Mark12
1ဝႆၢးတီး ၸဝ်ၵေႃၼႆႁေႃးလဝ်ၵိူဝ်ႇ တင်ဢုပမႃ ꧣႃး “ဢီႉႁွၵ်ႉ ၼႆပိူဝ်ႇသိူမ်းသိူဝ်ႇပိတ်ႇ ၼႆသရၢၵ်း။ ၼႆၵွင်းတင်လူတႃၶရၢဝ်းပလႄႉသပိတ်ႇ ၸီႇမူၵ်ႇတင်ၸရွၵ်ႇ။ ဝႆၢးတီး ၼႆၸၢင်းမူၵ်ႇတင် ဢီႉၸီႇၵၢၼ်း ဢိူၼ်းၼႆလႄလၼ်ရိူင်ꧣဵင်းတႃးၵလိူင်းဢၼ်သငႆၢၼေး။2မိူဝ်းလွတ်ဝ်းထရူးၶိင်လေႇပလႄႉသပိတ်ႇၼေး ၵိူရ်မႃႇသရၢၵ်ႉၵေႃ ၼႆၸ်ႂဢီႉဢိူၼ်းလၼ်ဢႄးတႃးတီဢီႉဢၼ်ဢိူၼ်းၸၢင်းၼေး တႃလေႇပုၼ်ပလႄႉဢၼ်ဢိူၼ်းလူဝ်ၿွၼ်းၼေး။3ၵေးတႃး ဢီႉၸီႇၵၢၼ်းၵိူဝ်ႇၼေးၼမ်ဢႄးႁလ်း ၼႆတုၵ်ႉတေးဢီႉဢိူၼ်းၼေး ၼႆပလွႆးဝဵင်ဢိူၼ်း။4မိူဝ်းၵိူရ်မႃႇသရၢၵ်ႉသပိတ်ၼေး ၸ်ႂပိူၼ်လၼ်ထႅင်းဢီႉဢိူၼ်းႁွၵ်း ၵိူဝ်ႇၵေႃၼႆတေးၵိင်းဢိူၼ်းထပ်းထပ်း ပိူၼ်ၵသေႉဢိူၼ်း ပလွႆးပိူၼ်ဝဵင်ၼႅလ်ဢိူၼ်း။5ဝႆၢးတီး ၵိူရ်မႃႇသရၢၵ်ႉၼေးၵေႃ ၼႆပလွႆးပိူၼ်လၼ်ထႅင်းဢီႉႁွၵ်ႉ မိူဝ်းတီးၵိူဝ်ႇၼႆတိူမ်ၽရွမ်ပယႅမ်းၸွၵ်ႇဢိူၼ်း။ မိူဝ်းၵိူရ်မႃႇသရၢၵ်ႉၼေး ၸ်ႂပိူၼ်လၼ်ထႅင်းဢီႉၼေးၵေႃ ၵိူဝ်ႇၼႆတုၵ်ႉတေးရၵႃ ရၵႃၵေႃၼႆပယႅမ်းၸွၵ်ႇ။6မိူဝ်းတီး ၵမ်းတိူၵ်ႇꧣုတ်းၼႆၵိုတ်ႉႁႃးၵွၼ်ဝ်းၵိူရ်မေႇဢိူၼ်းႁႃး။ ၼႆၼႄႇၵွၼ်ဝ်းဢိူၼ်းဢၼ်ဢိူၼ်းတေႃႉယေႃ။ ၵိူရ်မႃႇသရၢၵ်း ၼႆၸၵူးꧣႃး ‘ၵိူဝ်ႇငႃးၼပ်ႇသွမ်းမိူဝ်ႇၵွၼ်ဝ်းဢူဝ်ႉ’ ဢိူၼ်းၵေႃ ၼႆပလွႆးပိူၼ်လၼ်ဢႄးတႃး ဢီႉဢၼ်ဢိူၼ်းၸၢင်မူၵ်ႇၵိူဝ်ႇၼေး။7ၵေးꧣႃး