Mark13
1မိူဝ်းၸဝ်ယေသုလႄလၼ်ထင်းၵျွင်းပိၵ်ႉမၢၼ်ၼေး တပႄးဢိူၼ်းႁွၵ်ႉၼႆတႃး “ၸဝ် သိူင်း သမူဝ်ႇဢၼ်ပိူလ်ယႆၵိူဝ်ႇတင် ၵၢင်ဢၶႅမ်းယႆၵိူဝ်ႇၼေးဢႄး” တႃးသိူၼ်းၼီ။2ၸဝ်ယေသုၵေႃၼႆတႃး “ၵၢင်ၸရွင်ပိူလ်ယႆၵိူၼ်ၼီမီႇဢွလ်းမိူဝ်ႇၼမ်ၸိူဝ်။ သမူဝ်ႇဢၼ်ၼႄႇႁႃးၼီၵိူၼ်ၼီငႃးၺႃးၵူတ်ႇလူမ်ႉႁႆၢႉ သမူဝ်ႇဢၼ်တိူရ်တၢင်းမိူဝ်ႇတႄႉႁွၵ်းႁႃးၵေႃၼမ်ၵိုတ်း” တႃးသိူၼ်းၼီ။3ဝႆၢးတီး မိူဝ်းၸဝ်ၵတေးမိူဝ်ႇတႃးႁရ်ၵူလ်ရင်သေႃးလိၵ်း ၼႆဝႆၢးဢႄးႁရ်ၵျွင်းပိၵ်ႉမၢၼ်ၼေး ပေတရု၊ ယႃၵူပ်ႈ၊ ယေႃးႁၢၼ်တင် ဢႅၼ်တရေၼႆထရူးဢႄးတႃးၸဝ်ၽရသ်ႇ ၼႆꧣႃး4“လဝ်ဢႄးဢေႉၼႆၢ လွင်ၵိူၼ်ဢေးငႃးပဵၼ်းထရူးပွၵ်ႇၼႄႉတင် ပွၵ်ႇဢိူၼ်းငႃးပဵၼ်းထရူးၼေး ဢေႉငႃးပွၼ်းဢွလ်းဢႆၢႉ ၼမိၵ်ႇသိူၼ်းၼႄႉ” မႆၢၺ်းၸဝ်တႃးသိူၼ်းၼီ။5ၸဝ်ယေသုၼႆတႃး “ပေႉၵေႃ လူဝ်တိူမ်ၽရွမ်သတိ ဢႄးယႃၺႃးလႅၼ်းၼႆး။6ငႃးမၢင်ဢီႉတၢင်ႁိူင်း တႃး ‘ဢူဝ်ႉၼႄႇၸဝ်ၵေးၶျွတ်ႇ’ ꧣႃးသိူၼ်းတီး ၼႆလေႇၸႂ်မုသ်ႇဢူဝ်ႉ လႅၼ်းဢီႉတၢင်ႁိူင်းဢႄးယုမ်ယမ်တႄႉ။7ပွၵ်ႇပေႉငရ်း လွင်ဢီႉတူရ်တိုၵ်ႉ တင်ရဢူၺ်းဢၼ်ဢီႉတူရ်တိုၵ်ႉ ပေႉယႃတူဝ်းၼႆး။ လွင်ၵိူၼ်းတီးငႃးပဵၼ်းထရူးတႄသေတႃႉ မတ်ႇၸိူဝ် ဢၶိင်တိူၵ်ႇꧣုတ်းၵမ်ၽႃ။8ၵလိူင်းတင်ၵလိူင်း၊ ဢီႉၸၢဝ်းၶိူဝ်းတိူရ်ꧣူၺ်း ငႃးပဵၼ်းပၢင်တိုၵ်ႉ ယႃရုင်ၵေႃငႃးၶရုၵဵယ်းတီ ဢီႉတၢင်ႁိူင်းၵေႃ ငႃးငွတ်ႇၵႆၢးငွတ်ႇဢူမ်း။ လွင်ၵူၼ်းတီး ꧣူၺ်းႁႃး ၵလုင်းမႃႇၵွၼ်းဢီႉႁွၵ်းဢၼ်ငႃးၵိူတ်းၵွၼ်ဝ်းꧣုင်းသူႉ” ꧣႃးသိူၼ်းၼီ။9ၸဝ်ၵေႃၼႆꧣႃးထႅင်း “ပေႉၵေႃတူမ်ၽရွမ်သတိဢေး။ ဢီႉတၢင်ႁိူင်း ငႃးၺွပ်ႉလၼ်ပေႉရုမ်းတြႃး။ ငႃးတုၵ်ႉတေးတင်ပေႉ သွပ်းတႃးၸရွပ်ႇ ၵွပ်ႇဢူဝ်ႉ ပေ့ငႃးၿၼ်းၸဵင် သိူၼ်ꧣၢလ်းၶုၼ်းႁေႃးၶမ်း တင် ဢီႉဢၼ်မၢင်ဢႃၼႃၵိူဝ်ႇတၢင်ႁိူင်း။ မိူဝ်းတီး ပေႉငႃးၿၼ်းလႄပလႄးၸီႇဢႄးသၵ်ႇသေတႃလွင်ဢူဝ်ႉတႃးၵိူဝ်ႇ။10မိူဝ်းမၢတ်ႇလွတ်ဝ်းဢၶိင်တိူၵ်ႇꧣုတ်းၼေး ငႃးၿၼ်းႁေႃးဢႄးဢႆၢႉဢီႉၸၢဝ်းၶိူဝ်းတၢင်ႁိူင်းၵိူဝ်ႇၼႆၢ ၶၢဝ်မင်ၵလႃရၵ်ႇလွင်ဢူဝ်ႉ။11မိူဝ်းပေႉၺႃးတုၵ်ႉၼေး ယႃꧣူဝ်းၼႆး တႄႉငႃးလူဝ်တႃးသိူၼ်းၼႄႉ။ ၽတ်ပွၵ်ႇတီး ရမႃႁႃးမွႆရမႃဢၼ်ၽြႃးၸဝ်ပလႄးလဝ်တႃးၽွမ်းပေႉၼေးႁႃး။ ၵွပ်ႇၼႄႇလွင် ၼမ်ငႃးၸိူဝ်လႆးတူဝ်းပေႉရမႃ ၼႆငႃးၼႄႇတၢင်းဝူၼ်ႉပွင်ႇလႅင်းရမႃ။12ၽတ်းပွၵ်ႇတီး ဢီႉၵွၼ်းမႆတိူရ်ꧣူၺ်း သေၼမ်ꧣႃး၊ ပႃးတင် ၵွၼ်ဝ်းသေၼမ်ꧣႃး၊ ၵွၼ်ဝ်းတင်မႃႇပႃးသေၼမ်ꧣႃး ငႃးတိူရ်ႁၵ်ႉလင်ၼႅလ်တႄႉ ဢႄးလွတ်ဝ်းလွင်ယႅမ်။13ဢီႉတၢင်ႁိူင်းငႃးသၵရ်ပေႉ ၵွပ်ႇပေႉၼႄႇတပႄးဢူဝ်ႉ။ ၵေးတႃး ပွၵ်ႇပေႉယုမ်ယမ်တေႃးဢူဝ်ႉ ၽတ်းတိူဝ်တူၵ်ႇꧣုတ်းၼေး ငႃးၺႃးမိူဝ်ႇၽြႃးၸဝ်ထႅမ်း” ꧣႃးသိူၼ်းၼီ။14ၼႆꧣႃးထႅင်း “သိူဝ်သငိ ပေႉငႃးဢွလ်းဢီႉဢၼ်ပူၵ်ႇရိတ်း ဢၼ်ၸီႇဢႄးၸွင်းပိၵ်းမၢၼ်ပဵၼ်းတီဢီႉပလွႆးၸွၵ်ႇ။ ဢိူၼ်းငႃးၸဵင်တီဢိူၼ်းၼမ်လူဝ်ၸဵင်ၼေး။ (ဢႄးဢီႉဢၼ်ႁေႃးလိၵ်ႇၵိူဝ်ႇၸၢင်ပွင်းၽွမ်း) ၽတ်းပွၵ်ႇတီး ဢီႉမိူင်းယုတတၢင်ႁိူင်း ငႃးၿၼ်းရိူၵ်ႇတိုၼ်းရေႃတႃးရင်ၸရွင်။15ဢီႉဢၼ်လွတ်ဝ်းမိူဝ်ႇတႃးႁရ်ၵူလ်ၵၢင်ၵေႃ ယႃၵုတ်ၼႅလ်တႃးၵၢင်ၼႆး။ ရီးရႃႉၵေႃယႃၵုတ်ႇလေႇၼႅလ်တႃးၵိူၼ်တိၵၢင်ၼႆး။16ပွၵ်ႇပေႉလွတ်ဝ်းမိူဝ်ႇတႃးၼႃၵေႃ ယႃဝဵင်လေႇၶရွပေႉတႃးၵၢင်ၼႆး။17ဢၶိင်ဢၼ်တီး ၼႄႇဢၶိင်ဢၼ်ပိူၵ်ႇꧣူဝ်းယႆတႃဢီႉဢၼ်ၵိူၼ်မိူရ်တင် ဢီႉဢၼ်မၢင်ၵွၼ်ဝ်းၼင်ၼဵၼ်။ ၵိူဝ်ႇၼီ ၺၢပ်ႉယႆတႃထႅမ်းတိူဝ်းၽွမ်းတႄႉ။18တိူမ်ၽရွမ်သူႉတွင်းတႃးၽြႃးၸဝ် ဢႄးဢၶိင်ဢၼ်တီးယႃပဵၼ်းၵယႅရ်းၵတ်းၼႆးဢႄး။19ၵွပ်ႇၼႄႇ တုၵ်ႉၶ ဢၼ်ၼမ်ပၼ်းပဵၼ်းတင်ထမိူဝ်းၽြႃးၸဝ်ၸႃႇၽၢၼ်ၸီႇၵမ်ၽႃၼေး၊ တင်ဝႆၢးတီးၵေႃၼမ်ငႃးပဵၼ်းၼေး ငႃးပဵၼ်းဢၶိင်ဢၼ်ဢေး။20ပွၵ်ႇၽြႃးၸဝ် ၼမ်ၸီႇဢႄးဢၶိင်ဢၼ်ဢၼ်ဢေးꧣေႉ ၼမ်ငႃးမၢင်လႆး ယႅလ်းဢၼ်လွတ်ႇ။ ၵေးတႃး ၽြႃးၸဝ် ငႃးၸီႇဢႄးဢၶိင်ဢၼ်ဢေးယူဝ်ႇပူၼ် တႃဢီႉဢၼ်ဢိူၼ်းလိူၵ်ႇမူၵ်ႇ။21ၽတ်းဢၶိင်ဢၼ်တီး ငႃးမၢင်ဢီႉတႃးပေႉၼႆၢ ‘တူမ်ၽရွမ်သိူင်းဢႄး။ ၸဝ်ၶရဵတ်ႇၼႄႇႁႃးၼီး’ ၼမ်ၸိူဝ်ၵေႃ ‘သိူင်းဢႄး။ ၸဝ်ၶရဵတ်ႇၼႄႇႁေး’ ပွၵ်ႇꧣႃး ယႃယုမ်ၼႆး။22ၵွပ်ႇၼႄႇငႃးမၢင် ၸဝ်ၶရဵတ်ႇဢၼ်တုတင် ပရေႃးၽႅတ်းဢၼ်တုတၢင်ႁိူင်းပွၵ်ႇပေႃလႄထရူး ပွၵ်ႇပဵၼ်းၿွၼ်းငႃးလႅၼ်းတင်ဢီဢၼ်ၽြႃးၸဝ်လိူၵ်ႇမူၵ်ႇၵိူဝ်ႇၼေး ၼႆၸီႇလဝ်ၼမိၵ်ႇလွင်ဢၢမ်း။23ၵွပ်ႇသိူၼ်းတီး တိူမ်ၽရွမ်မင်သတီႇဢႄး။ ဢူဝ်ႉဝႃလဝ်ငွမ်ပေႉမိူဝ်းလွင်ၵိူၼ်တီးမၢတ်ႇပဵၼ်းထရူး” ꧣႃးသိူၼ်းၼီ။24ၸဝ်ၼႆသိူပ်းꧣႃးထႅင်း “ၵေးꧣႃး ဝႆၢးသငိတုၵ်းၶၵိူဝ်ႇၼေးလွတ်ဝ်းထရူး သငိၵေႃငႃးပိမ်း ၵယႅရ်းၵေႃၼမ်ငႃးဢၢသ်း။25သိူၵ်ႇမိူယ် ဢၼ်ၼႄႇတႃးပလဵင်းၵေႃငႃးၵလႄး လွင်ဢၢသ်းဢၼ်ၼႄႇတႃးပလဵင်းၵိူဝ်ႇၵေႃငႃးၶရု။26ၽတ်းပွၵ်တီး ဢီႉၵိူဝ်ႇငႃးၿၼ်းဢွလ်း ၵွၼ်ဝ်းဢီႉၸဝ်တုမ်းတင်ပဢိူမ်းတင်ၽုင်းတၼ်းၶူဝ်းဢၼ်ပိူလ်ယႆၼေးၼႆၸွထရူး။27ဝႆၢးတီး ၵွၼ်ဝ်းဢီႉၸဝ်ၼေး ငႃးၸ်ႂလၼ်ၶုၼ်းၽရႄႇၵိူဝ်ႇၼေး တိူရ်ၸူႉဢီႉဢၼ်ဢိူၼ်းလိူၵ်ႇမူၵ်ႇ ထင်းပၢင်းၵမ်ၽႃလွတ်ဝ်းတႃးတီတူၵ်ပလဵင်း ၸဵင်းပူၼ်းၸဵင်း” ꧣႃးသိူၼ်းၼီ။28ၼႆꧣႃးထႅင်း “ဢႄးတိူမ်ၽရွမ်လေႇတွၼ်းသွၼ်းထင်းဢုပမႃတိူင်းလင်ဝႃႇၼေး။ ပွၵ်ႇလႃႉလင်ဝႃႇဢၼ်ပလုင်းၼေးလႄထရူးထင်းၵၢၵ်ႉ ပေႉမသ်မိူဝ်ႇ ၼႄႇဢိူၼ်းဝႃထႅတ်းၵယႅရ်းႁွင်း။29ၼႄႇသိူၼ်းတီးႁႃး ပွၵ်ႇပေႉဢွလ်း လွင်တုၵ်ႉၶႃႉၵိူၼ်ဢေးၵေႃ ဢႄးပေႉမသ်တႃးၼႄႇ ၵွၼ်ဝ်းဢီႉၸဝ်ၼေးဝႃၼႄႇမိူဝ်ႇတႃးတူႉပိူရ်လွၵ်ႇ။30ဢူဝ်ႉငႃးလဝ်ပေႉၼႆၢလွင်တႄ ဢီႉၸိူဝ်ႉၶိူဝ်းၵိူၼ်ၼီမၢတ်ႇငႃးꧣုတ့် ဢႆၢႉလွင်ၵိူၼ်တီးမၢတ်ႇပဵၼ်းထရူး။31ပလဵင်းတင် ၽရီႉၵတေႉငႃးၿိလ်းလၼ်သေတႃႉ ၶေႃၵႂၢမ်းဢူဝ်ႉတႄၼမ်ငႃးမေႃးပိလ်းလၼ်ႁႆၢႉ” ꧣႃးသိူၼ်းၼီ။32ၼႆꧣႃးထႅင်း “ၵေးတႃး လိူဝ်းသေၽြႃးၸဝ် ယႅလ်းၼမ်မသ်ဢိူၼ်းငႃးပဵၼ်းသငိဢၶိင်ၼႃရီဢၼ်ၼႄႉ။ ၶုၼ်းၽရႄႇ တႃးၵလိူင်းၽရႄႇ တင် လိူဝ်းသေၵွၼ်ဝ်းဢီႉၸဝ်ဢၼ်ၽြႃးၸဝ်ပလွႆးထရူးၼေးၵေႃၼမ်မသ်။33ၵွပ်ႇပေႉၵေႃၼမ်မသ်လွင်ဢၼ်တီးငႃးလွတ်ဝ်းထရူးပွၵ်ၼႄႉ ပေႉၵေႃဢႄးတိူမ်ၽရွမ်သူႉတွင်းမူဝ်ႇတင်သတိ။34လွင်ၵိူၼ်တီးꧣူၺ်းဢီႉႁွၵ်ႉ ဢၼ်ငႃးလႄလၼ်ရိူင်တဵင်းၼေး ၼႆသိူမ်းဢီႉပိူဝ်ပိူရ်လွၵ်ႇၼေး ဢႄးပိူဝ်ငွမ်တင်သတိ တင် ၼႆဢႄးတင်ဢီႉၶႃႇဢိူၼ်းၵိူဝ်ႇၼေးဢႃၼႃတင်ၵၢၼ်းဢၼ်ၵိူဝ်ႇငႃးၿၼ်းၸီႇၵိူဝ်ႇၼေးမိူဝ်းဢိူၼ်းငႃးလႄလၼ်ထင်းၵၢင်။35ၵွပ်ႇသိူၼ်းတီး ၵိူရ်မႃႇၵၢင်ၼေး ငႃးထရူးလွတ်းၼႅလ် တိူၵ်ႇသွမ်းႁႃး၊ တိူၵ်ႇၶလိူပ်ႉႁႃး ငႃးထရူးၼႅလ်ပွၵ်ႇၼႄႉၼမ်မသ် ဢႄးပိူဝ်မူဝ်ႇတင်သတိဝိရိယ။36ပွၵ်ႇၼမ်ၸိူဝ်သိူၼ်းတီး ၵိူရ်မႃႇသရၢၵ်ႉၼေးထရူးလွတ်ဝ်းၼႅလ် ၼႆငႃးဢွလ်းပေႉယႅတ်ႉလငိူတ်ႇမိူဝ်ႇ။37ၵွပ်ႇသိူၼ်းတီး သိူၼ်းဢၼ်ဢူဝ်ႉၼႃးပေႉၼႆၢ ‘ဢႄးတိူမ်ၽရွပိူဝ်ငွမ်တင်သတိၼေး’ ဢူဝ်ႉꧣႃးတင်ဢီႉတၢင်ႁႆၢႉၼႆၢ” တႃးသိူၼ်းၼီ။
Empower Asia Bible Translation Movement