ရှာန်မာကု11
1ကိုယ်တော်ယေရှုယောက် ဟိန်တပယ့်တော်တာတ်ကား ဂျေရုဆလင်မြို့ယောက် ထန်နီဘန်းနာ သံလွင်ကယာပိုက်ပေငှါဘင်း ဗက်ဖာဂေထိန်ယောက် ဗေသနိထိန်ပိုက်ပါ ထုတ်မှါခ့်ခါ ကိုယ်တော်ကား ဟိန်တပယ့် ကလိန်းဟူးဒေ2“ဟနိမ် မန်းဘေငှါဘင်း ထိန်ပါလာန်ကြီး။ ဟနိမ်ကား ထိန်နောင်းဘေ ဆာန်မယောက် ဟာဟမဲစဲ အဘီးလူနွန်းဘင်း မြည်းရှရှာနူဝါဒေ ဟွတ်ပန်းပဲဘင်းနာဒေ ဟနိမ် ကတုံန်ကြီးကူ။ အန်ဘင်းဒေ ဆိုင်းဟပ်ပန်း အောပါကော်ရီ။3ဟော်ဝါဟော်ဝါကား ဟနိမ်ဒေ ‘ဟနိမ် ဟမာန်ငှါး အန်နိမ် အွန်နင်းကြီးဒေ’ ညယ် စိန်ယူဘန်းကား ‘အရှာန်လိုသနင်းဘင်းအတွာတ်ထှာမှာ။ အလေ အန်ဘင်းမြည်းရှရှာဒေ အမှါတ်ကြီ ပြန်သဘန်း ဆာတ်ခါန်းရီကူ’ ညယ်ငှေါရာန်” ညယ် မိန့်သဘန်း တာတ်နာန်မှာ။4အမှာတွာတ် တပယ့်တော်ကလိန်းဟူးရီဒါး ထိန်ပါပူကြီးရီဘန်း လမ်းပိုက်ပင်း ကျေမ်းဝါမ်းပတူးဘေ ဆိုင်းဟွတ်ပန်းပဲဘင်း မြည်းရှရှာဒေ တန်ဘန်းကတုံန်ကြီးမှာ။ အန်တာတ်ရီးဒါး မြည်းရှရှာဒေ ဆိုင်းဟပ်နင်းစါတ်5အန်ဘင်းဘေ စပ်ပန်းနင်းကြီးဘင်း သမီဆာစယ်ယာကား “ဟနိမ် မြည်းရှရှာဒေ ဆိုင်းဟပ်ပန်း ဟမာန်အွန်နင်းကြီးဒေ” ညယ် စိန်ယူကြီးမှာ။6တပယ့်တော်တာတ်ရီးဒါး အန်တာတ်တေ ကိုယ်တော်ယေရှု မိန့်ဒီဘင်းအတိုင်း ပြန်သဘန်း ငှေါကာဟာန်းကြီးမှါခ့်ခါ အန်ဘင်းဆိတ်တာတ်ရီးဒါး မြည်းရှရှာဒေ လာစိန်းယုတ်အာန်မှာ။7အမှာတွာတ် တပယ့်တော်တာတ်ရီးဒါး မြည်းရှရှာဒေ ကိုယ်တော်ပါ ကော်ကြီးရီဘန်း အန်တာတ်ပြာန်ဘင်း ဆာန်ဆုန်တေဒေ မြည်းရှရှာကဆာန်းစောက်ပေ ကန်းအီကြီးဘန်းနာ ကိုယ်တော်ရီးဒါး မြည်းရှရှာစောက်ပေဟယ်ဘန်း ထုံးငါန်မှာ။8ကိုယ်တော်ယေရှုကား ဂျေရုဆလင်မြို့ပါ မြည်းရှရှာဒေဘီးဘန်း ကြွသမှါခ့်ခါ သမီဆာကလောင်းတုံန်းတာတ်ရီးဒါး ကိုယ်တော်မန်းဘင်း လမ်းစောက်ပေ အန်တာတ်ဆာန်ဆုန်တေဒေ ကန်းအီကြီးဘန်းနာ တခြားဘင်းဆိတ်တာတ်ရီးဒါး အန်တာတ်ပိုက်ပင်း ကွာမ်းတေဟက် သလာပ်သလဲတေဒေ လာရီဘန်း ကိုယ်တော်မန်းဘင်း လမ်းဘေ ကန်းအီကြီးမှာ။9ကိုယ်တော်ယေရှုမန်းဟက် လာန်ကြီးဘင်းဆိတ်တာတ်ယောက် ဟလိန်းဟက် ဒီရာတ်ကြီးဘင်း ဆိတ်တာတ်ကား ဆကလားဝါတ်ဆလာတ်တုံန်းယောက်“ဟောရှဏ္ဏ ၊အရှာန်ဘင်း နာမယ်ယောက် ကြွဒီဘင်းဆိတ်တေ ဘုရားရှာန်ကား မန်းအီဘန်း။10အလေအဝါ ရှာန်းပလာန်ဒါဝိဒ်ပင်း နိုင်ငံတော်နိမ် ပေါ်ဒီကဘန်းဘင်း နိုင်ငံတော်ဒေ ဘုရားရှာန်မန်းအီလား ခံသထှာစိန်းကိုင်ယုတ်။အမြာန့်ဆုံးထှာဘင်း ရွှေမြို့တော်ဘေငှါဘင်း ဘုရားရှာန်ဒေ ချီးမွမ်းသမှာ” ညယ် ဟာတ်ကြီးမှာ။11စီးမှါခ့်ခါ ကိုယ်တော်ယေရှုကား ဂျေရုဆလင်မြို့ဘေ ဆာန်ဘန်းနာ ဗိမာန်တော်ဝါမ်းနောင်းပါရီး ဆာန်ငါန်မှာ။ ကိုယ်တော်ကား ဗိမာန်တော်ဝါမ်းနောင်းဘေငှါဘင်း နာတေဒေ သေသေချာချာ လှည့်သဘန်း ယူဝါမ်မှာ။ အန်နိမ်စါန်းငှေါဒီ စမိတ်ဆာန်ကဘန်းဟွန် ကိုယ်တော်ကား သာဝက ရှစ်နူဘန်းကလိန်းဟူးယောက်အတူ ဂျေရုဆလင်မြို့ဟက်ပူဘန်း ဗေသနိထိန်ပါလာန်မှာ။12နောက်မာန်းရာတ်မှါခ့်ခါ ကိုယ်တော်ယေရှုယောက် ဟိန်ဘင်းတပယ့်တော်တာတ်ကား ဗေသနိထိန်ဟက် ပူရီမှါခ့်ခါ ကိုယ်တော်ယေရှုကား ယုတ်ခေါ့ပ်နီမှာ။13ကိုယ်တော်ယေရှုကား သသပ်တေယောက် အုံ့ဆိုင်းသနင်းဘင်း ဆာန်းညက်ကလွုန်ဒေ လမ်းစာဟက် ကတုံန်ဘင်းအတွာတ် ကိုယ်တော်ကား ဆာန်းညက်ရှီ ငှါကူသမားညယ် သန်ဒင်အတွာတ် ပူရီမှာ။ အန်နိမ်စါန်းငှေါဒီ ကိုယ်တော်ကား ကလွုန်ပိုက်ပေထုတ်မှါခ့်ခါ ဆာန်းညက်ရှီ ရှီဘင်းအချိန်အချီဘန်းသာငှေါ သသပ်တေဟက်လွဲသဘန်း ဟာဘင်းရှရှီစဲ အကတုံန်ငှါး။14အမှာတွာတ် ကိုယ်တော်ကား အန်ဘင်းကလွုန်ဒေ “နာန်ဟက်ရှရှီဒေ အနားပန်းနူ ဟာဟမဲစဲ အယုတ်လူငှါစိန်းကိုင်ယုတ်” ညယ် မိန့်တော်မူသမှာ။ ကိုယ်တော် အန်နိမ်မိန့်သဘင်းနာဒေ တပယ့်တော်တာတ်ရီးဒါး သက်ပူကြီးမှာ။15ကိုယ်တော်ယေရှုယောက် တပယ့်တော်တာတ်ကား ဂျေရုဆလင်မြို့ပါ ထုတ်မှါခ့်ခါ ကိုယ်တော်ကား ဗိမာန်တော်ဝါမ်းနောင်းပါ ဆာန်လာန်ဘဲပန်း အန်ဘင်းနေရာဘေ ဈေးမာဘန်းနင်းဘင်းဆိတ်တာတ်ယောက် ဈေးမီးဘန်းနင်းကြီးဘင်းဆိတ်တာတ်တေ စသဘန်း ငါတ်ပူဆွန်နာန်မှာ။ ကိုယ်တော်ကား ဖူးကြိုက်ပန်းနင်းကြီးဘင်းဆိတ်တာတ် ခုံတေယောက် အဟူးတူမာနင်းကြီးဘင်း ဆိတ်တာတ် ခုံတေဒေ လှန်သဘန်း ငွတ်ပဲဆွန်နာန်မှာ။16စီးမှါခ့်ခါ ကိုယ်တာ်ကား ဗိမာန်တော်ဝါမ်းဒေ ဖြတ်သဘန်း ပစ္စည်းတေဒေလာရီဒင် ဟာဟမဲဒေစဲ အခွာမ်းအအီဘန်း။17ကိုယ်တော်ယေရှုကား သမီဆာတာတ်တေ “ကျမ်းကျိမ်းနောင်းဘေ ‘ငါဘင်းကျေမ်းကား သမီဆာအမျိုးမျိုးတာတ် ဆုစိန်ဘန်း ဝိုင်သဘင်းကျေမ်းညယ် ကော်လားခံသထှာကူ’ ညယ်ရေးသပဲမှာ။ အန်နိမ်စါန်းငှေါဒီ ဟနိမ်ကား ဗိမာန်တော်ဒေ သူခိုးတေ ဓားပြတေ ဒင်းဘင်းနေရာထှာကွန်း အွန်ကြီးရာန်မှာ” ညယ် ဟောသကာ ဆွောန်သကာမှာ။18ဂျူးပုရောဟိတ်ဟလာန်းစါတ်တုံန်းတာတ်ယောက် ကျမ်းကျိန်းပေါ့ပင်း အိုးဆကြီးတာတ်ကား အန်ဘင်းအကြောင်းဒေ သက်ပူမှါခ့်ခါ ကိုယ်တော်တေ သာန်းရှီးဒင် နည်းလမ်းစသဘန်း သန်နင်းကြီးမှာ။ အန်နိမ်စါန်းငှေါဒီ အန်တာတ်ကား ကိုယ်တော်ဒေ စါတ်ပန်းနင်းကြီးမှာ။ ဟမာန်တွာတ်ငှေါဘန်းတာတ်ငှေါ သမီဆာကလောင်းတုံန်းတာတ်ကား ကိုယ်တော်ဟောသကာ ဆွောန်သကာဘင်းနာတေဒေ အံ့ဩသနင်းကြီးဘင်းအတွာတ်ထှာမှာ။19စီးမှါခ့်ခါ ညနေစောင်းဒီဘင်းအတွာတ် ကိုယ်တော်ယောက် တပယ့်တော်တာတ်ကား အန်ဘင်းမြို့ဟက် ပူဟာန်းကြီးရီမှာ။20နောက်မာန်းရာတ် အတိုင်စောင်းရှီမှါခ့်ခါ ကိုယ်တော်ယေရှုယောက် ဟိန်တပယ့်တော်တာတ်ကား ဂျေရုဆလင်မြို့ပါ ဒီဟာန်းနင်းကြီးမှါခ့်ခါ ကိုယ်တော်ယေရှုမိန့်ဒီဘင်း ဆာန်းညက်ကလွုန်ကား