Mark5
1မိူဝ်းတီး ၸဝ်ယေသုတင်တပႄးၸဝ်ၵေႃၼႆလူဝ်လၼ်ဢူမ်းၵႃလိလႄး ၼႆလွတ်ဝ်းလၼ်တႃးၵလိူင်းတီဢီႉၵႃရသၵိူဝ်ႇမူဝ်ႇၼေး။2မိူဝ်းၸဝ်ၸုရ်ထင်းႁိူဝ်းၼေး ဢီႉႁွၵ်ႉဢၼ်ၽရႄႇၼမ်ရၵ်ႇၵုတ်ႇၼေး ၼႆလႄထရူးထင်းပူရ်လႃႇပူၼ်လူ လႄထရူးရပ်ႇၸဝ်။3ဢီႉဢၼ်ဢေးၼႆမူဝ်ႇတႃးပူရ်လႃႇပူၼ်လူ ယႅလ်းလေႇၼဝရ်ႁိရ်းတုၵ်းမူၵ်ႇဢိူၼ်းၵေႃၼမ်ပႄ။4ဢီႉတၢင်ႁိူဝ်းလေႇ ႁိရ်းတုၵ်ႉၸွင် တင်ၼဝရ်ႁိရ်းတုၵ်းမူၵ်ႇဢူၼ်းၵေႃ ဢိူၼ်းၼီ တိူၵ်ႇတိူၵ်းၸွၵ်ႇၼဝရ်းႁိရ်းၵိူဝ်ႇၼေးပဵၼ်းပွတ်းပွတ်း ယႅလ်းၵေႃၼမ်ၸၢင်တုၵ်ႉမူၵ်ဢိူၼ်းၵွပ်ႇဢိူၼ်းၶရင်။5ဢီႉဢၼ်ဢေးၼႆပၼ်ပၼ်ပႄပႄသွပ်းမိူဝ်ႇရိမ်ပူၼ်လူတင်ႁရ်ၵိူလ်ရင် ရေႃႉရၢၵ်ႇမိူဝ်ႇ ၼႆၵႆလေႇတင်သိူဝ်မူဝ်ႇပႆၢယ်ႉ သႅတ်းထိူဝ်းၼႅလ်တႄႉ။6မိူဝ်းဢိူၼ်းဢွလ်းၸဝ်ထင်းသိူဝ်ႇငၢႆၼေး ဢိူၼ်းၵေႃ ၼႆရိူၵ်ႇထရူးဢႄးတႃးၸဝ် ၵတေးထွၵ်ႇၵိင်းသင်းတႄႉသိူၼ်တႆၢလ်ၸဝ်။7မိူဝ်းတီးဢိူၼ်းၼႆတႃးၸဝ်ၼႆၢ “ၸဝ်ယေသုၵွၼ်ဝ်းၽြႃးၸဝ်ဢၼ်မျၢတ်ႇတူၵ်ႇႁႆၢႉ၊ ၸဝ်ငႃးၸီႇႁလ်းဢူဝ်ႉ။ ဢူဝ်ႉၶႃတိူင်ပၢၼ်လွတ်ဝ်းၽြႃးၸဝ် ယႃၸီႇႁလ်းဢူဝ်ႉၼႆးဢူဝ်ႉၶႃတွင်ပၢၼ်” ရၢၵ်ႇရေႃႉတႃးသိူၼ်းတီး။8ၵွပ်ႇၼႄႇၸဝ်ယေသုတႃးဢိူၼ်းၼႆၢ “ၽရႄႇၼမ်ရၵ်ႇတီး၊ လႄလၼ်ထင်းဢီႉဢၼ်တီးဢႄး” ဢိူၼ်းၵေႃၼႆၿၼ်းတွင်းပၼ်သိူၼ်းတီး။9ၸဝ်ၼႆတႃးဢိူၼ်းၼႆၢ “မုသ်မိတႃးသိူၼ်းၼႄႉ” ၽရႄႇၼမ်ရၵ်ႇၵေႃၼႆတႃး “မုသ်ဢူဝ်ႉၶႃတႃးလေၵၢဝ် ဢေႃ။ ၼႄႇၵွပ်ႇ တႃးတူဝ်းဢီႉဢၼ်ၼီ မၢင်ဢေႉၽရႄႈၼမ်ရၵ်ႇတၢင်ႁိူင်း” လဝ်တႃးၸဝ်သိူၼ်းတီး။10ဝႆၢးတီး