প্রকাশ5
1গাদিংতা গাওয়াকো দাংক্রেং খুইতাহা কাহা ইচো মেরোইচপুক্যইওয়া সোকুকো মুট্ঠা তিংয়ে। আকু সোকুকো মুট্ঠাকো নাপো আসা বাইরে নিহদ্যাতারাং লামি নিমি, আসা আকুহিংয়া নীচো শিল লাগাইমসা মেইমসা এমি নিমি।2আসা সেংজাকো ইচো সে নিক্যইওয়া পোইংহিং কা তিংয়ে। সাডিংপা ঙামসা আকুহা এপা জাংমসা উইয়ে, “ই শিল য়্যামসা সোকুকো মুট্ঠা ওয়েকোহা হাংসু য়োগ্য়্য নিংগা?”3আদো লোডিংবাতা, বাসিমতিতা আসা সিংপাংতা সোকুকো মুট্ঠাহিং আকো নাপোতা ওয়েমসা কাংকো ছুওয়াহা হাংসুরে মাতামগা।4এপা জিংপুনুওয়া কা সিওপারাং কাইয়ে, হাংপাতানাহা সোকুকো মুট্ঠা ওয়েমসা কাংকোহা হাংসুহিংনে য়োগ্য়্যকো মোদোতো।5ইচো মাটা ওয়ারাংপাহা কাহিং জাংয়ে, “মাকাইঘ্যই, কাং, য়হুদাকো জিরিকো সিংহ, হাংসু দাউদকো চিমাকো টেবো নিমমে, আকুহা জিয়োমি নিও আসা নীচো শিল য়্যামসা আকু সোকুকো মুট্ঠাহিং ওয়েকো ছুরোওয়া।”6আকো নোইতা কাহা ইপু লুকাহিং তিংয়ে, ই লুকাহা সিপুমি ত্যাবাপা তিংদিংমি। আকুহা ডিপু ঙাজ্যইং সেংচেংবি আসা মাটা ওয়ারাংপাবি আসা গাদিংকো প্যাকোতা জাদিংওয়া নিমি। আকোহা নীচো দাং আসা নীচো মিচো নিমি, ইহা তাংসা বাসিমতিতা নিংপুওয়া সেংজাকো নীচো লাংবেবিগা।7নাগাই গ্যইমসা লুকাহা গাদিংতা গাওয়া নিওয়াকো দাংক্রেং খুইসো আকু সোকুকো মুট্ঠা য়ুউয়ে।8আত্রংরাং আকু ডিপু ঙাজ্যইং সেংচেংবি আসা ইকাইসো ডিচো মাটা ওয়ারাংপাবিহা লুকাকো কোকোই কাটুতা তুরুই চুনুইসুয়ে। আবি তাংসাকো খুইতা ইচো বিণা আসা সাংকো ও-ও্যহওয়াসো মেইপুওয়া সুনকো চোপোই নিমি। আকু সাংকো ও-ও্যহওয়াহা সেংজাকো পবিত্র দিংঙাবিকো পাচাইওয়াবিগা।9আবিহা এপা জাংসুমসা ইচো চুবে লেহদি লেহসুয়ে, “ই সোকুকো মুট্ঠা য়ুউকো আসা ইকো শিল ওয়েকোহা নাতি মেংচে য়োগ্য়্য নিও, হাংপাতানাহা নাতিহিংয়া স্যাপুয়ে আসা আপনিকো য়ুতিসো তাংসা জিরি, ক্যাবি, দেশবি আসা জ্যাবিসো সেংজাকো সোতা দিংঙাবিহিংয়া চোইচাপুয়ে।10আসা আবিহিংয়া রাজ্য আসা য়োংকো সেংজাকো পাউ বানাইমি নিও, আসা আবিহা বাসিমতিতা রাজ জোরোওয়া।”11ন্যাসা কা কাংয়ে, আসা করোর লোডিংবাকো পোইংবিহা লেহদিংওয়া হিংয়ে।12আবিহা মাটা গাদিং, ঙাজ্যইং সেংচেংবি আসা তাংজিকো উটকেওয়াবিকো হুরাপা জাসুমসা লেহসুদিংমি; “বলি জিংপুমসা সিপুওয়া লুকাহা অধিকার, ধন, দুংজি, সে, মান, আদর, মহিমা আসা জয় জয়কার লাংকো য়োগ্য়্যকো নিও!”13আসা লোডিংবা, বাসিমতি, সিংপাং আসা ঝাহাদিতা তাংসা সেংচেংবিহা ই লেহদি লেহদিংওয়া কা হিংয়ে, “গাদিংতা গাওয়া নিওয়া আসা লুকাহিং জয় জয়কার, আদর, মহিমা, আসা অধিকার হাত্রংদো জিংকো!”14আসা ডিপু ঙাজ্যইং সেংচেংবিহা “আমেন” তামসা জবাব পিচায়ে আসা মাটা ওয়ারাংপাবিহা তুরুই চুনুইসুমসা আরাধনা জোসুয়ে!
The Seed Company