Mark4
1တင်ထႅင်း ၸဝ်ယေသုၼႆႁေႃးသွၼ်းလဝ်ထႅင်းမိူဝ်ႇတႃးပၢင်းဢူမ်းၵႃလိလႄးၼေး။ ဢီႉပရိၵ်ႇသၢတ်ႇတၢင်ႁိူင်း ၼႆတိူရ်ၸူႉႁိူင်းထရူးတႃးၸဝ် ၸဝ်ၵေႃၼႆရေႃၵတေးတႃးႁိူဝ်းဢၼ်ၼႄႇတႃးပၢင်းဢူမ်းၼေး။ ဢီႉတၢင်ႁိူင်းၵေႃၼႆၵတေးမိူဝ်ႇတပၢင်းဢူမ်း။2မိူဝ်းတီးၸဝ်ၵေႃၼႆႁေႃးလဝ်တင်ဢုပမႃတၢင်ႁိူင်း။ ၸဝ်ၼႆႁေႃးသွၼ်းတႃး3“တူမ်ၽရွမ်တူၵ်ႇငရ်းဢႄး၊ သိူဝ်ႈသငိမၢင်ပုင်ၼႃးႁွၵ်ႉ လႄလၼ်ဢႄးတႃးၼႃ တႃပၵ်းပိူဝ်သိူမ်းၸိူဝ်။4မိူဝ်းဢိူၼ်းပၵ်းၸိူဝ်ၼေး ၸိူဝ်ရၵႃၼႆၵလႄးလၼ်တႃးပၢင်းရိူင်တဵင်း သိမ်းၵေႃတိူမ်ၽရွမ်ထရူးသိူတ်ႉသွၢမ်းၸွၵ်ႇ။5ၸိူဝ်ရၵႃၼႆၵလႄးလၼ်တႃးၵတေႉလႅရ်းဢၼ်မၢင်သမူဝ်ႇႁရ်ဢွၵ်း ၵွပ်ႇၵတေႉလႅရ်းယႆ တိူင်းၼႆယူဝ်ႇလႄထရူးယႆ။6ၵေးꧣႃး မိူဝ်းၽရီႉသရၢင်းထရူးၼေး ၵွပ်ႇရယႅသ်ႇဢိူၼ်းၼမ်တၵ်း တိူင်းဢိူၼ်းၵေႃၼႆႁွင်းလၼ်။7ၵွပ်ႇၸိူဝ်ရၵႃၼႆၵလႄးလၼ်တႃးပရ်လႃႇတိူင်းၶရႄႉ ၼႆပိူလ်ထရူးတိူၼ်ပိူဝ်တင်ၸိူဝ်ၵိူဝ်ႇၼေး ၼႆၵၼ်မူၵ်ႇၸွၵ်ႇတိူင်းၸိူဝ်ၵိူဝ်ႇၼေး တိူင်းပိူလ်ထရူးၵေႃ ၼမ်ၸၢင်ပလႄႉ။8ၸိူဝ်ရၵႃ ၼႆၵလႄးလၼ်တႃးတီၵတေႉရၵ်ၼေး တိူင်းၼႆလႄၼႆပလႄႉပေႃးႁိူင်းယႆ ၿွၼ်း ဝႆးၵွလ်းပုင်၊ တွလ်းၵွလ်းပုၼ်၊ သိူဝ်ပိူရ်ယႃပုၼ်ၵိူၼ်ၼီ” ၼႃးသိူၼ်းၼီ။9ဝႆၢးတီးၸဝ်ၼႆၼႃး “ဢီႉဢၼ်တိူၵ်ႇငရ်းၵိူဝ်ႇ တိူမ်ၽရွမ်ၸၵူးသိူင်းဢၼ်ပေႉငရ်းၵိူဝ်ႇၼေးတၢင်ႁႆၢႉဢႄး” တႃးသိူၼ်းၼီ။10မိူဝ်းၸဝ်ၼႄႇမိူဝ်ႇတႄႉၼေး တပႄးၸဝ်တင် ဢီႉယႅၵ်းဢၼ်ပႃထရူးသွပ်းၵိူဝ်ႇၼေး