প্রকাশ22
1আকো নোইতা লোডিংবাকো পোইংহা কাহিং সাদি পিচাওয়া তিকো জোরা তিংপায়ে। আকু জোরাহা সেংজা আসা লুকাকো গাদিংসো নোমসা শহরকো মাটা ন্যাতা প্যাকোতা বাংদিংওয়া আসা মোতি ত্যাবাপা তাত্রাইদিংমি নিমি। জোরাকো নিহদ্যা আরিতাহা সাদি পিচাওয়া সিংটেং নিমি, হাংতা লোপোলেলে বার্চো কিসিমকো ফল সেমমে আসা তারি ইরি ইরিতা লারাংসা-লারাংসা ফল সেমমে। আকু সিংটেংকো লাপাতাহা জ্যা-জ্যাহিং সাংপাওয়া মেং নিমি।3নেহা ইসো য়ুতাহা আউতাহা হাই নুওয়াংতারে শ্রাপ মাজিংরোওয়া। সেংজাকো আসা লুকাকো গাদিংহা শহর নাংপোতারাং নিরোওয়া আসা আকো ডেইয়াবিহা আকুহিং সেওয়া জোরোওয়া।4আবিহা সেংজাকো য়ুওয়াই তিংরোওয়া আসা আকো মিংহা আবিকো টিঙাংতা নিরোওয়া।5আসা আউতাহা হাত্রংরে মোরি মোমোরোওয়া, আউতাহা দিব্রিকো আসা সানিকো হাহাইওয়ারে মোঘ্যইরোওয়া, হাংপাতানাহা প্রভুসেংজারাং আবিকো হাহাইওয়া জিংরোওয়া আসা আবিহা হাত্রংদো রাজ জোরোওয়া।6আকো নোইতা লোডিংবাকো পোইংহা কাহিং জাংয়ে, “ই য়্যইদিবিহা দেংকো চুওয়া আসা আজ্জিপ্পা নিও। অগমবক্তাবিহিং পবিত্র লাংবে পিচাওয়া প্রভুসেংজাহা আপনিকো ডেইয়াবিহিং ই সেন্নেপা জিংপাদাংওয়া ঘটনাবি তিংপাকো আপনিকো লোডিংবাকো পোইংহিং নিংপুমি নিও।”7ইশু জাংমগা, “কা ন্যাপারাং লেরোওয়া। ই হিগাতা লাওয়া অগমবাণীকো য়্যইদি মানেমবিহা আশিষিত নিও।”8ই তাংসা নুওয়াং হিংওয়া আসা তিংওয়াহা কা য়হুন্নাগা। হাত্রং কা ই নুওয়াং হিং আসা তিং, আত্রংহা কাহিং ই নুওয়াং তিংপাওয়া লোডিংবাকো পোইংকো কোকোইতা আরাধনা জোকো কাহা চুনুইয়ে।9আদো আকুহা কাহিংয়া জাংয়ে, “কাং, নাতিহা এপা জোমতুরোওয়া। কাহা নাতি আসা নাকো আপু এবি, অগমবক্তাবি আসা ই হিগাকো য়্যইদি হিংবি ত্যাবাপা সেংজাকো ডেইয়া মেংচেরাংগা। সেংজাহিংনাং চুনুইমসা আকুহিং আরাধনা জো।”10আকুহা ন্যাসারাং কাহিংয়া জাংয়ে, “ই হিগাকো অগমবাণীকো য়্যইদিহিংয়া ওয়েমসা এহ, ইহিংয়া শিল মালাগাইগ্যই, হাংপাতানাহা সময়হা পুরা জিংকো তোংপানতেয়ো।11হাংসু দুষ্টনি, আকুহা দুষ্টরাং জিংমসা হোরোওয়া, হাংসু আচকাপানি, আকুহা আচকাপা জিংমসারাং হোরোওয়া। হাংসু ঠিক আসা তাংজিনি, আকুহা এপারাং জিংমসারাং হোপুরোওয়া আসা হাংসু পবিত্রনি, আকুহা পবিত্র জিংপুমসারাং হোপুরোওয়া।”12ইশুহা জাংমগা, “কাং, কা সেন্নেপারাং লেরোওয়া, আপনি আপনি কাম অনুসার তাংসাহিং পিচাওয়া ইনাম কাহিংপা নিও।13কা অল্ফা আসা অমেগা, শুরু আসা অন্ত, নাগাইরেগা আসা নোইস্যারেগা।”14আপনিকো আংদুং দুমসা সাফা এমবিহা আশিষিত নিও। আবিহা সাদিকো সিংতেংকো ফল চাকো আসা আকু শহরকো লাপুংসো হোচাকো অধিকার মুংচারোওয়া।15আদো শহরসো বাইরেতাহা লাংচ্যাবি, টুনা-মুনা জোমবি, নুংনাংসুমবি, দিংঙা স্যামবি, মুর্তিহিং হুইমবি আসা আপনিকো কাম আসা য়্যইদি নিহসোতাসারাং প্যায়োং য়্যইকো মন পরেওয়াবি নিরোওয়া।16“কা ইশুহা নাকো মন্ডলিবিতা নিওয়া তাংসাহিং ই নুওয়াংবি সিদা চ্যইপাকো কুং লোডিংবাকো পোইং নিংপুমি নিও। কাহা দাউদ জাইপুকো গাদিংকো উত্তরাধিকারিগা। কা চাইচাইওয়া হাপকুংকো ফুইমাগা।”17পবিত্র লাংবে আসা বিয়ৌলিহা “ওয়াংচোংপুই” তামগা। হাংসু হিংবা, আকুরে জাংকো “ওয়াংচোংপুই” তামসা। হাংসু সেকেংবা, ঘ্যইওয়া সেই সাদিকো তি জাংতোংপা আংকো ওয়াংকো!18কুং লাওয়া ই হিগাকো অগমবাণীকো য়্যইদিবি হিংওয়া তাংসা দিংঙাবিহিংয়া কা য়হুন্নাহা ই চেতাউনি পিচাদিংয়ো, ইতামি হাইক্রি তোপেপুনাহা আকুহিংয়া সেংজাহা ই হিগাতা লাওয়া কোইচ্যাওয়াবি সিওপারাং নিংপুরোওয়া।19ই হিগাতা লাওয়া অগমবাণী য়্যইদিসো লেরামি হাইক্রি নুওয়াংবি ঠেনাহা সেংজারে সাদিকো সিংটেংকো ফলসো আকো ভাগ ঠেপুরোওয়া আসা পবিত্র শহরসো আকুহিংয়া নোপাপুরোওয়া।20হাংসু ই তাংসা নুওয়াংতা সাক্ছি পিচা, আকুরাং জাংমগা, “আজ্জিপা কা সেন্নেপারাং লেরোওয়া।”
আমেন। লেপ্পি, ও প্রভু ইশু!21প্রভু ইশুকো অনুগ্রহ তাংসাহিংপা নিকো! আমেন।
আমেন। লেপ্পি, ও প্রভু ইশু!21প্রভু ইশুকো অনুগ্রহ তাংসাহিংপা নিকো! আমেন।
The Seed Company