တကလပ်ဟက် ဆလောဘန်း ကူးစါတ်နင်းဘင်းနာဒေ အန်တာတ်ကတုံန်ကြီးမှာ။21အန်၌မှါခ့်ခါ ပေတရုကား ကိုယ်တော်ယေရှုမိန့်သည်ဘင်းနာတေ ဆတီးလူရာန်ဘန်း ကိုယ်တော်ဒေ “အိုးဆကြီး၊ ယူဝါမ်ယုတ်။ အိုးဆကြီး အမိန့်အီရီဘင်း ဆာန်းညက်ကလွုန်ကား ကူးစါတ်ပါန်” ညယ် လျှောက်တာန်သမှာ။22ကိုယ်တော်ယေရှုကား အန်တာတ်တေ “ဘုရားရှာန်စောက်ပေ ယုံကြည်သကြီး။23ဟနိမ်တေ ငါချီလားဒေငှေါထှာဘန်းကား ဟနိမ်ဘင်း အဆေင်နောင်းဘေ ဘုရားရှာန်ဘင်း တန်ခိုးတော်ဒေ သံသယအဘိုညယ် ဟနိမ်ငှေါဘင်းအတိုင်း ဘုရားရှာန်ကား အွန်အီကူညယ် အဟုတ်မလပ် ယုံကြည်သဘန်း ဟနိမ်ကား အန်ဘင်းကယာတုံန်းဒေ ‘လာန်၊ နာန်ကောတ်နာန် ပါမ်လယ်နောင်းဘေ တက်အက်နာန်’ ညယ်ငှေါဘန်းကား အန်ဘင်းနာကား ထှာလာန်ဘဲကူထှာမှာ။24အမှာတွာတ် ဟနိမ်တေ ငါငှေါကူ။ ဟနိမ်ဆုစိန်ကြီးမှါခ့်ခါ ဟနိမ်စိန်ဘင်း ဟာဘင်းနာဒေစါန်းငှေါဒီ လူကူညယ် ယုံကြည်သဘန်းကား ဘုရားရှာန်ကား အဟုတ်မလပ် ဟနိမ်ဒေ အီကူထှာမှာ။25ဟနိမ် ဆုစိန်မှါခ့်ခါ ဟော်ဝါဟော်ဝါကား ဟနိမ်စောက်ပေ အပြစ်အွန်ပဲဘင်းဒေ ဆတီးလူဘန်းကား အန်ဘင်းဆိတ် အွန်ပဲဘင်းအပြစ်တေ ခွာမ်းလွှတ်သအီရာန်။ အန်နိမ်မားဆာ ရွှေမြို့တော်ဘေငှါဘင်း ဟနိမ်အဝါဘုရားရှာန်ကား ဟနိမ်အွန်နီဘင်း အပြစ်တေဒေရီးဒါး ခွာမ်းလွှတ်သကူထှာမှာ။26အန်နိမ်စါန်းငှေါဒီ ဟနိမ်ကား အန်တာတ်တေ ခွာမ်းလွှတ်သလားအဘိုဘန်းကား ရွှေမြို့တော်ဘေငှါဘင်း ဟနိမ်အဝါဘုရားရှာန်ကား ဟနိမ်အွန်နီဘင်း အပြစ်တေဒေ ခွာမ်းလွှတ်သကလား အချီရား” ညယ်မိန့်သမှာ။27စီးမှါခ့်ခါ ကိုယ်တော်ယေရှုယောက် ဟိန်တပယ့်တော်တာတ်ကား ဂျေရုဆလင်မြို့ပါ ပြန်သဘန်း ထုတ်ခါန်းကြီးရီဘန်း ကိုယ်တော်ကား ဗိမာန်တော်ဝါမ်းနောင်းဘေ လမ်းတယ်နင်းမှါခ့်ခါ ဂျူးပုရောဟိတ်ဟလာန်းစါတ်တုံန်းတာတ်၊ ကျမ်းကျိန်းပေါ့ပင်း