ရှာန်မာကု12
1စီးမှါခ့်ခါ ကိုယ်တော်ယေရှုကား အန်တာတ်တေ ဥပမာတေစသဘန်း မိန့်သမှာ။ ကိုယ်တော်ကား “ပန်းနူမှါခ့်ခါ သမီဆာဟော်ဝါကား စပျစ်ကလာန်ဒေ စုတ်ပန်းပဲမှာ။ ဟိန်ကား ကလာန်ပတ်ပတ်လည်ဘေ ကွန်းနာန်းအွန်ဘန်း စပျစ်ရှရှီတေဟက် စပျစ်ဝလဲဒေ ကစစ်ပန်းလာဒင် တော်ဟွာန်ထူမှာ။ စီးမှါခ့်ခါ ဟိန်ကား မျှော်စါန်တုံန်း ဟုတ်အာဒေစာဘန်း စပျစ်ကလာန်ဒေ ကလာန်ငှါးသဘင်းဆိတ်တာတ်ပါ ငှါးသပဘဲဘန်း အန်ဘင်းအရပ်ဟက် လမ်းစာပါ ခရီးပူလာန်ဘဲမှာ။2စပျစ်ရှရှီတေ ကွန်ချိန်ထုတ်မှါခ့်ခါ စပျစ်ကလာန်အဆိတ်ကား စပျစ်ကလာန်ဟက်ပူဘင်း ဟိန်ဘင်း ရှရှီဝေစုဒေလာဒင်အတွာတ် အစေခံဟော်ဝါဒေ ကလာန်ငှါးသဘင်းဆိတ်တာတ်ပါ တာတ်နာန်မှာ။3အန်နိမ်စါန်းငှေါဒီ ကလာန်ငှါးသဘင်းဆိတ်တာတ်ကား အစေခံဒေရင်ဘန်း သာန်းဘန်း ဟမာန်ကစဲအအီညယ် တာတ်ခါန်းငါန်မှာ။4စီးမှါခ့်ခါ စပျစ်ကလာန်အဆိတ်ကား တခြားဘင်းအစေခံဟော်ဝါဒေ တာတ်မှါခ့်ခါ ကလာန်ငှါးသဘင်းဆိတ်တာတ်ကား အန်ဘင်းအစေခံ ဟလာန်းဒေသာန်းဘန်း မန်းကတန်ထာတ်ငှါကွန်း အွန်ကြီးမှာ။5စပျစ်ကလာန်အဆိတ်ကား အနားအစေခံဟော်ဝါဒေ တာတ်ခါန်းငါန်မှါခ့်ခါ ကလာန်ငှါးသဘင်းဆိတ်တာတ်ကား အန်ဘင်းအစေခံဒေ သာန်းရှီးကြီးရာန်မှာ။ စီးမှါခ့်ခါ စပျစ်ကလာန်အဆိတ်ကား တခြားဘင်း အစေခံတေဒေ တာတ်သည်ဒါး ကလာန်ငှါးသဘင်းဆိတ်တာတ်ကား အစေခံတေနောင်းဟက် စယ်ယာဒေသာန်းဘန်း တွောတ်ပန်း စယ်ယာဒေ သာန်းရှီးကြီးဆွန်နာန်မှာ။6အန်နိမ်ယောက် နောက်ဆုံးဘေကား စပျစ်ကလာန်အဆိတ်ကား ဟိန်အကြီးကျယ်မစ်ပင်း ဟော်ဝါဆာငှါဘင်း ဆာဒေ တာတ်တင်၌ ကျန်သဘန်းလား။ ဟိန်ကား ‘အန်တာတ် ငါဆာဒေကား လေးစားသကြီးကူဘင်းနာကား သေချာသမှာ’ ညယ်ငှေါဘန်း ဟိန်ဆာဒေ ကလာန်ငှါးသဘင်းဆိတ်တာတ်ပါ နောက်ဆုံးအနေယောက် တာတ်နာန်မှာ။7အန်နိမ်စါန်းငှေါဒီ ကလာန်ငှါးသဘင်းဆိတ်တာတ်ကား ‘အန်ဘင်းဆိတ်ကား စပျစ်ကလာန်ဒေ အမွေဆက်ခံသကူဘင်းဆိတ်ထှာမှာ။ ဒီကြီး၊ ဟိန်ဒေ သာန်းရှီးကြီးထှာမှာ။ အန်နိမ်ငှေါဘန်းကား ဟိန်ပိုင်သဘင်းနာတေကား အလေအပိုင်ထှာဘန်း’ ညယ် အချန်းချန်း ငှေါနင်းကြီးမှာ။8အမှာတွာတ် ကလာန်ငှါးသဘင်းဆိတ်တာတ်ကား စပျစ်ကလာန်အဆိတ်ဆာဒေ ရင်ဘန်း သာန်းရှီးဘန်းနာ အလောင်းဒေ ကလာန်ပြာန်ပါ တက်ပဲကြီးမှာ။9အန်နိမ်ငှေါဘန်းကား စပျစ်ကလာန်အဆိတ်ကား ဟာနိမ်အွန်ကူဒေ။ ဟိန်ကား စပျစ်ကလာန်ပါဒီဘန်း ကလာန်ငှါးသဘင်းဆိတ်တာတ်တေ သာန်းရှီးဘန်း စပျစ်ကလာန်ဒေ တခြားဘင်းဆိတ်တာတ်နင်း အီရာန်ကူထှာမှာ။10ဟနိမ်ကား ကျမ်းကျိန်းနောင်းဘေ‘ကျေမ်းစာဘင်းဆိတ်တာတ် တက်ပဲဘင်း လုံးကရှီကားအရေးတုံန်းဘင်း လုံးကရှီထှာရီမှာ။11အန်ဘင်းနာကား အရှာန် အွန်နီဘင်းနာတေထှာဘန်းအန်ဘင်းနာအတွာတ် အလေကား အံ့ဩသကြီးရီထှာမှာ’ ညယ်ငှေါဘင်း ကျမ်းချက်တေ အကျယ်ပတ်ကြီးရားရယ်” ညယ် မိန့်တော်မူသမှာ။12အန်၌မှါခ့်ခါ ဂျူးပုရောဟိတ်ဟလာန်းစါတ်တာတ်၊ ကျမ်းကျိန်းပေါ့ပင်း အိုးဆကြီးတာတ်ယောက် ဂျူးသမီဆာဟလာန်းစါတ်တာတ်ကား အန်တာတ်တေ ရည်ရွယ်သဘန်း အန်ဘင်းဥပမာဒေ ကိုယ်တော်မိန့်သဘင်းနာဒေ မိန်းရှာတ်ခါဘင်းအတွာတ် ကိုယ်တော်ဒေ ရင်ဒင် နည်းလမ်းသန်နင်းကြီးမှာ။ အန်နိမ်စါန်းငှေါဒီ အန်တာတ်ကား သမီဆာကလောင်းတုံန်းဒေ စါတ်ပင်းအတွာတ် ကိုယ်တော်ဒေ ပဘဲဘန်း လမ်းစာလားပါ ပူလာန်ဘဲကြီးမှာ။13အမှါတ်ကြီ အန်တာတ်ကား ဖာရိရှဲစယ်ယာယောက် ဟေရုဒ်ပင်းနောက်လိုက်စယ်ယာဒေ ကိုယ်တော်ယေရှုတေ မေးခွန်းတေစိန်ယူဘန်း ထောင်ချောက်အွန်ဒင် ကိုယ်တော်ပါ တာတ်နာန်မှာ။14အန်ဘင်းဆိတ်တာတ်ကား ကိုယ်တော်ယေရှုပါ ဒီကြီးဘန်း “အိုးဆကြီး၊ နာန်ကား ချီဘင်းနာဒေ၌ငှေါဘင်း ရိုးသားသဘင်းဆိတ်ထှာဘင်းဒေ အလေမိန်းရှာတ်ခါမှာ။ နာန်ကား သမီဆာ၌တိုင်းဒေ တန်းတူညီမျှ ဆက်ဆံသဘင်းအတွာတ် သမီတေကား နာန်ဒေ ဟာနိမ်ထာန်သနင်းမှာညယ်ရီး အစါတ်အား။ သမီဆာတာတ်တေ ဘုရားရှာန်နင်းစိန်းကာတ်ပင်း နည်းလမ်းတေဒေရီးဒါး ချီဘင်းအတိုင်း ဟောသကာ ဆွောန်သကာမှာ။ အမှာတွာတ် အလေကား ရောမဧကရာဇ်တုံန်းပါ အခွန်ဆက်သထှာဘင်းကား ပညတ်တော်ယောက် ညီသလဲ အညီသဝါးရဲ ငှေါဘင်းနာဒေ အရာတ်အလေနင်းငှေါကာ။15အလေကား အခွန်အီသင့်သောလဲ အန်နိမ်အချီ အအီသင့်သဝါးရဲ” ညယ် လျှောက်တာန်သကြီးမှာ။ အန်နိမ်စါန်းငှေါဒီ ကိုယ်တော်ယေရှုကား အန်တာတ် သမီဆာမလဲနိမ် အယောင်ဆောင်သနင်းဘင်းနာဒေ မိန်းရှာတ်ခါဘင်းအတွာတ် “ဟနိမ် ဟမာန်ငှါး ငါဒေ ထောင်ချောက်ဆာန်သနင်းကြီးဒေ။ ငါယူဒင်အတွာတ် ဒေနာရီဒင်္ဂါးပါတ်အာဒေ ငါပါလာရီ” ညယ် မိန့်တော်မူသမှာ။16အန်တာတ်ရီးဒါး ဒေနာရီပါတ်အာဒေ လာရီဘန်း ကိုယ်တော်ဒေ အီရာန်မှာ။ အန်၌မှါခ့်ခါ ကိုယ်တော်ကား “အဘင်းကား ဟာဟမဲဘင်း ပုံယောက် နာမယ်ထှာဒေ” ညယ် စိန်ယူရာန်မှာ။ အန်ဘင်းဆိတ်တာတ်ရီးဒါး “ရောမဧကရာဇ်ပုံယောက် နာမယ်ထှာမှာ” ညယ် ပြန်သဘန်း လျှောက်တာန်သကြီးမှာ။17အန်၌မှါခ့်ခါ ကိုယ်တော်ယေရှုကား အန်တာတ်တေ “မဲဘန်း၊ အန်နိမ်ငှေါဘန်းကား ရောမဧကရာဇ် ပိုင်သဘင်းနာတေဒေ ရောမဧကရာဇ်နင်း အီဘန်း ဘုရားရှာန်ပိုင်သဘင်းနာတေဒေ ဘုရားရှာန်နင်းအီကြီး” ညယ် မိန့်တော်မူသမှာ။ အန်တာတ်ရီးဒါး ကိုယ်တော်ဒေ အံ့ဩသနင်းကြီးမှာ။18စီးမှါခ့်ခါ ရှီးလားဟက် ပြန်သဘန်းစားဟာန်းရီဘင်းနာဒေ အယုံကြည့်သကြီးဘင်း ဇဒ္ဒုကဲတာတ်ကား ကိုယ်တော်ယေရှုပါ ဒီကြီးဘန်း19“အိုးဆကြီး၊ မောရှေကား အလေဒေ ပညတ်ကျမ်း စားနူဒေအီရီမှာ။ အန်ဘင်းနာကား သမီဆာဟော်ဝါဘင်း အမူးကား အိတ်ငှါစါတ် ဆာဆအိတ်အလူညယ် ရှီးလာန်ပဲဘန်းကား အန်ဘင်းဆိတ်ကား ရှီးလာန်ပဲဘင်း ဟိန်အမူအတွာတ် ဆာဆအိတ်လူကွန်း အန်ဘင်း မုဆိုးမဒေ လာထှာကူညယ် ထှာမှာ။20အန်နိမ်ငှေါဘန်းကား အမူးနရှီစစ်ဟူးငှါဘန်း ပထမအမူးတုံန်းဟော်ဝါကား အိတ်လာစီးဘန်း ဆာဆအိတ်အလူညယ် ရှီးလာန်ပဲမှာ။21ဒုတိယဟော်ဝါကား အန်ဘင်း မုဆိုးမဒေလာရာန်ဘန်း ဆာဆအိတ်အလူညယ် ရှီးလာန်ဟာန်းပဲမှာ။ တတိယနရှီရီးဒါး အန်နိမ်ထှာမှာ။22စီးမှါခ့်ခါ အမူးနရှီစစ်ဟူးစလုံးကား အန်ဘင်းအီးရှီယောက် လာရီဘန်း ဆာဆအိတ်အလူညယ် ရှီးလာန်ပဲကြီးဆွန်မှာ။ နောက်ဆုံးဘေ အန်ဘင်းအီးရှီရီးဒါး ရှီးလာန်ဘဲမှာ။23ရှီးစီးဘင်းသမီဆတာတ် ရှီးလားဟက် ပြန်သဘန်းစားဟာန်းကြီးဘင်း အချိန်ထုတ်အီမှါခ့်ခါ အန်ဘင်းအီးရှီကား ဟာဟမဲဘင်း