Mark6
1ဝႆၢးတီး ၸဝ်ယေသုၼႆလႄလၼ်ထင်းဝႅယ်ၵပေရၼွင် လၼ်ဢႄးဝႅယ်တီၸဝ်မူဝ်ႇ ဝႅယ်ၼႃၸရတ်ႈ။ တပႄးၸဝ်ၵိူဝ်ႇၵေႃ ၼႆတိူမ်ၽရွမ်ပႃထရူးသွပ်းတႃးပွတ်ဝ်းၸဝ်။2မိူဝ်းသငိသိၼ်းသိူဝ်သငိ ၸဝ်ၵေႃၼႆႁေႃးသွၼ်းမိူဝ်ႇၼ်ႂးၸရွပ်ႇၼေး ဢီႉဢၼ်ထရူးတိူၵ်ႇငရ်းၵေႃ တူမ်ၽရွမ်ဢၢမ်းမိူဝ်ႇၼႆတႃး “ဢိူၼ်းပွၼ်းထရူးလွင်ၵိူၼ်ၼီထင်းႁၼႄႉ။ ၺၢၼ်ပိင်ၺႃဢၼ်ဢိူၼ်းၿွၼ်းမူၵ်ႇ တင်လွင်ဢၢမ်းဢၼ်ဢိူၼ်းၸီႇၵိူဝ်ႇၼေး ၼႄႇသိူၼ်းၼႄႉ။3ဢိူၼ်းၼႄႇလၵ်ႇသမႃးၼမ်ၸိူဝ်ႁိူဝ်ႉ။ ဢိူၼ်းၼႄႇၵွၼ်ဝ်းမႃရိ ၼႄႇမႆယႃၵူပ်ႈ၊ ယေႃးသေ၊ ယုတတင် သိမူင် ၼမ်ၸိူဝ်ႁူဝ်ႉ။ တေႃႇၵိူၼ်ၺႃႇဢိူၼ်းၵေႃ မူဝ်ႇႁရ်ၼီၵွမ်းဢေႉၼမ်ၸိူဝ်” ၼမ်ပေႃတေႃႉၸဝ် ၼႆတႃးၸိူၼ်ၼီ။4ၸဝ်ယေသုၵေႃၼႆတႃးၵိူဝ်ႇၼႆၢ “ပရေႃးၽႅတ်ႈၵိူဝ်ႇၼီ ပွၼ်းလွင်ၼပ်ႉယမ်ဢီႉတင်ႁိူင်းၵဵယ်းတီၵဵယ်းဢိူင် လိူဝ်းသေဢီႉၵလိူင်းတႄႉ တင်ဢီႉၸၢဝ်းၶိူဝ်းတႄႉႁႃး” တႃးသိူၼ်ၼီ။5ၸဝ်ၼမ်ၸီႇလဝ်ၼိမိၵ်ႇဢၢမ်းႁလ်းဢိူင်ဢေး လိူဝ်းသေသိူၵ်ႇၼိူမ်လေႇတိတၢင်းဢႄးႁရ်ၵူလ်ဢီႉၼမ်မူဝ်ႇရၵ်ႇတိူရ်ယႄႉ။6ၸဝ်ၼႆဢၢမ်းမိူဝ်ႇ ၵွပ်လွင်ၼမ်ယုမ်ယမ်ၵိူဝ်ႇ။ ဝႆၢးတီး ၸဝ်ၼႆလၼ်ႁေႃးသွၼ်းဢႄးဢီႉၽရူႉဢၼ်ၼႄႇဢရၢပ်ႇႁေးၵိူဝ်ႇၼႆၢ။7ဝႆၢးတီး ၸဝ်ၼႆရၢၵ်ႇတပႄးၸဝ်သိူဝ်ႇၵွလ်းဢရ်း ၼႆဢႄးၵိူဝ်ႇၼႆၢဢၶႂၢင်းဢႃၼႃ တႃလွမ်ပလႄးၽရႄႇၼမ်ရၵ်ႇ ၼႆၸ်ႂၵိူဝ်ႇလၼ်ပဵၼ်းၵူ ၵိူဝ်ႇဢၢရ်း လၼ်သွပ်ႉၽရူႇသွပ်ႉဝႅင်။8ဝႆၢးတီး ၸဝ်ၼႆꧣႃး လိူဝ်းသေၵွၼ်ထွၵ်ႇယႃလေႇလၼ်ႁလ်းၼႆး ရိူမ်သွမ်း၊ သၵီး၊ ပႅၵ်း ၵိူၼ်ၼီ ယႃသပ်းလၼ်ၼႆးတႃးထွင်း တႃၶရၢဝ်းရိူင်ꧣဵင်း။9ဢႄးလေႇလၼ်ၸွင်ၶလႅၵ်ႉႁႃး ၶရွလိူဝ်းၵေႃယႃလေႇလၼ်ၼႆးꧣႃးသိူၼ်းၼီ။10ၼႆလဝ်တင်ၵိူဝ်ႇတႃး “ဢိူင်ႁႃးၼႄႉၼမ်တႃး ယႅတ်ႁႃးတႃၵၢင်ဢၼ်သုၼ်းရပ်ႇပေႉၼေး ပွၵ်ႇပေႉမၢတ်ႇလႄလၼ်ထင်းဢိူင်ဢၼ်ဢေး ပေႉလူဝ်မူဝ်ႇႁႃးတႃးၵင်ဢၼ်ဢေး။11ၵေးတႃး ဢိူင်ဢၼ်ၼႄႉသေၼမ်တႃး ပွၵ်ႇၼမ်ရပ်ၶၢမ်ပေႉ၊ ပွၵ်ႇၼမ်တိူၵ်ႇငရ်းမွႆယ်ရမႃပေႉ ပတ်းၸွၵ်ႇမုလ်မုၵ်ႇတႃးပလၢၵ်ႉၸွင်ပေႉၼေး ၼႄႇသိူၼ်းပေႉဢႄးသတိၵိူဝ်ႇ ၽြႃးၸဝ်ငႃးဢႄးဢပႅတ်ၵိူဝ်ႇၼေး” တႃးသိူၼ်ၼီ။12ၵွပ်ႇသိူၼ်းတီး တပႄးၸဝ်ၵိူဝ်ႇၵေႃၼႆလႄလၼ် ႁေႃးလဝ်ဢီႉတၢင်ႁိူင်း ဢႄးတိူမ်ၽရွမ်ၼွင်တႃႉ ဢပႅတ်ႇတႄႉ ၼႆဝႆၢးဢႄးၼႅလ်ႁရ်ၽြႃးၸဝ်။13ဝႆၢးတီး ၵိူဝ်ႇၵေႃၼႆၶႃးလွၢမ်ပလႄးၽရႄႇၼမ်ရၵ်ႇထင်းဢီႉၵိူဝ်ႇ ၼႆလေႇလမၼ်တႃးဢႄး သိူၵ်ႇၼိူမ်ဢႄးတင်ဢီႉၼမ်မူဝ်ႇရၵ်ႇၵိူဝ်ႇ။14မိူဝ်းတီး လွင်ၸဝ်ယေသုၵေႃၼႆလိုဝ်းလင်ထရူး ၶုၼ်းႁေႃးၶမ်းႁေရူတ်း ၵေႃၼႆငရ်း။ ဢီႉရၵႃတႃး “ဢိူၼ်းၼႄႇ သြႃငိူပ်ႈဢူမ်းယေႃးႁၢၼ်ဢၼ်ဢိမ်းၼႅလ်ထရူးထင်းယႅမ်။ ၵွပ်ႇသိူၼ်းတီး ဢိူၼ်းၼႆၸီႇလဝ်ပွၼ်းလွင်ဢၢမ်းပေႃတိူရ်တီး” တႃးသိူၼ်းၼီ။15ဢီႉရၵႃတႃး “ဢိူၼ်းၼႄႇ ဢေလိယ” ရၵႃတႃး “ဢိူၼ်းၼႄႇပရေႃးၽႅတ်ႈသိူဝ်ပႃး ၼႂ်းပရေႃးၽႅတ်းၵဵယ်းပွၵ်ႈ” တႃးသိူၼ်းၼီ။16မိူဝ်းၶုၼ်းႁေႃးၶမ်းႁေရူတ်းငရ်းဢီႉၵိူဝ်ႇၶရႆလွင်ၸဝ်ယေသု ဢိူၼ်းၼႆတႃး “ဢိူၼ်းၼႄႇသြႃႇငိူပ်ႇဢူမ်းယေႃးႁၢၼ်ဢၼ်ဢူဝ်ႉၸႂ်ဢႄးတတ်းၵိင်းဢိူၼ်းၼေး။ ဢိူၼ်းဝႃရွႆဢိမ်းၼႅလ်ထင်းယႅမ်” တႃးသိူၼ်းတီး။17ၶုၼ်းႁေႃးၶမ်းႁေရူတ်း ၺွပ်ႉယေႃးႁၢၼ်ၵလႄးထွင် ၵွပ်လွင်ဢၼ်ၶုၼ်းႁေႃးၶမ်းႁေရူတ်းလေႇၵိူဝ်ႇပိူၼ်းတေႃႇတႄႉၽိလိပု ဢၼ်ၼႄႇႁေရေႃးတိ။18ၵွပ်ႇယေႃးႁၢၼ်တႃး ၶုၼ်းႁေႃးၶမ်းႁေရူတ်းၼႆၢ “လွင်ဢၼ်လေႇၼႅလ်ၵိူဝ်ႇပိူၼ်းတေႃႇတႄႉၼီၼမ်တေႃးတြႃး” ၵွပ်ယေႃးႁၢၼ်တႃးသိူၼ်းတီးထပ်ထပ်။19ၵွပ်ႇသိူၼ်းတီး ႁေရေႃးတိၼီ သုၼ်းပယႅမ်း ယႆယေႃးႁၢၼ်ၵေႃၼမ်ၸၢင်ပယႅမ်း။20ၵွပ်ႇၼႄႇၶုၼ်းႁေႃးၶမ်းႁေရူတ်းမသ် လွင်ယေႃးႁၢၼ်ၼႄႇ တူရေႃၵွင်းဢၼ်သိုဝ်ႇယူဝ်းႁွၵ်း ၼႆၼပ်ႇသွမ်း သိူင်းၵႅတ်ၶႄဢႄးမိူဝ်ႇဢိူၼ်း။ မိူဝ်းႁေရူတ်းငရ်းလွင်ဢၼ်ယေႃးႁၢၼ်ႁေႃးသွၼ်းပွၵ်ႇၼႄႉၵေႃ ဢိူၼ်းသုၵ်ႇသၵ်ၽွမ်းမိူဝ်ႇၵေႃ ၼႆၵႆတိူၵ်ႇငရ်းပျေႃမိူဝ်ႇ။21တိူၵ်ႇꧣုတ်း ႁေရေႃးတိၵေႃၼႆၿွၼ်းဢၶႂၢင်း မိူဝ်းသငိပွႆၵိူတ်းၶုၼ်းႁေႃးၶမ်းႁေရူတ်း။ မိူဝ်းသိူဝ်သငိတီး ၵွပ်ႇၶုၼ်းႁေႃးၶမ်းႁေရူတ်းၸီႇပွႆသငိၵိူတ်း ၼႆၽိတ်ႇပၢင်းတင် ၵိူဝ်ႇဢီႉမၢင်ဢယႃၽႆၢသိုၵ်း ဢၼ်ဢယေးပိူလ်၊ တင်ၵိူဝ်ႇၶုၼ်သိုၵ်း တင်ဢီႉပိူလၼ်ၼႄၵႃလိလႄးၵိူဝ်ႇ တႃထရူးသွမ်းတႅယ်းၵွမ်း။22မိူဝ်းꧣမ်းမိူဝ်ႇၶႅၵ်ႉၼေး ၵွၼ်ဝ်းၵိူၼ်ၺႃႇႁေရေႃးတိၵေႃ ၼႆၵႃးလဝ်မိူဝ်ႇၵိူဝ်ႇ။ ၶုၼ်းႁေႃးၶမ်းႁေရူတ်းတင်ၶႅၵ်ႉတင်ႁိူင်းၼႆတိူမ်ၽရွမ်တေႃႉမိူဝ်ႇတၢင်ၵႃးဢိူၼ်းၼေး။ ၵွပ်ႇသိူၼ်းတီး ၶုၼ်းႁေႃးၶမ်းၼႆတႃးၵွၼ်ဝ်းဢိူၼ်းၼႆၢ “မီႇတေႃႉႁႆလ်းၵေႃ ႁႅယ်းဢႄး။ ဢူဝ်ႉငႃးဢႄးမီႇၼႆၢ။23လွင်ဢၼ်မီႇႁႅယ်းၼေး