প্রকাশ6
1হাত্রং লুকাহা আকু নীচোকো প্যাকোতাহা ইচো শিলহিং ওয়েওয়া কা তিং, আত্রংহা ডিপু ঙাজ্যইং সেংচেংবিতাহা ইপুহা গারাংগুরুংপা খ্যাওয়া ত্যাবাপা ইচো আওয়াজসোহা এপা জাংওয়া কা হিংয়ে, “লেই!”2আসা কাহা ইপু হাংপাওয়া ওইংঙা তিংয়ে, আকো তোইতা বাইওয়াহিংপা ইচো য়েরা-কেরা নিমি, আসা আকুহিংয়া ইচো মুকুট পিচায়ে, আসা আকুহা দোসরাহিং জিয়োমসা তাংসাহিং জিয়োকো নাগাই গ্যইপুয়ে।3আকো নোইতা আকুহা দোসরা শিল ওয়েহে, আত্রংহা দোসরা ঙাজ্যইং সেংচেংহা “লেই!” তাওয়া কা হিংয়ে।4দোসরা অ্যালুক্যইওয়া ইপু ওইংঙা বাইরে নোপামসা লেয়ে। ই ওইংঙা চালাইওয়াহিংয়া বাসিমতিসো তিমেওয়াহিং পুচাকো আসা দিংঙাবিহা ইচোহা ইচোহিং স্যাপুকো তামসা আকুহিংয়া ইচো টেবো তালওয়ার পিচায়ে।5হাত্রং লুকা তিন নন্বর শিল ওয়ে, আত্রংহা তিন নম্বর ইপু ঙাজ্যইং সেংচেংহা “লেই” তাওয়া কা হিংয়ে। কাহা ইপু দাসিক্যইওয়া ওইংঙা তিংয়ে। আকু ওইংঙা চালাইওয়াকো খুইতাহা ইচো দংওয়া পাল্লা নিমি।6আকু ডিপু সেংচেংকো প্যাকোতাহা ইচো আওয়াজহা এপা জাংওয়া ত্যাবাপা কা হিংয়ে, “সাইয়ুকো হাজিরাতাহা এক কিলো গেহুং, আসা সাইয়ুকো হাজিরাতাহা তিন কিলো জৌ মেংচে চোইকো ছুরোওয়া, আদো চুইতি আসা আংগুরকো সিংতেংহিংয়া খতি মোজো।”7হাত্রং আকু চার নম্বর শিল ওয়ে, আত্রংহা আকু চার নম্বরকো ঙাজ্যইং সেংচেংহা “লেই” তাওয়া কা হিংয়ে।8আত্রংহা কাহা য়োউয়োউক্যইওয়া ইপু ওইংঙা তিংয়ে, আসা আকু ওইংঙা চালাইওয়াকো মিংহা “সিদিং” নিমি, আসা “সিংপাংহা” আকো নুনুই নুনুই হুইদিংমি। আসা বাসিমতিকো চার ভাগতাহা এক ভাগহিংয়া তালওয়ার, অনিকাল, য়োংন্যাবি আসা চুংচাকো সেংচেংবিকোসো বাসিমতিকো দিংঙাবিহিং স্যাকো তামসা আবিহিংয়া অধিকার পিচায়ে।9হাত্রং আকু লুকাহা পাঁচ নম্বর শিল ওয়ে, আত্রংহা বেদিকো লিতা কাহা আবিকো লাংবেবি তিংয়ে, হাংসু সেংজাকো য়্যইদিকো সোতা আসা আবিকো পিচাওয়া গাওয়াইকো সোতা সিপুমি নিমমে।10আসা আবিহা এপা জাংমসা সাডিংপা ঙায়ে, “ও টেবো সে নিওয়া পবিত্র আসা আজিপ্পাকো প্রভু, ন্যাসারাং হাত্রং চোইপা নাতিহা বাসিমতিতা য়ুংবিকো ইন্সাপ মোজোকোগা আসা কাবিকো য়ুতিকো বাদলা মালাংকোগা?”11আবি তাংসাহিংয়া ইজো হাংপাক্যইওয়া আংদুং পিচায়ে, আসা আবিহিংপা হুইওয়া ডেইয়াবি, ডুওয়াবি আসা হুম্রিবি ত্যাবাপারাং সিপুমবিকো সংঙ্খাতা পুরা মাজিংনু চোইপা আম্যই সাচা তামসা আবিহিংয়া জাংয়ে।12হাত্রং লুকাহা ছয় নম্বর শিল ওয়ে, আত্রংহা কাহা টেবো নিঙা হ্যাওয়া তিংয়ে। সানিহা বোরাকো আংদুং ত্যাবাপা দাশিপা জিংপুয়ে, আসা পুর্নেকো তারিহা য়ুতি ত্যাবাপা অ্যালুইপা জিংপুয়ে।13আসা মুইরাকো সিংতেংহিং বিংঙাসো য়াপানুওয়া মামিংয়াংওয়া ফলবি হুইচামি ত্যাবাপা ডিংবাকো পুইমাবিহা বাসিমতিতা হুইচায়ে।14ডিংবাহা সোকুকো মুট্ঠা মেরোইচপুমি ত্যাবাপা ইদ্যাতা ওয়েংপুয়ে, আসা তাংসা বোইদাবি আসা লাগাবিহা আপনি আপনিকো জায়গাসো ওয়েংপুমসা হ্যাপুয়ে।15আত্রংহা বাসিমতিকো জাইপুবি, শাসন জোওয়াবি, সেনাপতিবি, পুপুউবি, সাডুংওয়াবি, তাংসা ডেইয়াবি আসা ছুটকারা দিংঙাবিহা, লাগাকো হোরোংবাবি আসা পাত্যারুংবিতা গুংসোইয়ে।16আবিহা লাগাবি আসা পাত্যারুংহিং জাংয়ে, “কাবিকো তোইতা হুইরে, আসা গাদিংতা গাওয়াকো য়ুওয়্যাইসো, আসা লুকাকো সেদ্রাংওয়াসো কাবিহিং গুংপোইপি,17হাংপাতানাহা আবিকো সেদ্রাংওয়াকো টেবো দিন ওয়াংমি নিও, আসা ইকো নাগাইতাহা হাংসু জাকো ছুকোগা?”
The Seed Company