အိတ်ထှာကူဒေ။ ဟမာန်တွာတ်ငှေါဘန်းတာတ်ငှေါ ဟိန်ကား အမူးနရှီစစ်ဟူးစလုံးယောက် လာရီဘင်းအတွာတ်ထှာမှာ” ညယ် စိန်ယူကြီးမှာ။24အန်၌မှါခ့်ခါ ကိုယ်တော်ကား အန်တာတ်တေ “ဟနိမ်ကား ဘုရားရှာန်ဘင်းတန်ခိုး အန်နိမ်အချီ ကျမ်းကျိန်းတေဒေရီးဒါး အနားလည် အမိန်းရှာတ်ခါဘင်းအတွာတ် အယူမှားသနင်းကြီးလားထှာမှာ။25ရှီးစီးဘင်းသမီဆာတာတ် အဆာတ်စားဟာန်းကြီးရီမှါခ့်ခါ အန်တာတ်ကား ရွှေမြို့တော်ဟက် မဲဘင်းဟမန်းတာတ်နိမ် ထှာကြီးကူထှာဘန်း မာန်းဂလာဆောင်သဘင်းနာတေ၊ အီယုတ်ကြီးမှာငှေါဘင်းနာရီဒါး ငှါကဘန်းလားအချီရား။26ရှီးစီးဘင်းသမီဆာတာတ် အဆာတ်စားဟာန်းရီဘင်း အကြောင်းယောက် ပတ်သက်သဘန်း မောရှေကျမ်းကျိန်းနောင်းဘင်း ဝါမ်ဟူနင်းဘင်း ချုံပုတ်အကြောင်းဒေ ရေးသပဲဘင်း ကျမ်းပိုဒ်ပေ ဘုရားရှာန်ကား မောရှေဒေ ‘ငါကား အာဗြဟံဘင်းဘုရား၊ ဣဇက်ပင်းဘုရားယောက် ယာကုပ်ပင်းဘုရားထှာမှာ’ ညယ် မိန့်ဒီဘင်းနာဒေ ဟနိမ်အကျယ်ပတ်ကြီးရားရယ်။27ဘုရားရှာန်ကား ရှီးစီးဘင်းသမီဆာတာတ် ဘုရားအချီညယ် အဆာတ်စားဘန်းနင်းဘင်းဆိတ်တာတ် ဘုရားထှာမှာ။ ဟနိမ်ကား အကြီးကျယ် အယူလွဲသနင်းကြီးဆွန်ဘန်း” ညယ် မိန့်တော်မူသမှာ။28ကိုယ်တော်တာတ် တူးသပေါက်ပန်း ငြာမ်းသဘန်းနင်းကြီးဘင်းနာဒေ သက်ပူဘင်း ကျမ်းကျိန်းပေါ့ပင်း အိုးဆကြီးဟော်ဝါရီးဒါး အန်ဘင်းဘေငှါဘန်းနင်းမှာ။ ကိုယ်တော်ယေရှုကား ဇဒုက္ကဲတာတ်တေ မလဲကလဲ ပြန်သဘန်းငှေါကာဟာန်းဘင်းနာဒေ ကတုံန်ဘင်းအတွာတ် ကိုယ်တော်ပိုက်ပါဒီဘန်း “ပညတ်တော်နောင်းဟက် ဟာဘင်းပညတ်တော်ကား အရေးတုံန်းဟန်ဆုံးထှာတေ” ညယ် စိန်ယူမှာ။29ကိုယ်တော်ယေရှုရီးဒါး “အရေးတုံန်းဟန်ဆုံးဘင်း ပညတ်တော်စားနူကား ‘အစ္စရေးသမီဆာတာတ်၊ သက်ကြီး။ အလေအရှာန်ထှာဘင်း ဘုရားရှာန်၌ဆာ တစ်ဆူ၌ငှါဘင်း ဘုရားထှာမှာ။30ဟနိမ်အရှာန်ထှာဘင်း ဘုရားရှာန်ဒေ ဟနိမ်ဘင်း လာန်၊ အဆေင်၊ နှလုံး ဆွန်းပါးစလုံးယောက် မစ်ကြီးထှာကူ’ ညယ်ငှေါဘင်း ပညတ်တော်ထှာမှာ။31ဒုတိယအရေးတုံန်းဘင်း ပညတ်တော်ကား ‘နာန်ကျေမ်းထာန်ကစက်တာတ်တေ နာန်ကောတ်နာန်မစ်နိမ် မစ်ထှာကူ’ ညယ်ငှေါဘင်း ပညတ်တော်ထှာမှာ။ အန်ဘင်းပညတ်တော်တေထာတ် ပိုသောအရေးတုံန်းဘင်း ပညတ်တော်တေအဘိုဝါး” ညယ်ငှေါမှာ။32ကျမ်းကျိန်းပေါ့ပင်း အိုးဆကြီးရီးဒါး ကိုယ်တော်ယေရှုတေ “ချီမှာ အိုးဆကြီး။ ဘုရားရှာန်ကား တစ်ဆူတည်း၌ငှါဘန်း တခြားဘင်းဘုရား အဘိုဝါးညယ် အိုးဆကြီးငှေါလား ချီမှတ်မှာ။33အလေကား ဘုရားရှာန်တေ လာန်၊ အဆေင်၊ နှလုံး ဆွန်းပါးစလုံးယောက် မစ်ကြီးထှာကူထှာဘန်း အလေကား အလေကျေမ်းထန်ကစက်တာတ်တေရီးဒါး ကိုယ်ကောက်ကိုယ်မစ်နိမ် မစ်ထှာကူငှေါဘင်း ပညတ်တော်တေကား အရေးတုံန်းမှာငှေါဘင်းဒေ အလေမိန်းရှာတ်ခါမှာ။ ပညတ်တော်တေကား နနူစဘူတေဒေ ပလာန်စောက်ပေတာန်သဘန်း ဝါမ်ဆွတ်ပန်းနာ ဘုရားရှာန်ဒေ လှူသဘင်းယောက် တခြားဘင်း အလှူပစ္စည်းတေထာတ် ပိုသောအရေးတုံန်းမှာ” ညယ် ပြန်သဘန်း လျှောက်တာန်သမှာ။34အန်ဘင်းဆိတ် ပညာတေယောက် ပြန်သဘန်းဖြေသဟာန်းဘင်းနာဒေ ကိုယ်တော်ယေရှုသက်ပူမှါခ့်ခါ ဟိန်ဒေ “နာန်ကား ဘုရားရှာန်ဘင်းသာသနာတော်ယောက် လမ်းအစာရား” ညယ် မိန့်သမှာ။ အန်၌မှါခ့်ခါ ကိုယ်တော်ဒေ ဟာဟမဲစဲဒါး မေးခွန်းတေထပ်သဘန်း အစိန်ယူကြီးစါတ်ပန်း။35စီးမှါခ့်ခါ ကိုယ်တော်ယေရှုကား ဗိမာန်တော်ဝါမ်းနောင်းဘေ ဟောသကာဆွောန်သကာနင်းမှါခ့်ခါ ကိုယ်တော်ကား သမီဆတာတ်တေ “မေရှိယအရှာန်ကား ရှာန်းပလာန်ဒါဝိဒ်ပင်း ဆာထှာမှာညယ် ကျမ်းကျိန်းပေါ့ပင်း အိုးဆကြီးတာတ်ကား ဟမာန်တွာတ်ငှေါကြီးဒေ။36ရှာန်းပလာန်ဒါဝိဒ်ကား ဉာဏ်အလင်းတော်ဘင်း တန်ခိုးတော်ယောက်‘ဘုရားရှာန်ကား ငါဘင်းအရှာန်ဒေနာန်ဘင်းရန်သူတေဒေ နာန်တာသဖာတွန်ဘေ ငါချသပဲဘင်းထုတ်ကွန်း ငါဘင်း ညာပါဘေ ထုံးဘန်းနင်း’ ညယ် မိန့်ဒီမှာ။37ရှာန်းပလာန်ဒါဝိဒ်ကိုယ်တိုင်စဲ မေရှိယအရှာန်ဒေ ‘ငါဘင်းအရှာန်’ ညယ် ကော်ရီမှာ။ အမှာတွာတ် မေရှိယအရှာန်ကား ဟိန်ဆာ ဟာနိမ်ထှာရန်ကူဒေ” ညယ်မိန့်သမှာ။ သမီဆာကလောင်းတုံန်းတာတ်ရီးဒါး ကိုယ်တော်ယေရှု ဟောသကာ ဆွောန်သကာဘင်းနာတေဒေ မွန်းဘန်းသက်နင်းကြီးမှာ။38ကိုယ်တော်ယေရှုကား