ဢူဝ်ႉဢႄးပွၼ်းလွတ်ဝ်းၵလိူင်းဢူဝ်ႉသိူဝ်ၶိၼ်း” ၶၢမ်ၵိၼ်တႃးသိူၼ်းၼီ။24မိူဝ်းတီးၵွၼ်ဝ်းၵိူၼ်ၺႃႇဢိူၼ်းၼႆလၼ်ဢႄးတႃးမႃႇဢိူၼ်းၵမ်းလဵဝ်ၼႆꧣႃး “ငႃးပွၼ်းႁႅယ်းႁလ်း” မႃႇဢိူၼ်းၼႆတႃး “ႁႅၺ်းၵိင်းသြႃငိူပ်ႈဢူမ်းယေႃးႁၢၼ်ဢႄး” တႃးသိူၼ်းၼီ။25ဢိူၼ်းၵေႃၼႆသိူၵ်ႇၼႅတ်ႇလၼ်ဢႄးတႃးၶုၼ်းႁေႃရူတ်း ၼႆတႃး “ဢူဝ်ႉတေႃႉၵိင်းသြႃငိူပ်ႇဢူမ်းယေႃးႁၢၼ် ဢႄးတၢင်းထရူးတႃးႁရ်ၵူလ်ၽဝွၼ်းဢႄးဢူဝ်ႉၼႆၢသိူဝ်တီး” တႃးသိူၼ်းၼီ။26ၶုၼ်းႁေႃရူတ်ၵေႃၼႆၼွင်တမိူဝ်ႇ ၵွပ်ႇၶေႃၶၢမ်ၵိၼ်ဢၼ်ဢိူၼ်းဢႄးၵတိၼေးၵေႃ ၵေးတႃးၵွပ်ႇဢိူၼ်းဢႄးၵတိသိူၼ်ꧣၢလ်းၶႅၵ်းတၢင်ႁိူင်း ၼႆၼမ်သုၼ်းထဵင်းၼႅလ်ဢိူၼ်း။27ၵွပ်ႇသိူၼ်းတီး ၶုၼ်းၵေႃၼႆရၢၵ်ႇလေႇသိုၵ်းႁွၵ်းၵမ်းလဵဝ် ဢႄးလၼ်လေႇထရူးၵိင်းယေႃးႁၢၼ်။ သိုၵ်းဢၼ်ဢေးၵေႃ ၼႆလၼ်ဢႄးတႃထွင် တတ်ႉၵိင်းယေႃးႁၢၼ်28ၼႆတၢင်းထရူးၵိင်းဢၼ်ဢေးႁရ်ၵူလ်ၽဝွၼ်း ဢႄးတႃးၵွၼ်းၵိူၼ်ၺႃႇၼေး။ ၵွၼ်းၵိူၼ်ၺႃႇၼေးၵေႃ ၼႆဢႄးမႃႇၵိူဝ်ႇၼႆၢ ၵိင်းဢၼ်ဢေး။29မိူဝ်းတပႄးယေႃးႁၢၼ်ၵိူဝ်ႇငရ်းလွင်ၵိူၼ်တီး ၵိူဝ်ႇၵေႃၼႆလၼ်လေႇထရူးတူဝ်းယႅမ်ယေႃးႁၢၼ် လၼ်သၢင်းၵဵဝ်ႇတႃးပူၼ်လူ။30ဝႆၢးတီး တပႄးၸဝ်ယေသုသိူဝ်ႇၵွလ်းဢရ်းဢၼ်ယေးပိူလ်ၵိူဝ်ႇၵေႃၼႆလွတ်ဝ်းထရူးၼႅလ် ၼႆထရူးလဝ်ၼႅလ်ၸဝ်ယေသု လွင်ဢၼ်ၵိူဝ်ႇၸီႇထရူးတင် လွင်ဢၼ်ၵိူဝ်ႇၶႃးႁေႃးသွၢၼ်းထရူးၼေး။31ၸဝ်ယေသုၼႆꧣႃး တပႄးၵိူဝ်ႇၼႆၢ “ပေႉလၼ်ၽရိူမ်းတီတီသငႆၢဢီႉတီၽရသ်ရသ်တင်ဢူဝ်ႉ” ꧣႃးသိူၼ်းၼီ။ ၵွပ်ႇဢီႉတၢင်ႁိူင်းၵိူဝ်ႇ ၵုတ်ႇလႄမိူဝ်ႇ တႃၵိူဝ်ႇသွမ်းရိူမ်းသွမ်းႁႃးၵေႃၼမ်မၢင်ဢၶိင်။32ၵွပ်ႇသိူၼ်းတီး ၵိူဝ်ႇၵေႃၼႆလေႇႁိူဝ်းလႄလၼ်ၶေႃးၼႄႉတီသငႆၢဢီႉ။33ၵွပ်ႇဢီႉတၢင်ႁိူင်းၵိူဝ်ႇၼႆဢွလ်းၵိူဝ်ႇလႄလၼ် ၼႆမသ်မိူဝ်ႇၼႄႇၸဝ်တင်တပႄးဢိူၼ်းၵိူဝ်ႇ။ ၵွပ်ႇသိူၼ်းတီး ဢီႉတၢင်ႁိူင်းထင်းၵဵယ်းဝႅယ်ၵဵယ်းၽရူႇၵိူဝ်ႇၵေႃ ၼႆလေႇၸွင်ရိူၵ်ႇလၼ် လၼ်လွတ်ဝ်းဢႆၢႉမိူဝ်ႇၸဝ်တင်တပႄးၵိူဝ်ႇ။34မိူဝ်းၸဝ်ၸုရ်ထရူးထင်းႁိူဝ်းၼေး ၸဝ်ၼႆဢွလ်းမိူဝ်ႇဢီႉပရိၵ်ႇသၢတ်တၢင်ႁိူင်းၵိူဝ်ႇ။ ၵွပ်ႇၵိူဝ်ႇꧣူၺ်းမိူဝ်ႇၸုမ်းပူသ်းဢၼ်ၼမ်မၢင်ဢီႉထိင်းၼေး ၸဝ်ၼႆတိူရ်ယွင်မိူဝ်ႇၵိူဝ်ႇ ၸဝ်ၵေႃၼႆႁေႃးလဝ်ဢႄးၵိူဝ်ႇၼႆၢ လွင်တၢင်းတၢင်ႁိူင်း။35မိူဝ်းလွတ်ဝ်းထရူးတိူၵ်ႇၿူရ်း တပႄးၸဝ်ၵေႃၼႆလွတ်ဝ်းထရူးဢႄးတႃးၸဝ် ၼႆတႃး “ႁၼီးၼႄႇတီသငႆၢဢီႉ ၽရီႉၵေႃဝႃငႃးၿိမ်း။36ၵွပ်ႇသိူၼ်းတီး ၸႂ်ဢႄးဢီႇၵိူဝ်ႇလၼ် တႃယႅလ်ရိူမ်သွမ်းတႃၵိူဝ်ႇတႃးၽရူႇဢရၢပ်ႇႁႃးၼီး” ꧣႃးသိူၼ်းၼီ။37မိူဝ်းတီး ၸဝ်ၼႆတႃးတပႄးၵိူဝ်ႇၼႆၢ “တူဝ်းပေႉလေႇဢႄးၵိူဝ်ႇၼႆၢရိူမ်သွမ်းဢႄး” ꧣႃးသိူၼ်းၼီ တပႄးၸဝ်ၵိူဝ်ႇၵေႃၼႆတႃး “ဢႄးဢေႉလေႇပႅၵ်းတိင်းၵႃးတႄၼႃရီဢၢရ်းပိူလ်ယႃ ၼႆယႅလ်ဢႄးၵိူဝ်ႇၼႆၢၶဝ်မုၼ်ႁႃး” တႃးသိူၼ်းၼီ။38မိူဝ်းတီး ၸဝ်ၼႆတႃး “ပေႉမၢင်ၶဝ်မုၼ်သိူဝ်ၼႄႉ။ လၼ်ꧣွမ်းဢႄး” ꧣႃးသိူၼ်းၼီ တပႄးၸဝ်ၵိူဝ်ႇၵေႃ ၼႆထရူးတႃးၼႅလ် “မၢင်ၶဝ်မုၼ်ၶၼ်းတင် ၵႃႉၵဢရ်း” တႃးသိူၼ်းၼီ။39ၸဝ်ၼႆၸ်ႂတပႄးၵိူဝ်ႇ ဢႄးလၼ်ၸ်ႂဢီႉတင်ႁိူင်းၵတေးပဵၼ်းၸုမ်း တႃးႁရ်ၵူလ်ၿိူၼ်းငႅရ်ၼေး။40ဢီႉတၢင်ႁိူင်းၵေႃၼႆၵတေး ပဵၼ်းၸုမ်း မၢင်ၸုမ်းသိူဝ်ႇပိူရ်ယႃ၊ မၢင်ၸုမ်းၵေႃ ႁၼ်းၵွလ်း။41ၸဝ်ၵေႃၼႆလေႇၶဝ်မုၼ်ၶၼ်း တင်ၵႃႉ ၵဢၢရ်း ၼႆသိူင်းရေႃပလဵင်း ယုၵ်းယွင်ၵုင်ၵေးၸူးၽြႃးၸဝ်။ ဝႆၢးတီးၼႆပွတ်းၸီႇၶဝ်မုၼ် ၼႆဢႄးလၼ်တႃးတပႄးၸဝ် တႃးဢႄးဝေဢီႉတၢင်ႁိူင်းၼႆၢ။ ၼႆပွတ်းတင်ၵ ၵဢၢရ်း ဝေႇဢႄးဢီႉတၢင်ႁိူင်းၼႆၢ။42ဢီႉတၢင်ႁိူင်းၵေႃၼႆၿၼ်းတိူမ်ၽရွမ်သွမ်းသၢၵ်း။43မိူဝ်းဢီႉတၢင်ႁိူင်းဝႃသွမ်းဝႃ တပႄးၵိူဝ်ႇၼႆၶႃးသိမ်းလေႇမူၵ်ႇၶဝ်မုၼ်တင်ၵႃႉဢၼ်လိူဝ်းၼေး ၼႆၿွၼ်းသိူဝ်ၵွလ်းဢၢရ်းၵပုၵ်ႇ။44ၵိူရ်မေႇႁႆၢႉႁႆၢႉဢၼ်သွမ်းႁေႃးၼႄႇမိူဝ်ဢရၢပ်ႇ ႁၼ်းရဵင်း။ ၼမ်ၼပ်ပႃၵွၼ်းဢီႉတင်ၵိူၼ်ၺႃႇ။ 45ဝႆၢးတီး မိူဝ်းၸဝ်ၼင်ပလွႆးဝဵင်ဢီႉပရိၵ်ႇသၢတ်ႇတၢင်ႁိူင်းၼေး ၸဝ်ၼႆၸ်ႂတပႄးၸဝ်ၵိူဝ်ႇရေႃးတႃးႁိူဝ်းၵမ်းလဵဝ် ဢႄးလၼ်ဢႄးငွမ်ဝႅယ်ပၵ်ႉသႄတဢၼ်ၼႄႇပၢင်းဢူမ်းၵႃလိလႄးပလၢၵ်းႁရ်ဢေးၼေး။46ဝႆၢးၸ်ႂဢီႉတၢင်ႁိူင်းဝဵင်ၼေး ၸဝ်ၵေႃၼႆၸွလၼ်တႃးႁရ်ၵူလ်ရင် တႃသူႉတွင်း။47မိူဝ်းၽရီႇၿူရ်းထရူးၼေး ႁိူဝ်းတပႄးၸဝ်ၵိူဝ်ႇၵေႃဝႃလွတ်ဝ်းတႃးတိူၼ်ၶိၼ်းဢူမ်း ၸဝ်ၵေႃၼႆၼႄႇမိူဝ်ႇတႄႉ ႁရ်ၵိူလ်ပုၵ်း။48မိူဝ်းၸဝ်ၼႆဢွလ်းတပႄးၸဝ်ၽႆၢးႁိူဝ်းလေႃးၵုရ်းၺၢပ်းယႆၼေး မိူဝ်းၽရီႇဝႃငႃးဢၢသ်း ၸဝ်ၵေႃၼႆၼဝရ်ထရူးႁရ်ၵိူလ်ဢူမ်း ၼဝရ်ထရူးဢႄးတႃးႁိူဝ်းတပႄးၸဝ်ၵိူဝ်ႇ ဝႃငႃးပူၼ်လၼ်မိူဝ်ႇၵိူဝ်ႇ။49မိူဝ်းတပႄးၸဝ်ၵိူဝ်ႇဢွလ်းၸဝ်ယေသုၼဝရ်မိူဝ်ႇႁရ်ၵူလ်ဢူမ်းၼေး