Mark14
1လူဝ်ထႅင်းႁႃး ဢၢရ်းသငိတႃလွတ်ဝ်း ပွႆပသၶႃ တင်ပွႆသွမ်းၶဝ်မုၼ်တသေးမႄႉၼေး။ ၸူးပရေႃးႁဵတ်းဢၼ်ပိူလ်တင် သြႃဢၼ်မေႃးၵျၢမ်းၵိူဝ်ႇ ၼႆၶႃႉမိူဝ်ႇလွၵ်ႉလႆၢးတႃတုတ်ႉပယႅမ်းၸဝ်။2ၵေးတႃး ၵိူဝ်ႇၼႆꧣႃး “ၵွပ်ႇၼူဝ်းဢီႉဢၼ်ယုမ်ယမ်ၸဝ်ၵိူဝ်ႇၼေး သုၵ်ႇသၵ်ႇႁႆၢႉ ယႃၺွပ်းၼႂ်းပွႆၼႆး” ꧣႃးသိူၼ်းၼီ။3မိူဝ်းၸဝ်ၵတေးသွမ်းမိူဝ်ႇၵႆၢးတႃးၵၢင်သိမူင်ဢၼ်ပဵၼ်းရေႃးၵႃတုတ်ႇ ၽရူႇပေတၼိၼေး ၼႆမၢင်ၵိူၼ်ၺႃႇႁွၵ်ႉ လေႇထရူးပလႅင်းၼႃတုလမၼ်ႁွမ်းဢၼ်ၸႅတ်ႇ ဢၼ်လေႇသမူဝ်ႇၸီႇ ဢၼ်မၢင်ၵႃၶၼ်ပူလ်ယႆၼေး ထရူးဢႄးတႃးၸဝ်။ ဝႆၢးတီး ဢိူၼ်းၼႆလေႇလမၼ်ႁွမ်း ၼႃတုၼေးထွၵ်းသပ်ႉတႃးၵိင်းၸဝ်။4မိူဝ်းတီးဢီႉရၵႃ ၼႆသုၼ်ၸႃမိူဝ်ႇ ၼႆတႃး “ၵွပ်ႇသိူၼ်းၼႄႉၸိင်းၼႆၸီႇဢႄးလမၼ်ႁွမ်းဢၼ်တမ်ၽူဝ်းပိူလ်ၼေးၸွၵ်ႇမၢတ်ႇ၊5ဢိူၼ်းထုၵ်ႇလီ သႃးလမၼ်ႁွမ်းဢၼ်ဢေး ဝႆးၸွႆတေၼႃရီတိင်းၵႃးၼႆလူဢႄးဢီႉၽရၢၼ်းၵိူဝ်ႇ” တိူရ်တႃးတႄႉၼႆၢသိူၼ်းတီး ၼႆꧣႃးမိူဝ်ႇဢပႅတ်ႇၵိူၼ်ၺႃႇၼေး။6မိူဝ်းတီးၸဝ်ၼႆတႃး “ယႃတႃးဢိူၼ်းၼႆး၊ ၼႄႇဢိူၼ်းၸီႇမိူဝ်ႇလွင်ဢၼ်ရၵ်ႇတေႃးဢူဝ်ႉႁႃး။ ၸိင်းၼႆသုၵ်းသၵ်းမိူဝ်ႇဢိူၼ်း။7ဢီႉၽရၢၼ်းၼီငႃးၼႄႇၵွမ်းသေမိူဝ်ႇပေႉ ပေႉသုၼ်းလူပွၵ်ႇၼႄႉၵေႃလူပွၼ်းမိူဝ်ႇ။ ၵေးတႃး ဢူဝ်ႉၼမ်ငႃးၼႄႇသေတင်ပေႉ။8ၼႄႇဢိူၼ်းၸီႇဢႄးဢူဝ်ႉၼႆၢဢၼ်ဢိူၼ်းပဵၼ်းပွၼ်း။ ၼႄႇဢိူၼ်းထွၢၵ်ႉဢႄးငွမ်တူဝ်းဢူဝ်ႉၼႆၢလမၼ်ႁွမ်း တႃသၢင်းၵဵဝ်ဢူဝ်ႉ။9ဢူဝ်ႉငႃးလဝ်ပေႉၼႆၢလွင်တႄ။ လွင်ဢၼ်ၵိူၼ်ၺႃႇၸီႇၼီ ဢီႉငႃးတိူရ်လဝ်လွင်ဢိူၼ်း သွပ်းၵဵယ်းၶၢဝ်မင်ၵလႃ တင်ၵမ်ၽႃပဵၼ်းတီမႆၢတွင်းဢိူၼ်း” တႃးသိူၼ်းၼီ။10ဝႆၢးတီး တပႄးၸဝ်ဢၼ်မၢင်မုသ်တႃး ယုတသၵႃရူတ်ႉ ဢၼ်ၼႄႇတပႄးၸဝ်ၼ်ႂးသိူဝ်ႇၵွလ်းဢၢရ်းၼေး ၼႆလၼ်တႃးဢီႉၸူးပရေႃးႁဵတ်းဢၼ်ပိူလ်ၵိူဝ်ႇၼႆၢ လွင်တႄႉၸၢင်ထႅမ်းၵိူဝ်ႇတႃၺွပ်းၸဝ်ယေသုသိူၼ်းၼႄႉၼေး။11မိူဝ်းၵိူဝ်ႇငရ်းယုတသၵႃရူတ်ႉတႃးသိူၼ်းတီး ၵိူဝ်ႇၵေႃတူမ်ၽရွမ်ဢိူမ်း ပွၵ်ႇၸီႇလေၵိူဝ်ႇငႃးဢႄးပႅတ်း ဢႄးၵတိတႃးသိူၼ်းတီး။ ၵွပ်ႇသိူၼ်းတီး ယုတၵေႃ ၼႆလႄလၼ် ၶိုင်မိူဝ်ႇလွၵ်ႉလႆၢးတႃၺွပ်းၸဝ်ယေသု။12မိူဝ်းသငိတႄပွႆတသေး တႃပူႇၸေႃႇၵွၼ်းပူသ်းတႃပွႆပသၶႃၼေး တပႄးၸဝ်ၼႆတႃးၸဝ်ၼႆၢ “တႃၸီႇပွႆၼီဢေႉငႃးပၼ်းရႅၼ်းမူၵ်ႇဢႄးႁႃးၼႄႉ” မႆၢၺ်းၸဝ်ꧣႃးသိူၼ်းၼီ။13ၸဝ်ၼႆပလွႆးလၼ်တပႄးဢိူၼ်းၵဢၢရ်းၼႆꧣႃး “ပရ်းၵဢၢရ်းလၼ်ဢႄးတႃဝဵင်းၸေရုသလမ်ဢႄး။ ပရ်းငႃးဢွလ်းဢီႉႁွၵ်ႉ ဢၼ်ၵူလ်းထရူးၵလူဝ်ႉဢူမ်းၼေး။ လၼ်သွပ်းတႃးပွတ်းဢိူၼ်း14ၵုတ်ဢႄးသွပ်းတႃးၵၢင်ဢၼ်ဢိူၼ်းၵုတ်ၼေး ၼႆတႃးၵိူရ်မႃႇၵၢင်ၼေးၼႆၢ ‘သရႃမႆၢယ်းတႃး လုၵ်းတႃၸီႇပွႆပသၶႃတင်တပႄးဢိူၼ်းၼေး ၼႄႇႁႃးၼႄႉ’ ꧣႃးသိူၼ်းၼီ။15ၽတ်းပွၵ်ႇတီးၵူရ်မႃႇၵၢင်ၼေး ငႃးလဝ်ပေႉၼႆၢ လုၵ်းဢၼ်ပႅလ်းမူၵ်ႇဝႃပရိပေႃးၵႃႉႁရ်ၵူလ်ၵၢင်ၼေး။ ရႅၼ်းဢႄးဢူဝ်ႉၼႆၢႁေးဢႄး” တႃးသိူၼ်းၼီ။16တပႄးၸဝ်ၵဢရ်းၵေႃ ၼႆလႄလၼ် ၼႆၵုတ်ဢႄးတႃးဝႅယ်ၼေး ၵွပ်ႇၼႆၼႄႇမိူဝ်ႇသိူၼ်းၸဝ်ယေသုတႃး ၵိူဝ်ႇၵေႃၼႆရႅၼ်းတႃၸီႇပွႆပသၶႃႁေး။17မိူဝ်းလွတ်ဝ်းထရူးတိူၵ်ပိူရ်း (ၽရီႇꧣုင်းငႃးၿိမ်း) ၸဝ်ယေသုၵေႃၼႆၸွထရူး တႃးၵၢင်ဢေးတင်ပႄးဢိူၼ်းသိူဝ်ႇၵွလ်းဢရ်း။18ဝႆၢးတီးမိူဝ်းၵိူဝ်ႇတူမ်ၽရွမ်သွၢမ်းမိူဝ်ႇၼေး ၸဝ်ယေသုၼႆတႃး “ဢူဝ်ႉငႃးလဝ်ပေႉၼႆၢလွင်တႄ။ ဢီႉႁွၵ်ႉၼႂ်းပေႉဢၼ်သွမ်းၵွမ်းမိူဝ်ႇဢေႉၼီ ငႃးၺွပ်းဢၢပ်းဢူဝ်ႉတႃးဢီႉဢၼ်သုၼ်းပယႅမ်းဢူဝ်ႉၵိူဝ်ႇၼေး” တႃးသိူၼ်းၼီ။19မိူဝ်းတီး