Mark16
1မိူဝ်းပူၼ်လၼ်သငိသိၼ်းၼေး မႃရိ ဢီႉဝႅယ်မႃၵတလ၊ တင်မႃရိ မႃႇယေႃးသပ်းတင်ယႃၵူပ်ႈ တင်ထႅင်းသႃလူင်ၼေး ၼႆလၼ်ယႅလ်ဢူမ်းၶရိူင်ႁွမ်းတႃလၼ်တႃးဢႄး ၶၢပ်ႇတူဝ်းယႅမ်ၸဝ်။2မိူဝ်းတိူၵ်ႇၶလိူပ်ႇၸဝ်သငိဝူင်ဢႆၢႉဢီႉၼေး ၵိူဝ်ႇၼႆလွတ်ဝ်းထရူးမိူဝ်ႇတႃးပူၼ်လူၸဝ်။3မိူဝ်းၵိူဝ်ႇလၼ်မိူဝ်ႇသိူၼ်းတီးၼေး ၵိူဝ်ႇၼႆတူရ်တႃးမိူဝ်ႇတႄႉၼႆၢ “ယႅလ်းငႃးမႅလ်ၸွၵ်ႇဢႄးဢေႉၼႆၢသမူဝ်ႇဢၼ်ပိၵ်ႉမူၵ်ႇတူႉၵွမ်ၸဝ်ၼေး” ꧣႃးသိူၼ်းၼီ။4မိူဝ်းၵိူဝ်ႇလၼ်လွတ်ဝ်းတႃးပူၼ်လူၸဝ် ၵိူဝ်ႇၼႆဢွလ်းသမူဝ်ႇပိူလ်ၼေးဝႃပိူၼ်မႅလ်ၶရႆၢဝႃမိူဝ်ႇ။5ဝႆၢးတီးမိူဝ်းၵိူဝ်ႇၵုတ်လၼ်တႃၵိူၼ်တိပူၼ်လူ ၵိူဝ်ႇၼႆဢွလ်းဢီႉႁွၵ်ႉ ၵိူပ်ႇတင်ၽႃဝႆၵၼ်ရႃ ၵတေးမိူဝ်ႇၽႆၢတူၵ်ၵႆၢး ၵိူဝ်ႇၵေႃၼႆတူမ်ၽရွမ်ၶရၼ်း။6ၵေးတႃး ဢီႉဢၼ်ဢေးၼႆတႃးၵိူဝ်ႇၼႆၢ “ယႃတူဝ်းၼႆး ၸဝ်ယေသုဢီႉၼႃၸရၢတ်ႈ ဢၼ်ၺႃးပယႅမ်းတႃးလၵ်ႉတၵ်ႉတိ ဢၼ်ပေႉတွမ်းမိူဝ်ႇၼေး ဝႃဢိမ်းၼႅလ်။ ၼမ်ၼႄႇလႆးႁၼီး။ သိူင်းတႃးတီမူၵ်တူဝ်းယႅမ်ဢိူၼ်းၼေးဢႄး။7ၵေးတႃး ပေႉလၼ်လဝ်ပေတရုတင်တပႄးၵိူဝ်ႇတႃး ‘ၸဝ်ယေသုဝႃၸွလၼ်ဢႄးငွမ်တႃးမိူင်းၵႃလိလႄးဢႆၢႉပေႉ သိူၼ်းဢၼ်ဢိူၼ်းတႃးမူၵ်ႇပေႉၼႆၢၼေး။ ပေႉငႃးဢွလ်းမိူဝ်ႇၸဝ်ႁေး’ လဝ်ꧣႃးသိူၼ်းၼီဢႄး” တႃးသိူၼ်းၼီ။8ၵိူဝ်ႇၵေႃၼႆဢၢမ်းတိူရ်ၸိူသ်မိူဝ်ႇ ရိူၵ်လႄလၼ်ထင်းပူၼ်လူၼေး။ ၵွပ်ႇၵိူဝ်ႇꧣူဝ်းယႆ ၼမ်လဝ်ၼႅလ်ယႅလ်းၼႆၢလွင်ႁလ်း။9ဝႆၢးၸဝ်ယေသုၵေႃဢိမ်းၼႅလ်မိူဝ်းတိူၵ်ႇၶလိူပ်းၸဝ်သငိဝူင်ဢႆၢႉဢီႉၼေး ဢိူၼ်းၼႆပလႄးလဝ်မႃရိ ဢီႉဝႅယ်မႃၵတလၼေးၼႆၢတူဝ်းတႄႉဢႆၢႉဢီႉ။ ဢိူၼ်းၼီၼႄႇမႃရိ ဢၼ်ၸဝ်ယေသုပၼ်းလွမ်ပလႄးဢႄးၽရႄႇၼမ်ရၵ်ႇတိူဝ်ပုလ်းထင်းဢိူၼ်းၼေး။10မႃရိၵေႃၼႆ ၵလႄးၽွမ်း လၼ်လဝ်ဢီႉဢၼ်ၿၼ်းၼႄႇၵွမ်းတင်ၸဝ်ၵိူဝ်ႇၼေးၼႆၢလွင်ဢၼ်ဢေး။11ၵေးတႃး မိူဝ်းၵိူဝ်ႇငရ်းလွင်ၸဝ်ၼင်ဢိမ်းမိူဝ်ႇတင် တင်မႃရိၼႆဢွလ်းထရူးၼေး