ဢိူၼ်းၵေႃတွင်းပၢၼ်ၸဝ် တႃဢႄးယႃလွမ်လၼ်သိူဝ်ငႆၢထင်းႁၼီးၼႆးထပ်းထပ်း။11မိူဝ်းတီးၼႆမၢင်လဵၵ်ႇသိူဝ်ၸုမ်းဢၼ် သွမ်းမိူဝ်ႇၿိူၼ်း တႃးႁရ်ၵိူလ်ရင်ရိမ်ႁေး။12ၽရႄႇၼမ်ရၵ်ႇၼေးၼႆꧣႃးၸဝ်ၼႆၢ “ၶႅၼ်းတေႃဢႄးဢၶႂၢင်းဢႄးဢေႉၵုတ်တႃးၸုမ်းလဵၵ်ႇၵိူဝ်ႇဢေး” တွင်းပၢၼ်ၸဝ်တႃးသိူၼ်းတီး။13ၵွပ်ႇသိူၼ်းတီး ၸဝ်ၵေႃၼႆဢႄးဢၶွင်းဢိူၼ်းၵုတ် ၽရႄႇၼမ်ရၵ်ႇၵိူဝ်ႇၼေးၵေႃၼႆလႄထင်းဢီႉၼေး လၼ်ၵုတ်ႇတႃးၸုမ်းလဵၵ်ႇ။ မိူဝ်းတီးၸုမ်းလဵၵ်ႇဢၼ်ၼႄႇဢရၢပ်ႇလဵၵ်ႇဢရ်းရဵင်းၼေး တူမ်ၽရွမ်ရိူၵ်ႉရိူၵ်ႇၸုရ်ထင်းလၢရ် ၵလႄးယႅမ်သပ်တႃးဢူမ်းၼေး။14မိူဝ်းဢီႉꧣမ်းလဵၵ်ႇၵိူဝ်ႇၼေးဢွလ်းသိူၼ်းတီး ၵိူဝ်ႇၵေႃၼႆရိူၵ်ႇလႄလၼ် လဝ်ဢီႉသွပ်းတႃးဝႅယ်တင် ဢၼ်ၼႄႇရိမ်ႁေးလႄႈ ဢီႉၵိူဝ်ႇၵေႃၼႆတူမ်ၽရွမ်လႄꧣွမ်း။15မိူဝ်းၵိူဝ်ႇလွတ်ဝ်ႉထရူးတႃးၸဝ်ယေသု ၼႆဢွလ်းဢီႉဢၼ်ၺႃးၽရႄႇၼမ်ရၵ်ႇတၢင်ႁိူင်းၵုတ်ႇၼေး ၵိူပ်ႇမိူဝ်ႇသၵႅင်ၵတေးမိူဝ်ႇ ꧣူၺ်းဢီႉရၵ်ႇ ၵိူဝ်ႇၵေႃၼႆတိူမ်ၽရွမ်ꧣူဝ်းမိူဝ်ႇ။16ဢီႉဢၼ်ဢွလ်းလွင်တၢင်းၽရႄႇၼမ်ရၵ်ႇတင်ၸုမ်းလဵၵ်ႇၵိူဝ်ႇၼေးၼႄႇၼေး ၵိူဝ်ႇၵေႃ ၼႆၶရႆလဝ်ၼႅလ်မိူဝ်ႇဢီႉၵိူၼ်ဢေး။17မိူဝ်းတီး ဢီႉတၢင်ႁိူဝ်းၼႆတူမ်ၽရွမ်တွင်းပၢၼ် ဢႄးၸဝ်လႄလၼ်ထင်းဢိူင်ၵိူဝ်ႇ။18မိူဝ်းၸဝ်ၼႆရေႃလၼ်ၼႅလ်တႁိူဝ်းၼေး ဢီႉဢၼ်ၺႃးၽရႄႇၼမ်ရၵ်ႇၵုတ်ထဝေႃႉၼေး ၼႆႁႅယ်းဢၶႂၢင်းလၼ်သွပ်းၸဝ်။19ၵေးတႃးၸဝ်ၼမ်ဢႄးဢိူၼ်းလၼ်သွပ်း ၼႆတႃးဢိူၼ်းၼႆၢ “ဝဵင်ဢႄးတႃးၵၢင်ပေႉ ဝဵင်လဝ်ဢီႉၵၢင်မီႇ လွင်ဢၼ်ၽြႃးၸဝ်ၸီႇဢႄးမီႇသိူၼ်းၼႄႉ တင်လွင်ဢၼ်ၽြႃးၸဝ်မူၵ်ႇမဵတ်ႉတႃၵရုၼႃတေႃးမီႇသိူၼ်းၼႄႉၼေး” တႃးသိူၼ်းၼီ။20ၵွပ်ႇသိူၼ်းတီးဢီႉဢၼ်ဢေးၵေႃၼႆဝႅယ်ဢႄးဢိူင်တီၵၢင်ဢိူၼ်းၼႄႇၼေး။ ဝႆၢးတီး ၵွပ်ႇဢိူၼ်းၼႆၶႃးၶရႆလဝ်ဢၼ်ၸဝ်ယေသုၸီႇၼေးၼ်ႂးၵလိူင်းတေၵႃပေႃးလိ ပေႃၸိရ်း ဢီႉတၢင်ႁိူင်းၵေႃတိူမ်ၽရွမ်ဢၢမ်းမိူဝ်ႇၸဝ်ယေသု။21တင်ထႅင်း ၸဝ်ယေသုတင်တပႄးၵေႃ ၼႆလေႇႁိူဝ်းလူဝ်ဝဵင်လၼ်ၼႅလ်ဢူမ်းၵႃလိလႄးသိူဝ်ပလၢၵ်း။ မိူဝ်းလွတ်ဝ်းႁေး ၼႆၼႄႇမိူဝ်ႇတႃးပၢင်းဢူမ်းၼေး ဢီႉတၢင်ႁိူင်းၵိူဝ်ႇၵေႃၼႆတိူမ်ၽရွမ်တိူရ်ၸူႉထရူးၸူၸဝ်။22မိူဝ်းတီးဢီႉႁွၵ်ႉဢၼ်ၼႄႇဢီႉပိူဝ်ၸရွပ်ႇမုသ်တႃး ယႃႇဢိရုၼေးၼႆလွတ်ဝ်းထရူး မိူဝ်းဢိူၼ်းဢွလ်းၸဝ် ၼႆလၼ်တွင်းပၼ်ထွၵ်ႇၵိင်းသင်း တႃးရိမ်ၸွင်ၸဝ်။23ဝႆၢးတီး ၼႆတႃးၸဝ်ၼႆၢ “ၵွၼ်ဝ်းၵိူၼ်ၺႃႇဢူဝ်ႉၼမ်မူဝ်ႇရၵ်ႇ ဝႃငႃးယႅမ်။ တႃဢႄးဢိူၼ်း ၿိလ်းၼႆသိုပ်းမၢင်ထႅင်းဢသၢၵ်ႇၼေး ၶႅၼ်းတေႃၸွထရူးတႃးၵၢင်ဢူဝ်ႉ လေႇတိတၢင်သပ်းႁရ်ၵူလ်တူဝ်းဢိူၼ်း” ႁႅယ်းၸ်ႂၸဝ်တႃး သိူၼ်းတီးထပ်းထပ်းႁိူင်းလႄႉ။24ဝႆၢးတီး ၸဝ်ယေသုတင်တပႄးၵိူဝ်ႇၵေႃၼႆ လၼ်သွပ်းဢၼ်ယႃၵုရု။ ဢီႉတၢင်းႁိူင်းၵေႃၼႆပႃထရူးသွပ်းၸဝ် ၼႆထႅင်းထုၺ်ၿွမ်းမိူဝ်ႇၸဝ်။25ၼ်ႂးဢီႉႁိူင်းၼေး ၼႆမၢင်ၵိူၼ်ၺႃႇႁွၵ်ႉဢၼ်ပဵၼ်းရေႃးၵႃၼၢမ်းထွၵ်းတႃသိူဝ်ၵွလ်းဢရ်းဝိတ်ႈ။26ၵိူၼ်ၺႃႇဢၼ်ဢေးၼႆၿၼ်းၶၢမ်ယႆဝေႇတၼႃ ရေႃးၵႃၼေး ၶႃးသိူၵ်ႇၼိူမ်သွပ်းသြႃဝုၼ်ၵိူဝ်ႇ ၶူဝ်းၶွင်ငိုၼ်းၶမ်းပေႃႁႆၢႉၵေႃ ရေႃးၵႃဢိူၼ်းၼမ်ၿိလ်းသေၼမ်ၵႃး ၼႆယဵင်ၼႃထရူးထႅင်းတိၵ်ႉတိၵ်ႉ။27ၵွပ်ဢိူၼ်းငရ်းလွင်ၶၢဝ်လွင်ဢၢမ်းဢၼ်ၸဝ်ၸီႇၵိူဝ်ႇၼေး ဢိူၼ်းၼႆထရူးသွပ်းတႃးပွတ်းၸဝ်ၽရသ်ၽရသ် ထုၺ်သပ်းၶရွၸဝ်ၼႆၢ။28ၵွပ်ႇၼႄႇဢိူၼ်းၸၵူးꧣႃး “ပွၵ်ႇထုၺ်ၶရွသၵႅင်ၸဝ်ႁႃးၵေႃ ရေႃးၵႃဢူဝ်ႉငႃးၿိလ်း” ၸၵူးꧣႃးသိူၼ်းၼီ။29မိူဝ်းဢိူၼ်းထုၺ်သပ်ႉၶရွၸဝ်ၼႆၢၼေးၵေႃ ဢိူၼ်းၼႆမသ်ငရ်းရေႃးၵႃၼၢမ်းထွၵ်းတႃးတူဝ်းတႄႉၼေး ၵိုတ်ႉလၼ်ၼႆၿိလ်းလၼ်ၵမ်းလဵဝ်။30မိူဝ်းတီးၸဝ်ၵေႃၼႆမသ်ၵမ်းလဵဝ်တၼ်းၶူဝ်းတႄႉလႄလၼ်ထင်းတူဝ်း ဢိူၼ်းၼႆဝႆၢးထရူးဢႄးႁရ်ဢီႉႁိူင်းၼႆꧣႃး “ယႅလ်းထုၺ်ၶရွဢူဝ်ႉ” မႆၢၺ်းတႃးသိူၼ်းၼီ။31တပႄးၸဝ်ၵိူဝ်ႇၵေႃၼႆတႃး “ၸဝ်ဢွလ်းမိူဝ်ႇဢီႉႁိူင်းယႆပေႃဝိတ်ႇဝိတ်ႇၵေႃ ၸဝ်ၸိင်းၼႆမႆယ်းတႃး ‘ယႅလ်းထုၺ်ဢူဝ်ႉ’” တႃးသိူၼ်းၼီ။32ၵေးꧣႃး ၸဝ်ယေသုၵေႃၼႆသိူင်းၶႃႉမိူဝ်ႇဢီႉဢၼ်ထုၺ်ဢိူၼ်း။33ဝႆၢးတီးၵိူၼ်ၺႃႇဢၼ်ဢေးၵေႃၼႆꧣူဝ်းမိူဝ်ႇ ၵွပ်မသ်မိူဝ်ႇတႃးတူဝ်းတႄႉၼႄႇသိူၼ်းၼႄႉ ဢိူၼ်းၼႆၵတေးထွၵ်ႇၵိင်းသင်းသိူၼ်တၢလ်းၸဝ် ၼႆလဝ်လွင်ဢၼ်တႄႉၸီႇတင် လွင်ဢၼ်ရေႃးၵႃတႄႉၿိလ်းသိူၼ်းၼႄႉၼေး။34မိူဝ်းတီးၸဝ်ၵေႃၼႆတႃးၵိူၼ်ၺႃႇဢၼ်ဢေးၼႆၢ “ၵိူၼ်ၺႃႇ လွင်ယုမ်ယမ်မီႇၼေးဝႃၸီႇဢႄးရေႃးၵႃမီႇၿိလ်း။ ၵွပ်ႇရေႃးၵႃမီႇၼေးၵေႃဝႃမိလ်း မီႇဝႃလၼ်တင်ၵတ်းငင်ၵေႃပွၼ်း” တႃးသိူၼ်းတီး။35မိူဝ်းၸဝ်ၼင်ꧣႃးမိူဝ်ႇသိူၼ်းတီး ဢီႉရၵႃထင်းၵၢင်ယႃဢိရုဢၼ်ၼႄႇဢီႉပိူဝ်ၸရွပ်ႇၼေးၼႆထရူးလဝ် ယႃဢိရုတႃး “ၵွၼ်ဝ်းၵိူၼ်ၺႃႇမီႇဝႃယႅမ်ဢိူဝ်၊ ယႃၼင်လၼ်သွပ်းၸဝ်ၼႆဢႄး” တႃးသိူၼ်းၼီ။36ၵေးꧣႃး