တပႄးၸဝ်တင်ႁိူင်းၵေႃတင်ၽွမ်းၼမ်ရၵ်ႇ ၼႆတူရ်တႃးတႄႉၼႆၢ “ၼမ်ၸိူဝ်ႁူဝ်ႉဢူဝ်ႉၼမ်ၸိူဝ်” ꧣႃးသိူၼ်းၼီ။။20ၸဝ်ယေသုၵေႃၼႆတႃး “ဢိူၼ်းၼႄႇၼ်ႂးတပႄးသိူဝ်ႇၵွလ်းဢရ်း ၼႄႇဢီႉဢၼ်သွၢမ်းၵွမ်းဢူဝ်ႉသိူဝ်ႇထဝႆၢးၼေးႁႃး။21ဢူဝ်ႉဢၼ်ၼႄႇၵွၼ်ဝ်းဢီႉၼီ ငႃးပၼ်းယႅမ်သိူၼ်းဢၼ်တႅမ်းမူၵ်ႇတႃးလိၵ်ႇၵျၢမ်းၼေးသေတႃႉ တႃဢီႉဢၼ်ငႃးဢၢပ်းဢူဝ်ႉၼေးတႄ ငႃးပိူၵ်ႇꧣူဝ်းယႆ။ ၽိူဝ်းဢိူၼ်းၼမ်ၵိူတ်းထရူးၼီ ငႃးရၵ်ႇယႄႉတႃဢိူၼ်း” တႃးသိူၼ်းၼီ။22ဝႆၢးတီး မိူဝ်းၵိူဝ်ႇၼင်တိူမ်ၽရွမ်ၵꧣေးသွမ်းမိူဝ်ႇၼေး ၸဝ်ယေသုၼႆလေႇၶဝ်မုၼ်ၼႆယုၵ်းယွင်ၵုင်ၵေးၸူးၸဝ် ၼႆပွတ်းၶဝ်မုၼ်ၼေး ဢႄးတပႄးဢိူၼ်းၵိူဝ်ႇၼႆၢ “လေႇသွမ်းဢႄး။ ၶဝ်မုၼ်ၼီၼႄႇတူဝ်းဢူဝ်ႉ” ꧣႃးသိူၼ်းၼီ။23တင်ထႅင်း ၸဝ်ၼႆလေႇၶလွၵ်ႉ ၼႆယုၵ်းယွင်ၵုင်ၵေးၸူးၸဝ် ၼႆဢႄးတပႄးဢိူၼ်းၵိူဝ်ႇၼႆၢ တပႄးဢိူၼ်းတၢင်ႁိူင်းၵေႃၼႆတူမ်ၽရွမ်တယႅင်း။24ၸဝ်ၼႆတႃးၵိူဝ်ႇၼႆၢ “ဢူမ်းသပိတ်ႇဢၼ်တီး တႅၼ်းတၢင်ၼၢမ်းဢူဝ်ႉ ဢၼ်ထွၵ်းတႃဢီႉတင်ႁိူင်း မိူဝ်းဢူဝ်ႉယႅမ်ၼေး ၼႄႇလွင်တိူမ်ၽရွမ်ပိူရ်လႃႇၽြႃးၸဝ် တင်ဢီႉဢိူၼ်းၸဝ်ၵိူဝ်ႇ။25ဢူဝ်ႉငႃးလဝ်ၼႆၢလွင်တႄပေႉ။ ဢူဝ်ႉၼမ်ငႃးတယႅင်းလႆးဢူမ်းသပိတ်ႇတူရ်ပွၵ်ႇ ၽတ်းတိူဝ်ဢူဝ်ႉ ငႃးပၼ်းတယႅင်းဢူမ်းသပိတ်ဢၼ်တိူၼ်မေႇ တႃးၵလိူင်းၽြႃးၸဝ်ၼေး” တႃးသိူၼ်းၼီ။26ဝႆၢးတီး ၵိူဝ်ႇၼႆမၢၵ်ႉၵႂၢမ်းယုၵ်ႉယွင်တင်ၵုင်ၵေးၸူးၽြႃးၸဝ် ၼႆရေႃလၼ်ရင်သေႃးလိၵ်းမိူဝ်ႇ။27မိူဝ်းတီး ၸဝ်ၼႆတႃး တပႄးဢိူၼ်းၼႆၢ “သိူၼ်းဢၼ်ၼ်ႂးလိၵ်ႇၵျၢမ်းတႅမ်းမူၵ်ႇလွင်ဢူဝ်ႉ ဢၼ်တႃး ‘ဢူဝ်ႉငႃးပယႅမ်းဢီႉဢၼ်ꧣမ်းပူသ်းၼေး ပူသ်းတၢင်ႁိူင်းၵေႃ ငႃးတိူမ်ၽရွမ်ရူၵ်ႇတိုၼ်းတိူၵ်ႇၽရၢသ်း’ ပေႉတၢင်ႁိူင်းၵေႃငႃးတူမ်ၽရွမ်ရိူၵ်ႇတိုၼ်းပလွႆးၸွၵ်ႇဢူဝ်ႉ။28ၵေးတႃး ဢူဝ်ႉငႃးရွႆဢိမ်းၼႅလ်ထင်းယႅမ် ဢူဝ်ႉငႃးလၼ်ဢႆၢႉပေႉတႃးၵလိူင်းၵႃလိလႄး” တႃးသိူၼ်းၼီ။29မိူဝ်းတီးပေတရုၼႆတႃး ၸဝ်ၼႆၢ “ဢီႉတၢင်ႁႆၢႉ တိူမ်ၽရွမ်ပလွႆးၸွၵ်ႇၸဝ်ၵေႃ ဢူဝ်ႉတႄၼမ်ငႃးပလွႆးၸွၵ်ႇၸဝ်” တႃးသိူၼ်းၼီ။30ၸဝ်ၼႆတႃး “ဢူဝ်ႉငႃးလဝ်မီႇလွင်တႄ။ သွမ်းမိူဝ်ႇၼီ ဢႆၢႉယႅရ်းမတ်ႇၵိူဝ်တွရ်းဢၢရ်းလႄႉၼေး မီႇငႃးထဵင်းတႃး တႄႉၼမ်မသ်ဢူဝ်ႉ တႃဝႆးလႄႉ” တႃးသိူၼ်းၼီ။31ပေတရုၵေႃၼႆတႃး “ဢႄးဢူဝ်ႉယႅမ်ၵွမ်းတင်ၸဝ်ၵေႃ ဢူဝ်ႉၼမ်မၢင်တႃတႃးတႄႉၼမ်မသ်ၸဝ်” တႃးသိူၼ်းၼီ။ တပႄးၵိူဝ်ႇ ဢၼ်ၵိုတ်းတၢင်ႁိူင်းၵေႃၼႆၽရွမ်တႃးမိူဝ်ႇသိူၼ်းတီး။32ဝႆၢးတီး ၸဝ်တင်တပႄးၵိူဝ်ႇလွတ်ဝ်းလၼ်တႃတီမုသ်ꧣႃး ၵေတသေမၢၼ်ၼေး။ ၸဝ်ၼႆတႃး “မိူဝ်းဢူဝ်ႉသူႉတွင်းၼေး တူမ်ၽရွမ်ၵတေးႁၼီးဢႄး” တႃးၵိူဝ်ႇၼႆၢသိူၼ်းတီး33ၸဝ်ၼႆရၢၵ်ႇ ပေတရု၊ ယႃၵူပ်ႈ တင်ယေႃးႁၢၼ် လၼ်သွပ်းဢိူၼ်း။ မိူဝ်းတီး ၵွပ်ႇၸဝ်ၵေႃၼႆၵꧣေးၵလႄးၽွမ်းမိူဝ်ႇ34ၸဝ်ၼႆတႃးတပႄးဢိူၼ်းၵဝႆၢးၼေးၼႆၢ “ၽွမ်းဢူဝ်ႉၵွႆယ်ႉယႆ ပေႃဝႃငႃးယႅမ်။ ပေႉတိူမ်ၽရွမ်ပိူဝ်ရၵ်ႇရၵ်ႇႁၼီးတင်သတီႇၼေႃး” တႃးသိူၼ်းၼီ။35ဝႆၢးတီး ၸဝ်ၼႆလၼ်ဢႄးတႃးတီသငႆၢတိူရ်ယႄႉၼေး ၼႆၵတေးထွၵ်ႇၵိင်းသင်းတႄႉဢၢပ်းဢႄးမွၵ်ႇငႆၢတႄႉတႃးၵတေႉၼႆသူႉတွင်း ပွၵ်ႇပဵၼ်းပွၼ်း ဢႄးၸီႇဢႄးၶိင်တုၵ်ႉၶႃႉဢၼ်ဢးပူၼ်36ၸဝ်ၼႆသူႉတွင်းတႃး “ၽြႃးၸဝ်၊ ဢၼ်ၼမ်ပဵၼ်းပွၼ်းဢၼ်တႃးၼေး ၼမ်မၢင်တႃၽြႃးၸဝ်။ ၶႅၼ်းတေႃၶရႆၢဢႄးတုၵ်ႉၶႃႉဢၼ်ဢူဝ်ႉငႃးၿၼ်းၶၢမ်ၼေး။ ၵေးတႃး ၽြႃးၸဝ်ယႃၸီႇသွပ်းဢလူဝ်ၽွမ်းဢူဝ်ႉၼႆး ဢႄးၸီႇသွပ်းဢလူဝ်ၽွမ်းၽြႃးၸဝ်” သူႉတွင်းတႃးသိူၼ်းၼီ။37ဝႆၢးတီး