ၵိူဝ်ႇၼမ်ယုမ်။12ဝႆၢးတီး ၸဝ်ၼႆပလႄးလဝ်တပႄးၵဢၢရ်း ဢၼ်လၼ်ဢႄးမူဝ်ႇၽရူႇပၼွၵ်ႇၼေးၼႆၢတူဝ်းတႄႉ ဢၼ်ၼမ်ၸိူဝ်ၽၢင်ႁၢင်ဢိူၼ်း။13တပႄးဢိူၼ်းၵဢရ်းၼေးၵေႃ မိူဝ်းမသ်ၼႄႇၸဝ်ယေသုၼေး ၼႆလၼ်ဢႄးၼႅလ်ဝႅယ်ၸေရူႉသလၢမ် ၼႆလဝ်တပႄးဢၼ်ၵိုတ်းၵိူဝ်ႇၼေး။ ၵေးတႃး ယႅလ်းၵေႃၼမ်ယုမ်။14ဝႆၢးတီး မိူဝ်းတပႄးဢိူၼ်းသိူဝ်ႇၵွလ်းၼိသ်ႉၼေးသွမ်းတႅယ်းမိူဝ်ႇၼေး ၸဝ်ၼႆပလႄးလဝ်ၵိူဝ်ႇၼႆၢတူဝ်းတႄႉ။ ၸဝ်ၼႆၼလ်ႁေႃးသွၼ်းမိူဝ်ႇတပႄးၵိူဝ်ႇ ၵွပ်ႇၵိူဝ်ႇၵိင်းၵလၵ်းၼမ်ယုမ်သၵ်ႇသေ ဢီႉဢၼ်ဢွလ်းၵိူဝ်ႇ ဝႆၢးၸဝ်ဢိမ်းၼႅလ်ၼေး။15ဝႆၢးတီး ၸဝ်ၼႆတႃးၵိူဝ်ႇၼႆၢ “လၼ်ၶႁေႃးလဝ်ဢီႉတင်ၵမ်ၽႃၼႆၢ ၶၢဝ်မင်ၵလႃရၵ်ႇဢၼ်မျၢတ်ႇၼေးဢႄး။16ဢီႉဢၼ်ယုမ်ယမ် ၼႆၶၢမ်လေႇမင်ၵလႃငိူပ်ႈဢူမ်းၼေး ငႃးၺႃးၽြႃးၸဝ်ထႅမ်းၵိူဝ်ႇ ဢီႉဢၼ်ၼမ်ယုမ်ယမ်ၶၢဝ်မင်ၵလႃရၵ်ႇၵိူဝ်ႇၼေး ငႃးၺႃးၽြႃးၸဝ်ဢႄးတၢမ်။17ဢီႉဢၼ်ယုမ်ယမ်ဢူဝ်ႉၵိူဝ်ႇၼေး ငႃးၸၢင်လေႇဢၶႂၢင်းဢႃၼႃဢူဝ်ႉ ၸၢင်ၸီၼမိၵ်ႇလွင်ဢၢမ်း၊ ငႃးၸၢင်လွမ်ပလႄးတင်ၽရႄႇၼမ်ရၵ်ႇဢၼ်ၵုတ်ႇဢီႉၵိူဝ်ႇ။ ငႃးၸၢင်ရမႃတင်ၽႃသႃ ဢၼ်ၼမ်ၿၼ်းသွၼ်းတိူရ်ပွၵ်ႇၵိူဝ်ႇၼေး။18ပွၵ်ႇၵိူဝ်ႇယုၵ်ႇႁိူယ်းၼႆၢတိသေၼမ်တႃး ပွၵ်ႇၵိူဝ်ႇတယႅင်းၿွၼ်းယႃၵွင်ႉဢၼ်ၸၢင်ယႅမ်သေၼမ်တႃး ၼမ်ငႃးၸၢင်ၸီႇဢႄးၵိူဝ်ႇပဵၼ်းၽေးႁလ်း။ မိူဝ်းၵိူဝ်ႇလေႇတိတႄႉတၢင်းသၢပ်ႉတႃးတူဝ်းဢီႉၼမ်မူဝ်ႇရၵ်ႇၵိူဝ်ႇၼေးၵေႃ ရေႃၵႃၵိူဝ်ႇငႃးပိလ်းလၼ်” တႃးသိူၼ်းၼီ။19ဝႆၢးၸဝ်တႃးသိူၼ်းတီး ၸဝ်ၵေႃၼႆၶၢမ်လေႇလွင်ရၢၵ်ႇရေႃၵလိူင်းၽရႄႇ ၼႆၵတေးမိူဝ်ႇႁရ်တိူၵ်ႇၵႆၢးၽြႃးၸဝ်။20တပႄးၸဝ်တၢင်ႁိူင်းၵေႃ ၼႆလႄလၼ်ထင်းဝႅယ်ၸေရုသလၢမ် လၼ်ၶႁေႃးသွၼ်းၵူႇဢိူင်ဢိူင်။ ၸဝ်ယေသုၵေႃ ၼႆၸီႇဢႄးၵိူဝ်ႇၸၢင်ၸီၼမိၵ်ႇလွင်ဢၢမ်း တီဢၼ်ၵိူဝ်ႇလၼ်ၵိူဝ်ႇၼေး။ ၼႆလေႇလွင်ဢၼ်တီးၼေး ဢႄးပဵၼ်းသၵ်ႇသေလွင် ၶၢဝ်မၵလႃၽြႃးၸဝ်ၼေးတေႃးတႄ။
Empower Asia Bible Translation Movement