ၵိူဝ်ႇၼႆတိူရ်တႃး ‘ဢိူၼ်းၼႄႇဢီႉဢၼ်ငႃးရၢပ်ႇၶၢမ်ဢမူၺ်။ ထရူးဢႄး။ ဢေႉတိူမ်ၽရွမ်ပယႅမ်းဢိူၼ်း။ ပွၵ်ႇသိူၼ်းတီး ဢမူၺ်ဢၼ်ဢိူၼ်းငႃးပွၼ်းၼေး ငႃးၼႄႇတႃဢေႉ’ တိူရ်ꧣႃးသိူၼ်းၼီ။8ၵွပ်ႇသိူၼ်းတီး ၵိူဝ်ႇၵေႃ ၼႆၺွပ်းၵွၼ်ဝ်းၵိူၼ်မႃႇသရၢၵ်ႉၼေး ပယႅမ်းၸွၵ်ႇဢိူၼ်း ၼႆပလွႆးမူၵ်ႇတူဝ်းယႅမ်ဢိူၼ်းတႃးႁရ်ပၼွၵ်ႇသရၢၵ်းၼေး။9ပွၵ်ႇၼႄႇသိူၼ်းတီး ၵိူရ်မႃႇသရၢၵ်ႉၼေးငႃးၸီႇသိူၼ်းၼႄႉ။ ဢိူၼ်း ငႃးထရူးပယႅမ်းၸွၵ်ႇ ဢီႉဢၼ်ဢိူၼ်း ၸၢင်းမူၵ်ႇၵိူဝ်ႇၼေး သရၢၵ်းၼေးၵေႃ ငႃးဢႄးဢီႉၼႆၢတႃဝုၼ်တႃပိူဝ်သိူင်းဢႄး။10ပေႉၿၼ်းႁေႃးမိူဝ်ႇလိၵ်ႇၵျၢမ်း ဢၼ်တႅၵ်ႇၸဝ်ၶရဵတ်ႇတင်သမူဝ်ႇဢၼ်ပိူလ်တိူၵ်ႇႁႆၢႉၼေးၼမ်ၸိူဝ်။ လိၵ်ႇၵျၢမ်းဢၼ်ဢေးတႅမ်းꧣႃး ‘သမူဝ်ႇ ဢၼ်ဢီႉၸီႇၵၢင်ပႄမူၵ်ႇ မိူဝ်းတႄၵၢင်ၼေး ၼႆပဵၼ်းထရူးသမူဝ်ႇဢၼ်ဢယေးပူလ်တိူၵ်ႇႁႆၢႉ။11လွၼ်ၵိူၼ်ၼီ ၵွပ်ႇၼႄႇဢၼ်ၽြႃးၸဝ်ၸီႇၼေး ၼႆၼႄႇလွင်ဢၢမ်း သိူၼ်ꧣၢလ်းဢေႉတၢင်ႁိူင်း’ ဢၼ်တႃးၼေး ပေႉၼမ်ပၼ်းႁေႃးႁႃး” တႃးသိူၼ်းၼီ။12မိူဝ်းတီး ၵွပ်ႇဢီႉပိူလ်ၸၢဝ်းၶိူဝ်းၸူးၵိူဝ်ႇ မသ်ၼႄႇဢုပမႃဢၼ်ၸဝ်ႁေႃးၼေး ၼႄႇဢၼ်သၼ်ၶတ်းၵိူဝ်ႇ ၵိူဝ်ႇၵေႃၼႆသုၼ်းၺွပ်ႉၸဝ်။ ၵေးတႃး ၵွပ်ႇၵိူဝ်ႇꧣူဝ်းဢီႉပရိၵ်ႇသၢတ်ႇတၢင်ႁိူင်း ဢၼ်ထရူးတိူၵ်ႇငရ်းၸဝ်ႁေႃးၼေး ၵိူဝ်ႇၵေႃၼႆပလွႆးမူၵ်ႇၸဝ် ၼႆလႄလၼ်။13ဝႆၢးတီးၵိူဝ်ႇၵေႃၼႆၸ်ႂပိူၼ်လၼ်ၽႃရိသႄးရၵႃတင် ဢီႉၶုၼ်းႁေႃးၶမ်းႁေရူတ်း