Mark11
1ဝႆၢးတီး ၸဝ်ယေသုတင်တပႄးၵိူဝ်ႇ ၼႆထႅတ်းထရူးဝႅယ်ၸေရုသလၢမ် ၼႆၸွလွတ်ဝ်းထရူးတႃးၽရူႇ ပၵ်ႉၽႃၵေ တင်ၽရူႇ ပေတၼိ ဢၼ်ၼႄႇတႃးတိူင်းရင်သေႃးလိၵ်ႉ။ မိူဝ်းတီး ၸဝ်ၼႆပလွႆးလၼ်တပႄးဢိူၼ်းၵိူဝ်ႇဢၢရ်း2ၼႆတႃးၵရ်ၼႆၢ “ပရ်းလၼ်ဢႄးတႃးၽရူႇသိူၼ်းတလ်းဢေးဢႄး။ ၽတ်းလွတ်ဝ်းႁေးပရ်းငႃးဢွလ်းၵွၼ်းမျၺ်း ႁွၵ်ႉ ဢၼ်ယႅလ်းမၢတ်ႇပၼ်းတုမ်းၼေးပိူတ်ႇတုၵ်ႉမိူဝ်ႇ။ ၶေႃးဢႄးၼဝရ်းဢိူၼ်းၼႆလေႇထရူးဢိူၼ်းႁၼီးဢႄး။3ပွၵ်ႇဢီႉႁွၵ်းႁွၵ်း တႃး ‘ၶေႃးၸီႁလ်းၼဝရ်းမျၺ်းၼေး’ တႃးၵိူဝ်ႇၼႆၢ ‘ၵွပ်ႇၸဝ်ယေသုလူဝ်ဢေႃ။ ယႅၵ်း ငႃးလေႇထရူးမူၵ်ႇၼႅလ်ႁၼီး’ တႃးၵိူဝ်ႇၼႆၢလေၼႃး” တႃးသိူၼ်းၼီ။4ၵွပ်ႇသိူၼ်းတီး တပႄးၸဝ်ၵဢၢရ်းၵေႃ ၼႆလႄလၼ်ဢႄးတႃၽရူႇဢေး ၵရ်ၵေႃၼႆဢွလ်းမျၺ်းႁွၵ်ႉဢၼ်တုၵ်ႉမူၵ်ႇမိူဝ်ႇတႃးပိူရ်လွၵ်ႇပၢင်းရိူင်တဵင်းၼေး။ မိူဝ်းၵရ်ၼႆၶေႃးၼဝရ်းဢၼ်တုၵ်ႉမူၵ်ႇၵွၼ်းမျၺ်းၼေး5ဢီႉဢၼ်ၸဵင်ရိမ်ႁေးၵိူဝ်ႇ ၼႆတႃး “ပေႉၸီႇႁလ်း။ ပေႉၶေႃးၸီႇႁလ်းၼဝရ်းမျၺ်းၼေး” ꧣႃးသိူၼ်းၼီ။6ၵရ်ၵေႃၼႆတႃးၼႅလ်သိူၼ်းဢၼ်ၸဝ်ယေသုလဝ်မူၵ်ႇၵရ်ၼေး ဢီႉၵိူဝ်ႇၵေႃၼႆဢႄးၵရ်လေႇလၼ်။7မိူဝ်းၵိူဝ်ႇလေႇထရူးဢႄးၵွၼ်းမျၺ်းၼေးတႃးၸဝ် ၵိူဝ်ႇၼႆလေႇၶရွႇၽႃဝႆတႄႉပႅလ်းဢႄး တႃးႁရ်ၵူလ်ၵꧣုၼ်းမျၺ်းၼေး တႃၸဝ်တုမ်း။ ၸဝ်ၵေႃၼႆတုမ်းမျၺ်းဢၼ်ဢေးၼေး။8ဢီႉတၢင်ႁိူင်းၼႆလေႇၽႃဝႆတႄႉပႅလ်းႁရ်ၵူလ်ရိူင်ꧣဵင်း