প্রকাশ21
1আকো নোইতা কাহা চুবে লোডিংবা আসা চুবে বাসিমতি তিংয়ে। নাগাইকো লোডিংবা আসা বাসিমতিহা য়াপুমসা হ্যাপুয়ে। ঝাহাদিহিংয়া তিংকোরে মাতিংতো।2সেংজাকোসো জিংমসা লোডিংবাসো পবিত্র শহর চুবে য়রুশালেম লিতা উইপাদাংওয়া কা তিংয়ে। ই শহরহিংয়া বিয়ৌলা দোসপাকো সজায়ওয়া বিয়ৌলি ত্যাবাপা জোমসা তৈয়ার জিংওয়া কা তিংয়ে।3গাদিংসো সাডিংপা ঙামসা এপা জাংওয়া কা হিংয়ে, “কাং! সেংজাকো সাহা দিংঙাবিকো প্যাকোতা নিও। নেহা ইসো য়ুতাহা সেংজাহা দিংঙাবিহিংপা য়ুংরোওয়া আসা আবিহা সেংজাকো দিংঙাবি জিংরোওয়া। সেংজা আপনিরাং আবিহিংপা নিরোওয়া।4আকুহা আবিকো মিচোসো তাংসা মিতি প্যাপিরোওয়া। নেহা ইসো য়ুতাহা হাংসুরে সিমগ্যইরোওয়া, হাংসুরে সেংদুমসা কাইমঘ্যইরোওয়া, হাইরে কোইচ্যামগ্যইরোওয়া, হাংপাতানাহা ই তাংসা নুওয়াংবিহা পেইপুনতেও।”5আত্রংহা গাদিংতা গাদিংওয়া নিওয়া সেংজাহা জাংয়ে, “কাং! নেহা কা তাংসা চুবে বানাইদিংয়ো।” আকুহা কাহিংয়া এপারে জাংয়ে, “ই নুওয়াং লা, হাংপাতানাহা আকুহা আজিপ্পা আসা দেংকো ছুওয়া নুওয়াংগা।”6আসা আকুহা জাংয়ে, “নেহা তাংসা নুওয়াং পুরা জিংপুনতেয়ে! অল্ফা আসা আমেগা, নাগাই আসা নোইস্যারে কারাংগা। হাংসু-হাংসুহিং তি সেকেং, আবিহিংয়া কা সাদিকো তি পাটিংকো মাটাসো জাংতোংপা পিয়াংরোওয়া।7হাংসু হাংসু জিয়োবা, আবিহা কুংসো ই তাংসা নুওয়াংবিতা হক মুংচারোওয়া। কা আবিকো সেংজা জিংরোওয়া আসা আবিহা কুং চেংওয়া-চেমে জিংরোওয়া।8আদো চোসুংওয়াবি, মাদেংওয়াবি, আচকা-চিকাওয়া কাম জোমবি, দিংঙা স্যামবি, নুংনাংসুওয়াবি, টুনা-মুনা জোওয়াবি, মুর্তিহিং হুইওয়াবি আসা তাংসা প্যায়োং য়্যইমবিকো জায়গাহা মেহ আসা গন্দকসো ওংদিংওয়া হোরোংবাতাগা। আউতা পরেকোহা নিহকোই সিওয়াগা।”9নীচো নোইস্যাকো কোইচ্যাওয়াবি নিওয়া নীচো কচৌরা চুংওয়া নীচো লোডিংবাকো পোইংবিতাহা ইচোহা কাহিং জাংয়ে, “ইতা ওয়াং, কা নাতিহিংয়া আকু বিয়ৌলি, হাংসু লুকাকো মেমমে, আকুহিং তিংপারোওয়া।”10আকো নোইতাহা কাহিংয়া লাংবেতা জিংমসা লাগাকো উচুংওয়া জায়গাতা পুরায়ে। লোডিংবাকো পোইংহা কাহিংয়া পবিত্র শহর য়রুশালেমহিং তিংপায়ে। ইহা সেংজাকোসো জিংমসা লোডিংবাসো লিতা উইদিংওয়া নিমি।11আকু শহরহা সেংজাকো মহিমাসো তিত্রাইদিংমি। আকো তিত্রাইওয়াহা ইচো পাংক্যইওয়া রত্ন, বিল্লোর ত্যাবাপা নিমি। ইহা স্পটিক ত্যাবাপা চাইচাইওয়া নিমি।12আকু শহরকো হুরাপাহা টেবো হিয়োওয়া পার্কা নিমি। আকু পার্কাকোহা বার্চো লাপুং নিমি আসা তাংসা লাপুংহিং কাং-য়োওয়াহা ইচো-ইচো লোডিংবাকো পোইংবি নিমি। আকু লাপুংতাহা ইস্রাইলকো বার্চো জিরিকো মিংবি লামি নিমি।