အိုးဆကြီးတာတ်ယောက် ဂျူးသမီဆာဟလာန်းစါတ်တာတ်ကား ကိုယ်တော်ပါ ထုတ်ကြီးရီမှာ။28အန်တာတ်ကား ကိုယ်တော်ယေရှုတေ “အန်ဘင်းနာတေဒေအွန်ဒင် နာန်ဘေ ဟာဘင်းအခွာမ်းအာဏာငှါဒေ။ အန်ဘင်းနာတေဒေအွန်ဒင် ဟာဟမဲကား နာန်ဒေ အခွာမ်းအာဏာအီပဲဒေ” ညယ် စိန်ယူကြီးမှာ။29ကိုယ်တော်ယေရှုကား အန်တာတ်တေ “ဟနိမ်တေ ငါ စားနူစိန်ယူကူ။ ဟနိမ်ငါဒေ ပြန်သဘန်း ဖြေသဟာန်းဘန်းကား အန်ဘင်းနာတေဒေအွန်ဒင် ငါဒေ ဟာဟမဲကား အခွာမ်းအာဏာအီပဲမှာငှေါဘင်းဒေ ဟနိမ်ဒေ ငါငှေါကာကူ။30ဝဲငွတ်ပင်းမာန်းဂလာအွန်အီဘင်း အိုးဆကြီးယောဟန်ကား သမီဆာတာတ်တေ ဝဲငွတ်ပင်းမာန်းဂလာအွန်အီမှါခ့်ခါ ဟိန်ဘင်းအခွာမ်းအာဏာကား ဘုရားရှာန်ဟက်ဒီလည်း အန်နိမ်အချီ သမီဆတာတ်ဟက်ဒီလည်း။ ငါဒေ ဖြေသကြီး” ညယ် မိန့်တော်မူသမှာ။31အန်တာတ်ရီးဒါး “အလေကား ‘ရွှေမြို့တော်ဘေငှါဘင်း ဘုရားရှာန်ဟက်ဒီမှာ’ ညယ်ငှေါဘန်းကား ဟိန်ကား ‘အန်နိမ်ငှေါဘန်းကား ဟနိမ်ကား ဟမာန်ငြား ယောဟန်ဒေ အယုံသကြီးဒေ’ ညယ် စိန်ယူကူ။32အန်နိမ်စါန်းငှေါဒီ အလေကား ဝဲငွတ်ပင်းမာန်းဂလာအွန်အီဘင်း အိုးဆကြီးယောဟန်ဘင်း အခွာမ်းအာဏာကား သမီဆာတာတ်ဟက် ဒီမှာညယ်ရီး ငှေါလားအလူဝါး” ညယ် အချန်းချန်း တိုင်ပါန်သနင်းကြီးမှာ။ ဟမာန်တွာတ်ငှေါဘန်းတာတ်ငှေါ ဝဲငွတ်ပင်းမာန်းဂလာအွန်အီဘင်း အိုးဆကြီးယောဟန်ကား အဟုတ်မလပ် ပရောဖက်ထှာဘင်းဒေ သမီဆတာတ်ကား ယုံကြည်သဘင်းအတွာတ် အန်တာတ်ကား သမီဆာကလောင်းတုံန်းဒေ စါတ်ပန်းနင်းကြီးမှာ။33အမှာတွာတ် အန်တာတ်ကား ကိုယ်တော်ယေရှုတေ “အလေ အမိန်းရှာတ်ခါး” ညယ် ပြန်သဘန်း ဖြေသမှာ။ ကိုယ်တော်ရီးဒါး “အန်နိမ်ငှေါဘန်းကား အန်ဘင်းနာတေဒေအွန်ဒင် ဟာဟမဲကား ငါဒေ အခွာမ်းအာဏာအီပဲမှာ ငှေါဘင်းနာဒေ ဟနိမ်ဒေ အငှေါကာရန်နား” ညယ် မိန့်တော်မူသမှာ။
Empower Asia Bible Translation Movement