Mark15
1မိူဝ်းလွတ်ဝ်းထရူးတူၵ်ၶလိူပ်ႉၸဝ် ပရေႃးႁဵတ်းဢၼ်ပူလ်ၵိူဝ်ႇတင်၊ ဢီႉၸၢဝ်ၶိူဝ်းဢၼ်ပိူလ် တင်သြႃဢၼ်မေႃးၵျၢမ်းတင် ဢီႉၸုမ်းတႅပ်းတတ်ႉတြႃးၵိူဝ်ႇၼႆတူရ်တိူင်ပၢင်တႄႉ ၼႆတုၵ်းရၢၵ်ႇလၼ်ၸဝ်ယေသုဢႄးတႃးၶုၼ်းႁေႃးၶမ်းၶၢမ်ပိလၢတ်း တႃၸႅတ်ႇမႆယ်းဢိူၼ်း။2မိူဝ်းတီး ၶုၼ်းႁေႃးၶမ်းပိလၢတ်းၼႆတႃးၸဝ်ၼႆၢ “ၸဝ်ၼႄႇၶုၼ်းႁေႃးၶမ်းၸၢဝ်းၶိူဝ်းၸူးႁႃး” ၸဝ်ၵေႃၼႆတႃး “ၼႄႇသိူၼ်းဢၼ်ၸဝ်တႃးၼေး” တႃးၼႅလ်သိူၼ်းၼီ။3ပရေႃးႁဵတ်းဢၼ်ပိူလ်ၵိူဝ်ႇၵေႃ ၼႆတိူမ်ၽရွမ်ꧣႃးၸဝ်ယေသုၵဵယ်းမဵဝ်း။4တင်ထႅင်း ၶုၼ်းႁေႃးၶမ်းပိလၢတ်းၼႆတႃးၸဝ်ၼႆၢ “မီႇၼမ်ငႃးတႃးၼႅလ်ႁူဝ်ႉႁလ်း။ တိူၵ်ႇငရ်းဢႄးဢီႉတၢင်ႁိူင်းတႃးမီႇၼႆၢဢၼ်ၼမ်ၸိူဝ်ၼမ်တေႃးပေႃတိူရ်ၼႄႉ” တႃးသိူၼ်းၼီ။5ၵေးꧣႃး ၵွပ်ႇၸဝ်ယေသုၼႆၽရသ်မိူဝ်ႇၼမ်တႃးၼႅလ်ႁလ်း ၶုၼ်းႁေႃးၶမ်းပိလၢတ်းၵေႃၼႆဢၢမ်းယႆမိူဝ်ႇ။6ၶုၼ်းႁေႃးၶမ်းၶၢမ်ၵိူဝ်ႇၼီ ပွၵ်ဢီႉႁႅင်းဢႄးပလွႆဢီႉၵလႄးထွင်ႁွၵ်ႉ ဢိူၼ်းပလွႆဢႄးသေမိူဝ်ႇ ဢၶိင်ပွႆပသၶႃၼေးၵဵယ်းဝိတ်ႇ။7မိူဝ်းတီး ဢီႉႁွၵ်ႉ ဢၼ်မုသ်တႃးပႃႇရပၢတ်ႈ ဢၼ်ၵလႄးထွင် ၵွပ်ႇဢိူၼ်းပယႅမ်းဢီႉ မိူဝ်းၶိင်သၢၼ်ၶတ်းဢၸူဝ်းယႃႉယေႃးမ။8ဢီႉတၢင်ႁိူင်းၵေႃ ၼႆလွတ်ဝ်းထရူးၼႆႁႅင်းဢႄးပလွႆးဢီႉၵလႄးထွင်ႁွၵ်ႉ သိူၼ်းဢၼ်ၶုၼ်းပိလၢတ်းၵႆၸီႇၼေး။9ခုၼ်းႁေႃးၶမ်းပိလၢတ်းၼႆမႆၢယ်းတႃး “ႁႆပေႉတေႃႉဢႄးဢူဝ်ႉပလွႆးဢီႉဢၼ်တႃးၶုၼ်းႁေႃးၶမ်းဢီႉၸူးၼေး” တႃးသိူၼ်းၼီ။10ၵွပ်ႇၶုၼ်းပလၢတ်းမသ် ပရေႃးႁဵတ်းဢၼ်ပိူလ်ၵိူဝ်ႇ ၼမ်ၼႃလူဝ်သၵရ်ၸဝ်ၼႆၺွပ်းထရူးဢၢပ်းဢႄးတႃးဢိူၼ်း ဢိူၼ်းၼႆမႆၢယ်းတႃးသိူၼ်းတီး။11ၵေးꧣႃးပရေႃးႁဵတ်းဢၼ်ပိူလ်ၵိူဝ်ႇ ၼႆသေႃသူၼ်းဢႄးဢီႉတၢင်ႁိူင်း ႁႅင်းဢႄးပလွႆးပႃႇရပၢတ်ႈႁႃး ၽိူဝ်းၸ်ႂပလွႆးၸဝ်ယေသု။12မိူဝ်းတီး ၶုၼ်းႁေႃးၶမ်းပိလၢတ်းၼႆတႃး ဢီႉၵိူဝ်ႇၼႆၢ “ပွၵ်ႇသိူၼ်းၼီဢူဝ်ႉငႃးပၼ်းၸီႇၶုၼ်းႁေႃးၶမ်းဢီႉၸူးၼီသိူၼ်းၼႄႉ” မႆၢယ်းတႃးသိူၼ်းၼီ။13မိူဝ်းတီးၵိူဝ်ႇၼႆတႃး “တၢင်းဢိူၼ်းတႃးလၵ်ႉတၵ်ႉတိ ၼေး” ရၢၵ်ႇတႃးသိူၼ်းၼီ။14မိူဝ်းတီး ၶုၼ်းႁေႃးၶမ်းပိလၢတ်း ၼႆတႃး “ၵွပ်ႇသိူၼ်းၼႄႉ။ ဢိူၼ်းၸီႇဢပႅတ်ႇသိူၼ်းၼႄႉလွတ်း” မိူဝ်းမႆယ်းꧣႃးသိူၼ်းတီး ဢီႉတၢင်ႁိူင်းၼႆတႃးမိူဝ်ႇ “ပယႅင်းဢိူၼ်းတႃးလၵ်ႉတၵ်ႉတိၼေး” တႃးမိူဝ်ႇသိူၼ်းၼီႁႃး။15ၶုၼ်းႁေႃးၶမ်းပိလၢတ်းၵေႃ ၼႆပလွႆးဢႄးမိူဝ်ႇပႃႇရပၢတ်ႈ တႃဢႄးဢီႉတၢင်ႁိူင်းၶေၼၢပ်ႇ။ ၸဝ်ယေသုတႄ ၼႆဢၢပ်းဢႄးလၼ်တႃးသိုၵ်ႉ ဢႄးလေႇၵွၼ်တေးဢိူၼ်း တႃၼႆတၢင်းဢိူၼ်းတႃးလၵ်ႉတၵ်ႉတိ။16မိူဝ်းတီး သိုၵ်းၵိူဝ်ႇၵေႃၼႆလေႇလၼ်ဢႄးၸဝ်ယေသုတႃးႁေႃးတီပိလၢတ်းမူဝ်ႇ ဢၼ်ရၢၵ်ႇꧣႃးရုမ်းၼေး။ ဝႆၢးတီး ၼႆရၢၵ်ႇတိူရ်ၸူႉႁႆၢႉသိုၵ်းတင်တပ်ႇ။17ၼႆၸႂ်ၸဝ်ၵိူပ်ႇၶရွဢယွင်တူရ်လုင် ၼႆလေႇတင်ၶရႄႉပၢၼ်းၵုမ်း ၸၵ်ႇဢႄးၸဝ်ယေသုၼႆၢ။18ဝႆၢးတီး ၼႆတႃးၵၺၢသ်မိူဝ်ႇၸဝ်တႃး “ၶုၼ်းႁေႃးၶမ်းဢီႉၸူးဢႄးဢသၢၵ်ႇႁၼ်းပဵၼ်းပိူရ်ယႃ” တႃးၵယၢသ်ၵိူလ်းမိူဝ်ႇ။19ၼႆလေႇတိူင်းပလုရ်တေးၵိင်းၸဝ်ထပ်းထပ်း ထုၺ်းသၵ်ႉၸဝ်ၼႆၢဢူမ်းၺၢင်း ၼႆၸီႇတင်ပုင်တႄႉထွၵ်ႇၵိင်းသင်းၼႆဝႆၸဝ်။20ဝႆၢးၵိူဝ်ႇၵၺၢသ်းၸဝ်သိူၼ်းတီး ၼႆလေႇၸွၵ်ႇၶရွဢယွင်တူရ်လုင်ၼေး ၵိူပ်ႇဢႄးၼႅလ်ၶရွၸဝ်ဢၼ်ထရိမ်း ဝႆၢးတီး ၼႆလေႇလၼ်ၸဝ်ႁရ်ပၼွၵ်ႇဝႅယ်တႃ တွၵ်ႉပယႅင်းၸဝ်သၵ်ႉတႃးလၵ်ႉတၵ်ႉတိ။21မိူဝ်းၵိူဝ်ႇ လၼ်ဢႄးမိူဝ်ႇပၼွၵ်ႇဝႅယ်ၼေး ဢီႉဢၼ်မၢင်မုသ်တႃးသိမူင်ၼေး ၼႆဝဵင်ဢႄးဝႅယ်ၸေရုသလၢမ်ထင်းၽရူႇပၼွၵ်ႇ။ ဢိူၼ်းၼႄႇဢီႉထင်းဝႅယ်ၵူႉရေၼေ ၼႄႇပႃး ဢေလႄႉသႅၼ်းတႃး တင် ရုၽုၼေး။ သိုၵ်းၵိူဝ်ႇၼႆၸ်ႂဢိူၼ်း ဢႄးပႅၵ်ႇလၵ်ႉတၵ်းတိၸဝ်ယေသုၼေး လၼ်ဢႄးတီငႃးပယႅမ်းၸဝ်ယေသု။22သိုၵ်းၵိူဝ်ႇၼႆရၢၵ်ႇလၼ်ၸဝ်တႃးတီတႃး ၵေႃးလၵေႃးတ ဢၼ်မၢင်တီပွင်းတႃး တီၶလွၵ်ႉၵိင်း ၽႃသႃဢႃရမိတ်ႇၼေး။23ဝႆၢးတီး ၵိူဝ်ႇၼႆလေႇဢူမ်းသပိတ် ဢၼ်ၸၢပ်ႇတင်သၼိူမ်ဢၼ်ꧣႃးမုရၼ်ႇၼေး ꧣမ်းၸဝ်ယေသု ဢႄးယႃငရ်းသူႉၼႆး။ ၵေးတႃးၸဝ်ၼမ်တယႅင်း။24သိုၵ်းၵိူဝ်ႇၼႆတွၵ်ႉသၵ်ႉၸဝ်ယေသုတႃးလၵ်ႉတၵ်ႉတိၼေး တႃပယႅမ်းၸဝ်။ ဝႆၢးတီး ၼႆတိူမ်ၽရွမ်ပူဝ်ႉမႄး ယႅလ်းငႃးပွၼ်းၶရွၸဝ်ယေသုဢၼ်ၼႄႉ။25မိူဝ်းတၢင်သပ်းၸဝ်တႃးႁရ်ၵူလ်လၵ်ႉတၵ်ႉတိၼေး ၼႆၼႄႇဢရၢပ်ႇတိမ်းၼႃရီတိူၵ်ႇၶလူပ်ႉ။26ၼႆလေႇတင်သႅင်းပုၵ်ႉဢၼ်တႅမ်းတႃး “ဢိူၼ်းၼီၼႄႇၶုၼ်းႁေႃးၶမ်းဢီႉၸူး” ဢၼ်ၼႄႇတၢင်းၽိတ်းဢၼ်ဢီႉတၢင်ဢိူၼ်းၼေးႁွႆးသပ်းတႃးလၵ်ႉၼေး။27ၼႆလေႇတင် ၸူၼ်းၵဢၢရ်း တွၵ်းသၵ်ႉတႃးလၵ်ႉတၵ်ႉတိၵွမ်းၸဝ်။ ၼႆမူၵ်ႇၸူၼ်းႁွၵ်းႁရ်တူၵ်ႇၵႆၢးၸဝ် ႁွၵ်းႁရ်တူၵ်ႇတႃႉၸဝ်ယေသု။28ၵွပ်ႇသိူၼ်းတီး လွင်ၸဝ်ဢၼ်တႅင်းမူၵ်ႇတႃးလိၵ်ႇၵျၢမ်းဢၼ်တႃး “ဢိူၼ်းငႃးၺႃးသပ်းတႃးၸရၢင်ဢီႉမၢင်ဢပႅတ်း” ၼေး ဝႃပဵၼ်းတႄ။29ဢီႉဢၼ်ပူၼ်လၼ်ရိမ်ႁေးၵေႃ ၼႆငႅလ်ငႅလ်တင်ၵိင်းတႄႉ ၼႆတႃး “ဢီႉဢၼ်တႃးတႄႉငႃးယႃၸွၵ်ႇၵျွင်းပိၵ်ႉမၢၼ်ၼေး ၸီႇၼႅလ်ၼ်ႂးၶၢဝ်းတၢင်းဝႆးသငိၼေး30သတီးထႅမ်းၼႅလ်တႄႉ ၸုရ်ထရူးထင်းလၵ်ႉၼေးဢႄး” တႃးၵယၢသ်မိူဝ်ႇသိူၼ်းၼီ။31ပရေႃးႁဵတ်းဢၼ်ပိူလ်ၵိူဝ်ႇတင်သြႃဢၼ်မေႃးၵျၢမ်းၵိူဝ်ႇၵေႃ ၵၺၢသ်းၸဝ်ၼႆꧣႃး “ဢိူၼ်းၼီ ၸိင်းထႅမ်းဢီႉၵေႃ တူဝ်းဢိူၼ်းတႄၼမ်ထႅမ်းပွၼ်း။32ဢေႉတိူမ်ၽရွမ်ပိူဝ်ငၢတ်ႇၶုၼ်းႁေႃးၶမ်းဢီႉဢီႉသရေး ၸဝ်ၶရဵတ်ႇ ႁႆဢိူၼ်းငႃးၸၢင်ၸုရ်ထင်းလၵ်ႉတၵ်ႉတိ။ ပွၵ်ႇဢိူၼ်းၸုရ်ထရူးၿွၼ်း ဢေႉၵေႃငႃးယုမ်ယမ်ဢိူၼ်း” တူရ်တႃးတႄႉၼႆၢသိူၼ်တီးၼႆၵယၢသ်ႇမိူဝ်ႇ။ ၸူၼ်းၵဢၢရ်း ဢၼ်ၺႃးတွၵ်းတႃးရိမ်ၸဝ်ၵရ်ၼေးၵေႃ ၼႆꧣႃးသေႃၵႃးမိူဝ်ႇၸဝ်ယေသု။33မိူဝ်းသငိဢၼ်တီး ထင်းသငိတိူၼ်ၸင် လွတ်ဝ်းဝႆးၼႃရီၼေး ၽရီႇၵေႃပိမ်းလၼ်ႁႆၢႉမိူဝ်ႇတင်ၵလိူင်း။34ဝႆၢးဝၼ်းဝႆးၼႃရီၼေး ၸဝ်ၼႆရၢၵ်တႃးမိူဝ်ႇတင်ရိူသ်ဢုသ်း “ဢေလိ၊ ဢေလိ၊ လႃမႃ သႃပၶတႃၼီႉ” တႃးမိူဝ်ႇသိူၼ်းတီး။ တီပွင်းဢိူၼ်းတႄတႃးမိူဝ်ႇ “ၽြႃးၸဝ်ဢူဝ်ႉ၊ ၽြႃးၸဝ်ဢူဝ်ႉ၊ ၵွပ်ႇသိူၼ်းၼႄႉၼႆပလွႆးၸွၵ်ႇဢူဝ်ႉ” တႃးသိူၼ်းၼီ။35မိူဝ်းဢီႉဢၼ်ၼႄႇရိမ်ႁေးၵိူဝ်ႇၼေးငရ်း ၼႆတႃး “သိူင်းဢႄး၊ ဢိူၼ်းရၢၵ်ႇမိူဝ်ႇပရေႃးၽႅတ်းဢေလိယ” တႃးသိူၼ်းၼီ။36ဢီႉႁွၵ်ႉ ၼႆလေႇၽေႃႉၸုမ်သပ်ႉတႃးဢူမ်းသပိတ်ႇၼေး တၢင်းသပ်းတႃးꧣုတ်းတိူင်းပလုရ် ဢႄးၸဝ်တႅယ်း ၼႆတိူရ်တႃးတႄႉၼႆၢ “ငွမ်သိူၼ်းဢႄး ႁႆဢေလိယငႃးထရူးလေႇၸုရ်ဢႄးဢိူၼ်း” တိူရ်တႃးတႄႉၼႆၢသိူၼ်းၼီ။37ဝႆၢးတီး ၸဝ်ယေသုၵေႃ ၼႆရၢၵ်ႇၵယႅၵ်ႉတင်ရူသ်ဢုသ်းၼႆယႅမ်လၼ်။38မိူဝ်းတီး ၿၼ်းဢၼ်သရ်တႃးၵျွင်းပိၵ်ႉမၢၼ်ၼေး ၼႆသယႅရ်းလၼ်ထင်းႁရ်ၵူလ်လွတ်ဝ်းႁရ်ဢွတ်း ပဵၼ်းဢရ်းပွတ်း။39မိူဝ်းတီး ၶုၼ်းသိုၵ်ႉႁွၵ်ႉ ဢၼ်ၸဵင်မိူဝ်ႇသိူၼ်တလ်းၸဝ်ယေသုၼေး မိူဝ်းဢိူၼ်းဢွလ်းၸဝ်ယေသုယႅမ်လၼ် ဢိူၼ်းၼႆတႃး “ဢိူၼ်းဢၼ်တီးၼႄႇတႄၵွၼ်ဝ်းၽြႃးၸဝ်” တႃးသိူၼ်းၼီ။40ႁေး ၼႆမၢင်မိူဝ်ႇတင်ၵိူၼ်ၺႃႇသိူဝ်ၸုမ်း ၼမ်ထႅတ်းၼမ်သငႆၢၼေး ငၢတ်ႇလၼ်မိူဝ်ႇၵိူဝ်ႇ။ ၵိူၼ်ၺႃႇၼႂ်းၵိူဝ်ႇၼႆပႃတင် မႃရိ ဢီႉဝႅယ်မႃၵတလ၊ တင်မႃရိ မႃႇယေႃးသေတင်ယႃၵူပ်ႈ တင်ထႅင်း သႃလူင်။41ၵိူဝ်ႇၼႄႇ ဢီႉဢၼ်လၼ်သွပ်းၸဝ် ၸီႇꧣမ်းၸဝ် မိူဝ်းၸဝ်ၼႄႇၵႃလိလႄးၼေး။ ၵိူၼ်ၺႃႇတၢင်ႁိူင်း ဢၼ်ထရူးသွပ်းၸဝ်ၸေရုသလၢမ်ၵိူဝ်ႇၼေးၵေႃ ၼႆၼႄႇမိူဝ်ႇႁေး။42လွင်ၵိူၼ်တီးၼႆပဵၼ်းမိူဝ်းသငိဢၼ်ဢီႉရႅၼ်းမိူဝ်ႇတႃသငိသိၼ်းၼေး မိူဝ်းလွတ်ဝ်းထရူးတိူၵ်ပူရ်း43ယေႃးသပ်ႉဢီႉဝႅယ်ဢရိမတႄး ၼႄႇတင်ဢီႉပိူလ်ၸုမ်းတႅပ်ႉတတ်းတြႃးႁွၵ်း ၼႄႇတင်ဢီႉဢၼ်ငွမ်သႃသၼႃၽြႃးၸဝ်ၼေး ၼႆလၼ်ဢႄးတႃးၶုၼ်းႁေႃးၶမ်းပိလၢတ်းတင်သရႆၢး ႁႅယ်းဢၶွၢင်း တႃသၢင်းၵဵဝ်ႇဢႄးၶၢပ်ႇတူဝ်းၸဝ်ယေသု။44မိူဝ်းၶုၼ်းႁေႃးၶၢမ်းပိလၢတ်း ငရ်းဢၼ်တႃးၸဝ်ယေသုဝႃယႅမ်တႄၼေး ဢိူၼ်းၵေႃၼႆဢၢမ်းမိူဝ်ႇ ၼႆရၢၵ်ႇမႆၢယ်းၶုၼ်းသိုၵ်ႉႁႆၼႄႇတႄၼမ်ၼႄႇတႄ။45မိူဝ်းဢိူၼ်းငရ်းထင်းၶုၼ်းသိုၵ်ႉတႃး ၸဝ်ယေသုဝႃယႅမ်တႄၼေး ဢိူၼ်းၵေႃၼႆဢႄးဢၶွၢင်းဢႄးယေႃးသပ်ႉသၢင်းၵဵဝ်ႇတူဝ်းၸဝ်။46ဝႆၢးတီး ယေႃးသပ်ႉၼႆယႅလ်ၿၼ်း ၼႆလေႇတိူၵ်ႇၵလႄးတူဝ်းၸဝ်ယေသု ထင်းလၵ်ႉၼေး ၼႆလေႇပၼ်းဢၼ်ၶယေႃးဢၼ်ရၵ်ႇပူၵ်ႇဢႄးတူဝ်းၸဝ် ၼႆလေႇတူဝ်းၸဝ်သပ်ႉတႃးၵွမ်ဢၼ်လေႇသမူဝ်ႇတူၵ်ႉတူႉမူၵ်ႇၼေး။ ဝႆၢးတီး ၼႆရၢၵ်ႇဢီႉထႅမ်းလေႇသမူဝ်ႇပိူလ်ၼေးပိၵ်းမူၵ်ႇတူႉပူၼ်လူ။47မႃရိ ဢီႉဝႅယ်မႃၵတလ တင်မႃရိ မႃႇယေႃးသေတင်ယႃၵူပ်ႇၼေး ၼႆလၼ်တွမ်းမိူဝ်ႇတီမူၵ်ႇတူဝ်းယႅမ်ၸဝ်ၼေးၼႄႇႁႃးၼႄႉ။
Empower Asia Bible Translation Movement