ဢႄးလၼ်ဢႄးတႃးၸဝ် တႃၶႃႉဢပႅတ်ႇထင်းမွႆယ်ရမႃဢၼ်လႄထင်းၵူဝ်ၸဝ်။14ၵိူဝ်ႇၼႆထရူးတႃးၸဝ်ၼႆၢ “ၸဝ်၊ ဢေႉမသ်ႇမိူဝ်ႇ ၸဝ်ၼႄႇဢီႉဢၼ်သိုဝ်ႇယူဝ်း ၼမ်ဢႃးၼႃယႅလ်း။ ၵွပ်ႇၼႄႇ ၼမ်ထွၵ်မွၵ်ႇငႆၢယႅလ်း ၼႆႁေႃးသွၢၼ်းမိူဝ်ႇဢႄးတေႃးသွပ်းရိူင်ꧣဵင်းၽြႃးၸဝ်။ လွင်ဢၼ်ဢႄးၸဝ်ဢေၵရိတ်ႉၼႆၢၶွၼ်ၼေး ႁႆဢိူၼ်းၸွမ်းတြုး၊ ၼမ်ၸွမ်းတြႃး။ ႁႆဢေႉလူဝ်ဢႄး၊ ၼမ်လူဝ်ဢႄး” တႃးသိူၼ်းၼီ။15ၵေးꧣႃး ၵွပ်ႇၸဝ်ၼႆမသ်ႇတၢင်ၸၵူးၼမ်သိုဝ်ႇယူဝ်းၵိူဝ်ႇ ၸဝ်ၼႆတႃးၵိူဝ်ႇၼႆၢ “ပေႉၸၢမ်ၸီႇႁလ်းဢူဝ်ႉ။ ဢႄးဢူဝ်ႉၼႆၢ တိင်းၵႃးပျႃးတေၼႃရီ တႃဢူဝ်ႉသိူင်းဢႄး” တႃးၵိူဝ်ႇၼႆၢသိူၼ်းၼီ။16ၵွပ်ႇသိူၼ်းတီး ၵိူဝ်ႇၵေႃၼႆလေႇဢႄးၸဝ်ၼႆၢ တိင်းၵႃးတေၼႃရီ သိူဝ်ပျႃးၼေး ၸဝ်ၼႆတႃးၵိူဝ်ႇၼႆၢ “ၼ်ႂးတိင်းၵႃးၼီ တႅမ်းမူၵ်ႇမုသ်ယႅလ်းတင် ပုင်ယႅလ်း” ၵိူဝ်ႇၵေႃၼႆတႃး “ပုင်ဢေၵရိတ်ႉ တင် မုသ်ဢေၵရဵတ်း” တႃးသိူၼ်းၼီ။17ၸဝ်ၵေႃၼႆတႃး “ဢႄးဢေၵရိတ်ႉၼႆၢ ဢၼ်သႅင်တင်ဢေၵရဵတ်းၼေး ဢၼ်သႅင်တင်ၽြႃးၸဝ်ၼေး ဢႄးတႃးၽြႃးၸဝ်” မိူဝ်းၸဝ်တႃးသိူၼ်းတီး ၵိူဝ်ႇၵေႃၼႆၽရွမ်ဢဢၢမ်းမိူဝ်ႇ။18ဝႆၢးတီး သၼ်တူႉၵႄး ၵိူဝ်ႇရၵႃ ဢၼ်ၼမ်ယုမ်လွင်ဢိမ်းၼႅလ်ထင်းယႅမ်ၼေး ၼႆထရူးမႆယ်းၸဝ်ၼႆၢ ၶေႃမႆယ်း။19ၵိူဝ်ႇၼႆꧣႃး “ၸဝ်၊ ၼ်ႂးၵျၢမ်းမေႃးသေၼေး တႅမ်းမူၵ်ႇတႃး ပွၵ်ႇၵိူရ်မေႇႁွၵ်ႉယႅမ်လၼ် ၼမ်တၼ်မၢင်ၵွၼ်ဝ်းၼေး တေႃႇဢိူၼ်း ၼႆငႃးပွၼ်းလေႇၵပိူၼ်းဢိူၼ်း ၼႆၿၼ်းလေႇၵွၼ်ဝ်းႁွၵ်းတႃရပ်ႇၶၢမ်ဢမူၺ်မႆဢိူၼ်းဢၼ်ယႅမ်လၼ်ၼေး တႅမ်းလဝ်မူၵ်ႇတႃးသိူၼ်းၼီ။20ပွၵ်ႇၼႄႇသိူၼ်းတီး ၼႃၵၢင်သိူဝ်ၵၢင်ၼႆမၢင်ၵိူရ်မေႇၵွၼ်းမႆတိူဝ်ပုလ်ၼေး။ မႆဢီႉၼေးၼႆမၢင်ၵပိူၼ်း ၼမ်တၼ်မၢင်ၵွၼ်ဝ်းၼႆယႅမ်လၼ်။21တေႃႇမႆၢၵဢၢရ်းၼႆလေႇ ၵိူဝ်ႇပိူၼ်းဢိူၼ်း ဢိူၼ်းၵေႃၼႆယႅမ်လၼ် ၼမ်မၢင်ၵွၼ်ဝ်း။ ၼႄႇသိူၼ်းတီးႁႃးတေႃႇမႆၢၵိူဝ်ႇဝႆးၼေးၵေႃ ၼႆယႅမ်လၼ်။22ၵိူဝ်ႇတၢင်တိူဝ်ပုလ်းၵေႃ ၼႆပၼ်းလေႇ ၵိူၼ်ၺႃႇဢၼ်ဢေး ၼမ်တၼ်မၢင်ၵွၼ်ဝ်းၼႆယႅမ်လၼ်သိူၼ်တီးႁႃး။ တိူၵ်ႇꧣုတ်း ယႃၵမႆၢၼေးၵေႃၼႆယႅမ်လၼ်။23ပွၵ်ႇၼႄႇသိူၼ်းတီး ၽတ်းၵိူဝ်ႇတင်တပုလ်းရွႆဢိမ်းၼႅလ်ထင်းယႅမ်ၼေး ၵိူၼ်ၺႃႇဢၼ်ဢေးငႃးၼႄႇၵိူဝ်ပိူၼ်းယႅလ်း” တႃးသိူၼ်းၼီ။24ၸဝ်ၵေႃၼႆတႃး “ပေႉၼီ ၵွပ်ႇပေႉၼမ်မသ်လိၵ်ႇၵျၢမ်းတႅမ်းမူၵ်ႇသိူၼ်းၼႄႉ ပေႉၼမ်သတိၿွၼ်းၼႄႇဢယူပေႉပလိူင် လွင်ဢိမ်းၼႅလ်ထင်းယႅမ်သေၼမ်ꧣႃး တင်တၼ်းၶူဝ်းၽြႃးၸဝ်။25ၽတ်းဢီႉၵိူဝ်ႇဢိမ်းၼႅလ်ထရူးထင်းယႅမ်ၼေး ၵိူဝ်ႇငႃးꧣူၺ်းၶုၼ်းၽရႄႇ ဢၼ်ၼႄႇတႃးၵလိူင်းၽရႄႇၼေး ၼမ်မၢင်လႆးလွင်သွင်တိူရ်လေႇ။ လွင်ၸီႇဢႄးဢီႉတိူရ်လေႇတႄႉၵေႃၼမ်ငႃးမၢင်လႆး။26ပေ့ၼမ်ၿၼ်းႁေႃးႁူဝ်ႉၵျၢမ်းမေႃးသေ ဢၼ်ၽြႃးၸဝ် တႃးမူၵ်ႇမေႃးသေၼႆၢ လွင်ဢိမ်းၼႅလ်ထင်းယႅမ်တႃးတွၼ်ႈဢၼ်တႅမ်းမူၵ်ႇလွင် ငလ်ၵတ်ရူၼေး ဢၼ်တႃး ‘ဢူဝ်ႉၼႄႇၸဝ်ၽြႃး ဢႃပျႃႁၼ်၊ ၸဝ်ၽြႃး ဢေသႅၵ်ႉ၊ တင်ၸဝ်ၽြႃး ယႃႇၵုပ်ႈ’ တႃးမေႃးသေၼႆၢသိူၼ်းတီး။ 27ၵွပ်ႇသိူၼ်းတီး ၽြႃးၸဝ်ၼီ ၼႄႇၽြႃးၸဝ်တႃဢီႉဢၼ်ၼင်မူဝ်ႇၵိူဝ်ႇ။ ၼမ်ၸိူဝ်ၽြႃးတႃဢီႉဢၼ်ဝႃယႅမ်လၼ်။ ဢယူပေႉၼီၼမ်တေႃး” တႃးသိူၼ်းၼီ။28ဝႆၢးတီး ၼႆမၢင်သြႃႇမေႃးၵျၢမ်းႁွၵ်ႉ ငရ်း ဢၼ်သၼ်တုၵႄးၵိူဝ်ႇတင် ၸဝ်ယေသုတိူရ်တႃးတႄႉၼႆၢၼေး။ ဢိူၼ်းၼႆသတိၿွၼ်းဢၼ်ၸဝ်တွပ်ႇၼႅလ်ရၵ်ႇရၵ်ႇၼေး ဢိူၼ်းၵေႃ ၼႆထရူးဢႄးတႃးၸဝ် ၼႆတႃးၸဝ်ၼႆၢ “ၼ်ႂးတြႃးပၺၢတ်တၢင်ႁႆၢႉဢၼ်ၼီ ပၺၢတ်ႇဢၼ်ၼႄႉဢယေးပိူလ်တွၵ်ႉဢီႉ” တႃးသိူၼ်းၼီ။29ၸဝ်ၵေႃၼႆတႃး “ပၺၢတ်ႇဢၼ်တႃး ‘ဢီႉၸၢဝ်ၶိူဝ်းဢီႉသရေးတၢင်းႁိူင်း တူမ်ၽရွမ်တိူၵ်ႇငရ်းဢႄး။ ထႃဝရႃႉၽြႃးၸဝ်ဢေႉၼီ ၼႄႇၽြႃးၸဝ်သိူဝ်ႇပႃးႁႃး။30ဢႄးလေႇတူဝ်း၊ ၽွမ်းတႄႉ ယုမ်ယမ်တေႃႉယေႃတေႃးၽြႃးၸဝ်ပိူလ်တႄႉၸၵူးၿွၼ်းၼေး’ ဢၼ်တႃးၼေးၼႄႇ မႆၢႁွၵ်းဢၼ်ဢယေးပိူလ်တိူၵ်ႇႁႆၢႉ။31မႆၢၵိူဝ်ငရ်းၼႆၼႄႇ ဢၼ်တႃး ဢႄးတိူမ်ၽရွမ်ယေႃဢီႉရိမ်ၵၢင် ꧣူၺ်းတႄႉယေႃတူဝ်းတႄႉ။ ၼမ်မၢင်လႆး ပၺတ်ႇဢၼ်ဢယေးပိူလ်တွၵ်ႉ ပၺတ်ႇၵိူဝ်ႇဢၢရ်းၼီ” တႃးသိူၼ်းၼီ။32ဢီႉဢၼ်ဢေးၼေးၵေႃ ၼႆတႃး “တေႃးတႄဢေႃ။ ဢၼ်ၸဝ်တႃး ၽြႃးၸဝ်ၼီမၢင်ႁႃးသိူဝ်ႇပႃးႁႃး လိူဝ်းသေၽြႃးၸဝ် ၼမ်မၢင်လႆးၽြႃးဢၼ်တႃးၼေး