ၼႆမႆၺ်းၸဝ်ၼႆၢတီပွင်းဢုပမႃဢၼ်ဢေးၼေး။11ၸဝ်ၼႆတႃး “ၽြႃးၸဝ် ဝႃၸီႇဢႄးပေႉပွင်းၽွမ်း လွင်တႄဢၼ်ၵဵဝ်ႇၵပ်းတင်သႃသၼႃၽြႃးၸဝ် ဢၼ်ပေႉၼမ်ၿၼ်းမသ်မိူဝ်းၸႃႇၼေး။ ၵေးတႃး တႃဢီႉတၢင်ႁိူင်းဢၼ်ၼမ်ယုမ်ယမ်ဢူဝ်ႉၵိူဝ်ႇၼေးတႄ ဢူဝ်ႉလဝ်ဢႄးတင်ဢုပမႃ။12ၵွပ်ႇၼႄႇ ဝႃပဵၼ်းသွပ်းဢၼ်တႄဢၼ်တႅမ်းမူၵ်ႇတႃးလိၵ်ႇၵျၢမ်းဢၼ်တႃး ‘ဢွလ်းမိူဝ်ႈလွင်ဢၼ်ဢူဝ်ႉၸီႇၼေးၵေႃ ၼမ်ရၢမ်းၿွၼ်း။ ငရ်းမိူဝ်ႈဢၼ်ဢူဝ်ႉႁေႃးၼေးၵေႃ ၼမ်ပွင်းၽွမ်း’ ဢၼ်ꧣႃးၼေး။ ပွၵ်ႈၼမ်ၸိူဝ်သိူၼ်းတီး ၵိူဝ်ႇငႃးပွင်းၽွမ်း ၼႆဝႆၢးၼႅလ်ႁရ်ၽြႃးၸဝ် ၼႆငႃးၿွၼ်းလွင်ပလွႆးၶႂၢင်း” ꧣႃးသိူၼ်းၼီ။13ဝႆၢးတီး ၸဝ်ၼႆသိုပ်းတႃးထႅင်း “ပေႉၼမ်ပွင်းႁႃးဢၼ် လွင်ဢုပမႃဢၼ်ၼီ။ ပွၵ်ႈသိူၼ်းၼီ ပေႉငႃးပွင်းၽွမ်းလွင်ဢုပမႃသိူၼ်းၼႄႉ။14ပုင်ꧣႃးဢၼ်ပၵ်းၸိူဝ်ၼေး တိူၼ်းတူဝ်းဢီႉဢၼ်ႁေႃးၶၢဝ်မင်ၵလႃၽြႃးၸဝ်။15ဢီႉရၵႃၼႆꧣူၺ်းၸိူဝ် ဢၼ်ၵလႄးလၼ်တႃးပၢင်းရိူင်တဵင်းၼေး။ မိူဝ်းၵိူဝ်ႇငရ်းရဢူၺ်းၽြႃးၸဝ်ၼေး မႃၼၢတ်ႇၼႆထရူးၸီႇဢႄးၵိူဝ်ႈမိလ်းမိလ်းၵမ်းလဵဝ်။16ဢီႉရၵႃၼႆတူၺ်း ၸိူဝ်ဢၼ်ၵလႄးလၼ်တႃးၵတေႉဢၼ်မၢင်သမူဝ်ႇႁရ်ဢွၵ်းၼေး။ မိူဝ်းၵိူဝ်ႇငရ်းတြႃးၽြႃးၸဝ် ၼႆၵႆပျေႃဢိူမ်းယုမ်ယမ်ၵမ်းလဵဝ်။17ၵေးတႃး ၵွပ်ႇတြႃးၽြႃးၸဝ် ရယႅသ်ႇၼမ်ၵုတ်ႇတၵ်းတႃးၽွမ်းၵိူဝ်ႈ ၵိူဝ်ႇၼႆၼမ်ယုမ်ယမ်ၸၼေႃႇ။ မိူဝ်းၺႃးတုၵ်ႉၶႃႉ၊ ၺႃးတုၵ်းတေးၼေး ၵိူဝ်ႇၼႆၿိလ်းၿိလ်းၸွၵ်ႇတြႃးၽြႃးၸဝ်ၵမ်းလဵဝ်။18ဢီႉရၵႃၼႆတူၺ်း