သမီဆာကလောင်းတုံန်းဒေ ဟောသကာဆွောန်သကာနင်းမှါခ့်ခါ ကိုယ်တော်ကား “ကျမ်းကျိန်းပေါ့ပင်း အိုးဆကြီးတာတ်တေ ဆတီးပဲကြီး။ အန်တာတ်ကား ဈေးတုံန်းဘင်း ဆာန်ဆုန်စောက်ဆလောက်တုံန်းတေ တော်ဘန်း သမီဆာတာတ်ကြားဘေ ဟာထှာဘင်းနာဒေ ကြိုက်သကြီးဘန်းနာ ဈေးဘေရီးဒါး လေးလေးစားစား နှုတ်ဆာတ်သလား ခံသထှာဘင်းနာဒေရီးဒါး ကြိုက်သကြီးမှာ။39အန်တာတ်ကား ဓမ္မာရုံတေဘေ အရေးတုံန်းဟန်ဆုံးဘင်း ထိုင်ခုံတေဘေ ထုံးထှာဘင်းနာဒေ ကြိုက်သကြီးဘန်းနာ ယုတ်ပင်းအူဘင်းပွဲတေဘေရီးဒါး မဲဟန်ဆုံးငှေါဘင်း နေရာတေဘေ ထုံးထှာဘင်းဒေ ကြိုက်သကြီးမှာ။40အန်တာတ်ကား ဆာန်းရဲသဘင်း မုဆိုးမတာတ်ပိုင်သဘင်း ပစ္စည်းဥစ္စာတေဒေ အတရားသညယ်လာဟာဘန်း ဖြောင့်မတ်သဘင်းသမီဆာတာတ်နိမ် ဟန်ဆောင်သဒင်ရီးဒါး သမီဆာတာတ်ကြားဘေ စောက်ဆလောက်တုံန်းတေ ဆုစိန်ကြီးဟာမှာ။ အမှာတွာတ် အန်တာတ်ကား ပိုသောတုံန်းဘင်း အပြစ်အီလားဒေ ခံသကြီးထှာကူထှာမှာ” ညယ် မိန့်တော်မူသမှာ။41စီးမှါခ့်ခါ ကိုယ်တော်ကား ဗိမာန်တော်အလှူခံသေတ္တာ ငှါလားပါ မန်းဘန်းနာထုံးဘန်း အလှူခံသေတ္တာနောင်းဘေ သမီဆာတာတ် ဖူးတေစါန်းဘန်းနင်းကြီးဘင်းနာဒေ ယူဘန်းနင်းမှာ။ ဆွာမ်းဘင်းသမီဆတာတ်ကား ဖူးတေကလောင်းတုံန်း စါန်းဘန်းနင်းကြီးမှာ။42စီးမှါခ့်ခါ ဆာန်းရဲသဘင်း မုဆိုးမဟော်ဝါရီးဒါး ထုတ်အီဘန်း အကြီးကျယ်တန်ဖိုးစစ်ပင်း ဖူးဒင်္ဂါးရှရှာ ကလိန်းပါတ်တေ စါန်းပန်းလှူတာတ်မှာ။43ကိုယ်တော်ယေရှုရီးဒါး ဟိန်တပယ့်တော်တာတ်တေ ဟိန်ပါကော်ဘန်း “ဟနိမ်တေ ငါချီဘင်းအတိုင်း ငှေါထှာဘန်းကား အန်ဘင်းမုဆိုးမကား အလှူခံသေတ္တာနောင်းပါ တခြားဘင်းဆိတ်တာတ်ထာတ် ပိုသောစဲ လှူဒီယုတ်မှာ။44ဟမာန်တွာတ်ငှေါဘန်းတာတ်ငှေါ တခြားဘင်းသမီဆာတာတ်ကား အန်တာတ် ပိုသဘင်းဖူးတေဟက် စယ်ယာဒေ၌ လှူသကြီးလားထှာဘန်း အန်ဘင်းမုဆိုးမကား ဆာန်းရဲသဒီဒါး ဟိန်အဆာတ်စားဘန်းနင်းရန်ကွန်း လိုသဘင်းဖူးဆွန်ကွန်းဒေ လှူဒီဘင်းအတွာတ်ထှာမှာ” ညယ် မိန့်တော်မူသမှာ။
Empower Asia Bible Translation Movement