প্রকাশ8
1হাত্রং লুকাহা নীচো শিল ওয়ে, আত্রংহা লকভগ আদি ঘন্টা চোইপা লোডিংবাতা চিচোপা জিংপুয়ে।2সেংজাকো নাগাইতা জাদিংওয়া নীচো লোডিংবাকো পোইংবিহিং কা তিংয়ে। আবিহা সেংজাকোসো নীচো পেপনেবি মুংচায়ে।3আসা দোসরা ইচো লোডিংবাকো পোইং লেয়ে, আসা সুনকো ধুপৌরো চুংমসা বেদিকো আবেইতা জায়ে। আকুহিংয়া গাদিংকো নাগাইতা নিওয়া সুনকো বেদিকো তোইতা তাংসা পবিত্র দিংঙাবিকো পাচাইওয়াহিংপা চড়াইকো সোতা উইসে সাং পিচায়ে।4সাংকো মুদুইহা পবিত্র দিংঙাবিকো পাচাইওয়াহিংপা চিত্তা লোডিংবাকো পোইংকো খুইসো য়ুতা সেংজাকোতা দেকায়ে।5আত্রংহা লোডিংবাকো পোইংহা ধুপৌরো চুংমসা আউতা বেদিসো মেহ ওয়্যায়ে, আকো নোইতা বাসিমতিতা বাডোইপুয়ে। আসা গারাংগুরুংপা খ্যামসা তিত্রাইমসা নিংঙা হ্যায়ে।6আকু নীচো পেপনেবি নিওয়া নীচো লোডিংবাকো পোইংবিহা পেপনেবি মুইকো তৈয়ারি জিংয়ে।7নাগাইকো লোডিংবাকো পোইংহা আপনিকো পেপনে মুইয়ে, আসা য়ুতিহিংপা লাসিচপুওয়া ঝেসে আসা মেহ হুইয়ে। আসা বাসিমতিকো সুংদ্যাতাহা এক ভাগ, আসা সিংতেংবিকো সুংদ্যাতাহা এক ভাগ, আসা তাংসা য়োউনিংওয়া স্যাম্যাবিহা ওংপুয়ে।8দোসরা লোডিংবাকো পোইংহা আপনিকো পেপনে মুইয়ে, আসা মেহ লারাইদিংওয়া ইচো টেবো লাগা ত্যাবাক্যইমি ঝাহাদিতা বাডোইয়ে,9আসা ঝাহাদিকো সুংদ্যা ভাগতাহা এক ভাগহা য়ুতি জিংপুয়ে। আসা ঝাহাদিতা নিওয়া ঙাজ্যইং সেচেংবিকো সুংদ্যা ভাগতাহা এক ভাগহা সিপুয়ে, আসা নোওয়াইবিকো সুংদ্যা ভাগতাহা এক ভাগহা দাংপুয়ে।10তিন নম্বর লোডিংবাকো পোইংহা পেপনে মুইয়ে, আসা ডিংবাসোহা লারাইদিংওয়া মেচেং ত্যাবাপা ইচো টেবো পুইমা হুইয়ে, আসা জোরাবিকো সুংদ্যাতাহা এক ভাগতা আসা তিবিকো পাটিংতা আকুহা হুইয়ে।11আকু পুইমাকো মিংহা “কাক্যইওয়া” নিমি, আসা আকো সোতা তিকো সুংদ্যা ভাগতাহা এক ভাগহা কাক্যইয়ে, আসা তি কাক্যইওয়াকো সোতা উইসে দিংঙাবিহা সিপুয়ে।12চার নম্বর লোডিংবাকো পোইংহা আপনিকো পেপনে মুইয়ে, আসা সানিকো সুংদ্যা ভাগকো এক ভাগতা আসা তারিকো সুংদ্যা ভাগকো এক ভাগতা আসা পুইমাকো সুংদ্যা ভাগকো এক ভাগকো তোইতা হুইয়ে, আসা আবিকো হাহাইওয়া সুংদ্যা ভাগতাহা এক ভাগহা নাগীহপা জিংপুয়ে। আবিকোহা সুংদ্যা ভাগতাহা হাহাইওয়া মাতাপা জিংপুয়ে, এপারাং জেইসুং আসা লিশুংকো সুংদ্যা ভাগতারে এক ভাগহা নাটুংপা জিংপুয়ে।13আকো নোইতা কা তিংয়ে, আসা ডিংবাতাহা ইপু টাংজা ভুইমসা সাডিংপা এপা জাংওয়া কা হিংয়ে, “মুইকো ল্যইতেওয়া সুংচো লোডিংবাকো পোইংবিকো পেপনেকো আওয়াজকো কারণ বাসিমতিতা য়ুংওয়াবিহিংয়া ধিক্কার! ধিক্কার! ধিক্কার!”
The Seed Company