ၸဝ်ၵေႃၼမ်သူၼ်ဢၼ်ၵိူဝ်ႇꧣႃးၼေး ၼႆတႃး ယႃဢိရုဢီႉပိူဝ်ၸရွပ်ႇၼႆၢ “ယႃၵွႆႉၽွမ်းၼႆး၊ မၢင်လွင်ယုမ်ယမ်ႁႃးဢႄး” တႃးသိူၼ်းၼီ။37ၸဝ်ၵေႃ လိူဝ်းသေ ပေတရု၊ ယႃၵူပ်ႈ တင်တေႃႇဢိူၼ်း ယေႃးႁၢၼ်ၼေး ၼမ်ဢႄးယႅလ်းလၼ်သွပ်းတႃးပွတ်းဢိူၼ်း။38မိူဝ်းၵိူဝ်ႇလွတ်ဝ်းတႃးၵၢင်ယႃဢိရုဢီႉပိူဝ်ၸရွပ်ႇ ၼႆဢွလ်း ဢီႉတၢင်းႁိူင်းၵိူဝ်ႇရၢၵ်ႇယၢမ်ပေႃသုၵ်ႇသၵ်ႇမိူဝ်ႇ။39ၸဝ်ၵေႃၼႆၵုတ်လၼ်ဢႄးတႃးၵိူၼ်တိၵၢင် ၼႆတႃးၵိူဝ်ႇၼႆၢ “ၵွပ်ႇသိူၼ်းၼႄႉပေႉၼႆယၢမ်မိူဝ်ႇပိူတ်လုတ်း။ ၵွၼ်းၵိူၼ်ၺႃႇဢၼ်တီးၼမ်ၸိူဝ်ဢိူၼ်းယႅမ် ၼႄႇဢိူၼ်းယႅတ်းႁႃးဢိူဝ်ႈ” တႃးသိူၼ်းၼီ။40ၵေးꧣႃး ဢီႉတၢင်ႁိူင်းၵေႃၼႆတိူမ်ၽရွမ်ၵိူဝ်ၺသ်မိူဝ်ႇၸဝ်။ မိူဝ်းတီး ၸဝ်ၼႆၸ်ႂဢီႉတၢင်ႁိူင်းလႄပၼွၵ် ၼႆရၢၵ်ႇလေႇမႃႇ၊ တင်ပႃးၵွၼ်းဢီႉ တင်တပႄးၸဝ်ၵိူဝ်ႇဢၼ်ပႃထရူးသွပ်းၼေး ၼႆၵုတ်ႇလၼ်တႃးတီၵွၼ်းၵိူၼ်ၺႃႇၼေးၼႄႇ။41ဝႆၢးတီး ၸဝ်ၼႆၵမ်းတီႉၵွၼ်းၵိူၼ်ၺႃႇၼေး ၼႆတႃး “တလိတၵုမိ” တႃးသိူၼ်းၼီ။ တီးပွင်းဢိူၼ်းၼေႇတႃး “ၵွၼ်းၵိူၼ်ၺႃႇ၊ ဢူဝ်ႉတႃးမီႇၼႆၢ ရွႆဢႄး” ၼႄႇသိူၼ်းၼီ။42မိူဝ်းၸဝ်တႃးသိူၼ်းတီး ၵွၼ်းၵိူၼ်ၺႃႇၼေးၵေႃ ရွႆထရူးၼဝရ်ၵမ်းလဵဝ်။ ဢသၢၵ်ႇၵွၼ်းၵိူၼ်ၺႃႇၼေး ၼႄႇဢရၢပ်ႇသိူဝ်ၵွလ်းဢၢရ်း။ ဢီႉတၢင်ႁိူင်းဢၼ်ၿၼ်းဢွလ်းၵိူဝ်ႇၵေႃတိူမ်ၽရွမ်ဢဢၢမ်းမိူဝ်ႇ။43ဝႆၢးၸဝ်ၼႆလဝ်ၵိူဝ်ႇ ဢႄးယႃလဝ်ယႅလ်းလွင်ၵူၼ်းၼီးၼႆး ၼႆၸ်ႂဢႄး လေႇဢႄး ၵွၼ်းၵိူၼ်ၺႃႇၼေးၼႆၢ ရူမ်သွမ်း။
Empower Asia Bible Translation Movement