ၸိူဝ်ဢၼ်ၵလႄးလၼ်တႃးပိူရ်လႃႇတိူင်းရူၶရႄႉၼေး။ ၵိူဝ်ႇငရ်းမိူဝ်ႇတြႃးၸဝ်ၵေႃ19ၸၵူးၽွမ်းၵွႆယ်ႉတႃးၽဝႃႉတႄႉ၊ ၽွမ်းတၵ်းသွပ်းရီးရႃႉဢုၵ်းၸႃတႄႉတင် လွင်ၽွမ်းသုၼ်းၿွၼ်းသုၼ်းလေႇၵိူဝ်ႇ ၼႆၸီဢႄးသုၵ်ႇသၵ်ႇၶၢဝ်မင်ၵလႃၽြႃးၸဝ် ၼႆၵၼ်ဢႄးၵိူဝ်ႇယႃၸၢင်ၸီႇသွပ်းဢၼ်ၽြႃးၸဝ်မၢင်ဢလူဝ်ၼေး။20ဢီႉရၵႃၼႆꧣူၺ်းၸိူဝ်ဢၼ်ၵလႄးလၼ်တႃးတီၵတေႉရၵ်ႇ မိူဝ်းၵိူဝ်ႈငရ်းတြႃးၽြႃးၸဝ် ၵိူဝ်ၼႆယုမ်ယမ်ၸီႇသွပ်း ဢၼ်ၽြႃးၸဝ်မၢင်ဢလူဝ် ၼႆပဵၼ်းထရူးသိူၼ်း တိူင်းဢၼ်ပလႄႉ ၼႆၿွၼ်း ဝႆးၵွလ်းပုင်၊ တွလ်းၵွလ်းပုၼ်၊ သိူဝ်ပိူရ်ယႃပုၼ်” သပ်ႉလႅင်းလဝ်သိူၼ်ၼီ။21ဝႆၢးတီးၸဝ်ၵေႃၼႆ ႁေႃးလဝ်ထႅင်းတင်ဢုပမႃ “ပေႉၼီ ၼမ်လေႇငလ်ငွႆးၵုတ်ႇထရူးတႃးၵၢင်ၼႆမူၵ်ႇ ႁရ်ဢွၵ်းၵပုၵ်ႇသေၼမ်ꧣႃး၊ တင်ႁရ်ဢွပ်းၵူ။ ၽိူဝ်းဢၼ်တီး တႃးဢီႉၵဵယ်းဢီႉၿွၼ်းဢၢသ်းၼေး ၿၼ်းႁၵ်ႉမူၵ်ႇတႃးလၵ်းငလ်ႁႃး ၼမ်ၸိူဝ်။22ၵွပ်ႇၼႄႇ လွင်သိူင်ႇသိမ်းၵေႃ လွင်ဢၼ်ဢုမ်းမူၵ်ႇတၢင်ႁႆၢႉၵိူဝ်ႇၼေးၵေႃ ဢီႉငႃးမသ်ႁႆၢႉ။ ဢၼ်ၸီႇသိူင်ႇသိမ်းဢၼ်ၼီၵေႃ ဢီႉတၢင်ႁိူင်းၵေႃငႃးမသ်ႁႆၢႉ။23ဢီႉဢၼ်တိူၵ်ႇငရ်းၵိူဝ်ႇ တိူမ်ၽရွမ်ၸၵူးသိူင်းဢၼ်ပေႉငရ်းၵိူဝ်ႇၼေးတၢင်ႁႆၢႉဢႄး” ꧣႃးသိူၼ်းၼီ။24ဝႆၢးတီး ၸဝ်ယေသုၼႆသိုပ်းꧣႃး “တိူမ်ၽရွမ်ၸၵူးသိူင်းဢၼ်ပေႉငရ်းၵိူဝ်ႇၼေးတၢင်ႁႆၢႉဢႄး။ ပေႉငႃးၿွၼ်းၼႅလ်သိူၼ်းဢၼ်ပေႉဢႄးဢီႉၼႆၢၼေး။ ငႃးၿွၼ်းလိူဝ်းတင်တွၵ်းꧣီး။25ယႅလ်းသေၼမ်ꧣႃးဢီႉဢၼ်သုၼ်းပွင်းၽွမ်းဢၼ်ဢူဝ်ႉႁေႃးသွၼ်းၵိူဝ်ႇၼေး