တႃၵွၼ်းရပ်ႇၸဝ် ရၵႃၵေႃတတ်းလေႇလႃႉၶႄႉထင်းပလၢင်း ပႅလ်းဢႄး။9ဢီႉဢၼ်လၼ်သိူၼ်တလ်းၸဝ် တင်ဢၼ်လၼ်တႃးပွတ်းၸဝ်ၵိူဝ်ႇ ၼႆရၢၵ်ႇရေႃႉတႃး “ႁေႃးသၼ်ၼ ၊ ဢီႉဢၼ်လေႇမုသ်ၼၢမ်ၽြႃးၸဝ် ၸွထရူးၼီ ဢႄးဢိူၼ်းမၢင်မင်ၵလႃ။10ၵလိူင်းပူႇမွၼ်ပႃးဢေႉတႃဝိတ်း ဢၼ်ငႃးပဵၼ်းထရူးထင်းဢၶွၢင်းၽြႃးၸဝ်ၼီ မၢင်ၼိူၵ်ႇလွင်ရၵ်ႇမင်ၵလႃ။ ဢေႉၶႃယုၵ်းယွင်မိူဝ်ႇၵုင်ၵေးၸူးၽြႃးၸဝ် ဢၼ်ၼႄႇတႃးၵလိူင်းၽရႄႇဢၼ်ၸရွင်တိူၵ်ႇႁႆၢႉၼေး” ရၢၵ်ႇတႃးသိူၼ်းၼီ။11ဝႆၢးၸဝ်ယေသုၵေႃၼႆၵုတ်ႇထရူးတႃး ဝႅယ်ၸေရုသလၢမ်ၼေး ဢိူၼ်းၼႆၵုတ်ဢႄးတႃးၵျွင်းပိၵ်ႉမၢၼ်။ ၼႆၶႃးသိူင်းမိူဝ်ႇ ဝႆၢးတီးၵွပ်ႇၽရီႇဝႃငႃးၿိမ်းထရူး ၸဝ်တင်တပႄးၵိူဝ်ႇၵေႃ ၼႆလႄလၼ်ဢႄးၼႅလ်တႃးၽရူႇပေတၼိ။12ထႅင်းသိူဝ်ႇၶလိူပ်း မိူဝ်းၵိူဝ်ႇလႄလၼ်ထင်းၽရူႇပေတၼိၼေး ၸဝ်ယေသုၵေႃၼႆၸူဝ်ႇၵႆၢးမိူဝ်ႇ။13မိူဝ်းတီး ၸဝ်ၼႆဢွလ်းလၼ်မိူဝ်ႇ တိူင်းလင်ဝႃႇဢၼ်လႃႉႁိူင်းယႆ ထင်းသိူဝ်ႇငႆၢ ၸဝ်ၵေႃၼႆလၼ်ဢႄးတႃးတိူင်းလင်ဝႃၼေး တႃꧣွမ်းႁႆမၢင်ပလႄႉလင်ဝႃႇ။ ၵေးတႃး မိူဝ်းလွတ်ဝ်းလၼ်တႃးတိူင်းလင်ဝၼေး ၼႆဢွလ်းတိူင်းလင်ဝၼေး လိူဝ်းသေလႃႉၼမ်မၢင်ႁလ်း ၵွပ်ႇၼမ်ၸိူဝ်ဢၶိင်လင်ဝႃႇ။14မိူဝ်းတီးၸဝ်ယေသုၵေႃၼႆꧣႃးတိူင်းလင်ဝႃႇၼေးၼႆၢ “တႄထင်းသိူဝ်တီး ယႃဢႄးယႅလ်းၿၼ်းသွမ်းပလႄႉမီႇၼႆး” တႃးသိူၼ်ၼီ။ တပႄးၸဝ်ၵေႃၼႆငရ်းဢၼ်ၸဝ်တႃးတိူင်းလင်ဝႃႇၼေးၼႆၢသိူၼ်းတီးၼေး။15မိူဝ်းၸဝ်ယေသုတင်တပႄးၵိူဝ်ႇလွတ်ဝ်းတႃးဝႅယ်ၸေရုသလၢမ်ၼေး ၸဝ်ယေသုၵေႃၼႆၵုတ်လၼ်ဢႄးတႃးၵျွင်းပိၵ်ႉမၢၼ် ၼႆလွမ်ပလႄးဢီႉဢၼ်တိူရ်သႃးတိူရ်ယႅလ် တူဝ်းသတ်းဢၼ်ၸႂ်တီပူၸူၼေး။ ၼႆလေႇၶူင်ဢီႉဢၼ် တိူရ်ယႅလ်ပႅၵ်ႉၵိူဝ်ႇတင် ၶူင်ဢီႉဢၼ်သႃးသိမ်းပလူၺ်းတႃပူၸေႃၵိူဝ်ႇသူၵ်ႇပုင်း16တင်ထႅင်းၼမ်ဢႄးလႆးတင် ဢီႉလေႇၵုတ်ထရူးၶရိူင်ယႅလ် ၶရိူင်သႃး ဢၼ်ပၼ်းလေႇပူၼ်လၼ်ၵူၼ်တိၵျွင်းပိၵ်ႉမၢၼ်ၼေး။17ၸဝ်ယေသုၼႆတႃးၵိူဝ်ႇၼႆၢ “ၼ်ႂးလိၵ်ႇၵျၢမ်းၼေး တႅမ်းမူၵ်ႇတႃး ‘ၵၢင်ဢူဝ်ႉၼီ ဢီႉငႃးရၢၵ်ႇတႃးဢိူၼ်း ၵၢင်တီဢီႉတၢင်ၶိူဝ်းတၢင်ႁိူင်းသူႉတွင်း’ တႅမ်းလဝ်မူၵ်ႇသိူၼ်းတီး။ ၵေးတႃး ၵၢင်ဢၼ်ဢေးပေႉၸီႇဢႄးပဵၼ်းၼႄႇတီၸူၼ်းပိူၼ်ရႃႇၵိူဝ်ႇမူဝ်ႇ” တႃးသိူၼ်းၼီ။ 18မိူဝ်းပရေႃးႁဵတ်းဢၼ်ပိူလ်ၵိူဝ်ႇတင် သြႃဢၼ်မေႃးၵျၢမ်းၵိူဝ်ႇငရ်းလွင်ဢၼ်တီး ၵိူဝ်ႇၵေႃၼႆၶိုင်လွၵ်ႇလႆၢးတႃပယႅမ်းၸဝ်။ ၵွပ်ႇၼႄႇဢီႉပရိၵ်ႇသၢတ်ႇတၢင်ႁိူင်းတူမ်ၽရွမ်ယုၵ်းယွင် လွင်ႁေႃးသွၼ်းၸဝ်ၼေး ၵိူဝ်ႇၵေႃၼႆꧣူဝ်းၸဝ်။19မိူဝ်းလွတ်ဝ်းထရူးတိူၵ်ႇၿူလ်း ၸဝ်ယေသုတင်တပႄးၵိူဝ်ႇၵေႃၼႆလႄလၼ်ဢႄးပၼွၵ်ႇဝႅယ်။ 20မိူဝ်ႇလွတ်ဝ်းထရူးတိူၵ်ႇၶလိူပ်ႉ ၵိူဝ်ႇၼႆၼဝရ်လၼ်ၼႅလ်တႃးဝႅယ်ၸေရုသလၢမ်ၼေး ၵိူဝ်ႇၼႆဢွလ်းတိူင်းလင်ဝႃႇဢၼ်ႁွင်းႁႆၢႉပေႃလွတ်ဝ်းတႃးရယႅသ်ႇဢိူၼ်းၼေး။21မိူဝ်းတီး