Mark10
1ဝႆၢးတီး ၸဝ်ယေသုၵေႃတင်တပႄးၵိူဝ်ႇၵေႃ ၼႆလႄလၼ်ထင်းဝႅယ်ၵပေရၼွင် ꧣတ်းလၼ်မိူင်းယုတ ၸွလၼ်ဢႄးပၢင်းဢူမ်းၸေႃတၢၼ်သိူဝ်ပလၢၵ်း။ မိူဝ်းတီးဢီႉတင်ႁိူင်းၵေႃၼႆတိူရ်ၸူႉထရူးထႅင်းတႃးၸဝ် ၸဝ်ၵေႃၼႆႁေႃးသွၼ်းလဝ်သိူၼ်းထုင်းၸၢမ်။2မိူဝ်းတီး ၵွပ်ႇၽႃရိသႄးရၵႃၵွပ်ႇၵိူဝ်ႇသုၼ်းၸၢမ်ၸဝ် ၼႆထရူးဢႄးတႃးၸဝ် ၼႆတႃးၸဝ်ၼႆၢ “လွင်ၵိူရ်မေႇၸွၵ်ႇၵပိူၼ်းဢိူၼ်းၼီ ႁႆဢိူၼ်းတေႃးတြႃးပၺတ်ႇ” မႆယ်းꧣႃးသိူၼ်းၼီ။3ၵွပ်ႇၸဝ်ၼႆတႃးၼႅလ်ၵိူဝ်ႇၼႆၢ “မေႃးသေသွၼ်းလဝ်မူၵ်ႇပေႉတႃးသိူၼ်းၼႄႉ”4ၵိူဝ်ႇၼႆတႃး “မေႃးသေဢႄးမူၵ်ႇဢၶႂၢင်း တႃတိူရ်ၸွၵ်ႇၼီ ၿၼ်းလူင်းလႆၢးတိတႃးၼ်ႂးလိၵ်ႇၵိၼ်ၵႅၼ်တိူရ်ၸွၵ်ႇ” တႃးသိူၼ်းၼီ။5ၸဝ်ၼႆတႃးၵိူဝ်ႇၼႆၢ “ၵွပ်ႇပေႉသွၼ်းၺၢပ်း မေႃသေၼႆပၼ်းတႅမ်းမူၵ်ႇလိၵ်ႇၵျၢမ်းဢၼ်တီးတႃပေႉ။6ၵေးတႃးၽြႃးၸဝ်ဢၼ်ၼီ ၸီႇပလႄးၵိူၼ်ၺႃႇတၢင်ၵူရ်မေႇတင်ထမိူဝ်းတိူင်းတင်ထမိူဝ်းၽၢၼ်ၸီႇလွင်တၢင်ႁႆၢႉၼေး။7ၵွပ်ႇသိူၼ်းတီး ၵိူရ်မေႇဢၼ်ဝႃပၼ်းသွင်ၼီ ပၼ်းပလွႆးမူၵ်ႇမႃႇပႃးတႄႉ လၼ်မိူဝ်ႇသွပ်းၵိူဝ်ႇပိူၼ်းဢိူၼ်း။8ၵွပ်ႇသိူၼ်းတီး ၵိူရ်မေႇတင်ၵိူၼ်ၺႃႇတႃးယႃႇဢၼ်ၼီ ၼႆပဵၼ်းၵွမ်းတူဝ်းႁွၵ်း ၼမ်ၸိူဝ်လႆးဢီႉၵဢၢရ်း။9ၵွပ်ႇသိူၼ်းတီးဢၼ်ၽြႃးၸဝ်ၵူပ်းၵူဢႄးၼေး ဢီႉၼႆၸီႇဢႄးတိူၵ်ႇၽရၢသ်းၼီၼမ်လူဝ်ပဵၼ်း” တႃးသိူၼ်းၼီ။10ဝႆၢးတီး မိူဝ်းၸဝ်ၼႄႇတႃးၵၢင် တင်တပႄးၸဝ်ၵိူဝ်ႇၼေး တပႄးၵိူဝ်ႇၵေႃၼႆမၢၺ်းၸဝ်လွင်ဢၼ်ဢေး။11ၸဝ်ၼႆလဝ်တႃး “ၵိူရ်မေႇႁွၵ်ႉပွၵ်ႇၸွၵ်ႇၵပိူၼ်းတႄႉၼႆလေႇထႅင်းႁွၵ်ႉဢၼ်ၼီၼေး ပဵၼ်းဢပႅတ်ႇၵူတ်းၼႃၵၢင်ဢိူဝ်။12ပွၵ်ႇၵိူၼ်ၺႃႇႁွၵ်ႉၸွၵ်ႇၵိူဝ်ႇမေႇတႄႉၼႆလေႇထႅင်းၼီၵေႃ ပဵၼ်းဢပႅတ်ႇၵူတ်းၼႃၵၢင်ဢိူဝ်ႇ” တႃးသိူၼ်းၼီ။13ဢီႉတင်ႁိူင်းၵိူဝ်ႇ ၼႆလေႇထရူးၵွၼ်ဝ်းၵိူဝ်ႇၸ်ႂၸဝ်လေႇတိဢိူၼ်းထုၺ်ဢႄး ၸႂ်ဢႄးဢႄးလွင်ရၵ်ႇမၵလႃ။ ၵေးတႃး တပႄးၸဝ်ၵိူဝ်ႇၼႆꧣလ်ဢီၵိူၼ်ဢေး။14မိူဝ်းၸဝ်ဢွလ်းသိူၼ်းတီး ၸဝ်ၼႆသုၼ်းၸႃတပႄးၵိူဝ်ႇၼႆၢ ၼႆတႃး “ဢႄးၵွၼ်ဝ်းဢီႉၵိူဝ်ႇၼေးထရူးတႃးဢူဝ်ႉဢႄး။ ယႃၵၼ်ၵိူဝ်ႇၼႆး။ ၵွပ်ႇ သႃသၼႃၽြႃးၸဝ်ၼီ ၼႄႇတႃးဢီႉဢၼ်ယုမ်ယမ် သိူၼ်းၵွၼ်းဢီႉၵိူၼ်တီး” ꧣႃးသိူၼ်းၼီ။15ၸဝ်ၼႆꧣႃးထႅင်း “ဢူဝ်ႉငႃးလဝ်ပေႉၼႆၢလွင်တႄ ဢီႉဢၼ်ၼမ်မၢင်လွင်ယုမ်ယမ် ꧣူၺ်းသိူၼ်းၵွၼ်းဢီႉၵိူၼ်တီးမၢင်လွင်ယုမ်ယမ်ၼေး ၼမ်ငႃးၿွၼ်းၵုတ်ႇတႃးသႃသၼႃၽြႃးၸဝ်တိူရ်ပွၵ်ႇ” တႃးသိူၼ်းၼီ။16ဝႆၢးတီး ၸဝ်ၼႆပုမ်းလေႇၵွၼ်းဢီႉၵိူဝ်ႇၼေး ၼႆလေႇတိဢိူၼ်းတၢင်းသပ်ႉတႃးတူဝ်းၵွၼ်းဢိၵိူဝ်ႇ ဢႄးၵိူဝ်ႇၼႆၢလွင်ရၵ်ႇမင်ၵလႃ။17မိူဝ်းၸဝ်ယေသုတင်တပႄးၵိူဝ်ႇလႄလၼ်ထင်ႁေး မိူဝ်းတီးၼႆမၢင်ဢီႉႁွၵ်း ရိူၵ်ႇထရူးတႃးၸဝ် ၼႆထွၵ်ႇၵိင်းသင်းသိူၼ်ꧣလ်းၸဝ်ၼႆတႃး “သြႃႇဢၼ်မျတ်ႇရၵ်ႇ၊ တႃဢႄးဢူဝ်ႉပွၼ်းဢသၢၵ်ႈထႃဝရၼီ ဢူဝ်ႉငႃးပၼ်းၸီႇလွင်သိူၼ်းၼႄႉ” မႆၢယ်းၸဝ်တႃးသိူၼ်းၼီ။18ၸဝ်ယေသုၼႆတႃးဢိူၼ်းၼႆၢ “မီႇရၢၵ်ႇတႃးဢူဝ်ႉ ‘သြႃႇဢၼ်မျတ်ႇရၵ်ႇ’ ၼီၵွပ်ႇႁလ်း။ ၽြႃးၸဝ်သိူဝ်ႇပႃးႁႃးဢိူဝ်ႇဢၼ်မျၢတ်ႇ။19မီႇမသ်မိူဝ်ႇလိၵ်ႇၵျၢမ်းဢၼ်တႃး ‘ယႃပယႅမ်းဢႃသၢၵ်ႇဢီႉၼႆး၊ ယႃၵူတ်းၼႃၵၢင်ၼႆး၊ ယႃရႃႇၼႆး၊ သၵ်ႇသေဢၼ်ၼမ်တေႃးဢၼ်ၼီယႃꧣႃးၼႆး၊ ယႃလႅၼ်းဢီႉၼႆး၊ ဢႄးၼပ်သွမ်းမႃႇပႃးတႄႉ’ ဢၼ်တႃးၼေး မီႇမသ်မိူဝ်ႇ” တႃးသိူၼ်းၼီ။20ဢီႉဢၼ်ဢေးၼႆတႃးၸဝ်ၼႆၢ “သြႃ၊ ဢူဝ်ႉၸီႇသွပ်းလွင်ၵိူၼ်တီးဢၼ်တီးတင်မိူဝ်းဢူဝ်ႉၼင်ၼႄႇၵွၼ်းဢီႉဢေႃ” ꧣႃးသိူၼ်းၼီ။21မိူဝ်းတီးၸဝ်ၼႆသိူင်းဢိူၼ်းတင်ၽွမ်းမဵတ်ႉတႃၵရုၼႃ “ၵိုတ်းထႅင်းႁွၵ်ႉဢၼ်မီႇလူဝ်ၸီႇ။ သႃး ဢုၵ်ႉၸႃငိုၼ်းၶမ်းဢၼ်မီႇမၢင်တၢင်ႁႆၢႉဢၼ်မီႇမၢင်ၵိူဝ်ႇၼေး လူဢႄးဢီႉၽရၼ်းၵိူဝ်ႇၼႆၢဢႄး။ ပွၵ်ႇမီႇၸီႇသိူၼ်းတီး မီႇငႃးပွၼ်းလွင်ဢၵျူဝ်းရၵ်ႇတႃးၵလိူင်းၽရႄႇဢိူဝ်ႇ။ ဝႆၢးတီး ၼႆထရူးသွပ်းတပွတ်ဝ်းဢူဝ်ႉဢႄး” တႃးဢိူၼ်းၼႆသိူၼ်းၼီ။22ဢီႉဢၼ်ဢေးၵေႃၵွပ်ႇဢိူၼ်းၼႄႇဢီႉဢၼ်မၢင်ဢၼ်သထေးယႆ မိူဝ်းငရ်းၸဝ်တႃးသိူၼ်းတီး မွၵ်ႇဢိူၼ်းပေႃၵလႄးၼႆလႄလၼ်ထင်းႁေး။23မိူဝ်းတီး ၸဝ်ၼႆဝႆၢးသိူင်းသိူရ်ဝိတ်ႇ ၼႆတႃးတပႄးၵိူဝ်ႇၼႆၢ “ဢီႉဢၼ်မၢင်ဢၼ်သထေးပႅၵ်းၼီ ၺၢပ်းယႆတႃၵုတ်ႇပွၼ်းတႃးသႃသၼႃၽြႃးၸဝ်” တႃးသိူၼ်းၼီ။24တပႄးတၢင်ႁိူင်းၵေႃၼႆတိူမ်ၽရွမ်ဢၢမ်းမိူဝ်ႇ ၵွပ်ႇလွင်ၶေႃၵႂၢမ်းၸဝ်။ ၸဝ်ၼႆတႃးထႅင်းၵိူဝ်ႇၼႆၢ “တပႄးတၢင်ႁိူင်း၊ ယႅလ်းသေၼမ်ꧣႃး တႃၵုတ်ႇသႃသၼႃၽြႃးၸဝ်ၼီ ၺၢပ်းယႆ။25ဢီႉဢၼ်မၢင်ဢၼ်သထေးႁွၵ်း