအူကဘန်းလားအချီရား” ညယ် မိန့်သမှာ။26စီးမှါခ့်ခါ ကိုယ်တော်ယေရှုယောက် ဟိန်တပယ့်တော်တာတ်ကား ဘုရားရှာန်ဒေ ချီးမွမ်းသဘင်း တေချမ်းတေကျယ်ဘန်း သံလွင်ကယာစောက်ပါ ပူလာန်ဘဲကြီးမှာ။27ကိုယ်တော်ယေရှုကား ဟိန်တပယ့်တော်တာတ်တေ “ကျမ်းကျိန်းဘေ ‘ငါကား သိုးနနူပူဘင်းဆိတ်တေ သာန်းရှီးကူထှာဘန်း သိုးတာတ်ရီးဒါး အကွဲကွဲအပြားပြား ထှာကြီးဆွန်နာန်ကူ’ ညယ် ရေးသပဲဘင်းအတိုင်း ဟနိမ်အားလုံးကား ငါဒေ ပဘဲဘန်း ကာတ်ပဲကြီးဆွန်နာန်ကူ။28အန်နိမ်စါန်းငှေါဒီ ငါကား ရှီးလားဟက် အဆာတ်ပြန်သဘန်း စားဟာန်းရီမှါခ့်ခါ ဟနိမ်ထာတ်အရာန် ဂါလိလဲပြေပါ လာန်ကူထှာမှာ” ညယ် မိန့်သမှာ။29အန်၌မှါခ့်ခါ ပေတရုကား ကိုယ်တော်တေ “ကျန်သဘင်းသမီဆာတေအားလုံး ကိုယ်တော်ဒေ သက်ပဲလာန်ဘဲကြီးဒီဒါး ငါကား ကိုယ်တော်ဒေ ဟာ၌မှါခ့်ခါစဲ သက်ပဲလာန်ဘဲကလားအချီရား” ညယ် လျှောက်တာန်သမှာ။30ကိုယ်တော်ယေရှုကား ပေတရုဒေ “နာန်ဒေ ငါချီလားဒေငှေါထှာဘန်းကား အရာတ်နာတ်ကြယ် အူကလိန်းပန်း အကြယ်ကြီ နာန်ကားငါဒေ အမိန်းရှာတ်ခါးညယ် ဆွုန်းပန်းတိုင်တိုင် ငြာမ်းသကူ” ညယ်မိန့်သမှာ။31အန်နိမ်စါန်းငှေါဒီ ပေတရုကား “ငါကား ကိုယ်တော်ယောက်အတူတူ ရှီးထှာကူငှေါဘန်းရီးဒါး အန်နိမ် ဟာ၌မှါခ့်ခါစဲ ငှေါကလားအချီရား” ညယ် အလေးအနက်ငှေါမှာ။ တခြားဘင်းတပယ့်တော်တာတ်ရီဒါး အန်ဘင်းအတိုင်း ငှေါကြီးမှာ။32စီးမှါခ့်ခါ ကိုယ်တော်ယေရှုယောက် တပယ့်တော်တာတ်ကား ဂေသရှေမန် ညယ်ကော်ဘင်း ဥယျာဉ်ပါထုတ်အီဘန်း ကိုယ်တော်ကား ဟိန်တပယ့်တော်တာတ်တေ “ငါ ဆုစိန်နင်းမှါခ့်ခါ အဘင်းနေရာဘေ ထုံးဘန်းနင်းကြီး” ညယ်မိန့်သမှာ။33ကိုယ်တော်ယေရှုကား ပေတရု၊ ယာကုပ်ယောက် ယောဟန်တာတ်တေ ဟိန်ယောက် အတူတူကော်ရာန်မှာ။ စသဘန်း ကိုယ်တော်ရီးဒါး အကြီးကျယ်သောကထုတ်ပန်း အဆင်အမဲငှါရီမှာ။34ကိုယ်တော်ယေရှုကား အန်တာတ်တေ “ငါကား ရှီးထှာကဘန်းနိမ် အကြီးကျယ်သောကထုတ်နင်းမှာ။ နိုနိုးကြားကြားယောက် အဘင်းဘေနင်းကြီး” ညယ် မိန့်တော်မူသမှာ။35ကိုယ်တော်ကား အစစ်ဆာလမ်းစာဘင်း နေရာပါလာန်ဘန်း ကာစောက်ပေ သထူထောက်တာန်မှာ။ စီးမှါခ့်ခါ ကိုယ်တော်ကား ဟလာန်းဒေ ကာယောက်ထိသကွန်း ငွတ်ပန်း ဒုက္ခဆာန်းရဲ ခံသထှာကူဘင်းအချိန်ဒေ ထှာရန်ဘန်းကား ကျော်သလာန်ဘဲကွန်းအတွာတ် ဆုစိန်မှာ။36ကိုယ်တော်ကား “အဝါ။ ငါဘင်း အဝါဘုရားရှာန်။ အဝါအတွာတ် အကုန်လုံးကား ထှာရန်နာ။ အမှာတွာတ် ငါဒေ အဘင်းဒုက္ခဆာန်းရဲဟက် ကယ်တာန်သအီယုတ်။ အန်နိမ်စါန်းငှေါဒီ ငါအလိုဆန္ဒအတိုင်း အအွန်ဆာ။ အဝါ အလိုအတိုင်း ထှာစိန်းကိုင်ယုတ်” ညယ်ဆုစိန်မှာ။37စီးမှါခ့်ခါ ကိုယ်တော်ယေရှုကား ဟိန်တပယ့်တော် ဆွန်းဟူးငှါလားပါ ဒီဟာန်းမှါခ့်ခါ တပယ့်တော်တာတ် အေ့ပ်ပန်းနင်းဘင်းနာဒေ ကတုံန်ငါန်မှာ။ အမှာတွာတ် ကိုယ်တော်ကား ရိုမုန်ပေတရုဒေ “ရှိမုန်၊ နာန်အေ့ပ်နင်းလဲ။ နာန်ကား တစ်နာရီဆစဲ နိုးနိုးကြားကြား အနင်းရန်နားရဲ။38နိုးနိုးကြားကြားနင်းဘန်း ဟနိမ် ဖြားယောင်းသွေးဆောင်အခံသထှာကွန်း ဆုစိန်ကြီး။ ဟနိမ်အဆေင်ကား ချီဘင်းနာဒေ အွန်ကြီးကာတ်သည်ဒါး ဟနိမ်လာန်ကား အားနည်းသနင်းမှာ” ညယ် မိန့်သမှာ။39စီးမှါခ့်ခါ ကိုယ်တော်ယေရှုကား ပန်းနူတပယ့်တော်တာတ်တေ ပဘဲဘန်း မက်နားဆုစိန်ဘင်းအတိုင်း ပြန်သဘန်း ဆုစိန်ဟာန်းမှာ။40ပန်းနူကိုယ်တော်ကား တပယ့်တော်တာတ်ပါ ထုတ်ခါန်းရီမှါခ့်ခါ အန်တာတ်ကား အန်တာတ်မိတ်တူရှီတေဒေ အဖွာမ်းသရန်ကွန်းထုတ် အေ့ပ်ပန်းနင်းကြီးဘင်းနာဒေ ကတုံန်ငါန်မှာ။ စီးမှါခ့်ခါ ကိုယ်တော်ကား တပယ့်တော်တာတ်တေ ဆော်ရာန်မှါခ့်ခါ တပယ့်တော်တာတ်ကား မင်ကြီးရီဘန်း ကိုယ်တော်ဒေ ဟာနိမ်လျှောက်သထှာကူ အမိန်းရှာတ်ခါ ငှါနင်းကြီးမှာ။41ကိုယ်တော်ယေရှုကား တတိယအကြိမ်ဒီဟာန်းမှါခ့်ခါ တပယ့်တော်တာတ်တေ “ဟနိမ် အေ့ပ်ပန်း အနားလာနင်းကြီးယုတ်လည်း။ အန်နယ်ငှေါဘန်းကား ကွန်းဘန်း။ ယူကြီး၊ သမီဆာ ဆာ ကား အမဲဘင်းအပြစ်ဆားတာတ် သဟူးနောင်းပါ အပ်သလားခံသထှာကူဘင်းအချိန် ထုတ်အီဘန်းထှာမှာ။42ရဲကြီး။ အလေလာန်ကြီးမှါတ်။ ယူကြီး၊ ငါဒေ သေစ္စာဖောက်သကူဘင်းဆိတ်ကား အန်းဘေ ဒီနင်းဘန်းထှာမှာ” ညယ် မိန့်တော်မူသမှာ။43ကိုယ်တော်ယေရှု အန်နိမ်ငှေါနင်းမှါခ့်ခါ သာဝကရှစ်နူဘန်းကလိန်းဟူးနောင်းဟက် ယုဒရှာကာရုတ်ကား ကိုယ်တော်ယေရှုပါ ထုတ်အီမှာ။ ဂျူးပုရောဟိတ်ဟလာန်းစါတ်တုံန်းတာတ်၊ ကျမ်းကျိန်းပေါ့ပင်း အိုးဆကြီးတာတ်ယောက် ဂျူးသမီဆာဟလာန်းစါတ်တုံန်းတာတ် တာတ်နီဘင်း သမီဆာကလောင်းတုံန်းကား တာန်တေယောက် ဖွုန်းတူကာတ်တေငါတ်ပန်း ဟိန်ယောက်အတူတူ ဒီရာတ်ကြီးမှာ။44ကိုယ်တော်ယေရှုတေ သစ္စာဖောက်သဘင်း ယုဒရှာကာရုတ်ကား အန်ဘင်း သမီဆာကလောင်းတုံန်းတေ “ငါလာန်ဘန်း လပါန်ဒေ ဆတွန်းယောက် သွန်းနာန်ဘင်းဆိတ်ကား ဟနိမ် ရင်ထှာကူဘင်းဆိတ်ထှာမှာ။ ဟိန်ဒေရင်ဘန်း လုံလုံခြုံခြုံ ကော်လာန်ဘဲကြီး” ညယ် ကြိုသဘန်း ငှေါပဲမှာ။45ယုဒရှာကာရုတ်ကား ကိုယ်တော်ယေရှုပါ ထုတ်အီမရောက် ကိုယ်တော်ယေရှုပိုက်ပါ လာန်ဘန်း “အိုးဆကြီး” ညယ်ငှေါဘန်း ကိုယ်တော်လပါန်ဒေ သွန်းဘန်း နှုတ်ဆက်တာန်မှာ။46အမှာတွာတ် သမီဆာတာတ်ရီးဒါး ကိုယ်တော်ယေရှုတေ ရင်ဘန်း ချုပ်သပဲကြီးရာန်မှာ။47စီးမှါခ့်ခါ ကိုယ်တော်ယေရှုပိုက်ပေ စပ်ပန်းနင်းဘင်း သမီဆတာတ်ဟက် ဟော်ဝါကား ဟိန်ဘင်းတာန်ဒေ တွန်းပူဝါမ်ဘန်း အတုံန်းဟန်ဆုံးဂျူးပုရောဟိတ်ပင်း အစေခံဟော်ဝါဒေ ဝါမ်းနာန်မှါခ့်ခါ ဟိန်ကနားကား တူရာန်မှာ။48အန်၌မှါခ့်ခါ ကိုယ်တော်ယေရှုကား “ဟနိမ်ကား တာန်တေ၊ ဖွုန်းတူကာတ်တေ လာရီဘန်း ငါဒေရင်ထှာကွန်းကား ငါကား အပြစ်ဆားဟော်ဝါရဲ။49ငါကား ဗိမာန်တော်နောင်းဘေ သမီဆာတာတ်နင်း ဟောသကာဆွောန်သကာနင်းမှါခ့်ခါ ဟနိမ်ယောက်အတူတူ မာန်းရာတ်၌တိုင်းငှါနင်းစါတ် ဟနိမ်ကား ငါဒေ ဟမာန်တွာတ် အရင်ကြီးဒေ။ အန်နိမ်စါန်းငှေါဒီ ကျမ်းကျိန်းကား ပြေ့စုံမှန်ကန်သထှာကူ” ညယ် မိန့်တော်မူသမှာ။50စီးမှါခ့်ခါ ကိုယ်တော်ယေရှုဘင်း တပယ့်တော်အားလုံးကား ကိုယ်တော်ဒေ တက်ပဘဲဘန်း ကာတ်ပဲလာန်ဘဲကြီးမှာ။51ပိတ်ချောစ တူဝါ၌ တော်ဘန်းနာ ဟာဘင်းတော်ဒင်စဲ အတော်ပဲဘင်း ဟလောဝါရှာဟော်ဝါရီးဒါး ကိုယ်တော်ယေရှု ဟလိန်းပါ ဒီရာတ်မှာ။ သမီဆာတာတ်ကား အန်ဘင်းဟလောဝါရှာဒေရီးဒါး ရင်ကူညယ် အွန်ကြီးမှာ။52အန်နိမ်စါန်းငှေါဒီ အန်ဘင်းဟလောဝါရှာကား ဟိန်ဘင်း ပိတ်ချောစတေ ပဘဲဘန်း လာန်းကျိန်ရှိန် ကပ်ပဲလာန်ဘဲမှာ။53စီးမှါခ့်ခါ ကိုယ်တော်ယေရှုတေ ဂျူးပုရောဟိတ်ဟလာန်းစါတ်တာတ်၊ ကျမ်းကျိန်းပေါ့ပင်း အိုးဆကြီးတာတ်ယောက် ဂျူးသမီဆာဟလာန်းစါတ်တာတ် အတူတူငှါနင်းကြီးဘင်း အတုံန်းဟန်ဆုံးဂျူးပုရောဟိတ်ပင်း ကျေမ်းပါကော်ကြီးရီမှာ။54ပေတရုရီဒါး လမ်းအစာလားဟက် ကိုယ်တော်ယေရှုဟလိန်းပါ ဒီရာတ်ပန်းနာ အတုံန်းဟန်ဆုံးဂျူးပုရောဟိတ်ပင်း ကျေမ်းဝါမ်းနောင်းပါ ဆာန်ငါတ်အာန်မှာ။ အန်ဘင်းဘေ ဟိန်ကား အစောင့်တပ်တားတာတ်ယောက်အတူတူ ထုံးဘန်း ဝါမ်ကွပ်နင်းမှာ။55စီးမှါခ့်ခါ ဂျူးပုရောဟိတ်ဟလာန်းစါတ်တာတ်ယောက် တရားလွှတ်တော် အဖွဲ့ဝင်တေကား ကိုယ်တော်ယေရှုတေ သေဒဏ်ချသဒင်အတွာတ် သက်သေတေဒေ သန်ကြီးဒီဒါး အန်တာတ်ကား ဟမာန်သက်သေစဲ သန်လားအကတုံန်ကြီးရား။56သမီဆာကလောင်းတုံန်းတာတ်ရီးဒါး ကိုယ်တော်ယေရှုတေ ဆန့်ကျင်သဘန်း အချီဘင်း သက်သေတေဒေ ငှေါကြီးဒီဒါး အန်တာတ်ငှေါဘင်း သက်သေတေကား ဟော်ဝါယောက်ဟော်ဝါ အကိုက်ညီသကြီးရား။57စီးမှါခ့်ခါ သမီဆာစယ်ယာကား ရဲဘန်းနာ ကိုယ်တော်ယေရှုတေ ဆန့်ကျင်သဘန်း အန်နိမ် အချီဘင်း သက်သေတေဒေ ငှေါကြီးမှာ။58အန်ဘင်းဆိတ်တာတ်ကား “အဘင်းဆိတ်ကား ‘ငါကား သမီဆာတာတ်သဟူးယောက် စာဘန်းပဲဘင်း ဗိမာန်တော်ဒေ ဖြိုသအက်ပန်း သမီဆာတာတ်တဟူးယောက် အစာပဲဘင်း ဗိမာန်တော်ဒေ ဆွန်းရာတ်အတွာန်းဘေ ငါစာကာကူ’ ညယ်ငှေါနင်းဘင်းဒေ အလေ သက်ပူရီမှာ” ညယ်ငှေါကြီးမှာ။59အန်နိမ်စါန်းငှေါဒီ အန်တာတ်ငှေါဘင်း သက်သေတေရီးဒါး အကိုက်ညီသဝါး။60စီးမှါခ့်ခါ အတုံန်းဟန်ဆုံးဂျူးပုရောဟိတ်ကား သမီဆာတာတ်မန်းဘေ စပ်နာန်ဘန်းနာ ကိုယ်တော်ယေရှုတေ “နာန်ကား ဟမာန်စဲအငှေါညယ် နင်းကလဲ။ အဘင်းသမီဆာတာတ် နာန်ဒေ ဆန့်ကျင်သဘန်း ငှေါနင်းကြီးဘင်းနာယောက် ပတ်သက်သဘန်း နာန်ဟမာန်ငှေါကာတ်တေ” ညယ် စိန်ယူမှာ။61အန်နိမ်စါန်းငှေါဒီ ကိုယ်တော်ယေရှုကား ဟမာန်ကစဲ အဖြေသညယ် ရူရှရှီနင်းမှာ။ ပန်းနူ အတုံန်းဟန်ဆုံးဂျူးပုရောဟိတ်ကား ကိုယ်တော်ဒေ “နာန်ကား ဘုရားရှာန်ဘင်းဆာ မေရှိယအရှာန်ချီလဲ” ညယ် စိန်ယူဟာန်းမှာ။62အန်၌မှါခ့်ခါ ကိုယ်တော်ယေရှုကား “အဟုတ်မလပ်ချီမှာ။ ဟနိမ်ကား သမီဆာ ဆာဒေ တန်ခိုးတော်အန္တယောက် ပြည့်စုံသဘင်း ဘုရားရှာန်ညာပါဘေ ထုံးဘန်းနင်းဘင်းနာဒေ ကတုံန်ကြီးလူကူထှာမှာ။ သမီဆာ ဆာ ကား ရွှေမြို့တော်ဟက် ဟာန်းချီတေယောက်အတူတူ ကြွဒီဘင်းနာဒေရီဒါး ဟနိမ်ကတုံန်ကြီးထှာကူ” ညယ် မိန့်တော်မူသမှာ။63အတုံန်းဟန်ဆုံးဂျူးပုရောဟိတ်ရီးဒါး ကိုယ်တော်ယေရှုငှေါဘင်းတူးဒေ သက်ပူမှါခ့်ခါ ဟိန်ကားဒေါသပူဘန်း ဟိန်ဘင်းဆာန်ဆုန်ဒေ တွန်းဆိုက်ပန်း “အလေ အနားဟာဘင်းသက်သေစဲ အလိုသဘန်း။64အဘင်းသမီဆာကား ဘုရားရှာန်တေ စော်ကားသဘန်း ငှေါနင်းဘင်းနာဒေ ဟနိမ် သက်ပူကြီးဘန်းထှာမှာ။ ဟနိမ် ဟာနိမ် ဆုံးဖြတ်သကာတ်ကြီးဒေ” ညယ် စိန်ယူမှာ။ တရားလွှတ်တော်အဖွဲ့ဝင်တေရီဒါး ကိုယ်တော်ယေရှုတေ အပြစ်ငှါမှာယောက် ရှီးဘင်းဒဏ်အီသင့်သမှာညယ် သဘောတူသကြီးမှာ။65အန်တာတ်နောင်းဟက် သမီဆာစယ်ယာရီးဒါး ကိုယ်တော်ယေရှုတေ အာတ်ဝဲတေယောက် ထောက်ကြီးမှာ။ အန်တာတ်ကား ကိုယ်တော်မိတ်တူရှီဒေ ပစယ်ကန်းယောက် ပတ်သဘန်း သာန်းကြီးဘန်းနာ “နာန်ဒေ ဟာဟမဲ သာန်းနင်းဘင်းနာဒေ မှန်းတာန်စါန်း” ညယ် ငှေါကြီးမှာ။ အစောင့်တေရီးဒါး ကိုယ်တော်ဒေ ကော်လာန်ဘဲကြီးဘန်းနာ သာန်းဘန်း နှိပ်စါတ်သကြီးမှာ။66ပေတရုကား ကျေမ်းဝါမ်းနောင်းဘေ ငှါနင်းမှါခ့်ခါ အတုံန်းဟန်ဆုံးဂျူးပုရောဟိတ်ပင်း အစေခံအီးရှီဟော်ဝါကား ပေတရုငှါနင်းဘင်းနေရာပါ ထုတ်အီမှာ။67ဟိန်ကား ပေတရု ဝါမ်ကွပ်ပန်းနင်းဘင်းနာဒေ ကတုံန်မှါခ့်ခါ ဟိန်တေ ယူစိန်စါပ်ပန်း “နာန်ရီဒါး အန်ဘင်းနာဇရက်မြို့ဆား ယေရှုယောက် အတူတူငှါနင်းရီမှာနော်” ညယ်ငှေါမှာ။68အန်နိမ်စါန်းငှေါဒီ ပေတရုကား “နာန်ဟမာန်တေ ငှေါနင်းဘင်းနာဒေ ငါအမိန်းရှာတ်ခါနိမ် ကနားရီးအလည်သဝါး” ညယ် ငြာမ်းသဘန်း ကျေမ်းဝါမ်းပတူးဝပါ ပူလာန်ဘဲမှါခ့်ခါ အူကြယ်ဘင်းဆကလားဒေ သက်ပူရာန်မှာ။ 69အစေခံအီးရှီကား ပေတရုဒေ ပြန်သဘန်း ကတုံန်ဟာန်းမှါခ့်ခါ အန်ဘင်းနေရာဘေ စပ်ပန်းနင်းဘင်း သမီဆာတာတ်တေ “ဟိန်ကား ယေရှုနောက်လိုက်တေဟက် ဟော်ဝါထှာမှာ” ညယ် ငှေါမှာ။70အန်နိမ်စါန်းငှေါဒီ ပေတရုကား ပြန်သဘန်း ငြာမ်းသဟာန်းမှာ။ အချိန်အစစ်ဆာ မှါတ်ရီမှါခ့်ခါ ပေတရုပိုက်ပေ စပ်ပန်းနင်းကြီးဘင်း သမီဆာတာတ်ကား ပေတရုဒေ “နာန်ကား ယေရှုနောက်လိုက်တေနောင်းဟက် ဟော်ဝါထှာဘင်းနာကား သေချာသမှာ။ ဟမာန်တွာတ်ငှေါဘန်းတာတ်ငှေါ နာန်ရီဒါး ဂါလိလဲပြေဟက် ဒီဘင်းအတွာတ်ထှာမှာ” ညယ် ငှေါကြီးမှာ။71စီးမှါခ့်ခါ ပေတရုကား “ငါချီဘင်းအတိုင်း ငှေါနင်းမှာငှေါဘင်းဒေ ဿန်သမှာ။ အဟုတ်မလပ် ငါပက်သဘန်းနာငှေါဘန်းကား ငါဒေ ဘုရားရှာန်အပြစ်အီစိန်း။ ဟနိမ်ငှေါနင်းဘင်းနာဒေ ငါအဟုတ်မလပ် အမိန်းရှာတ်ခါး” ညယ်ငှေါမှာ။72ချတ်ချန်းငှေါနိမ် ဒုတိယအကြိမ် အူကြယ်ဟာန်းမှာ။ အန်၌မှါခ့်ခါ ပေတရုကား ဟိန်ဒေ ကိုယ်တော်ယေရှုမိန့်ဒီဘင်း “အူကလိန်းပန်း အကြယ်ကြီ နာန်ကား ငါဒေ အမိန်းရှာတ်ခါးညယ် ဆွန်းပန်းတိုင်တိုင် ငြာမ်းသကူ” ညယ်ငှေါဘင်းတူးဒေ ဆတီးလူရာန်မှာ။ အမှာတွာတ် ပေတရုကား အကြီးကျယ် ဟပ်ပန်းနင်းနာန်မှာ။
Empower Asia Bible Translation Movement