မိူဝ်းၸဝ်လွတ်ဝ်းထရူးၼႅလ်တႃးတပႄးၵဝႆးၼေး ၸဝ်ၼႆဢွလ်းၵိူဝ်ႇယႅတ်းလငိူတ်ႇမိူဝ်ႇ။ ၸဝ်ၼႆꧣႃးပေတရုၼႆၢ “သိမူင် ပေႉယႅတ်ႉလငိူပ်ႇမိူဝ်ႇ။ သိူဝ်ၼႃရီႁႃးၵေႃပေႉၼမ်ပိူဝ်ပွၼ်းႁိူဝ်ႉ။38ၽွမ်းပေႉမၢင်ၶရင်ၵေႃ တူဝ်းပေႉၼမ်မၢင်လႆးၶရင်။ တိူမ်ၽရွမ်သူႉတွင်းဢႄးယႃၵလႄးလၼ်တႃးလွင်လႅၼ်းၼေးဢႄး” တႃးသိူၼ်းၼီ။39ဝႆၢးတီး ၸဝ်ၵေႃၼႆလၼ်သူႉတွင်းထႅင်းသိူၼ်းထဝေႃႉၼေး။40မိူဝ်းၸဝ်လွတ်ဝ်းထရူးၼႅလ်ၼေး ၼႆဢွလ်းၵိူဝ်ႇ ငႆၢႁႃးၵေႃၼမ်ၸၢင်ပလၢၵ်းယႅတ်းလိူဝ်ငိူတ်ႇထႅင်းမိူဝ်ႇ။ မိူဝ်းၸဝ်ၼႆပူယ်ရွႆၵိူဝ်ႇၼေး ၵိူဝ်ႇၵေႃၼမ်မသ်တႄႉတႃးသိူၼ်းၼႄႉ။41ဝႆၢးတီး ၸဝ်ၼႆလၼ်သူႉတွင်းပွၵ်ႇၵမ်းၵဝႆၢးၼႆထရူးၼႅလ်ၼေး ၸဝ်ၼႆတႃးၵိူဝ်ႇၼႆၢ “ပေႉၼင်ယႅတ်းၽရိူမ်းမိူဝ်ႇၽတ်းတိူဝ်သတီး။ ဝႃပွၼ်း။ သိူင်းဢႄး။ ဝႃလွတ်ဝ်းဢၶိင် ဢၼ်ငႃးဢၢပ်ႉၵွၼ်ဝ်းဢီႉၸဝ် တႃးတိဢီႉမၢင်ဢပႅတ်ႇၵိူဝ်ႇ။42ရွႆဢႄး။ ဢေႉတိူမ်ၽရွမ်လၼ်။ ဢီႉဢၼ်ငႃးဢၢပ်ႉဢူဝ်ႉၼေး ဝႃငႃးလွတ်ဝ်းထရူး” တႃးသိူၼ်းၼီ။43မိူဝ်းၸဝ်ၼင်တႃးမိူဝ်ႇသိူၼ်းတီး ဢၼ်ၼႄႇတပႄးၸဝ်ႁွၵ်ႉ ယုတသၵႃရူတ်း ၼ်ႂးတပႄးသိူဝ်ႇၵွလ်းဢၢရ်းၼေး ၼႆလွတ်ဝ်းထရူးဢႄးမိူဝ်ႇတႃးၵိူဝ်ႇ။ ပရေႃးႁဵတ်းဢၼ်ပိူလ်ၵိူဝ်ႇ၊ တင်ဢီႉတၢင်ႁိူင်းဢၼ်သြႃမေႃးၵျၢမ်းၵိူဝ်ႇၸ်ႂပိူၼ်ထရူးၼေး ၼႆလေႇတင်ၵွၼ်၊ တင်လႅဝ်း ထရူးသွပ်းမိူဝ်ႇဢိူၼ်း။44မိူဝ်းတီး ယုတသၵႃရူတ်း ၼႆတႃးမူၵ်ႇဢီႉဢၼ်ဢိူၼ်းရၢၵ်ႇထရူးၵိူဝ်ႇၼေးၼႆၢ “ဢီႉဢၼ်ဢူဝ်ႉငႃးငၼ်ႁွမ်းၼေး ၼႄႇဢီႉဢၼ်ပေႉငႃးပၼ်းၺွပ်ႉ။ ၺွပ်ႉရၢၵ်ႇလၼ်ဢိူၼ်းရၵ်ႇရၵ်ႇဢႄး” တႃးမူၵ်ႇၵိူဝ်ႇၼႆၢ သိူၼ်းၼီ။45ၵွပ်ႇသိူၼ်းတီး ယုတသၵႃရူတ်း မိူဝ်းဢိူၼ်းလွတ်ဝ်းတႃးၸဝ်ၼေး ၼႆတႃး “ၸဝ်” ꧣႃးသိူၼ်းတီး ၼႆငၼ်ႁွမ်းမိူဝ်ႇၸဝ်။46မိူဝ်းတီး ဢီႉတၢင်ႁိူင်းၵိူဝ်ႇၵေႃ ၼႆတူမ်ၽရွမ်ၺွပ်ႉမူၵ်ႇၸဝ်ယေသု။47မိူဝ်းတီး ဢီႉႁွၵ်းၼႂ်းၵိူဝ်ႇဢၼ်ၸဵင်မိူဝ်ႇရိမ်ႁေးၼေး ၼႆလေႇပလႄးလႅဝ်းမၵ်ႇသၢပ်ႉဢီႉပရေႃးႁဵတ်းႁွၵ်းၼႆၢ ၵတႅယ်ႉဢိူၼ်းၵေႃၼႆပုတ်းလၼ်။48ဝႆၢးတီး ၸဝ်ၼႆတႃး “တႃးၺွပ်ႉဢူဝ်ႉၼီ ပေႉလေႇထရူးတင် မိတ်၊ တင်ၵွၼ် ဢူဝ်ႉꧣူၺ်းၸူၼ်း။49ဢူဝ်ႉႁေႃးမိူဝ်ႇတႃးၵိူၼ်တိၵျွင်းပိၵ်ႉမၢၼ်ၵဵယ်းသငိသေတႃႉ ပေႉၵေႃၼႄႇမိူဝ်ႇႁေး ပေႉၸိင်းၼမ်ၺွပ်းဢူဝ်ႉ။ ၵေးတႃး လွင်ၵိူၼ်ၼီဢၼ်ၼႄႇထရူးၼေး ၼႄႇတႃဢႄးပဵၼ်းသွပ်းၼ်ႂးလိၵ်ၵျၢမ်းဢၼ်တႅမ်းမူၵ်ႇလွင်ဢူဝ်ႉ” ꧣႃးသိူၼ်းၼီ။50မိူဝ်းတီး တပႄးၸဝ်တၢင်ႁႆၢႉၵေႃၼႆတူမ်ၽရွမ်ရိူၵ်ႇတိုၼ်းပလွႆးၸွၵ်ႇၸဝ်။51မိူဝ်းတီးၼႆမၢင်ဢီႉႁွၵ်းဢၼ်ၵိူပ်ႇႁႃးၽႃဝႆၼမ်ၵိူပ်ႇၶရွၼေးထရူးသွပ်းၸဝ်။ မိူဝ်းဢီႉၵိူၼ်ဢေးၼႆၺွပ်းဢိူၼ်းၼေး52ဢိူၼ်းၵေႃၼႆ ၸွၵ်ႇၸွၵ်ႇၽႃဝႆတႄႉ ရိူၵ်ႇတိုၼ်းတင်တူဝ်းမၢတ်ႇၼမ်ၵိူပ်ႇႁလ်း။53ဝႆၢးတီး ၵိူဝ်ႇၵေႃၼႆၺွပ်ႉရၢၵ်ႇၸဝ် လၼ်ဢႄးတႃးၵၢင်ပရေႃးႁဵတ်းဢၼ်ပူလ်တိူၵ်ႇႁႆၢႉ။ ဢီႉဢၼ်ပိူလ်ပရေႃးႁဵတ်း၊ ဢီႉပိူလ်ၸၢဝ်းၶိူဝ်းၸူးၵိူဝ်ႇ တင်သြႃဢၼ်မေႃးၵျၢမ်းၵိူဝ်ႇၵေႃ တူမ်ၽရွမ်ထရူးဢႄးႁႆၢႉတႃးၵၢင်ဢၼ်ဢေး။54ပေတရုၵေႃၼႆထရူးသွပ်းတႃးပွတ်ဝ်းၸဝ်ယေသုၼမ်ထႅတ်းၼမ်သငႆၢ ၵုတ်ႇဢႄးတႃးသရၢၵ်ႉၵၢင်ပရေႃးႁဵတ်းဢၼ်ပိူလ်တိူၵ်ႇႁႆၢႉၼေး ၵတေးတၢတ်ႉမိူဝ်ႇငလ် တင်ဢီႉပိူဝ်ယၢမ်းၵိူဝ်ႇ။55ၸူးပရေႃးႁဵတ်းဢၼ်ပိူလ်ၵိူဝ်ႇ တင်ဢီႉၸုမ်းတႅပ်ႉတတ်းတြႃးၵိူဝ်ႇ ၼႆၶႃႉမိူဝ်ႇသၵ်ႇသေ တႃဢႄးပွၼ်းၸဝ်ယေသုၼႆၢတၢမ်ယႅမ်းၼေး ၵေးတႃးၵိူဝ်ႇၼမ်ဢွလ်းသေမဵဝ်း။56ဢီႉတၢင်ႁိူင်းၼႆတူမ်ၽရွမ်သၢၼ်ၶတ်းၸဝ်ယေသုတႃးၸီႇမိူဝ်ႇသၵ်ႇသေ ဢၼ်ၼမ်ၸိူဝ်ၼမ်တေႃးၼေး ၵေးတႃး ဢၼ်ၵိူဝ်ႇတႃးၼေး ႁွၵ်ႉတင်ႁွၵ်ႉၵေႃၼမ်တူရ်တေႃးတႄႉ။57မိူဝ်းတီး ဢီႉသိူဝ်ႉၸုမ်း ၼႆꧣႃးသၵ်သေဢၼ်တေႃးတႄသၢၼ်ၶတ်းၸဝ်တႃး58“ဢေႉငရ်းဢိူၼ်းၼီတႃး ‘ဢူဝ်ႉငႃးယႃၸွၵ်ႇၵျွင်းပိၵ်းမၢၼ် ဢၼ်လေႇတိဢီႉၸီႇၼီ ၼႆငႃးၸီႇၵျွင်းပိၵ်ႉမၢၼ်ဢၼ်ၼမ်ၸိူဝ်တိဢီႉၸီႇၼေး ၼ်ႂးဝႆးသငိ’ ဢေႉငရ်းဢိူၼ်းတႃးသိူၼ်းတီး” တႃးသိူၼ်းၼီ။59ၵေးတႃး သၵ်ႇသေၵိူဝ်ႇၼႄႇသိူၼ်းထဝေႃႉႁႃး ၼမ်တိူရ်တေႃးတႄႉ။60မိူဝ်းတီး ဢီႉပရေႃးႁဵတ်းဢၼ်ပိူလ်တိူၵ်ႇႁႆၢႉၼေးၵေႃ ၼႆၸဵင်တႃးၸဝ်ၼႆၢ “ၸဝ်ၼမ်ငႃးတႃးႁိူဝ်ႉသိူၼ်းၼႄႉ။ ၸဝ်ငႃးꧣႃးဢၼ်ဢီႉတၢင်ႁိူင်းတႃးပလႄးသၵ်ႉသေၼမ်ၸိူဝ်တႄၼီ” တႃးသိူၼ်းၼီ။61ၵေးတႃး ၸဝ်ၵေႃၼႆၽရၢသ်ႇမိူဝ်ႇၼမ်တႃးသိူၼ်းၼႄႉ။ ၵွပ်ႇသိူၼ်းတီး ပရေႃးႁဵတ်းဢၼ်ပူလ်တိူၵ်ႇႁႆၢႉၼေး ၼႆတႃးၸဝ်ၼႆၢ “ႁႆၸဝ်ၼႄႇၸဝ်ၶရဵတ်ႇၵွၼ်ဝ်းၽြႃးၸဝ်ဢၼ်ဢေႉၵူဝ်းၵွႆၢၼေး” မိူဝ်းတႃးသိူၼ်းတီး62ၸဝ်ၵေႃၼႆတႃး “ၼႄႇဢေႃ။ ပေႉငႃးပၼ်းဢွလ်းဢူဝ်ႉ ဢၼ်ၼႄႇၵွၼ်ဝ်းဢီႉၸဝ်ၵတေးမိူဝ်ႇၽႆၢတိူၵ်ၵႆၢးၽြႃးၸဝ်ဢၼ်ၼိူၵ်ႇထူၼ်းတင်တၼ်းၶူဝ်းသေၼမ်ꧣႃး တင်ၽတ်းဢူဝ်ႉၸွၸုရ်ထရူးတင်ပဢိူမ်း ထင်းပလဵင်းၼေး” တႃးသိူၼ်းၼီ။63ဢီႉပရေႃးႁဵတ်းဢၼ်ပိူလ်တိူၵ်ႁႆၢႉၵေႃ မိူဝ်းဢိူၼ်းငရ်းသိူၼ်းတီး ၼႆသုၼ်းၸႃမိူဝ်ႇၸယႅရ်းၸွၵ်ႇၶရွတႄႉ ၼႆတႃး “ငႃးလူဝ်ထႅင်းသၢၵ်ႇသေႁလ်း။64ပေႉၵေႃငရ်းမိူဝ်ႇဢိူၼ်းၼီ တႃးꧣႃးသေႃၵႃးၽြႃးၸဝ်။ ပေႉဢွလ်းသိူၼ်းၼႄႉ” မိူဝ်းတႃးသိူၼ်းတီး ၸုမ်းတႅပ်ႉတတ်ႉတြႃးၵိူဝ်ႇၵေႃ ၼႆၽရွမ်တႃဢႄးတၢမ်ယႅမ်ၸဝ်ယေသု။65မိူဝ်းတီး ဢီႉရၵႃၵေႃ ၼႆတိူမ်ၽရွမ်ထုၺ်းသၢပ်ႉၸဝ်ၼႆၢဢူမ်းၺၢင်း။ လေႇတင်ၿၼ်းပိတ်းငႆၢၸဝ် ၼႆတေးဢိူၼ်း တႃးဢိူၼ်းၼႆၢ “ပွၵ်ႇၸဝ်ၼႄႇတႄပရေႃးၽႅတ်းၵေႃ ႁေႃးသိူင်းဢႄး ၼႄႇယႅလ်းဢၼ်တေးမိူဝ်ႇၸဝ်သတီးၼေး” တႃးသိူၼ်းၼီ။ ဢီႉပိူဝ်ယၢမ်းၵိူဝ်ႇၼေးၵေႃၼႆရၢၵ်ႇလၼ်ၸဝ် တိူမ်ၽရွမ်တေးဢိူၼ်း။66မိူဝ်းပေတရုၼႄႇတႃး ၵိူၼ်တိသရၢၵ်ႉၵၢင်ပရေႃးႁဵတ်းဢၼ်ပိူလ်တိူၵ်ႇႁႆၢႉၼေး ၼႆမၢင်ၵိူၼ်ၺႃႇႁွၵ်ႉဢၼ်ၼႄႇဢီႉၶႃႇပရေႃးႁဵတ်းဢၼ်ပိူလ်တိူၵ်ႇႁႆၢႉၼေး ထရူးဢႄးတႃးပေတရု။67မိူဝ်းၵိူၼ်ၺႃႇဢၼ်ဢေးဢွလ်းပေတရုဢၼ်ၼင်တၢတ်းမိူဝ်ႇငလ်ၼေး ၼႆသိူင်းထႅတ်းထႅတ်းပေတရုၼႆတႃးဢိူၼ်းၼႆၢ “မီႇၵေႃၼႄႇ ဢီႉယေသုဢီႉဝႅယ်ၼႃၸရၢတ်ႈၼေး” တႃးသိူၼ်းၼီ။68ၵေးꧣႃး ပေတရုၼႆတႃး “ဢူဝ်ႉၼမ်မသ်မီႇတႃးလွင်ႁလ်း၊ ပွင်းၵေႃၼမ်ပွင်းၽွမ်း” တႃးသိူၼ်းၼီ ပေတရုၵေႃ ၼႆလႄလၼ်ပၼွၵ်ႇသရၢၵ်းၼေး မိူဝ်းတီး ယႅရ်းၵေႃၼႆၵိူဝ်ꧣွရ်းလႄ။69ဝႆၢးတီး ၵွပ်ႇၶႃႇၵိူၼ်ၺႃႇဢၼ်ဢေး ၼႆဢွလ်းထႅင်းပေတရု ဢိူၼ်းၼႆတႃးဢီႉဢၼ်ၼႄႇရိမ်ႁေးၼႆၢ “ဢိူၼ်းၼႄႇဢီႉၼႂ်းၸုမ်းၵိူဝ်ႇႁွၵ်ႉ” ꧣႃးသိူၼ်းၼီ။70ပေတရုၵေႃ ၼႆထဵင်းၼႅလ်ထႅင်း။ ၸၼေႃႇလၼ်တိူရ်ယႅၵ်ႉ ဢီႉႁွၵ်ႉ ဢၼ်ၼႄႇရိမ်ပေတရုၼေး ၼႆတႃးထႅင်းဢိူၼ်းၼႆၢ “မီႇရမႃၼီꧣူၺ်းဢီႉၵႃလိလႄး။ ၵွပ်ႇသိူၼ်းတီး မီႇၼီၼႄႇတႄတပႄးၸဝ်ယေသုႁွၵ်း” တႃးသိူၼ်းၼီ။71ၵေးꧣႃး ပေတရုၵေႃၼႆၶၢမ်ၵိၼ်ꧣႃးၵိူဝ်ႇၼႆၢ “ဢူဝ်ႉၼမ်မသ်ဢီႉဢၼ်ပေႉꧣႃးၼေး” တႃးသိူၼ်းၼီ။72မိူဝ်းတီးၵမ်းလဵဝ် ယႅရ်းၵေႃၼႆၵိူဝ်တွရ်းပွၵ်ၵမ်းၵိူဝ်ႇဢရ်း။ မိူဝ်းတီ ၵွပ်ႇပေတရုၵေႃၼႆတွင် ဢၼ်ၸဝ်ယေသုꧣႃးတႄႉၼႆၢ “မိူဝ်းယႅရ်းမၢတ်းၵတွရ်းဢၢရ်းလႄႉၼေး မီႇငႃးတႃးတႄႉၼမ်မသ်ဢူဝ်ႉတႃဝႆးလႄႉ” ၼေး ဢိူၼ်းၵေႃၼႆယၢမ်မိူဝ်ႇ။
Empower Asia Bible Translation Movement