တႃဢိူၼ်းၵုတ်ႇသႃသၼႃၽြႃးၸဝ်ၼီ ၵလႃဢုၵ်းၵုတ်ႇတႃးတူႉပိူလ်ငေႇ ၼင်ၵၿဵင်းယႄႉဢိူဝ်ႇ” တႃးသိူၼ်းၼီ။26မိူဝ်းတပႄးၵိူဝ်ႇငရ်းသိူၼ်းတီး တပႄးၸဝ်တၢင်ႁိူင်းၵေႃၼႆယဵင်ဢၢမ်း ၼႆတိူရ်တႃးတႄႉၼႆၢ “ပွၵ်ႇၼႄႇသိူၼ်းတီး ယႅလ်းငႃးၺႃးထႅမ်း” တိူရ်တႃးတႄႉၼႆၢသိူၼ်းတီး။27ၸဝ်သိူင်းတပႄးဢိူၼ်းၵိူဝ်ႇၼေးၼႆတႃး “လွင်ဢၼ်တီးတႃဢီႉတႄၼမ်ၸၢင်ပဵၼ်းၵေႃ ၼမ်ၸိူဝ်တႃၽြႃးၸဝ်။ တႃၽြႃးၸဝ်တႄႁလ်းသေၼမ်တႃးၸၢင်ပဵၼ်းႁႆၢႉ” တႃးၵိူဝ်ႇၼႆၢ။28မိူဝ်းတီးပေတရုၼႆတႃးၸဝ်ၼႆၢ “သိူင်းဢႄး။ ဢေႉတၢင်ႁိူင်းၵေႃဝႃပႃပလွႆၸွၵ်ႇႁႆၢႉ ၼႆလၼ်သွပ်ႉၸဝ်” တႃးသိူၼ်းၼီ။29ၸဝ်ၼႆတႃး “ဢူဝ်ႉငႃးလဝ်ပေႉၼႆၢလွင်တႄ။ ယႅလ်းသေၼမ်ꧣႃး တႃပဵၼ်းတပႄးဢူဝ်ႉ တင်တႃၶႃးႁေႃးလဝ်ၶၢဝ်မင်ၵလႃၼီ ၼႆပလွႆးၸွၵ်ႇ ၵၢင်၊ ပလွႆးၸွၵ်ႇၵွၼ်းတေႃႇၵွၼ်းမႆ၊ မႃႇသေၼမ်ꧣႃး၊ ပႃးသေၼမ်ꧣႃး၊ ၵွၼ်ဝ်းၵိူဝ်ႇသေၼမ်ꧣႃး၊ တင်မၢရ်တၢင်ႁိူင်း30ၸၢတ်ႇဢၼ်ၼီႁႃးငႃးၺႃး ဢီႉတေးဢီႉပယႅမ်းၵေႃ ၼႆငႃးပွၼ်းၼႅလ် ငႃးပွၼ်း ၵၢင်၊ ၵွၼ်းတေႃႇၵွၼ်းမႆ၊ မႃႇပႃး၊ တင်ၵွၼ်း၊ တင်မၢရ်တၢင်ႁိူင်း တင်ဢသၢၵ်ႇထႃဝရ သိူဝ်ႇပူရ်ယႃပုၼ်။31ၵေးတႃး ဢီႉဢၼ်မျၢတ်ႇပိူလ်သိူဝ်တီးၼေး ငႃးၵလႄးꧣႅလ်း ၽတ်းဝႆၢးၼီ ဢီႉဢၼ်ၵလႄးꧣႅလ်းသိူဝ်ႇတီးၼေး ငႃးပဵၼ်းဢီႉဢၼ်မျၢတ်ႇပိူလ်ဝႆၢးၼီ” တႃးသိူၼ်းၼီ။32မိူဝ်းၵိူဝ်ႇလၼ်ဢႄးဝႅယ်ၸေရုသလၢမ်ၼေး ၵွပ်ႇၸဝ်ယေသုၼႆလၼ်သိူၼ်ꧣၢလ်းဢီႉ တပႄးၸဝ်ၵိူဝ်ႇၵေႃၼႆဢၢမ်းမိူဝ်ႇ။ ဢီႉတၢင်ႁိူင်းဢၼ်ထရူးသွပ်းတႃးပွတ်းၵိူဝ်ႇၵေႃ ၼႆတိူမ်ၽရွမ်မိူဝ်ႇတႄႉꧣူဝ်း။ မိူဝ်းတီး ၸဝ်ၼႆရၢၵ်ႇတပႄးဢိူၼ်းသိူဝ်ႇၵွလ်းဢရ်းၼေး ၼႆလဝ်ၵိူဝ်ႇၼႆၢလွင်ဢၼ်တႄႉငႃးၺႃးၼေး။33ၸဝ်ၼႆတႃး “တိူမ်ၽရွမ်တိူၵ်ႇငရ်းဢႄး။ ဢေႉလၼ်ဢႄးမိူဝ်ႇဝႅယ်ၸေရုသလၢမ် ၵွၼ်ဝ်းဢီႉၸဝ်ၼေး ငႃးၺႃးဢၢပ်းတႃးတိပရေႃးႁဵတ်းဢၼ်ပိူလ်ၵိူဝ်ႇ တင်သြႃမေႃးၵျၢမ်းၵိူဝ်ႇႁေး။ ၵိူဝ်ႇငႃးဢႄးတၢမ်ယႅမ်ၵွၼ်ဝ်းဢီႉၼေး ၼႆငႃးဢၢပ်းဢႄးဢိူၼ်းတႃးတိဢီႉတၢင်ၸၢဝ်ၶိူဝ်း။34ဢီႉၵိူၼ်ဢေးၵေႃငႃးၵၺၢသ်ဢိူၼ်း ၼႆထုရ်းသပ်ဢိူၼ်းၼႆၢဢူမ်းၺၢင်း ငႃးတေးပယႅမ်းဢိူၼ်း။ မိူဝ်းဢိူၼ်းယႅမ်ပွၼ်းဝႆးသငိၼေး ဢိူၼ်းၼႆငႃးရွႆဢိမ်းၼႅလ်ထင်းယႅမ်” တႃးသိူၼ်းၼီ။35ဝႆၢးတီး ဢၼ်ၼႄႇၵွၼ်ဝ်းသေပေတႄး ယႃၵူပ်ႈတင်တေႃႇဢိူၼ်းယေႃးႁၢၼ်ၼေး ၼႆထရူးဢႄးတႃးၸဝ် ၼႆတႃး “ၸဝ်၊ ၶႅၼ်းတေႃၸဝ်ၸီႇဢႄးလွင်ဢၼ်ဢေႉငႃးႁႅင်းၼေး” တႃးသိူၼ်းၼီ။36ၸဝ်ၼႆတႃးၵရ်ၼႆၢ “ပရ်းသုၼ်းႁယႅင်းႁလ်း” မိူဝ်းမႆၢၺ်းꧣႃးသိူၼ်းတီး37ၵရ်ၼႆတႃး “ၽတ်းၶိင်ၸဝ်ဢုပ်ႉပိူင်တင်တၼ်းၶူဝ်းၼေး ဢႄးဢႄးဢၶွၢင်းဢႆး ႁွၵ်ႉၵတေးသိူဝ်ႇပလၢၵ်ၽႆၢတိူၵ်ႇတ၊ ႁွၵ်ႉၵတေးၽႆၢတိူၵ်ႇၵၢႆး” တႃးသိူၼ်းၼီ။38မိူဝ်းတီး ၸဝ်ၼႆတႃး “ပရ်းၼမ်မသ်ႁူဝ်ႉၼႄႇတႄႉႁႅယ်းလွင်ႁလ်း။ တုၵ်ႉၶဢၼ်ဢူဝ်ႉငႃးပၼ်းၶၢမ်ၼီႁႆပေႉငႃးၶၢမ်ပွၼ်း။ ႁႆပေႉၶၢမ်ၿွၼ်းလွင်ယႅမ် သိူၼ်းဢၼ်ဢီႉငႃးပယႅမ်းဢူဝ်ႉၼေး” မိူဝ်းမႆယ်းꧣႃးသိူၼ်းတီး39ၵိူဝ်ႇၵေႃၼႆတႃး “ဢေႃ၊ ဢေႉၶၢမ်ႇပွၼ်းဢေႃ” ၵွပ်ႇၵိူဝ်ႇတႃးသိူၼ်းတီး ၸဝ်ၼႆတႃး “ပေႉငႃးပၼ်းၶၢမ်လွင်တုၵ်ႉၶႃႉဢၼ်ဢူဝ်ႉငႃးၿၼ်းၶၢမ်ၼေး။ ငႃးၿၼ်းယႅမ်တင်သိူၼ်းဢၼ်ဢူဝ်ႉယႅမ်ၼေး။40ၵေးတႃး ဢီႉဢၼ်ဢႄးဢၶႂၢင်း ယႅလ်းငႃးပၼ်းၵတေးႁရ်တိူၵ်ႇၵႆၢး တင်တူၵ်ႇꧣႃႉၼေး ၼမ်ၸိူဝ်ဢူဝ်ႉ။ ၼႄႇႁႃးဢီႉဢၼ်ၽြႃးၸဝ်တႅပ်းတပ်းမူၵ်ႇၼေးႁႃး ဢၼ်ငႃးၸၢင်ၵတေးတႃးတီဢၼ်ဢေး” တႃးသိူၼ်းၼီ။41မိူဝ်းတပႄးသိူဝ်ႇၵွလ်းဢၼ်ၵိုတ်းၵိူဝ်ႇၼႆငရ်းလွင်ဢၼ်ဢေးၼေး ၵိူဝ်ႇၵေႃၼႆသုၼ်းၸႃ ယႃၵူပ်ႈ တင်ယေႃးႁၢၼ်ၼႆၢ။42ၵွပ်သိူၼ်းတီး ၸဝ်ၼႆရၢၵ်ႇလေႇႁႆၢႉၵိူဝ်ႇ ၼႆတႃး “ပေႉမသ်မိူဝ်ႇ တႃးလေႃးၵႃႉၼီ ဢီႉပိူလ်တၢင်ၸၢဝ်းၶိူဝ်းဢၼ်ꧣႃးတႄႉၼႄႇဢီႉဢုပ်းပိူင်ၵိူဝ်ႇ ၸႂ်လေႇဢႃၼႃတႃဢုပ်းပိူင်ဢီႉႁရ်ဢွၵ်းၵိူဝ်ႇ။43ပေႉၼမ်လူဝ်ပဵၼ်သိူၼ်းၵိူဝ်ႇၵိူၼ်ဢေး။ ဢီႉၼႂ်းပေႉၵိူၼ်တီး ပွၵ်ႇသုၼ်းပဵၼ်းဢီႉပိူလ်တိူၵ်ႇႁႆၢႉၼီ ဢိူၼ်းငႃးပၼ်းၸီႇၶႃႇဢီႉတၢင်ႁိူင်း။44ဢီႉဢၼ်သုၼ်းပဵၼ်း သြႃဢီႉတၢင်ႁိူင်းၼီ ငႃးပၼ်းၸီႇꧣမ်းဢီႉတၢင်ႁိူင်း သိူၼ်းၶႃႈ။45ၵွပ်ႇဢူဝ်ႉဢၼ်ၼႄႇၵွၼ်ဝ်းဢီႉၸဝ်ၵေႃ ၼမ်ၸိူဝ်ၸွထရူး တႃၶၢမ်လေႇဢီႉၸီႇꧣမ်း သိူၼ်းဢီႉဢုပ်းပိူင်ဢၼ်ပိူလ်ၵိူဝ်ႇၼေး ၼႄႇတႃၸီႇꧣမ်း တင်တႃၸုၼ်ႉဢသၢၵ်ႇတႄႉ ၼႆထႅမ်းဢီႉၵိူဝ်ႇ” တႃးသိူၼ်းၼီ။46ဝႆၢးတီး ၸဝ်တင် တပႄးဢိူၼ်းၵိူဝ်ႇၼေး ၼႆလွတ်ဝ်းထရူးဝႅယ်ၸေရိၶေႃး။ မိူဝ်း ၸဝ်တင်တပႄးၵိူဝ်ႇတၢင်ႁိူင်း ပႃတင်ပရိၵ်ႇသၢတ်ႇတၢင်ႁိူင်း လႄလၼ်ထင်းဝႅယ်ၸေရိၶေႃးၼေး ဢီႉငႆၢလပ်းမုသ်တႃးပႃတိမႄး ဢၼ်ၼႄႇၵွၼ်ဝ်းတိမႄးၼေး ၵတေးႁႅယ်းသွမ်းမိူဝ်ႇပၢင်းရိူင်ꧣဵင်း။47မိူဝ်းဢိူၼ်းငရ်း ၸဝ်ယေသုဢီႉဝႅယ်ၼႃၸရၢတ်ႈၸွထရူးၼေး ဢိူၼ်းၼႆရၢၵ်ႇတႃး “ၸဝ်ယေသု ၵွၼ်ဝ်းခုၼ်းႁေႃးၶမ်းတႃဝိတ်း၊ ၶႅၼ်းတေႃတိူရ်ယွင်ဢူဝ်ႉၶႃ” တႃးသိူၼ်းၼီ။48မိူဝ်းတီးဢီႉတၢင်ႁိူင်းၼႆတႃးဢိူၼ်းၼႆၢ ဢႄးမူဝ်ႇၽရသ်ႇၽရသ်ႇၵေႃ ဢိူၼ်းၼႆယဵင်ရၢၵ်ႇတႃး “ၸဝ်ယေသု ဢၵွၼ်ဝ်းတႃဝိတ်း၊ ၶႅၼ်းတေႃတိူရ်ယွင်ဢူဝ်ႉၶႃ” ယဵင်ရၢၵ်ႇဢုသ်းတႃးသိူၼ်းၼီ။49မိူဝ်းၸဝ်ငရ်း ၸဝ်ၼႆၵိုတ်း ၼႆꧣႃးဢီႉၵိူဝ်ႇၼႆၢ “ရၢၵ်ႇထရူးဢိူၼ်းတႃးဢူဝ်ႉဢႄး” ꧣႃးသိူၼ်းၼီ။ ၵွပ်ႇသိူၼ်းတီး ၵိူဝ်ႇၵေႃၼႆꧣႃးဢီႉငႆၢၼမ်ဢွလ်းၼေးၼႆၢ “ယႃꧣူဝ်းၼႆး။ ရွႆဢႄး။ ၸဝ်ရၢၵ်ႇမိူဝ်ႇမီႇ” ꧣႃးသိူၼ်းတီးၼႆတိူမ်ၽရွမ်ရၢၵ်ႇထရူးဢိူၼ်း။50မိူဝ်းတီးဢီႉငႆၢလပ်းၵေႃ ပလွႆးၸွၵ်ႇၽႃႇဝႆတႄႉ သိူၵ်ႇၼႅတ်ႇၸဵင် ရိူၵ်ႇလၼ်ဢႄးတႃးၸဝ်ယေသု။51ၸဝ်ၼႆတႃးဢိူၼ်းၼႆၢ “မီႇတေႃႉဢႄးဢူဝ်ႉၸီႇဢႄးႁလ်းတႃမီႇ” ဢိူၼ်းၵေႃၼႆတႃး “ၸဝ်၊ ဢူဝ်ႉသုၼ်းဢွလ်းၼႅလ်ငႆၢ” တႃးသိူၼ်းၼီ။52ၸဝ်ၵေႃၼႆတႃး “လၼ်ဝိူတ်ႉဢႄး၊ လွင်ယုမ်ယမ်မီႇဝႃၸီႇဢႄးမီႇၿိလ်း” ꧣႃးသိူၼ်းၼီ။ မိူဝ်းၸဝ်တႃးသိူၼ်းတီး ငႆၢဢိူၼ်းၵေႃဢွလ်းထရူးၼႅလ်ၵမ်းလဵဝ် ဢိူၼ်းၵေႃၼႆၼဝရ်ထရူးသွပ်းမိူဝ်ႇၸဝ် တႃးသွပ်းရူင်တဵင်းဢၼ်ဢေးၼေး။
Empower Asia Bible Translation Movement