প্রকাশ7
1আকো নোইতাহা বাসিমতিতা, ঝাহাদিতা, সিংতেংতা বিংঙা মাভিকো তামসা ডিচো লোডিংবাকো পোইংবিহা বাসিমতিকো তাংসা বিংঙাহিং য়োইমসা বাসিমতিকো দিদ্যাতা জাদিংওয়া কা তিংয়ে।2আত্রংহা ঙাজ্যইং সেংজাকো শিল চিত্তা পুউমসা দোসরা ইচো লোডিংবাকো পোইং নুব্যাসো লোপাওয়া কা তিংয়ে। বাসিমতি আসা ঝাহাদিহিং খতি জোকো অধিকার পিচাদিংওয়া ডিচো লোডিংবাকো পোইংহিং আকুহা সাডিংপা ঙামসা জাংয়ে,3“কাবিহা কাবিকো সেংজাকো ডেইয়াবিকো টিংঙাংতা শিল মালাগাইনু চোইপা বাসিমতি, ঝাহাদি, আসা সিংতেংবিহিংয়া হাইরে খতি মোজোগ্যই।”4আত্রংহা কাহা শিল লাগাইমবিকো সংখ্যা হিংয়ে। আবিহা এক লাখ চুয়াল্লিশ হাজার নিমি, আসা আবিহা ইস্রাইলকো চেংবিকো জিরিবিসো নিমি।5য়হুদাকো জিরিসো বারো হাজার দিংঙাহিং শিল লাগাইয়ে, রুবেনকো জিরিসো বারো হাজার দিংঙাহিং, গাদকো জিরিসো বারো হাজারহিং6আসোরকো জিরিসো বারো হাজার, নপ্তালিকো জিরিসো বারো হাজার, মনশোরকো জিরিসো বারো হাজার,7শিমিয়োনকো জিরিসো বারো হাজার, লেবিকো জিরিসো বারো হাজার, ইস্সাখারকো জিরিসো বারো হাজার,8জবুলুনকো জিরিসো বারো হাজার যোসেফকো জিরিসো বারো হাজার, বেন্জামিনকো জিরিসো বারো হাজার দিংঙাহিং শিল লাগাইয়ে।9আকো নোইতাহা হাংসু দিংঙারে চেংকো মাছুওয়া উইসে ভির, আসা তাংসা জ্যাসো, তাংসা জিরিসো, দিংঙাবি আসা ক্যা য়্যইমবিসো নিমগা, হাংপাওয়া আংদুং লুমসা খুইতা তারিকো লাপা চুংমসা গাদিং আসা লুকাকো নাগাইতা জাদিংওয়া কা তিংয়ে।10আবিহা সাডিংপা ঙাসুমসা এপা জাংসুয়ে, “গাদিংতা গামি নিওয়া কাবিকো সেংজা আসা লুকাতাহা মুক্তি নিও।”11আসা গাদিং, মাটা ওয়ারাংপাবি আসা ডিপু ঙাজ্যইং সেংচেংবিকো হুরাপা তাংসা লোডিংবাকো পোইংবিহা জাসুয়ে, আসা আবিহা গাদিংকো নাগাইতা চুইনুইসুমসা এপা জাংমসা সেংজাহিং নোংসুয়ে।12আবিহা এপা জাংয়ে, “আমেন! য়োংকো সেংজাহিং প্রশংসা জিংকো, মহিমা, দুংজি, গারানি, সম্মান, আসা সেহা হাত্রংদো জিংকো। আমেন!”13মাটা ওয়ারাংপাবিতাহা ইচোহা কাহিং উইয়ে, “ই হাংপাওয়া আংদুং লুমবিহা হাংসুগা, আসা হানিসো ওয়াংমগা?”14আসা কাহা আকুহিংয়া জাংয়ে, “ও উটকেওয়া, নাতিরাং গেরোওয়া।” আকুহা কাহিংয়া জাংয়ে, “ইবিহা আবিরাংগা, হাংসু টেবো কোইচ্যাওয়াসো ওয়াংমমে, আসা আবিহা আপনি আপনিকো আংদুংবিহা লুকাকো য়ুতিতা দুমসা হাংপাপা বানাইমি নিমমে।15আকো সোতা আবিহা সেংজাকো গাদিংকো নাগাইতা নিও, আসা জেইসুং লিসুং আকো দেমসাতা আকো সেওয়া জোমগা, আসা গাদিংতা গাওয়াহা আপনিকো উপস্থিতিতাহা আবিহিং রক্ছা পিচারোওয়া।16আবিহা হাত্রংরে মাহাপাংরোওয়া আসা হাত্রংরে মাসেকেংরোওয়া, সানিকো লোইচাওয়াসো আসা হাইক্রি লোইচাওয়াবিসোরে আবিহা হাত্রংরে মালোউচারোওয়া,17হাংপাতানাহানা গাদিংকো প্যাকোতা নিওয়া লুকাহা আবিকো গোইত্র জিংরোওয়া, আসা আবিহিং তোইংমসা হাত্রংরে মিশিওয়া তিকো পাটিং চোইপা পুরারোওয়া, আসা সেংজাহা আবিকো মিচোসো তাংসা মিতিবি প্যাপিরোওয়া।”
The Seed Company