ၵိူဝ်ႇၼႆထၢင်ၼႄႇၽရႄႇ ၼႆရၢၵ်ႇၵယႅၵ်ႉမိူဝ်ႇ။50ၵွပ်တပႄးၸဝ်တၢင်ႁိူင်းၼႆꧣူဝ်းမိူဝ်ႇ ၸဝ်ၼႆတႃးတပႄးၵိူဝ်ႇၼႆၢၵမ်းလဵဝ် “တိူမ်ၽရွမ်မၢင်ၽွမ်းသရႆၢးဢႄး။ ၼႄႇဢူဝ်ႉဢိူဝ်။ ယႃꧣူဝ်းၼႆး” တႃးသိူၼ်းၼီ။51ဝႆၢးတီးၸဝ်ၵေႃၼႆရေႃဢႄးတႃႁိူဝ်းတႃးတီတပႄးၵိူဝ်ႇၼႄႇၼေး ၽရီႇၵုရ်းၵေႃ ပေႃၼိမ်လၼ်။ တပႄးၸဝ်ၵိူဝ်ႇၼေးၵေႃ တူမ်ၽရွမ်ဢၢမ်းလၼ်ယႆမိူဝ်ႇ။52ၵွပ်ႇၼႄႇၵိူဝ်ဢွလ်းမိူဝ်ႇ လွင်ဢၢမ်းဢၼ်ၸဝ်ၸီႇ ဢၼ်ၵဵဝ်ႇၵပ်းတင်ၶဝ်မုၼ်ၼေးၵေႃ ၵေးတႃး ၵိူဝ်ႇၵေႃၼမ်ပွင်းၽွမ်းၼႄႇတၼ်းၶူဝ်းၸဝ်ပိူလ်ပေႃတိူရ်ၼႄႉ။ ၵွပ်ႇၵိူဝ်ႇၵိင်းၵလၢၵ်းယႆတႃယုမ်ယမ်ၸဝ်။53ဝႆၢးတီး ၸဝ်တင်တပႄးၸဝ်ၵိူဝ်ႇၵေႃၼႆꧣတ်းပူၼ်လၼ်ပၢင်းဢူမ်းသိူဝ်ပလၢၵ်း ၼႆလွတ်ဝ်းထရူး ဝႅယ်ၵၼေတရတ်ႉ ၵိူဝ်ႇၵေႃၼႆ ၶယႃးမိူဝ်ႇႁိူဝ်းတႃးပၢင်းဢူမ်း။54မိူဝ်းၵိူဝ်ႇၸုရ်ထရူးထင်းႁိူဝ်းၵေႃ ဢီႉတၢင်ႁိူင်းၵိူဝ်ႇၼႆတွင်ၸဝ်ၵမ်းလဵဝ်။55ၵွပ်ႇသိူၼ်းတီးဢီႉတၵိူဝ်ႇၵေႃၼႆသိူၵ်ႇၼႅတ်ႇၶႃးလဝ်ဢီႉပေႃးၸိရ်းလွင်ၸဝ်ၼႄႇႁေးၼေး။ ဝႆၢးတီးၼႆလေႇတၢင်းထရူးဢီႉဢၼ်ၼမ်မူဝ်ႇရၵ်ႇၵိူဝ်ႇႁရ်ၵူလ်တၼ်းသိူဝ်းတႃးၸဝ်ၼႄႇၼေး။56ဢီႉတႃးဝႅယ်၊ ၽရူႉတီၸဝ်ၸွလၼ်ၼေး ၵိူဝ်ႇၼႆလေႇဢီႉၼမ်မူဝ်ႇရၵ်ႇၵိူဝ်ႇ တမ်မူၵ်ႇတႃးၵၢတ်းတီဢီႉႁိူင်း ၼႆႁႅယ်းဢၶႂၢင်း တႃထုၺ်ႁႃးꧣုတ်းၶရွၸဝ်။ ဢီႉၼမ်မူဝ်ႇရၵ်ႇဢၼ်ၿၼ်း ထုၺ်ၸဝ်ၵိူဝ်ႇၵေႃ ရေႃးၵႃၿိလ်းလၼ်ၵမ်းလဵဝ်။
Empower Asia Bible Translation Movement