ၽြႃးၸဝ် ငႃးၸီႇဢႄးၵိူဝ်ႇပွင်းၽွမ်းလိူဝ်း။ ယႅလ်းသေၼမ်ꧣႃးဢီႉဢၼ်ၼမ်သုၼ်းပွင်းၽွမ်းဢၼ်ဢူဝ်ႉႁေႃးသွၼ်းၵိူဝ်ႇၼေး ၽြႃးၸဝ်ငႃးသိမ်းလေႇၼႅလ်တင် လွင်တၢင်ႁႆၢႉဢၼ်ၵိူဝ်ႇမသ်မူဝ်ႇၵိူဝ်ႇၼေး ထင်းၵိူဝ်ႇ” တႃးသိူၼ်းၼီ။26ၸဝ်ၼႆလဝ်တႃးထႅင်း “သႃသၼႃၽြႃးၸဝ်ၼီ ꧣူၺ်းဢီႉႁွၵ်ႉ ဢၼ်ပလွႆးသပ်ႉၸိူဝ်တႃးၵတေႉၼေး။27ဝႆၢးပၵ်းၸိူဝ် ဢိူၼ်းၵေႃၼႆယႅတ်းရွႆသိူၼ်းၵဵယ်းသငိၼေးသေတႃႉ တိူင်းသမၢလ်းၵိူဝ်ႇ ၼႆလႄပိူလ်ထရူး။ ၵေးꧣႃး ဢိူၼ်းၼမ်မသ်ၼႄႇ တိူင်းဢၼ်ဢေးလႄပိူလ်ထရူးသိူၼ်းၼႄႉ။28ၵတေႉၼႆၸီႇဢႄး တိူင်းၵိူဝ်ႇၼေးပိူလ်ထရူး။ ၼႆလႄထရူးဢႆၢႉတိူင်း ၼႆလႄထရူးၵိူဝ်ႇၵၢၵ်း ၼႆပဵၼ်းထရူးပလႄႉသမၢလ် ထင်းၵၢၵ်းဢေး။29မိူဝ်းပလႄႉၵေႃၼႆသိၼ်းထရူးၼႆလွတ်ဝ်းထရူးဢၶိင်ဝဵယ်ႇၼေး ပုင်ꧣႃးၵေႃၼႆလွတ်ဝ်းထရူးၵမ်းလဵဝ် ၼႆလေႇတိူၼ်ၸၢၼ်ဝဵယ်ႇမူၵ်ႇ” ꧣႃးသိူၼ်းၼီ။30ဝႆၢးတီးၽြႃးၸဝ်ၼႆတႃးထႅင်း “ဢူဝ်ႉငႃးၿၼ်းတႅၵ်ႇလဝ် သႃသၼႃၽြႃးၸဝ် ၼႆၢႁလ်း၊ ၼမ်ၸိူဝ်ၵေႃ ဢုပမႃႁလ်း။31သႃသၼႃၽြႃးၸဝ်ၼီ ꧣူၺ်း ၸိူဝ်တငႅရ်။ ၸိူဝ်ဢိူၼ်းၵိူၼ်ၼႅယ်ႉတွၵ်းၸိူဝ်တၢင်ႁႆၢႉၼႂ်းၸိူဝ်ဢၼ်ပသိူမ်းတႃးၵတေႉ။32မိူဝ်းတိူင်းပိူလ်ထရူးၼေး တိူင်းဢိူၼ်းၼႆပိူလ်တွၵ်း တိူင်းရၵႃဢၼ်ၼႄႇတႃးဢုယဵၼ်ႇၵိူဝ်ႇ ၵၢၵ်းဢိူၼ်းၵေႃႁၼ်းထရူး။ သိမ်းၵိူဝ်ႇၵေႃ ပေႃၸၢင်ၸီႇသပ်းၿွၼ်းႁၢၼ်း ၼႆၽရိူမ်းတႃးၵၢၵ်ႉဢိူၼ်း” ꧣႃးသိူၼ်းၼီ။33ၸဝ်ၼႆႁေႃးလဝ်ၵိူဝ်ႇၼႆၢ ၼုၵ်ႇၵပၢတ်ႇၽြႃးၸဝ် တင်ဢုပမႃသိူၼ်းတီးတၢင်ႁိူင်း