တေႃးတႄ။33ဢေႉလူဝ်တိူမ်ၽရွမ်လေႇတင်တူဝ်းၽွမ်းတႄႉ၊ တေႃႉယေႃတေႃးၽြႃးၸဝ်ပိူလ်ဢေႉၸီႇၿွၼ်းၼေး။ လူဝ်ယေႃဢီႉ ꧣူၺ်းဢေႉယေႃတူဝ်းတႄႉ။ လွင်ၵိူၼ်ၼီ မျၢတ်ႇတွၵ်း လွင်ပူၸေႃလေႇတူဝ်းသတ်းတိုဝ်ႉႁရ်ၵူလ်ပလၢင်ပူၸေႃၽြႃးၸဝ်ၼေး” တႃးသိူၼ်းၼီ။34မိူဝ်းၸဝ်ငရ်းဢိူၼ်းတႃးသိူၼ်းတီးတင်ပိင်ၺႃ ၸဝ်ၵေႃၼႆတႃး “မီႇၼမ်ပေႃသိူဝ်ႇငႆၢလႆးတင်သႃသၼႃၽြႃးၸဝ်” တႃးသိူၼ်းၼီ။ တႄထင်းမိူဝ်းတီး ယႅလ်းသေၼမ်တႃး ၼမ်သရႆၢးမႆၢၺ်းလႆးၸဝ်။35သိူဝ်ႇသငိ မိူဝ်းၸဝ်ယေသု ႁေႃးလဝ်မိူဝ်ႇဢီႉ တႃၵျွင်းပိၵ်ႉမၢၼ်ၼေး ၼႆတႃး “ၵွပ်ႇသိူၼ်းၼႄႉ သြႃဢၼ်မေႃးၵျၢမ်းၵိူဝ်ႇၼႆတႃး ၸဝ်ၶရဵတ်ႇၼီ ၼႄႇ ၵွၼ်ဝ်းၶုၼ်းႁေႃးၶမ်းတႃဝိတ်း။36ဢၼ်တူဝ်းၶုၼ်းႁေႃးၶမ်းတႃဝိတ်းလေႇတင်တၼ်းၶူဝ်းတၢင်းဝူၼ်ႉပွင်ႇလႅင်းၼေးတႃး ‘ၽြႃးၸဝ်တႃး ၸဝ်ဢူဝ်ႉၼႆၢ “ၵတေးၽႆၢတိူၵ်ႇၵႆၢးတိဢူဝ်ႉ ၽတ်းတိူဝ်ဢူဝ်ႉမၢတ်ႇလေႇရၢၼ်သူမီႇမူၵ်ႇႁရ်ဢွၵ်းပလၢၵ်ႉၸွင်မီႇ” တႃးသိူၼ်းတီး’ တႃးမူၵ်ႇသိူၼ်းၼီ။37ၵွပ်ႇသိူၼ်းတီး ပွၵ်ႇတူဝ်းၶုၼ်းႁေႃးၶမ်းတႃဝိတ်းၼီ ရၢၵ်ႇၸဝ်ၶရဵတ်ႇတႃး ‘ၸဝ်ဢူဝ်ႉ’ ၼီ ၸဝ်ၶရဵတ်ႇငႃးၸီႇသိူၼ်းၼႄႉၼႄႇ ၵွၼ်းဝ်းဢိူၼ်း” တႃးသိူၼ်းၼီ။ ဢီႉတၢင်ႁိူင်းၵေႃၼႆတိူမ်ၽရွမ်တိူၵ်ႇငရ်းပျေႃမိူဝ်ႇ မွႆယ်ရမႃၸဝ်ယေသု။38မိူဝ်းၸဝ်ၼင်ႁေႃးသွမ်းမိူဝ်ႇၼေး ၸဝ်ၼႆꧣႃးၵိူဝ်ႇၼႆၢ “တိူမ်ၽရွမ်သတိ သြႃမေႃးၵျၢမ်းတၢင်ႁိူင်းဢႄး။ ၵိူဝ်ႇၼီ ပွၵ်ႇၵိူဝ်ႇၿၼ်းၵိူပ်ႇ ၽႃဝႆဢၼ်ႁၼ်းၼေးၼႆၼႅလ်လၼ်သိူၼ်ꧣၢလ်းဢီႉသေၼမ်တႃး ပွၵ်ႇၵိူဝ်ႇပွၼ်းလွင်ၼပ်ႉယမ်ဢီႉဢီႉၵိူဝ်ႇ တႃးသွပ်းၵၢတ်းသေၼမ်တႃး ၵိူဝ်ႇတေႃႉယႆ။39ပွၵ်ႇၵိူဝ်ႇ ပၼ်းၵတေးၶူင်တႃဢီႉဢၼ်ယေးပိူလ်သွပ်းၸရွပ်ႇသေၼမ်တႃး တင်တီဢၼ်ဢယေးပိူလ် သွပ်းပွႆသွမ်းတႅယ်းၼေးပွၵ်ႇꧣႃး ၵိူဝ်ႇၽွမ်းပျေႃယႆ။40ၵိူဝ်ႇၼႆၵႆ တဵၵ်းသိမ်းလေႇၵၢင်ယႃၵမႆၢၵိူဝ်ႇ ၼႆႁေႃးသူႉတွင်းဢႄးႁၼ်းႁၼ်းမိူဝ်ႇ။ ၵိူဝ်ႇငႃးၿၼ်းၶၢမ် ဢပႅတ်ႇဢၼ်ၵၸႅၼ်ပိူလ်လိူဝ်းၼေး” တႃးသိူၼ်းၼီ။41မိူဝ်းၸဝ်ၵꧣေးမိူဝ်ႇ တႃးၵျွင်းပိၵ်းမၢၼ်ၼေး ဢိူၼ်းၼႆၵတေးသိူင်းမိူဝ်ႇ ဢီႉတၢင်ႁိူင်းလူပႅၵ်း သပ်ႉတႃးပုင်းလူပႅၵ်းၼေး။ ဢီႉဢၼ်သထေးၵိူဝ်ႇ ၼႆသပ်းလူတၢင်ႁိူင်း။42မိူဝ်းတီး ၼႆမၢင်ယႃၵမႆၢႁွၵ်း ထရူးလူၶလႅပ်ႉတိင်းၵႃးဢၢရ်းပျႃးဢၼ်တမ်ၽူဝ်းၸျဵၼ်းယႆၼေး။43မိူဝ်းတီး ၸဝ်ၼႆရၢၵ်ႇတပႄးဢိူၼ်းၵိူဝ်ႇၼေး ၼႆꧣႃး “ဢူဝ်ႉငႃးလဝ်ပေႉၼႆၢလွင်တႄ ယႃၵမႆၢဢၼ်ဢေးၼေး လူပႅၵ်းသပ်းတႃးပုင်းပႅၵ်းၼေးႁိူင်းတွၵ်ႉဢီႉတၢင်ႁႆၢႉ။44ၵွပ်ႇဢီႉတၢင်ႁိူင်းၵိူဝ်ႇလူႁႃး ဢၼ်လိူဝ်းဢၼ်ၵိူဝ်ႇမၢင်ၼေး ၵေးတႃးယႃၵမႆၢဢၼ်ၽရၢၼ်းၼေးတႄ လူႁႆၢႉ ပႅၵ်ႉဢၼ်ဢိူၼ်းမၢင်တႃဢိူၼ်းသိုပ်းမၢင်ဢသၢၵ်ႇၼေး” တႃးသိူၼ်းၼီ။
Empower Asia Bible Translation Movement