ရှာန်မာကု13
1ကိုယ်တော်ယေရှုကား ဗိမာန်တော်ဟက်ပူရီမှါခ့်ခါ ဟိန်တပယ့်တော်တာတ်နောင်းဟက် ဟော်ဝါကား ကိုယ်တော်ဒေ “အိုးဆကြီး၊ ယူဝါမ်ယုတ်။ လုံးကရှီတုံန်းတေကား ဟာနယ်တုံန်း တုံန်းငါန်သမား။ အဆောက်အုံတုံန်းရီးဒါး ဟာနယ်တုံန်း အံ့ဩသထာတ်မဲရာန်သမား” ညယ်လျှောက်တာန်သမှာ။2အန်၌မှါခ့်ခါ ကိုယ်တော်ယေရှုကား အန်ဘင်းဆိတ်တေ “အကြီးကျယ်တုံန်းဘင်း အဆောက်အုံတုံန်းဒေ နာန်ကတုံန်လည်း။ အဘင်းနေရာဘေ လုံးကရှီရှာဟုတ်အာယောက် ဟုတ်အာ တာန်သဘန်းအကျန်သကွန်း အကုန်လုံး ဖြတ်ဆီးသလား ခံသထှာကူ” ညယ်မိန့်သမှာ။3စီးမှါခ့်ခါ ကိုယ်တော်ကား သံလွင်ကယာစောက်ပေဟယ်ပန်း ဗိမာန်တော်ပါ မန်းဘန်းထုံးနင်းမှါခ့်ခါ ပေတရု၊ ယာကုပ်၊ ယောဟန်ယောက် အန္ဒြေတာတ်ကား ကိုယ်တော်ပါဒီဘန်း4“အန်ဘင်းနာတေကား ဟာ၌မှါခ့်ခါ ထှာရီကူငှေါဘင်းနာဒေ အလေနင်းငှေါကာယုတ်။ အန်ဘင်းနာတေ အားလုံးထှာရီကပန်းငှေါဘန်းကား အလေဒေ ဟာဘင်းနိမိတ်လက္ခဏာတေ ကာကူဒေ” ညယ် သပ်သပ်စိန်ယူကြီးမှာ။5ကိုယ်တော်ယေရှုရီးဒါး အန်တာတ်တေ “ဟနိမ်ဒေ ဟာဟမဲစဲ အပက်သရန်ကွန်း ဆတီးပဲကြီး။6သမီဆာကလောင်းတုံန်းတာတ်ကား ငါနာမယ်ဒေနပ်ပန်း ထုတ်ကြီးရီကူထှာဘန်း ‘ငါကား မေရှိယအရှာန်ထှာမှာ’ ညယ်ငှေါဘန်း သမီဆာကလောင်းတုံန်းဒေ လှည့်စားသကြီးကူထှာမှာ။7ဟနိမ်ကား စစ်ပွဲအကြောင်းတေယောက် တိုက်ပွဲဆတာန်းတေဒေ သက်ပူကြီးလူမှါခ့်ခါ အစါတ်ကြီးဆာ။ အန်ဘင်းနာတေကား အဟုတ်မလပ် ထှာရီကူငှေါဒီဒါး အန်ဘင်းတေကား ကမ္ဘာတုံန်း အဆုံးသတ်အချီနွန်း။8သမီဆာတစ်မျိုးယောက်တစ်မျိုး တိုက်ခိုက်သကြီးဘန်းနာ တစ်နိုင်ငံယောက်တစ်နိုင်ငံ စစ်ထှာကြီးကူထှာမှာ။ နေရာတိုင်းဘေရီးဒါး ငလျင်တေ ထှာဆွန်နီဘန်းနာ ယုတ်တင်အူဒင်တေ ကဒါတ်နီဘင်းနာရီး ငှါကြီးဆွန်နီကူ။ အန်ဘင်းဆာန်းရဲဒုက္ခတေကား ဆာပန်ကူဘင်း အီးရှီဟော်ဝါ ပထမဆုံးကနာဘင်းနာနယ်၌ ငှါယုတ်လား” ညယ်မိန့်သမှာ။9ဆာတ်သဘန်း ကိုယ်တော်ယေရှုကား “ဟနိမ်ကိုယ်တိုင်ရီးဒါး ဆတီးပဲကြီးထှာကူ။ ဟနိမ်ကား ရင်လားခံသထှာဘန်းနာ တရားရုံးပါ ကော်လားခံသထှာဘန်း ဓမ္မာရုံတေဘေရီးဒါး ဟနိမ်ဒေ သာန်းကြီး တွောတ်ကြီးကူထှာမှာ။ ဟနိမ်ကား ငါတပယ့်တော်တေထှာဘင်းအတွာတ် ရှာန်းပလာန်တေယောက် အုပ်ချုပ်သဘင်းဆိတ်တာတ်မန်းဘေ တရားစွဲသလားခံသထှာဘန်းနာ အန်တာတ်တေ မာန်းဂလာဆတာန်းဒေရီးဒါး ဟောသကာကြီးထှာကူ။10အန်နိမ်စါန်းငှေါဒီ ကမ္ဘာတုံန်းအဆုံးသတ် အထုတ်မချန်း ဟနိမ်ကား မာန်းဂလာဆတာန်းဒေ သမီဆာအမျိုးမျိုးတာတ်နင်း ဟောသကာကြီးထှာကူ။11ဟနိမ်ကား ဟာကားအချိန်ဘေစါန်းငှေါဒီ ရင်လားခံသထှာဘန်း တရားရုံးပါ ကော်လားခံသထှာမှါခ့်ခါ ဟနိမ်ကား ဟာဘင်းဒေ ငှေါထှာကူဘင်းနာဒေ ကြိုသဘန်း အစါတ်နင်းကြီးဆာ။ အန်ကားအချိန်ဘေ ဟနိမ်ဒေ ဘုရားရှာန်အီဘင်း တူးတေဒေငှေါကြီး။ ဟမာန်တွာတ်ငှေါဘန်းတာတ်ငှေါ ဟနိမ်ငှေါဘင်းတူးတေကား ဟနိမ်ဟက်ဒီလားအချီညယ် ဉာဏ်အလင်းတော်ဟက် ဒီဘင်းအတွာတ်ထှာမှာ။12အန်ကားအချိန်မှါခ့်ခါ အမူးနရှီတေအချန်းချန်း သစ္စာဖောက်သဘန်း ရှီးစိန်းကြီးကူ။ အဝါရီးဒါး ကိုယ်ဆာ ဆအိတ်တာတ်တေ သေစ္စာဖောက်သဘန်း ရှီးစိန်းကြီးကူ။ ဆာဆအိတ်တာတ်ရီးဒါး အမယ်အဝါတာတ်တေ ဆန့်ကျင်သဘန်း အမယ်အဝါတာတ်တေ ရှီးစိန်းကြီးကူ။13ဟနိမ်ကား ငါဘင်းတပယ့်တော်တေ ထှာဘင်းအတွာတ် သမီဆ၌တိုင်းကား ဟနိမ်ဒေယူနီကြီးကူ။ အန်နိမ်စါန်းငှေါဒီ နောက်ဆုံးထုတ်ကွန်း ငါစောက်ပေ သစ္စာငှါဘင်းဆိတ်ကား ကယ်တာန်သလားခံသထှာကူ” ညယ် မိန့်တော်မူသမှာ။14စီးမှါခ့်ခါ ကိုယ်တော်ကား “မာန်းရာတ်ရအာမှါခ့်ခါ ဗိမာန်တော်ဒေ သမီဆာထုတ်လားစစ်ပင်းအရပ်ထှာကွန်း အွန်ကူဘင်း စလစ်ထာတ်မဲဘင်း အမဲဘင်းသမီဆာဟော်ဝါကား ဟိန်အစပ်ထိုက်သဘင်း ဗိမာန်တော်ဘင်း မြင့်မြတ်သဘင်းနေရာဘေ စပ်ပန်းနင်းဘင်းနာဒေ ဟနိမ်ကတုံန်ကြီးထှာကူ။ (အဘင်းကျမ်းပိုဒ်တေ ကျယ်ဘင်းဆိတ်၌တိုင်း ကိုယ်တော်ယေရှု ဆတီးအီဘင်းဒေ ဂရုတစိုက် မှတ်သကြီး။) အန်ဘင်းအချိန်ထုတ်အီမှါခ့်ခါ ယုဒပြေဘေငှါဘင်း သမီဆာတာတ်ကား ကယာစောက်ပေတေ ကာတ်ကြီးထှာကူထှာမှာ။ 15ကျေမ်းပြာန်ဘေ ငှါနင်းဘင်းဆိတ်တာတ်ကား အကာပ်ပူကြီ စားနူစားနာဒေလာဒင် ကျေမ်းနောင်းပါ ဆာန်ဘင်းတေ အအွန်ကြီးဆာ။ 16လပါးဘေ ငှါဘင်းဆိတ်တာတ်ရီးဒါး ဆာန်ဆုန်တေဒေ လာဒင်အတွာတ် ကျေမ်းပါအလာန်ဟာန်းဆာ။17အန်ဘင်းအချိန်ဘေ ပုတ်ကာန်ဘင်းအီးရှီတာတ်ယောက် စုတ်ရှီတိုက်သထှာဘင်း အမယ်တာတ်အတွာတ်ကား ကာတ်ပူဒင် ဟာနယ်ဒုက္ခထုတ်အာန်ကူသမား။18အန်ဘင်းအဖြစ်အပျက်တေကား ခရီးဟာဒင်ခါတ်ခဲသဘင်း ရှင်ဟားဘေ အထှာစိန်းကွန်းအတွာတ် ဆုစိန်ကြီး။19ဟမာန်တွာတ်ငှေါဘန်းတာတ်ငှေါ သမီဆတာတ်ကား အဘင်းကမ္ဘာတုံန်းဒေ ဘုရားရှာန်ဖန်ဆင်းဒီမှါခ့်ခါဟက် စသဘန်း အန်တာတ်ခံဒီထှာဘင်း ဒုက္ခဆာန်းရဲတေထာတ် အန်ဘင်းအချိန်ဘေ အကြီးကျယ်ဆိုးသဘင်း ဒုက္ခဆာန်းရဲတေဒေ ခံသကြီးထှာကူဘင်းအတွာတ်ထှာမှာ။ အနားမန်းပါ အန်ဘင်းအဖြစ်ပျက်တေနိမ် ဟာ၌မှါခ့်ခါစဲ ထှာကဘန်းလားအချီရား။20အရှာန်ကား အန်ဘင်းမာန်းရာတ်တေဒေ ခပ်မြန်မြန်အစီးစိန်းဘန်းကား ဟာဟမဲစဲ အဆာတ်စားဘန်း ကျန်သကလားအချီရား။ အန်နိမ်စါန်းငှေါဒီ အရှာန်ကား ဟိန်မယ်ပဲဘင်း ဆိတ်တာတ်တေ ကူညီသဒင် အန်ဘင်းမာန်းရာတ်တေဒေ ခပ်မြန်မြန်စီးစိန်းကူထှာမှာ။21အန်ကားအချိန်တေမှါခ့်ခါ ဟော်ဝါဟော်ဝါကား ဟနိမ်တေ ‘ယူကြီး၊ မေရှိယအရှာန်ကား အောဘေထှာမှာ’ အာနိမ်အချီ ‘ယူကြီး မေရှိယအရှာန်ကား အန်ဘေထှာမှာ’ ညယ် ငှေါကြီးဘန်းကား အန်ဘင်းနာဒေ အယုံသကြီးဆာ။22ဟမာန်တွာတ်ငှေါဘန်းတာတ်ငှေါ အန်တာတ်ကားအန်တာတ် မေရှိယအရှာန်ထှာမှာ အန်နိမ်အချီ ပရောဖက်ထှာမှာညယ် ငှေါနင်းကြီးဘင်း သမီဆာကလောင်းတုံန်း ပေါ်သကြီးရီကူဘင်းအတွာတ်ထှာမှာ။ အန်ဘင်းဆိတ်တာတ်ကား ထှာရန်ဘန်းကား ဘုရားရှာန်မယ်ပဲဘင်း သမီဆာတာတ်တေဒေစဲ ပက်သဒင်အတွာတ် အံ့ဩသထာတ်မဲဘင်း နိမိတ်လက္ခဏာတေဒေ အွန်ကာကြီးကူထှာမှာ။23အမှာတွာတ် ဟနိမ်ဆတီးပဲကြီး။ ငါကား ဟနိမ်နင်း အကုန်လုံးတေ ကြိုသောငှေါရီစီးဘန်းထှာမှာ” ညယ် မိန့်တော်မူသမှာ။24စီးမှါခ့်ခါ ကိုယ်တော်ယေရှုကား ဆာတ်သဘန်း “အန်နိမ်စါန်းငှေါဒီ ဆာန်းရဲဒုက္ခတေ ခံသထှာဘင်း မာန်းရာတ်တေ စီးမှါခ့်ခါ စမိတ်ကား ထာန်းဘန်းနင်းနာန်ကူထှာဘန်း ဆတားရီးဒါး ရားကဘန်းလားအချီရား။25ဟမုခ်စောက်ပင်း အူလူရှီတေရီးဒါး ကျဉ်အက်ဆွန်နီကူထှာဘန်း ဟမုခ်စောက်ပေ ရားဘန်းနင်းဘင်းနာတေကား ဆန်သဘန်းနာ ရန်းသနင်းကြီးဆွန်ကူ။26အန်ကားအချိန်ဘေ ကြီးမြတ်သဘင်းတန်ခိုးတော်တေ အရောင်အဝါတေယောက် သမီဆာ ဆာ ကား ဟာန်းချီတေနောင်းဟက် ကြွဒီဘင်းနာဒေ သမီဆာတာတ် ကတုံန်ကြီးကူထှာမှာ။27စီးမှါခ့်ခါ ဟိန်ကား ကမ္ဘာစောက်ပင်း နေရာတိုင်းဟက် ဘုရားရှာန်မယ်ဘန်းပဲဘင်း သမီဆာတာတ်တေ စုသဒင် ဟိန်ဘင်းမဲဘင်းဟမန်းတာတ်တေ အရပ်လေးမျက်နှာဟက် တာတ်ကူထှာမှာ” ညယ်မိန့်သမှာ။28စီးမှါခ့်ခါ ကိုယ်တော်ယေရှုကား “အရာတ် ဆာန်းညက်ရှီကလွုန်ဟက်အီဘင်း သင်ခန်းစာဒေ လေ့လာသကြီး။ ဆာန်းညက်ကလွုန်ဘင်း ကလိုင်းကလန်းတေဟက် သသပ်အဒီးရှာတေ ပူရီဘန်းကား ကားဘင်းရာသီ ထုတ်အီကဘန်းဘင်းဒေ ဟနိမ် မိန်းရှာတ်ခါကြီးမှာ။29အန်ဘင်းအတိုင်း ဟနိမ်ကား အန်ဘင်းထှာရီဘင်းနာဒေ ကတုံန်မှါခ့်ခါ သမီဆာ ဆာ ကြွဒီကူဘင်းအချိန်ကား ထန်နီဘန်းငှေါဘင်းနာဒေ မိန်းရှာတ်ခါကြီးကူ။30ဟနိမ်ဒေ ငါချီလားဒေငှေါထှာဘန်းကား အရာတ်မျိုးဆက် သမီဆာအားလုံး အရှီးကြီ အန်ဘင်းတေ ထှာရီကူထှာမှာ။31ဟမုခ်ယောက် ကာကား ကယာရာန်ကူငှေါဒီဒါး ငါဘင်းတူးတေကား ကယာရာန်ကလားအချီရား” ညယ်မိန့်သမှာ။32ကိုယ်တော်ယေရှုကား “အန်နိမ်စါန်းငှေါဒီ အန်နိမ်ထှာရီကူဘင်း မာန်းရာတ်ယောက် အချိန်ဒေ ဟာဟမဲစဲ အမိန်းရှာတ်ခါနွန်း။ ရွှေမြို့တော်ဘေငှါဘင်း မဲဘင်းဟမန်းတာတ်ယောက် ဘုရားရှာန်ဆာစဲ အမိန်းရှာတ်ခါကြီးဘန်းနာ အဝါဘုရားရှာန် ဟော်ဝါဆာ၌ မိန်းရှာတ်ခါလား။33ဆတီးပဲကြီး။ နိုးနိုးကြားကြား ဆုစိန်ဘန်း နင်းကြီး။ အန်ဘင်းအချိန်ကား ဟာ၌မှါခ့်ခါ ထှာရီကူဘင်းနာဒေ ဟနိမ် အမိန်းရှာတ်ခါရန်နား။34အန်ဘင်းကား ခရီးပူကူဘင်းသမီဆာဟော်ဝါကား ဟိန်ကျေမ်းဒေပဘဲပန်း အပူလာန်ဘဲကြီ ဟိန်အစေခံတာတ်တေ အခွာမ်းအာဏာဒေ အီပဘဲပန်းနာ ဟော်ဝါစီဒေရီးဒါး ဟာဘင်းအလုပ်တေ အွန်ပဲထှာကူညယ် ငှေါပဘဲပန်း ကျေမ်းဝါမ်းစောင့်သဘင်းဆိတ်တေရီးဒါး ဆတီးယောက် စောင့်သနင်းဒင် ဆာန်သပဘဲဘင်းယောက် တူသမှာ။35ကျေမ်းဆိတ်ကား ညနေစောင်း အန်နိမ်အချီ နာတ်ကြယ်ဆာန်းခေါင် အန်နိမ်အချီ အူကြယ်ဘင်းအချိန် အန်နိမ်အချီ ဟလာန်းယားထန်ဘင်းအချိန်တေဟက် ဟာကားအချိန်ဘေ ဒီဟာန်းကူဘင်းနာဒေ ဟနိမ်အမိန်းရှာတ်ခါရန်ဘင်းအတွာတ် အမြဲဆတီးပဲဘန်း စောင့်သနင်းကြီး။36အန်နိမ်မားဆာ ကျေမ်းဆိတ် ဗြုန်းစားတုံန်း ထုတ်ခါန်းရီဘန်းကား ဟနိမ် အေ့ပ်ပန်းနင်းဘင်းနာဒေ အကတုံန်ကလားထှာမှာ။37အမှာတွာတ် ဟနိမ်တေဆာအချီ သမီဆာ၌တိုင်းဒေ ငါငှေါကူ။ ဆတီးယောက် စောင့်သဘန်းနင်းကြီး” ညယ် မိန့်တော်မူသမှာ။
Empower Asia Bible Translation Movement