ဢၼ်ဢီႉတင်ႁိူင်းၸၢင်ပွင်းၽွမ်း။34ၸဝ်ၼႆႁေႃးလဝ်ဢႄးဢီႉတၢင်ႁိူင်းၼႆၢတင်ဢုပမႃႁႃး။ ၵေးတႃး ၼႆႁေႃးသပ်ႉလႅင်းလဝ်ၶေႃး တႃတပႄးၸဝ်ၵိူဝ်ႇ မိူဝ်းၼႄႇၶေႃးၼေး။35မိူဝ်း လွတ်ဝ်းထရူးၿူရ်းဢၼ်တီး ၸဝ်ၼႆတႃးတပႄးဢူၼ်းၵိူဝ်ႇၼႆၢ “ဢေႉတိူမ်ၽရွမ်လူဝ်လၼ်ဢႄးပၢင်းႁရ်ဢေး” တႃးသိူၼ်းၼီ။36ၵွပ်ႇသိူၼ်းတီး တပႄးၵိူဝ်ႇ ၼႆပလွႆမူၵ်ႇဢီႉတင်ႁိူင်း ရေႃလၼ်တႃးႁိူဝ်းဢၼ်ၸဝ်ၵꧣေးၼေး ၼႆရၢၵ်ႇလၼ်ၸဝ်။ ဢီႉတၢင်ႁိူင်းၵေႃၼႆလေႇႁိူဝ်းတၢင်ႁိူဝ်း လၼ်သွပ်းၸဝ်။37မိူဝ်းၵိူဝ်ႇၼင်လူဝ်လၼ်မိူဝ်ႇၼေး ၽရီႇၼႆၵုရ်းထရူး ဢူမ်းၵေႃၼႆၵိူမ်ၽွဝ်းသပ်းႁိူဝ်းၼႆၢ။ ႁိူဝ်းၵေႃၼႆၼိူၵ်ႇထရူးတင်ဢူမ်း ပေႃဝႃငႃးၵိတ်း။38မိူဝ်းတီး ၸဝ်ၵေႃၼႆယႅတ်းလငိူပ်ႇမိူဝ်ႇတႃးပၢင်းႁိူဝ်းပလၢၵ်ႇႁရ်ပွတ်ဝ်း။ တပႄးၸဝ်ၼႆပူၺ်ရွႆတႃးၸဝ်ၼႆၢ “ၸဝ်၊ ဢေႉဝႃငႃးယႅမ်ႁႆၢႉ ၸဝ်ၼမ်ငႃးသိူင်းဢႄးႁူဝ်ႉ” တႃးၸဝ်ၼႆၢသိူၼ်းၼီ။39ၸဝ်ၵေႃရွႆထရူးၼႆတႃး “ၼိမ်ဢႄး၊ ၵိုတ်ႉဢႄး” မိူဝ်းၸဝ်တႃးသိူၼ်းတီး ၽရီႇၵေႃၼမ်ၵုရ်းလႆး ဢူမ်းၼွင်းၵေႃၼိမ်လၼ်။40ဝႆၢးတီး ၸဝ်ၼႆတႃးတပႄးၸဝ်ၼႆၢ “ပေႉတိူမ်ၽရွမ်ၻူဝ်းမိူဝ်ႈၸီႇႁလ်း။ ၽတ်းတိူဝ်သတီးပေႉမၢတ်ႇမၢင်ႁူဝ်ႉလွင်ယုမ်ယမ်” တႃးသိူၼ်းၼီ။41ၵေးꧣႃးတပႄးၸဝ်ၵိူဝ်ႇၵေႃꧣူဝ်းတိူရ်ၸိူသ်မိူဝ်ႇ ၼႆတိူရ်တႃးၼႄႉၼႆၢ “ဢီႉဢၼ်ၼီးၼႄႇယႅလ်း။ ဢူမ်းတင်ၽရီႉၵေႃၿၼ်းတိူၵ်ႇငရ်းတင်ၶေႃသင်ဢိူၼ်း” တႃးသိူၼ်းတီး။
Empower Asia Bible Translation Movement