13নুব্যাই কাটুতাহা সুংচো লাপুং নিমি, দিব্যাই কাটুতা সুংচো লাপুং, দ্যাব্যা কাটুতা সুংচো লাপুং আসা ম্যাব্যা কাটুতা সুংচো লাপুং নিমি।14শহরকো পার্কাকোহা বার্চো হুটিং নিমি আসা আকো তোইতাহা লুকাকো বার্চো জেংওয়া পোইংবিকো মিং লাওয়া নিমি।15কাহিংপা য়্যইওয়া লোডিংবাকো পোইংকো খুইতাহা ই শহর, ইকো লাপুং আসা ইকো পার্কাহিং নোওয়া সুনকো সিংদি নিমি।16হাত্রং শহরহিং নোও, ই শহরহা দিদ্যা কাটুতা ন্যাওয়া নিমি আসা ইকো চৌড়াই আসা লোম্বাইহা বরাবর নিমি। লোডিংবাকো পোইংহা সিংদিসো নোওনুওয়া দুই হাজার দুইশো বিশ কিলোমিটার হিয়োপা আসা আউসেরাং চৌড়াই আসা আউসেরাং লোম্বাই নিমি।17আসা লোডিংবাকো পোইংহা শহরকো পার্কাহিং নোওয়ে আসা দিংঙাকো খুইসো নোওয়া সেইহা আকুহা একশো চুয়াল্লিশ হাত বাংদাইপা নিমি।18আকু পার্কাহা বিল্লোরসো বানাইওয়া নিমি, ই শহরহা ছোসোওয়া সুনসো বনেওয়া নিমগা, আসা ই সুনহা চাইচাইওয়া সিসা ত্যাবাপা তাত্রাইক্যইওয়া নিমি।19পার্কাকো হুটিংহা হুইসে পাংক্যইওয়া রত্নবিসো সজায়ওয়া নিমি। নাগাইকো হুটিংহা বিল্লোরকো নিমি, দোসরাহা নিরকো, তিন নম্বরহা হরিতমনিকো, চার নম্বরহা পন্নাকো।20পাঁচ নম্বরহা আনিক্সকো, ছয় নম্বরহা লালমনিকো, সাত নম্বর পিতমনিকো, আঁট নম্বরহা বেরুজকো, নয় নম্বরহা পুস্পরাজকো, দশ নম্বরহা লসুনেকো, এগারো নম্বরহা নিলমনিকো, আসা বারো নম্বরহা কটেলাকো নিমি।21আকু বার্চো লাপুংহা ইচো ইচো মোতিসো বনেওয়া নিমি। আকু শহরকো ন্যাতাহা ছোসোওয়া সুনসো বনেওয়া নিমি, আসা আকু সুনহা আইনা ত্যাবাপা তাত্রাইক্যইওয়া নিমি।22কাং, কাহা আকু শহরতাহা হানি দেমসারে মাতিংতো, হাংপাতানাহা আকো দেমসাহা সে নিওয়া সেংজা আসা লুকা আপনিরাংগা।23আকু শহরহিং হাহাইপা জোকোহা সানি আসা তারিকো দরকার মোতো, হাংপাতানাহা সেংজাকো মহিমারাং আকো হাহাইওয়াগা। আকো দিব্রিহা লুকা আপনিরাংগা।24আকো হাহাইওয়াতারাং জ্যা-জ্যাকো দিংঙাবিহা তেইরোওয়া। বাসিমতিকো জাইপুবিহা আপনিকো পুংজিবিহা আসা মান-সন্মানহা আকু শহরতারাং পারোওয়া।25জেইসুংহা আকো লাপুংবিহা হাই জোমসারে মামেইচারোওয়া, হাংপাতানাহা আউতাহা লিসুংরাং মাজিংরোওয়া।26আবিহা জ্যা-জ্যাকো মান-সন্মান আসা আদরবিহা আকো নাপোতা পারোওয়া।27আদো হানি দুষ্ট নুওয়াংবিরে আউতা হোচা মামুংরোওয়া, আজকাক্যইওয়া নুওয়াং য়্যইওয়া, প্যায়োং নুওয়াং য়্যইওয়াহা আকু শহরতা হোচা মামুংরোওয়া। লুকাকো সাদিকো হিগাতা মিং লাওয়াবি মেংচে আউতা হোচা মুংরোওয়া।
The Seed Company