ပေတရုၵေႃ ၼႆတွင်ဢၼ်ၸဝ်ꧣႃးမိူဝ်းသငိဢၼ်ပူၼ်လၼ်ၼေး “ၸဝ်၊ သိူင်းဢႄး၊ တိူင်းလင်ဝႃႇဢၼ်ၸဝ်ၵိၼ်ၼေးဝႃႁွင်းလၼ်” တႃးသိူၼ်းၼီ။22မိူဝ်းတီးၸဝ်ၼႆတႃးတပႄးဢိူၼ်းၵိူဝ်ႇၼေးၼႆၢ “မၢင်လွင်ယုမ်ယမ်တေႃးၽြႃးၸဝ်ဢႄး။23ဢူဝ်ႉငႃးလဝ်ပေႉလွင်တႄ။ ပွၵ်ႇဢီႉဢၼ်ယုမ်ယမ်တေႃးတႄၽြႃးၸဝ်ထင်းၽွမ်းဢိူၼ်းၼေးတႃး ရင်ဢၼ်တီးၼႆၢ ‘ၶရႆၢထင်ႁတီးၵလႄးသပ်တႃးဢူမ်းပၢင်လႆၢ’ ၵေႃငႃးပဵၼ်းတႄသွပ်းသိူၼ်းဢိူၼ်းတႃးၼေး။24ၵွပ်ႇသိူၼ်းတီး ဢူဝ်ႉငႃးလဝ်ပေႉ။ မိူဝ်းပေႉသူႉတွင်းၼေး တိူမ်ၽရွမ်ယုမ်ယမ်တႄႉငႃးၿွၼ်းလွင်ဢၼ်သူႉတွင်းၼေး။ မိူဝ်းတီး ငႃးပဵၼ်းတႄတႃပေႉသိူၼ်းတီး။25မိူဝ်းပေႉၸဵင်သူႉတွင်းၼေး ဢႄးပလွႆၶႂၢင်းဢႄးဢပႅတ်ႇဢၼ်ဢီႉၸီႇပေႉၼႆၢၼေး။ ပွၵ်ႉၼႄႇသိူၼ်းတီး ၽြႃးၸဝ်ပေႉဢၼ်ၼႄႇတႃးၵလိူင်းၽရႄႇၵေႃ ငႃးပလွႆးၶႂၢင်းဢႄးဢပႅတ်ႇဢၼ်ပေႉၸီႇမူၵ်ႇၼေး။26ၵေးꧣႃး ပွၵ်ႇပေႉၼမ်ပလွႆၶွၢင်းဢႄးဢပႅတ်ႇဢီႉၵေႃ ၽြႃးၸဝ်ပေႉဢၼ်ၼႄႇတႃးၵလိူင်းၽရႄႇၵေႃ ၼမ်ငႃးပလွႆၶႂၢင်းဢႄးဢပႅတ်ႇပေႉ” တႃးသိူၼ်းၼီ။27မိူဝ်းၸဝ်ယေသုတင်တပႄးၸဝ်ၵိူဝ်ႇၼႆလွတ်ဝ်းထရူးၼႅလ်တႃး ဝႅယ်ၸေရုသလၢမ်ၼေး ပရေႃးႁဵတ်းဢၼ်ပိူလ်ၵိူဝ်ႇ၊ တင်သြႃဢၼ်မေႃးၵျၢမ်းၵိူဝ်ႇတင်ဢီႉထဝ်ၵိူဝ်ႇ ၼႆထရူးဢႄးတႃးၸဝ်ယေသု မိူဝ်းၸဝ်ၼဝရ်မိူဝ်ႇတႃးၵိူၼ်တိဝႅယ်းၵျွင်းပိၵ်ႉမၢၼ်ၼေး။28ၵိူဝ်ႇၼႆတႃးၸဝ်ၼႆၢ “မီႇလေႇဢၶႂၢင်းဢႃၼႃသိူၼ်းၼႄႉၸီႇဢမူႉသိူၼ်းတီး၊ ၼမ်ၸိူဝ်ၵေႃ ဢၶႂၢင်းဢၼ်ၸၢင်ၸီႇသိူၼ်းတီးၼေး ယႅလ်းဢႄးမီႇၼႆၢ” မႆယ်းတႃးသိူၼ်းၼီ။29ၸဝ်ၵေႃၼႆတႃး “ဢူဝ်ႉၵေႃငႃးမႆၢယ်းပေႉၼႆၢၶေႃၵႂၢမ်းသိူဝ်ႇၶေႃ။ ပွၵ်ႇပေႉတွပ်ႇဢႄးၶေႃၵႂၢမ်းဢူဝ်ႉ ဢူဝ်ႉၵေႃငႃးလဝ်ပေႉ လွင်ဢူဝ်ႉလေႇဢၶႂၢင်းဢႃၼႃထင်းသိူၼ်းၼႄႇၸီႇသိူၼ်းတီး။30မိူဝ်းယေႃးႁၢၼ်ဢႄးဢီႉၼႆၢမင်ၵလႃငိူပ်ႈဢူမ်းၼေး ဢိူၼ်းၿွၼ်းဢၶႂၢင်းဢႃၼႃထင်းၽြႃးၸဝ်ဢၼ်ၼႄႇတႃးၵလိူင်းၽရႄႇႁႃး ၼမ်ၸိူဝ်ၵေႃ ထင်းဢီႉႁႃး၊ တွပ်ႇဢၼ်ဢူဝ်ႉမႆၺ်းၼေးဢႄး” တႃးသိူၼ်းၼီ။31မိူဝ်းတီး ၵိူဝ်ႇၵေႃၼႆတိူရ်ပၢင်မိူဝ်ႇတႄႉ ၼႆတိူရ်တႃးတႄႉၼႆၢ “ပွၵ်ႇဢေႉတႃး ‘ထင်းၽြႃးၸဝ်ဢၼ်ၼႄႇတႃးၵလိူင်းၽရႄႇ’ ငႃးတႃး ‘ပွၵ်ႇသိူၼ်းတီးၸႁလ်းပေႉၼႆၼမ်ယုမ်ယမ်ယေႃးႁၢၼ်’ ငႃးတႃးသိူၼ်းၼီ။32ပွၵ်ႇဢေႉတႃး ‘ၼႄႇထင်းဢီႉႁွၵ်ႇႁွၵ်ႉ’ ၵေႃ ဢီႉတၢင်ႁိူင်းငႃသုၼ်းၸႃဢေႉၼႆၢ” တိူရ်တႃးတႄႉၼႆၢ သိူၼ်းတီး။ ၵွပ်ဢီႉတၢင်ႁိူင်းၼႆယုမ်ယမ်တႃးၼႄႇတႄ ယေႃးႁၢၼ်ၼႄႇၸဝ်ပရေႃးၽႅတ်ႈ ၵိူဝ်ႇၵေႃၼႆꧣူဝ်းဢီႉပရိၵ်ႇသၢတ်ႇတၢင်ႁိူင်းၵိူဝ်ႇ။33ၵွပ်ႇသိူၼ်းတီးၵိူဝ်ႇၵေႃၼႆတႃးၸဝ်ၼႆၢ “ဢေႉၼမ်မသ်” တႃးသိူၼ်းၼီ။ မိူဝ်းတီးၸဝ်ၵေႃၼႆတႃး “ဢူဝ်ႉၵေႃၼမ်ၸၢင်လဝ်ပေႉ လွင်ဢၼ်ဢူဝ်ႉလေႇဢႃၼႃဢၶႂၢင်းထင်းသိူၼ်းၼႄႉၸီၼေး” တႃးသိူၼ်းၼီ။
Empower Asia Bible Translation Movement